_ ع الهـــــامــــــش 🌿 .

عُبّادُ البَشَر

_  صارلي ساعة اكتب وبالاخير ينحذف الموهيم
لأني صارلي اسبوعين إلا يومين مكتبت بارت اليوم
جبتلكم موضوع دسم ويطوك بالكاع ..

مثل ميكول علي الوردي : لا اقصد بهذا الموضوع أن اقنع جميع القراء ... فإن الذي تعود أن ينظر إلى الحقيقة من ناحية مختلفة عن الناحية ااتي أنظر منها وأرى من المستحيل إقناعه مهما كانت قوة البراهين التي اعرضها ... الطرح حيكون من منظوري اني ورأيي ومو شرط أنو تتقبل كلامي وحجيي وتأيدني الموهيم فخلك ريلاكس ..

________________________________________

_________________________________________

● تدرون شنو أحلى شيء بالدين الاسلامي ؟؟
_ انو جعلنا أحرار احرار بمعنى الكلمة حررنا من هواي اصنام جانت تقيدنا وجعلنا أحرار عابدين لله وبس ميزنا وخله النا قيمة كلش جبيرة ومنعنا أنو ننطي عقلنا طبق مطرز بالعالم بأكمله .. فالذهب قليل ورديئ جدا اذا قارنا بعقل بشري .. هذا احلى شيء برأيي ومعليه بالمفتهمين الدين مكلوبي ويغرّب ويحدّر مثل ميكولون اهلنا ..

من جنا صغار جنا نستغرب من قصص فرعون وهيمنته وآمون وصلعانه وهواي من الي طغوا ومن نشوف الناس تعبد حجر وبقر وفأر ونار يزيد استغرابنا شلون من الممكن الواحد يعبد هيج ؟؟؟
وصرنا نتوقع أنو احنا مستحيل حيجي يوم ونعبد مخلوق ... لكن ما أن اجه عصر التطور اجت اصناف جديدة واساليب جديدة محتكرة حول شلون ممكن يحولون الناس الى عبيد الهم ... ووصل بيها هالناس أنو تعبد بشر إي وداعتكم بشر يمكن يكون هالتعبير مجازي لكن أفضل تعبير ممكن يمثل الواقع المُحاطين بي خل ندخل بموضوعنا

                        ● عُبّاد البشر

راح احجي عن الفئات الشائعة فقط

1○ عبدة السياسي :
_ الفئة هاي (( كلش مهمة )) لان من خلال هاي الفئة ممكن تودي شعب كامل الى التهلكة وممكن تنقذ شعب كامل _ تتقبل هواي احتمالات بس احتمال التهلكة اكبر _
.. بالعالم كله كل سياسي اكو مجموعة من المجتمع والناس تأيدة ويحبوه ومنكذب ع بعضنا فهالفئة كلش منتشرة بالعراق والصراحة تخووف والنا تجارب سابقة وياهم بتاريخ العراق العظيم خلت اغلب الشعب يمشي وية ثقب الحايط ولا زلنا... وصلت بيهم المرحلة يقدسوه ويجعلوه معصوم مع العلم ماكو انسان معصوم  ولو فعلاً احنا معصومين فميسمونه بشر يسممونه ملائكة وهاي بالفطرة البشرية يعني ... اكو منهم يحببوه وينذلون علمودة حتى لو كان ظالم وجائر وهالشي ماكو سياسي ينكره أو يرفضة ويكللهم اني مو نبي فهو شلون تكون اله مكانه من دونهم ..

2○ عبدة المشاهير :
_ قبل لا افتح تُميي 👄👅انتو تعرفون هالناس كلش زين ولابد يوم من الايام صادفتولكم واحد منهم او يمكن تكون انت منهم اي انت ... الانسان المشهور هوة شخص الناس تعرفه ويتميز عن غيرة سواء بموهبة او فكرة أو فن او جعل اله منصه واشتهر بيهة او يمكن طلع يركص بال Tik tok  وطش طشة الذين طششوا ... الخ .

فبعض الناس يحبوووه ( الفانزززز) يحببوه الدرجة ياخذوا قدوة بكلشي بكلشي يكون مرجع الهم وكلشي يسووي يسووا وهذا غلط كلش جبير لنفترض طلع هذا مو خوش انسان انت متكدر بعد تميز الغلط من الصح لان بكل بساطة صرت تشوفه قدوة بكلشي وهو يشوفك مجرد رقم  وروح بيهة ..وهذا حرفيا مرض نفسي هواي كتب وناس حجووا بي  وأكو كتاب اسمه ● سيكلوجية الجماهير مقاريته بس عجبني يحجي عن هالموضوع وبس اخلص الي عندي واطفر عليه فأقروا اذا تحببون .

اكتبوا اسم الكتاب ب Google ويطلعلكم وحملوه  PDF

3○ عبدة الحب :
حرفيا هالنوع داقني كلش .سواء وافقتوني الرأي او لا راح احجي واليحب يقرة معندي مانع .. اي بعض البنات متخيلات الحب او الرجال كأنه فد شيء نازل من السمه ويلالي بحيث تضل ترسم عالم برتقالي وتتخيل عريس الغفلة يجيها وبينما هي جاي تتخيل تنصدم بالواقع الي عايشة بي الحب مو اهم من الحياة ولا اهم من صحتج ولا كرامتج ولا حياتج هوة جزء ضئيل منهة واذا بنينا حياتنا ع مجرد شعور حلوو حتصير حياتنا مجردة من الحياة .. وانت بهالاثناء ومعلقة نفسج بشيء هامشي فجأة ضاع من ايدج تخيلي شنو ممكن تصير حياتج هل راح تكومين وتكملين حياتج و تعالجين نفسج وجروحج وتضمديهة ؟؟؟ لو تركنين حياتج ع ارفف ذكريات تكاد تتلاشى وتكعدين تنتظرين الراح يرجع ؟؟

● حجيي مو بس الكم حجيي هذا النفسي حتى يذكرني اني منو ولو بعد سنين ..

_ اكتبوا نصيحه عن هالموضوع بعد متخلصوه ..

_

صيري عظيمة حتى تلكين الرجل العظيم وتكمل عبارة خلف كل رجل عظيم امرأة عظيمة .

_________________________________________

وَمّضَة

● رديتني بفشلتي مثل اليجي بلهفته وما شايف امه عمر بس فاقدة الذاكرة وتكله ياهو انت ..
( رضا العبادي)

●يا فشلتي كبال عيني فشلة النكته الفطيرة التنحجي كبال الرزن..
( حسين علي المطوري )

                  في حُب الله .💙🙃