سادية الحب 🔥

عيد ميلاد

جازو يامات ....حالة العائلة كيما العادة ....العمات يروحو و يرجعو ....و اية كل يوم تحاول تهدر مع سيرين بصح ترجعها ...متخليهاش تهدر ....الجد خلاها ترجع لخدمتها ...و ترجع تخرج ....كل موعد تصوير يديها اسلام ....لي العلاقة معاه بقات برك هكاك ...ما تقدمت ما رجعت لور ....غير بدات تجبدو و يرتاحلها ...بصح هو واع ....مش بساهل يولي معاها عادي ....مروان مبان عليه حتى خبر ...يعيط من تلفون صاحبو بالماسكي يهدر مع يماه و يكوبي ....شعل نار ...و خلاها تتلتهب ...حبيبة قلب تحترق ....و ابنة خال شوهت سمعتها .....
.......

رجعت مع اسلام من لاكلينيك عيانة ....راحت بدلت صلات ...و راحت ترقد....و هو تاني كيف كيف ...دوش و راح رقد .....
حتى لحق وقت العشا ...تجمعو كامل للعشا ...العمات مكانوش فدار ....رجعو لديورهم ......
قعدت اية غير تشوف في سيرين لي  حالتها كل يوم تتدهور ....مبينة من وجها ....دير حاجة
تقدرش ...مكانش اي دليل يثبت براءتها ....صعيبة هجران الحبيب و الخيانة ...كانو يتعشاو ....حتى هدر الجد ....
الجد : اية غدوا عيد ميلادك صح ياخي ...

غير سمع اسلام بدا يكح حصلتلو الماكلة .....
اية :وي جدي غدوا باذن الله
الجد : زملاءك في الخدمة مقررين يديرولك حفلة صغيرة بالمناسبة هدي ...و تاني كي نجحتي في فترة صغيرة و قدرتي تاخذي ثقة مرضا تاعك ....
اية حصلت ملقات واش تقول بقات تشوف فيهم ...
اما اسلام شرب كاس كوكا على ضربة و شاف فيها منبعد لجدها ....

اسلام :و شكون هوما جدي ؟ علاه انا نخدم تماك و معلاباليش ؟ علاه انا خبرونيش ؟
الجد :وين علابالي انا ؟....اك قلتها نتا لي تخدم تماك مش انا .....

زير على قبضتو و بقا يطبطب على طابلة طبطبات خفاف ....
اسلام :مممممم و كون نقولكم بلي أنا مش قابل تروح لحفلة هدي واش  تقولو؟
الجد:تروح و روح معاها ...باسكو عيد ميلادها ... و الحفلة صاي نظموها ...ميخرجوش في خسارة ....
شاف مع طبسي و شاف مع اية لي فرحانة من الحفلة و خايفة ميقبلش ....

اسلام :يخرجو في الف خسارة يهمنيش فيهم ...خطرة جاية يتعلمو يشاوروني انا ....مش انا الغريب هو لي يعرف قبل القريب ...أيا بصحتكم انا ني خارج ....

خلاهم في الطابلة مخلاش مامبا واحد يهدر .....
اية :
خلصنا العشا ...عاونت سيرين رفدنا طابلة بصح بلا ما نهدر معاها .....جيت نغسل المواعن ...جات خداتلي لبلاصة و بقيت نشوف فيها حابة نهدر خايفة ترجعني كيما كل خطرة ....خليتها على راحتها ....و طلعت لشمبرتي ....شديت تلفون لقيت ابالات من عند هيثم ...

و خلالي ميساجات خبرني على عيد الميلاد ...معرفتش واش نقولو ...منعرف واش يقول اسلام ....طفيت تلفون ...و جبدت البيسي ...نحوس على كاش فليم نتفرجو ...نبعد شويا على لي نعيشو و نتمتع في الخيال ....مقدرتش نكونسونطري على والو جاتني القنطة و الضيقة ....منعرف واش ندير ...راسي معمر بحوايج ...عييت من تخمام ...و قلبي معمر ....منعرف كيفاش قادرة على شقايا و شادة روحي على شعرة ....كنت نستنا في وليد عمي العزيز يرجع ...نشوف قرارو الاخير واش ...أصلا لازم يخليني نروح ...هدي حاجة خاصة بيا ...بصح ميخليني ندير والو من غيرو ...اه يا ربي شكون قال يجي نهار هدا ....