Seasons 3: The Fall of Autumn

Chapter Eighteen

Napangiti si Gabby nang makita ang kotse ng ama niya sa tapat ng bahay. Ibig sabihin, tapos na ang lakad nito at ni Sid. Nae-excite siyang pumasok ng bahay para mag-ayos. Gusto niyang maging maganda sa harap ni Sid.

Pagkapasok niya ay dumiretso siya sa study room ng ama para kausapin ito. Nakabukas ang pinto niyon at mukhang may kausap ang daddy niya. Papasok pa lang siya nang marinig niyang magsalita ang ama.

"You're doing a good job, Sid. Balita ko, hindi na naghahanap ng prospect si Gabby ngayon," wika ng kanyang ama.

Si Sid? Nasa loob si Sid?

"I told you to trust me. I will never fail you, sir," wika ni Sid.

Siya ba ang pinag-uusapan ng mga ito?

"And you didn't. Tama nga ata na inutusan kitang maging sekretarya para mabantayan si Gabby. It's high time her pride got crushed dahil hindi siya matututo. Iniisip niya kasi na lagi siyang tama. She thinks that anything can be handled by money. Pero ngayon, mukhang in love na sa'yo ang anak ko na 'yon."

"I'm coming to that, sir. Sa ngayon, hindi niyo na kailangang mag-alala. I'm doing my best."

"And of course, katulad ng napagusapan natin, pwede mo nang kalimutan ang utang mo sa'kin sa lupa. You did more than what you promised to do with Gabby," nasisiyahang sabi nito.

Hindi niya gusto ang nararating ng utak niyang conclusion sa sinasabi ng mga ito, pero iisa lang ang naiisip niya – na sinasadya ni Sid na paibigin siya. Para ano?

"Anything for the company, sir. Malaki ang utang na loob ko sa inyo," narinig niyang sabi ni Sid.

Para siyang sinupalpal sa narinig niya. Of course. Anything for the company. Naalala niya na matagal nang sinasabi ng ama niya na tumigil siya paghahanap ng kung sino-sino pero hindi siya nakikinig. And now, her father had resorted to breaking her by using Sid, his most trustworthy assistant.

Ang kapalit ba ay para paibigin siya? Para ano? Para hindi na siya maghanap ng kung sino-sinong businessman na papakasalan? At hanggang kailan naman iyon gagawin ni Sid? Would he keep her hanging knowing that she was vulnerable to him? Para saan?

Your father helped me claim my land back. Pero syempre, may kapalit...

That, of course. Para hindi na nito bayaran ang utang nito.

Pero paano naman sya? Lahat ba ng mga ipinakita nito sa kanya nitong mga nakaraang araw ay pakitang-tao lang? Ginagamit lang ba siya nito talaga sa sarili nitong kapakanan?

I will never fall again for you again...

Biglang nagkabikig ang lalamunan niya. Daig pa niya ang nalagasan ng stocks sa tindi ng sakit na nararamdaman niya. Kaya nga dapat, sa umpisa pa lang ay hindi na niya hinayaan na masali sa usapan ang damdamin niya. Sa business nga, ang unang bumigay ang emosyon ang siyang talo.

Pinilit niyang hindi umiyak. Dalawang mahahalagang tao sa buhay niya ang pinagkaisahan siya. Para turuan siya ng leksyon? Sumobra naman ata. Inipon niya ang lakas ng loob at pumasok ng study room. Mukhang nagulat pa ang dalawa ng makita siya.

"Gabby, kanina ka pa?" tanong ng ama niya.

Tumikhim siya at sumikap na hindi pumatak ang nagaambang mga luha. Damn Sid! Ang huling beses na umiyak siya ay noong mamatay ang nanay niya.

"Hindi naman, Dad. Mukhang maagang natapos ang appointment mo."

Ngumiti si Alfredo. "Eh kasi, balita ko ay may lakad kayo ni Sid mamaya. Tinapos ko kaagad ang appointment para makapagusap kayo."

Ikinuyom niya ang kamay para pigilan ang sarili na magalit sa ama. Kilala niya ang ama niya. Noon pa man ay padalos-dalos ito kapag sila ni Andy ang concerned. Sumosobra na ito minsan sa ginagawa at sa pagmamanipulate. She knew it before, pero hindi niya alam na masasaktan siya sa pagkakataong ito.

"Wala kaming lakad ni Sid, Dad. Although may lakad talaga ako." Sinadya niyang itaas ang mukha at silipin sandali si Sid. "With Mac Lizalde. Kilala niyo siya, 'di ba? The heir to the Lizalde Industries." Sorry, Mac. Damay-damay na 'to.

"Ha?" Litong tumingin ito kay Sid na nanatiling tahimik sa isang sulok. Mukhang nalilito rin ito pero hindi nagsasalita. "Sid..."

"Bakit si Sid ang tinitingnan niyo? Dahil iniisip niyo na nagkakagusto ako sa sekretarya ko? Hah! Kilala niyo ako Dad. I won't waste my time with a nobody. It's against my rule."

Halos naririnig niya ang pagtatagis ng bagang ni Sid.

"Gabrielle! Watch your language," sigaw ng ama niya.

Ipinukpok niya ang kamao niya sa mesa ng ama. She was hurt so she was unstoppable.

"Bakit, Dad? Hindi ba at sinusunod lahat ni Sid ang iniuutos niyo? Hindi ba at inutusan niyo rin siyang paibigin ako? Bakit? To prove your point? What does that make him then? Your dog?"

Kitang-kita niya ang ang pamumutla ng mukha ng ama niya. Kahit si Sid ay namumutla sa isang sulok.

"Narinig mo ang usapan namin," nanlalambot na wika ni Alfredo.

Ni hindi man lang nito itinanggi ang lahat. Sinikap niyang itaas ang pride kahit gusto na niyang umiyak sa harap ng mga ito. How can they be so cruel?

"Stop meddling with my affairs, Dad. Hindi na ako bata."

Ni hindi niya tiningnan si Sid kahit nang tumalikod siya at lumabas ng kwarto. Pero naririnig niyang tinatawag siya ni Sid. Tuloy-tuloy lang siyang naglakad paakyat ng hagdan. Pero naabutan siya nito at hinawakan ang kamay niya.

"Gabby, makinig ka muna sa'kin."

Huminga siya ng malalim at tiningnan ito. Sinikap niyang hindi magpakita ng kahit na anong emosyon.

"Sid, narinig ko ang usapan niyo. Itinatanggi mo ba lahat ng iyon?"

Kitang kita sa mukha ni Sid ang guilt. "Aaminin ko, inutusan ako ng daddy mo. But only because he wanted you to learn that things don't always go your way. Don't take it out on your dad." Then he searched her face. "Maniwala ka man o hindi Gabby, hindi ka namin intensyong lokohin."

Itinaas niya ang kamay. Wala siyang panahong makipagbolahan kay Sid. Hindi nakakatulong na gusto niyang maniwala dito sa kabila ng lahat. Siguro nga ay tanga siya.

"Sid, inuubos mo lang ang oras ko. There's no harm done, really. Siguro, kung nainlove ako sa'yo ng tuluyan, saka ka magpaliwanag. As you can see, hindi naman kayo nagtagumpay. I still think of you as my paid secretary." Tatalikuran na sana niya ito nang may maalala. "And one more thing, thanks for the momentary flirtation. Nag-enjoy ako kahit paano."

Narinig niya ang pagtatagis ng ngipin ni Sid. "Nagsisinungaling ka, Gabby. What happened between us was more than a momentary flirtation. Alam kong alam mo 'yan!"

Umarko ang kilay niya. "Ows? Hindi ba at nilinaw ko naman sa'yo? I don't have time to mess around with you anymore. Sorry, Sid. Try harder next time."

Hindi na niya hinintay na makapagsalita ito. Taas noo siyang naglakad papunta sa kwarto niya. Naririnig pa niya ang yabag ng mga paa ni Sid na nanakbo palabas ng bahay. Nang makarating siya sa kwarto niya ay nanghihina siyang sumalampak sa sahig. Itinuon niya ang mukha sa tuhod.

"How stupid can you get, Gabby?" sarkastiko niyang sabi sa sarili.

Pakiramdam niya ay pinagbagsakan siya ng langit at lupa. Pero hindi ito ang oras para umiyak. She was not Gabrielle Montecillo for nothing.