عذريتي مقابل براءتي

البارت السادس والعشرون

وديلي صوره شلابس اليوم  

حلو وجماله كاشخ اليوم هيه زفه  

وشدعوه قميصك هيج مفتوح 

لا تأخذ برد يمعود ادفه 

قبل شويه خطك جان مشغول  

بيمن يا ترى بيا مستخفه  

اسكتي لخاطر الله لا تكملين

اتجاوزتي وحجيتي حجايه كلفه 

دارين - بعد ما خابرت جيرانه الي اني عدها على عمتي وبلغتها أنه اني يمها

عمتي مجاوبتها كايلتلها راح تجي حوراء وزوجها ياخذوني

المره ظلت تسأل على شنو سبب الخلاف ساعه تمدح فرقد وساعه تنعل الشيطان واني ساكته

ما أعرف شجاوبها ورجعت تسأل ليش انتي حلوه وصغيره وماخذه واحد جبير واني ساكته

ما عندي أي جواب وظليت مثل بلاع الموس لا اكدر ابلعه ولا اكدر اطلعه

تسأل وبس دموعي تصب ما مر وقت هوايه ندكت الباب طلعت المره تفتح الباب

سمعت صوت حوراء وهي أسلم على المره

وتكلها احنه نشكرج عيني ام أكرم سوينه عليج زحمه

دخلت وشافتني وكامت تلطم على وجهه

وهي تكول ولج ليش سوه بيج هيجي

كتلها سالفه طويله عفيه بس أريد ابني روحي جيبي من عنده والله ما اتحمل ابقى بدون ابني

كالت - أمشي ويايه والله إلا ألعب بيهم طوبه شنو ماكو مخافة الله

شكرت من المره ام أكرم وطلعنه للسياره زوجها جان نازل من السياره من شافني

تفاجأه بيه

وكال ليش هيجي وجهج ليش ضربك فرقد

واحنه واكفين يم السياره حجيتلهم سالفة حرك سما والمشكله الي صارت إلى ضربي وطردي

وطلاكي

ظلوا صافنين عليه شلون طفله فرت الموضوع هيجي

كال أبو كرار هسه اني راح ادخل يمه واهدئ الموضوع واشوف شنو المشكله وانتن اكعدن

بالسياره راح فتح الباب ودخل ما غاب هوايه ورجع

يكول - فرقد مو بالبيت

كالت حوراء - بعد احسن

نزلت من السياره وكالت تعالي ويايه اخذي ابنج

نزلت وياها ودخلنه للبيت سمعت صريخ بارق صعدت فوك أركض ودخلت لغرفة حياة

شفته حاطته بالكاع وتصبغ اظافرها وهو يصرخ