الآغا السادي

جزء 17

سيف الدين (مطلع حاجبو) : دابا للي كيبغي يحمي شرف عائلتو كيولي مصيبة من عند الله؟

سحر : سيف راه طريقتك للي خايبة.. قاسية..

سيف الدين : مجبور..

سحر : علاااش؟ علاش مجبور؟ علاش متبدلش طريقتك.. هاكاك راه. كتخلي الواحد يخاف يقوليك الحقيقة..

سيف الدين : مللي تكوني هازة مسؤولية عائلة على قدها فوق رقبتك غتفهميني.. اي حاجة طرات ماشي تال تما.. اللومة كترجع عليك كتر من للي داير الخطأ ! و داك الواحد للي كيخاف يڭوليا شنو طاري ليه كون كان كيعرفني غيلقا بللي احن و ارحم ليه يجي يعاود ليا و نحل ليه المشكل و لا يخبي عليا!

(شاف ليها فعينيها نيشان و نطق) : سحر كنفضل بنادم يڭول الحاجة بنفسو و ميخلينيش نعرفها من عند البراني!

سحر (فهماتو شنو كيقصد) : الموضوع د البارح..

سيف الدين (بصرامة) : مباغيش نهضر فالموضوع!

خلاها و ناض دوش و خرج لبس سروال كحل و برودكان كحل و تيشورط بيض مطرطق عليه.. دار ساعتو فيديه و خاتم زواجو و رش ريحتو "sauvage" سحر غي شماتو دارها و هي تمشي عندو عنقاتو و بدات كتسمها تا هو حاوطها بيديه .. عارف الحمل للي داير فيها هاد الحالة ..

خلاها تا شماتو و شبعات و هو يبوسها فراسها

هزها سيف حيت مخصهاش تبقا واقفة على رجليها و نزلها لتحت فين لقات الطابلة واحدة بالماكلة و للي تحب الشهية.. يالله غتنطق و هي تبان ليها رقية للي جابوها الصباح بكري لي ڭارد بطلب من سيف الدين ..

جلس سيف فكرسي و جلسها حداه فكرسي و خلاها غطسات فالماكلة كيما موالفة من نهار حملات..

اما هو كان كينقب شوية و راسو عامر مطارق.. غي كملات فطورها و هو يشوف فيها

سيف الدين : غنرجعو للقصر..

سحر : معنديش مشكل و لكن نتا..

سيف الدين : ماشي على ود شي حد لكن تما غتكوني محمية كتر من هنا و مغتكونيش بوحدك!

سحر : اوك للي بغيتي!

****

فاقت الصباح وهي متحمسة.. باغا تقوي راسها.. باغا تنسا كل مافات.. كلشي داز و ولى .. مازال صغيرة باقي قدامها الحياة.. كنغلطو بزاف فحق راسنا مللي كنخليو المشاكل تنهينا و تنهي حيويتنا.. لا.. الا طحتي.. نوضي.. وقفي.. تحركي.. متبقايش فبلاصتك طايحة حيت مكاينش للي ينوضك من غير راسك و إرادتك.. فين حد مشاكلك توصل؟ ربي كتبهم عليك و ربي غيخرجك منهم.. وردة صغيرة ربي مكينسهاش مابالك نتي للي وحدة من عبادو.. غلطتي ماشي مشكل.. كاين للي غلط بلاصة الغلط 100 و ربي غفر ليه.. باقي مافات الحال.. تقدري تبدلي حياتك كاااااااملة فنهاااار.. عندك مرة وحدة.. مرررررررة وحدة غتعيشي.. حياة فانية و غتكوني فيها مرة وحدة.. علاااااش تهولي و تهزي الهم و ديري راسك فبنادم و كلكم غتمشيو شي نهار و تبقا تسمع غي كان فلان و كانت فلانة الله يرحمهم..