كلامها لي قالتو كيما وجعني كيما خلاني نفيق على روحي.... المرة هادي لازم نحسبها صح ......لازم نعرف وين نحط رجلي و نعرف كيفاه نستغل الفرصة ....خاطر مستحيل نتقبل انها تزيد ظيع مني مرة خلاف.... بصح في نفس الوقت غايضتني فاتن... مرات نقول هيا لي حبت ورضات روحها تعيش معايا وقلبي وروحي عند مرا غيرها ومرات نقول مهما يكن هي مادرتش معايا دوني وعلى هادي لازم انا تاني نكون فحل. ....وهاد الشي لي خلاني نلغي فكرة الطلاق نهائي من راسي بصح في نفس الوقت منقدرش نبقا عايش هك... نضن حتى انا من حقي نفرح ونعيش مع لي بغاها قلبي وزيد كلامها لي قالتو قبيل كامل عندها حق فيه في عوض مانزوج بيها قدام ربي وعبادو وليت نخرج فيها في نصاف ليالي. هادا كامل من قلبي الطحان لي راح يخليني نغلط في حقها وفي حق روحي... . ...........
وصلتها لدار وبقيت نستنا فيها حتى دخلت وكملت لدار دخلت ڨاريت الطونبيل ومشيت قعدت فالجاردان.... ماعينيش ندخل لدار... خصوصي ومخي مشوش هك.... الفكرة في راسي بصح معرفتش كيفاه نبداها وشكون الأول لي نحكي معاه خايف لاتزيد ترفضني المرة هادي وخايف العايلتين يرفضووو وخايف على فاتن تنضر من لحكاية. تنهدت وغمضت عينيا نخممم في حل كيما يرضيني كيما يرضي الناس كامل.....زمان نسمع فيها تحكي
فاتن : علاه مدخلتش ولدرجة هادي معينكش تشوفني وهارب مني
انا : لا حاشة ربي ماش هارب منك بصح عحبني الجو بقيت قاعد
فاتن : كل يوم نقول ليوم يتبدل ويقرب مني بصح لقيت العكس مارايح غير تزيد تبعد.. لدرجة هادي مقدرتش تحبني ؟ ولا لدرجة هادي مزال قلبك يعشق فيها
انا : هك ولا هك نضن مكدبتش عليك ...ومن الأول حطيتك فالصورة ونتي حرنتي واش نديرلك
فاتن : واش نفهم من كلامك
انا : ماتفهمي والو خير
فاتن :!مازلت عينك فيها
انا : منقدرش نكدب عليك ونقولك لا
فاتن : والحل
انا : منعرفش واش راح نقولك بصح الله غالب مازل قلبي عندها وانا مانيش حاب نغلط معاها.
فاتن : يعني حاب تزوج بيها
انا : نتي واش رايك مهما يكن منحبش نجرحك
فاتن : موافقة
هزيت راسي مصدوم بقيت حاير كيفاه وافقت بالسهولة هادي ومن غير حتى ما تتقلق
فاتن : حتى وماقتليش نتا انا كنت راح نقولك
انا : لدرجة هادي ماش مقلقك الموضوع
فاتن : اكيد مقلقني وفوق ماتتصور بصح يجي زمان وتفهم علاه
خلاتني نخمم ورجعت دخلت لدار بقيت وراها مدة نخمم من جهة فاتن فرات يبقاو تاغ الدار غدوة حتى هوما نحطهم فالصورة منقدرش نصبر كثر....
....................
محسيتش كيفاه رقدت وكيفاه نضت.... اللية عدات في رمشة عين... حليت عينيا على يدها لي تلعب بيها على ليحيتي تبسمتلها وقلتلها صباح الخير.. جيت نايض حكمتني من كتافي وردتني كيما كنت راقد وطلعت فوقي.... بقيت نشوف معاها وين حابة تصول مع أني متأكد نعرف حالتها هادي مليح خصوصي من الطريقة لي تعض بيها شفايفها..... نحس في روحي راح تخرج مني وملقيتش كيفاه نتسبب وخصوصي انو شعرة ماتحركت فيا العكس قلبي نافر.... بقيت مدة نتبع فيها بعينيا وهي تقول حبت تركح.... سمعنا صوت الباب يطبطب ومريم قاتلي حسام اهبط عزيز يحتاجك. ....حسيت باب القدر تفتح في وجهي اعتذرت منها ونضت دخلت لدوش عايف روحي...... كملت دوشت وخرجت لبست قشي بزربة هبطت لقيتهم تلمو وبداو يفطرو... حكيت مع عزيز عالخدمة وبعد دورت لبابا ويما وقلتلهم حاب نزوج بمنى حسيتهم كامل تصدمو غير فاتن لي كانت عادي.... حسيت بضربة على رجلي هزيت راسي لقيت مريم تضحك تبسمت معاها وكملت نحكي...
أنا : نضن راكم كامل عارفين حكايتي معاها بلا ما نبقى نوضح ونبرر
بابا : وفاتن
فاتن : عمي أنا قابلة معنديش مشكل المهم يعدل بيناتنا
يما : ايه ومنى قابلة
انا : منا لعشية نردلكم الخبر حبيت نحكي معاكم قبل
يما : كبير وتعرف صلاحك المهم مانحب حتى مشاكل
هزيتلها براسي وخرجت هزيت طول التلفون وعيطت لمحمد سقسيتو وينو قالي ساعة ويكونو فالدار. .. .....
