الحلقة 62
فالدنيا هادي مايدوم حال ويبقى غير الصح.... الإنسان لازم قبل اي خطوة في حياتو يخمم مليح ويحسبها بعقلو سيرتو فالقرارات المصيرية خاطر لي راح عمرو يولي والندامة هي اللخرة ......
واقفة فالبالكون نشوف مع الجو لي تبدل اصلا سينوغمال يتبدل راهي 3شهر عدات على الصيف ودخل الخريف..... حياتي تبدلت 180درجة في مدة اقل من عام لقيت روحي في بلاصة ماش بلاصتي لقيت روحي عايشة حياة مش حياتي 3شهر عايشة وحدي لا دخلة لا خرجة قرايتي وحلمي ضاعو كيما ضاع عمري ......ابسط وسائل الاتصال مع الناس لي هوا تلفون مكانش.... ماما حكيت معاها مرة وحدة منهار زوجت.... كي نتفكر كيفاه كنت وكيفاه وليت نضحك وفي نفس الوقت يطيحو دموعي عالشي لي خسرتو بيدي ومحال يرجع...... يمكن تسالوني وينو منير.... نقولكم منير حكايتو حكاية... الشك والغيرة يمشيو في دمو لدرجة نفاني عالدنيا ومافيها كلشي ممنوع حتى دارنا مستحيل نروح ليها قرايتي و خرجني منها وصلت بيه الغيرة والشك لدرجة انو يغير من خوه وباباه وعلى هادي خرجنا من دار العايلة وسكنا وحدنا في اباغتمون في كارتي تقريبا مهجور اغلبية الديار فارغين كي نطل من البالكو نشوف غير الباراج (بحيرة)
وشجر ....
مفهمتش الشي لي صار اول ليلة جمعتنا مع بعض هوا لي وصلنا نعيشو الحياة هادي ولا من الاساس هوا طبيعتو هكا وانا تعميت ومشفتش العيوب لي فيه .....
حسيت بيه كي وقف قدامي حاط يديه في جيابو كي لعادة أصلا السيناريو هادا ولا عادة كل يوم تتعاود وفي نفس الوقت. ...
منير : حاب نعرف برك واش عحبك فالمنضر هادا... السما مغيمة تخوف والشجر فارغين بقاو غير لغصان حتى الباراج لونو قهوي شي يهبط المورال ويجيب الطاقة السلبية للعبد ونتي ضلي مستمرة هنا مكرهتيش ؟
انا : ...................
منير : كي نحكي مع.*** جاوبيني ومتحطينيش فالثقيل
انا : ما تحكي معايا مانحطك فالثقيل
منير : كي يعود رايك وديجا دوري هنا واش قتلك على ** اللبسة هادي ولا تتحدي فيا ؟
هبطت راسي نشوف البيجامة لي لابستها حتى هي بجامة عادي اصلا هياتي ماهيش هيأة تاع عروسة الزين لي في وجهي وطفى.... تبسمت بحزن ودخلت وخليتو ياكل في روحو اصلا ماعينيش نحكي معاه ولا حتى نشوف وجهو.....
مشيت للكوزينة سخنت لعشا وجدت الطالبة ورحت عندو لبيت باش نقولو يجي يتعشا.... دخلت لقيتو واقف يبدل في قشو زدت تقلقت من الشي لي شفتو رديت الباب بزربة وحكيت معاه من ورا الباب ورجعت نزرب للكوزينة ....واقفة نصب فالجو حتى حسيت بيه كي حط يديه على كرشي وراسو في رقبتي قلبي رجع يخبط بقوة من الخوف اصلا العلاقة الحميمية رجعت حاجة كوشماغ في حياتي ومنتوقعش يجي يوم ونتقبلها معاه ولا مع غيرو....
منير : واش حبي ماش راح يهديك ربي وتحني عليا راني صبرت بزاف ونتي ماش حاسة بيا..
انا : حتى انا صابرة ونتى مش حاس بيا الأنانية تعلمتها عليك منير
منير : علابالك بلي نحبك والشي هادا فوق جهدي الله غالب نحبك ونغير
انا : عمرو ماكان الحب هكا وحتى الغيرة عندها حدود وديجا سامحني نقدر نغرف من واش راك تغير
منير : نتي تعرفي وانا نعرف ومتفكرينيش لا نبيت عليك ليلة كحلة
انا : شوف نقولك حاجة منير يا تبدل علينا المهزلة هادي يا انا عندي حل خلاف حط في بالك بلي ورايا رجال ولخر منهم يوققك عند حدك مالا متستعملش معايا اسلوب التهديد خاطر ماجيبلك حتى نتيجة. .
منير : يحكمنوي من *** وماعندهم ما يقضولي راكي بالكارني معايا متنسايش
انا : دوم على رايك ونتمنى متندمش.... كول وحدك انا شبعت... تصبح على خير.......
