الحلقة 67
ماحسيت غير بشفافها فوق شفافي... كلمة مصدوم متوصفش الحالة لي كنت فيها ماقدرت ندير حتى ردة فعل ولي زاد على مابيا انو الطفلة رايحة وتتمادى ..تمشي في يديها على صدري ورقبتي بكل حنانة ........وانا ويين مخي سارح في دنيا خلاف جسمي بارد ڨلاص حبيت نتفاعل معاها كيما اي راجل يطيح في موقف كيما هك مقدرتش. حتى شكيت في رجولتي... الطفلة ذايبة فوقي قادر نكمل لي بداتو هي بكل سهولة بصح ماش انا لي نلعب ببنت ناس لي مانرضاهش في ختي مانرضاهش في غيرها مهما غلطت تبقى ولية .... .بعدت عليها بضرافة منحبش نجرحها ولا نحشمها. .قعدت قدامي فوق السرير تمروح على وجها لي شقر من الحشمة في زيها هادا وين فاقت مع روحها...
شفتها معاها تبسمت....
انا : في يدك ربع ساعة نلاقك واجدة صينو روح ونخليك
فاتن : اااا حسام سامحني عالشي لا صرا معرفتش كيفاه مقدرتش نتحكم في روحي ونضن راك فاهم كلشي من خزرة عينيا ماش حتى نحكيو فيها. ...
تنهدت وطبست راسي الشي لي كنت خايف منو طحت فيه كنت متأكد بلي عندها مشاعر من جيهتي بصح مش لدرجة هادي... بقيت مدة ساكت نضم في افكاري قبل مانتسرع ونجرحها.... بعد مدة هزيت راسي ليها لقيت دموعها يجريو على خدودها زادت صعبتها عليا حب من طرف واحد راني جربتو وتكويت منو على هادي نقدر نحس بيها تبست وحكيت...
انا : امسحي دموعك وهادا من درك بديتيني بالبكا هههه
فاتن : حسام نحبك وماش من عام وماش من عامين هادي 5سنين.....
هزيت راسي مصدوم اخر حاجة توقعتها....
اييييه هادي الدنيا صعيب الواحد يفهمها تلعب بينا كيما تحب تدينا وتجيبنا وحنا لا خبر..
خممت شوية مع روحي وبعد مديتلها مالخر هكا باش نحطها فالصورة ومتقوليش مرة خلاف ضلمتني.
انا : شوفي فاتن المرحلة لي راكي فيها حتى انا عديت عليها ومزال مبريت ونضن رراكي عارفة بالحكاية مليح قلبي ماهوش عندي خلاص داتو مولاتو وراحت بعيد مانقدر نقدملك حتى شي على هادي منحب نوعدك بوالو....
فاتن : وحتى انا مانيش طالبة المحال حسام نحبك تعطيني فرصة وقلبك انا نردو ليا...
انا : كيفاه تقدري تكوني معايا ونتي تعرفي بلي قلبي مهوش ليك
فاتن : نقدر خاطر نعرفك راجل وفحل محال تجرحني ولا دير حاجة توجعني.. نعرفك فيدال
هبطت راسي نخمم علاه منى مقدرتش تشوف الحوايج هادو فيا... للدرجة هادي كانت عمية من جيهتي ولا انا معطيتهاش الصورة الحقيقية ..خرجني من تخمامي كلامها.
فاتن : حسام صدقني جرحك على يدي يبرا وبيناتنا ليام.
انا : ربي يجيب لي فيه الخير.
فاتن : واش نفهم من كلامك
انا : واش راح نقولك.... ربي يقدرني ومنضلمكش معايا
.......................................
هي خرجت وانا دخلت لدوش ضايق خاطري وروحي نحس فيها راح تخرج مني ....لما هابط على لحمي والدموع هابطة على لحيتي.........لدرك كي نتفكرها نبكي...... مافهمت روحي نحب نشوفهها نحضنها ونهرب بيها من الدنيا وما فيها مافهمت نحب نشوفها باش نلوم عليها ونعاتبها.. لي متأكد منو اني فالوقت الحالي نحتاج غير نحط راسي في صدرها بلاك ريحتها تهديني ولمسة يديها داويلي جراحي.......
