♍عَــــــذْرَاءْ وَ قَــــــوْسْ♐
للكاتبة✒️: Victoria kaelin
الفصل الثاني: 🍁أنت المنفى و بين ذراعيك حريتي🍁
💜📖الجزء 374💜📖
خرجات حتى شدات الطاكسي و وصلها لقدام الدار..كان الحي هادئ و الناس قلال فهاد الوقيتة..قربات من الباب حتى دقات جوج دقات و وقفات تتسنا الرد..فالداخل سمعات نواهل الدقان و هي تمشي تحل ظنا منها انه برناس قضا الغاراض د ختو فالجامعة دغيا و رجع..فاش حلات الباب بانت ليها امرأة كبيرة شوية فالعمر واقفة..دواني غير تحل الباب وقفات عليها تطلعها و تهبطها من راسها لصباع رجليها...
نواهل: فاش نقدر نعاونك ا خالتي؟
دواني شافت يمينها و يسارها عاد قربات منها بشوية تتفحصها بعينيها: انا مامات برناس
نواهل بدهشة: مامات برناس؟(بتوتر) ا ااه مكاينش دابا
دواني: راني عارفة ماجيت على قبلو جيت ندوي مع البنت لي تزوج بيها
نواهل بلعات ريقها: انا؟ مكاين لاش اخالتي هادشي فيه المشاكل(رجعات خطوة للوراء)
دواني: ماجيتش ندير المشاكل بغيت غير ندوي معاك و نعرف كأي أم شكون هي مراة ولدها
نواهل بقات ساكتة لثواني تتفكر واش تدخلها ولا لا خافت حيت فراسها انه واليديه رافضينها اذن علاش مو غتجي تعامل معاها بضرافة و تبغي تعرف عليها؟ تنحات ليها قدام الباب دايرة ليها الطريق منين تدوز و بيديها شييرات ليها تدخل..دخلات دواني تتمنضر فالدار لي كانت غير حيوط و خواا و دابا ولات مجهزة و مفرشة...
دواني تلفتات ليها: ذوقك زوين
نواهل وقفات باستغراب: مافهمتش؟
دواني و هي تتمنضر و تمعن: ولدي ماعندوش مع قوة هاد الزواق باينة نتي لي ختاريتي فهمتي دابا؟
نواهل ضامة يديها لعندها: ا ااه شكرا..ا انا نمشي نصوب شي حاجة...
دواني قاطعاتها: لا مابغيت والو جلسي
نواهل: ولكن...
دواني بأمر: جلسي!
نواهل جلسات بلهلا يطريه ليها فالصالون فوق السداري و دواني جلسات قدامها مصوبة انضارها عليها..تتبان ليها درية نقية..مهدنة..زوينة و باقة صغيرة مابايناش فيها ابدا من داك النوع د خرجان الطريق ولا لي تيلصق فالرجال صحة ماكانتش متخييلاها ابدا هاكا من جهة اخرى من ناحية الشكل جاتها مواتية بزاف مع ولدها و ذوقو فالبنات(كونما جمعوه بعذراء فالماضي بزز طبعا)..بينما نواهل ساكتة تتلعب بصباعها بتوتر ماعارفة ماتقول تتسنا فيها هي لي تدوي...
دواني: قولي ليا كيفاش حتى غلط معاك ولدي؟!(نيشان)
نواهل بصدمة: ش شنو؟
دواني: ولدي مايمكنش يتعدا عليك ولا يبزز عليك شي حاجة و نتي تتباني ليا ماخفيفاش كي درتو ليها؟
نواهل شادة فأطراف كسوتها بحشمة و خدودها حمرين ماعرفاتش اش تقول ليها حيت هادشي مافيه مايتقال اصلا...
دواني تتشوف فيها كيفاش تتهرب فعينيها و حشمانة زادت تأكدات من ظنونها: عطيني غير تلميح ماقلتش ليك كيفاش وقع لي وقع و تفاصيلو
نواهل بخجل: ك ك كانت لحظة ضعف ف فاش عرضتو لشقتي يشرب القهوة قبل مايرجع لدار و وقع لي وقع بلا مانحسو
دواني تنهدات: ا بنتي هاد بلا مانحسو راه مكايناش و ماعندها حتى معنى..قولي واش كنتي تتبغي ولدي من لول ياك؟
نواهل حدرات راسها و حركاتو بالإيجاب...
دواني شبكات يديها مع بعض بتنهيدة: كنت عارفة داكشي علاش خليتيه دار لي دار و مع تلاقيتي معاه باقي محطم كملات
نواهل طلعات فيها راسها بحزن: ملي نتي عارفة هادشي كامل ق قولي ليا و واش باقي تيبغي خطيبتو؟
دواني: واش متيقاش فيه؟
نواهل: لا لا لا ماشي هكاك غير..بعد المرات تنقول مع راسي مايمكنش كيف كان متعلق بيها ينساها دغيا
دواني: كاين فرق بين البغو و بين الولف و كاين تاني الوهم
نواهل: هادشي لي قلت ليه من قبل
دواني: للأسف ولدي كان عايش فوهم و تييق داك الوهم و ماعاق بهادشي حتى تحطم و شاف كلشي بعينيه
نواهل بتردد: انا عارفة بلي نتوما ماقابلينش عليا حيت من برج اخر زائد انه(زييرات على جلايلها)ولدك تزوج بيا بهاد الطريقة ولكن لي بغيتكوم تعرفوه هو انه انا غنطهلا فولدكوم و مغتخصو حتى حاجة معايا و غنوقف معاه حتى يولي حسن و كتر انا ماشي مامزياناش ولا خايبة ماتحكموش عليا حيت انا من برج اخور(غرغرو عينيها)
دواني: قبل مانجاوبك واش عائلتك بعدا نتي عارفة بهادشي؟
نواهل هربات عينيها: قلت ليهوم غير غنتزوج ماعطيتهومش التفاصيل مابغيتش نتلقا رفض من طرف اخور
دواني: هادي راه حاجة طبيعية هدا هو مجتمع الأبراج راه ماشي حاجة جديدة عليك
نواهل هزات فيها عينيها المدمعين: ولكن علاش عذراء تزوجات بقوس؟؟و قدام عيباد الله و من الفوق مدوزينهوم القنواات و المجلاات بحالا شي حاجة عادية! و انا مانستاهلش فرصة؟؟
دواني بدهشة: كيفاش؟؟؟عذراء تزوجاات بهاداك؟!!!
نواهل: انا كصحفية سابقة متبعة الأخبار حتى على برا اليوم بالصدفة شفت مجلات إلكترونية باثين الخبر
دواني بقات لثواني تتستوعب الأمر عاد شافت فيها: شوفي انا قبل مانجي لهنا قررت واحد الحاجة
نواهل بخوف: ش شنو هي؟؟
دواني: مادام تزوجتو تزوجتو نتي و ولدي دابا ماكاين لاش نبقاو ساكتين مزال
نواهل بتسائل: شنو قصدك؟
دواني: مادام نتي اصلا عاجبك زواج عذراء لي ولا فالأخبار انا غنمشي عند مي سلافا نقول ليها على زواجكوم باش نحييدو علينا هاد الهم...
أنت تقرأ
♍عذراء و قوس♐|مكتملة✨️
Romanceالقصة بعنوان: ♍عَــــــذْرَاءْ وَ قَــــــوْسْ♐ للكاتبة✒️:Victoria kaelin (⛔ممنوع الاقتباس جميع الأفكار من مخييلتي الخاصة⛔) في عالم بحال ديالنا غير هو هاد العالم عالم الأبراج كل عائلة و رمز برجها و تقاليدها و عاداتها و فعالم الأبراج العشق و الحب لي...
