Boss အဆိပ်မပြင်းလွန်းနဲ့...!

၂။ ရွှေပေါ်မြတင် (၂)

ရွှေပေါ်မြတင် (၂)
~~~~~~~~~~~~~~

ခမ်းနားစွာပြင်ဆင်ထားသည့် ခန်းမကြီးထဲမှာ သာယာငြိမ့်ညောင်းသော တေးဂီတသံများ ပျံ့လွင့်နေသည်။ တန်ဖိုးကြီးဝတ်စုံများ ဝတ်ထားသည့် အမျိုးသားများရော အမျိုးသမီးများပါ သူတို့၏ ဆိုင်ရာဆိုင်ရာ အုပ်စုများနှင့် စုဝေးလျက် စကားစမြည် ပြောဆိုနေကြသည်။

ရှီရှန်းကတော့ ထောင့်တစ်နေရာတွင် ထိုင်နေလိုက်သည်။ သူမ အသွင်ပြင်က တည်ငြိမ်ပြီး သဘာ၀ဆန်ကာ သူမ၏ ခံစားချက်ကို တစ်စွန်းတစ်စ မမြင်နိုင်ပေ။ ထိုပါတီပွဲက မစ္စနန်ကုန်း၏ မွေးနေ့ပွဲအတွက် ကျင်းပသည့်ပါတီဖြစ်သည်။ ဒီနေ့ဟာ ရွှီချန်းယွဲ့က စုယိယိအကြောင်းကို နန်ကုန်းကျင်း၏ မိဘများထံ ပြောပြလိုက်သည့်နေ့လည်း ဖြစ်သည်။

ရွှီချန်းယွဲ့၏ ဆန္ဒက နန်ကုန်းကျင်းဆိုသည့် အကျင့်မကောင်းသော ကောင်ကို စွန့်လွှတ်ပြီး သူမ၏ ရွှီမိသားစုကို ကယ်တင်ရန်နှင့် သူမ၏ မိဘများအတွက် သမီးလိမ္မာလေးဖြစ်ပေးပြီး သူတို့ ကျန်သည့် ဘဝသက်တမ်းမှာ အငြိမ်းစားယူပြီး ပျော်ရွှင်စွာ နေထိုင်နိုင်စေရန်ဖြစ်သည်။

"ချန်ယွဲ့ နင်ဒီမှာ ဘာလို့ လာထိုင်နေတာလဲ။ အစ်ကိုလေးကျင်းကရော မင်းအနား ဘာလို့ ရှိမနေတာလဲ"

လှပပြီး နူးညံ့သိမ့်မွေ့သည့် အမျိုးသမီးငယ်လေးတစ်ဦး ရှီရှန်းဘေးမှာ လာထိုင်သည်။ သူမက ရှည်လျားသည့် ဆံပင်ကောက်လေးများနှင့် ချစ်စရာ ကလေးမျက်နှာလေးကို ပိုင်ဆိုင်သည်။

သူမနှင့် ပတ်သက်သည့် အချက်အလက်များ ရှီရှန်းခေါင်းထဲဝင်လာသည်။ သူမနာမည်က လန်းရွှယ်။ ရွှီချန်းယွဲ့နှင့် သူငယ်ချင်းကောင်းများဖြစ်သည်။ ဒါက သူမ ထင်ခဲ့တာလည်း ဖြစ်သည်။ တကယ်တမ်းက ရွှီမိသားစု စီးပွားကျလာတော့ သူမက လန်းရွှယ်ဆီသွားပြီး အကူအညီတောင်းခဲ့ချိန်။ သူမက ချန်ယွဲ့ကို အကူအညီ မပေးခဲ့သည့်အပြင် လှောင်ပြောင်ပျက်ရယ်ပြုခဲ့သည်။

မူလ ရွှီချန်းယွဲ့က နန်ကုန်းကျင်းနှင့် စုယိယိတို့ ချစ်ကြိုးသွယ်သွားရခြင်းဟာ လန်းရွှယ်လက်ချက်ဆိုတာ သိခဲ့သည်။