الحلقة77
واقفة فالطاقة هازة الريدو بالشوية باش منبانش... ونشوف معاهم كي دخلو لكباش وبداو يدبحو فيهم.... حاسة روحي تدبحت انا في بلاصتهم ...بصح هكاك وكابرت على روحي وماطاحوش دموعي يزيني مابكيت لازم نرضى بالمكتوب.... بقيت ساهية نتفرج معاهم حسيتهم كامل فرحانين من الجو لي مديارينو حتى من بابا وخواتي معاهم مكانش غير هوا ومحمد.....
تنهدت وبعدت من الطاقة ومشيت قعدت فوق السرير ....جا في بالي منير زعمة واش صرالو واش دارو فيه خاوتي... حتى كي سقسيت محمد قالي متزيديش تجبدي عليه ويامات وتجيك طلقتك.... الدنيا الحلوفة لي يدير فيها لمان ...شكون كان يقول بلي نولي هجالة وانا عمري 20........
تحل الباب ودخلت ماما شفت فيها بحزن وهبطت عينيا حشمانة منها..... قعدت قدامي وحكات...
ماما :علابالي صعيبة بصح قدر الله ماشاء فعل هادا مكتوبك ولازم ترضاي بيه وزيد هادا قرارك واحد ماضربك على يدك وقالك تزوجي بيه بالسيف... لازم تدي العبرة من هادي وتولي تعرفي وين تحطي رجلك
انا : ايه عارففة بلي انا درتها بيدي
ماما : معليش مازلتي صغيرة والدنيا مازالت قدامك وحطي في بالك ماش كي طلقتي يعني راح طيح قيمتك بالعكس قدرك مزال محفوظ وحاجة ماتبدلت كي بكري كي درك معزتك هي معزتك متخليش كلمة مطلقة تأثر عليك وعلى حياتك.. هكا بنتي ؟
انا : نشاله ...ربي يجيب لي فيه الخير منا لغدوا بعيد الحال
ماما : هيا مالا نوضي كي لفحلة البسي وحمري وكحلي درك نروحو عند طاطاك فلة نعاونوهم واكيد نلقاو ناس برانية عندهم ملازمش يشوفوك هك
انا : لا ماما غير ماكلاه روحو على روحكم هاني هنا فالدار وزيد حابة غير نرقد... والدوخة تدي فيا وتجيب
ماما : يابنتي كثرت الدوخة تاعك هادي ونشاله ميكونش لي في بالي برك
انا : علاه واش في بالك
ماما : والو والو مانزيدش نحيرك كثر كشما كاين مع الوقت يبان
انا : مالا روحي راح الحال وانا هاني راح نرقد
ماما : معليش ارقدي بصح فليل او يجي ليك محمد ارواحي تتعشاي صينو يتغششو منك وزيد لازم تعاونيهم نسيتي واش عاونونا في عراس خاوتك وحتى إكرام موحولة
انا : ماما راكي تشمي ؟
ماما : وشنو... اااا ريحت التشواط (بوزلوف)
انا : ريحتو تشهي
ماما : كي نروح نقولهم يبعتولك كي تشهيتيه ....هي خرجت وانا غطيت على راسي ورقدت بلاك ننسا شوية ويرتاح بالي
..................... ........
فطنت على صوت الغنا قاوي تقول الباف محطوط في ودني زدت تقلقت كثر ماني مقلقة مشيت طليت لقيتتهم مركبين بافات كبار والدنيا مروية الكارتي مقفول بالطاوبل ولكراسى صحاب حسام يخدمولو فالديكور وين راح يحني الطاكسيات قافلين الحومة بلا مانحكي على ريحة الكسكسي لي تتشم من بعيد... سمعت صوت الباب تحل دورت لقيتو محمد واقف يشوف معايا بشوفة خلات الدموع لي محاصرة عليها بقوة طيح دمعة ورا دمعة حتى وليت نبكي بالصوت نحس فالدنيا هادي بعرضها قد عين لبرة.... وزيد الجو هادا حير فيا لمواجع.... حسيت بيه كي حضني بقوتو خلاني حتى كملت نوبة البكا لي جاتني وبعد مسحلي دموعي بكف يديه هزيت عينيا في عينيه لقيتهم حومر من الدموع لي حاصرهم ....تنهد وقالي....
محمد : هي خفي وجدي روحك باش نديك قبل مايقوى الغاشي برا أصلا الرجال برا قافلين الدخلة...
خليتو خرج وانا مشيت غسلت وجهي حطيت شوية ماسكرة وروج خفيف وشوية بلوش باش ميبقاش وجهي صفر تقول هاربة للغسال رجعت للبيت لبست جبة باهية وحطيت شوية بارفان شعري متعبنيش جيست لميتو لما خفيفة وهبطت محمد فالصالو يسنا فيا.... جيت خارجة قالي وين خارجة هك ورمالي جيلي تاع اكرام لبستها وانا حشمانة منو اصلا نسيت بلي الحومة معمرة بالرجال.... غالقت الجيلي وتبعتو.... مع خرجنا لقينا الضلمة طاحت وديجا شعلو الظواو والبروجيكتورات وزيد لغنا قاوي لدرجة مسمعتش محمد كي قالي ازربي حتى لقيتو دار ليا وڨودني مشيت معاه وانا مهبطة راسي خاطر نعرف عقليتو.... كي وصلنا للدخلة تاع الدار هزيت عينيا وياريت ماهزيتهم..... جاو عينيا في نص عينيه لي حومر دمممم هبطت راسي كي سمعت محمد يحكي معاه
محمد : وينك يا راجل العرس عرسك ونتا هارب او مزال الحال كون زدت شوية
حسام : كانت عندي طريق هادا وين جيت
محمد : المهم شوفنا طريق ندخل الطفلة
حسام : آني داخل انا خلي تدخل معايا
😈😈😈😈😈😈😈😈التفاعل🚶🚶🏃🏃🏃🏃 😎😎😎التفاعل هههههيييييييي
