البارت8
بدأت تتلاشى من بين اضلعي
بطريقه مخيفه، وكأنك لم تكن هناك يوماً
لم يعد لك اثر سوى في بعض السطور من رسائل قديمه غلفها الغبار
و الحان موسيقى لطالما تكلمت عنا مسبقاً ...
شاهر /
من سمعت بشهااب رجع ماكمت اندل دربي
طلعت من بيتنه و اني مليان غضب و حقد عليه
شهاب طعني طعنة قووية بظهري ..
اني جنت حاقد عليه على الي سواه بأختي
و على طعني شهاب جان بلنسبة الي اخوه
ما جابتة أمي جان صديقي و أخوي..
أمنت جوري عنده و جنت واثق بيه كلش
كتله جوري أمانة عندك بس هو ماصان الأمانة
كلشي و لا أختي جوري اكلب الدنيا على روسهم
اذا يمسون شعره من راسه ..
احرك الأخضر و اليابس و لا أشوف جوري
تنزل دمعة من عينها هاي اخيتي و ماعندي
غيره و شهاب كسره و ظلمة ..
رحت و فرغت غضبي بيه بس هو ساكت
مايحجي بس عيونه تنطق بكلشي
يباوع و مبتسم جنه يكول اخذ حقك ..
مستغرب تصرفة ليش هيج سووه
و ما برر اي يتصرف منه او حتى حاول يفهمنه..
جان مبتسم بس من حجيت عن جوري
و شنو شافت بحياته و شصار بيه هاي
ال ٥ سنين احس نظرته تغيرت
و أبتسامتة أختفت معقولة !؟
معقولة شهااب بعده يحب مستحيل
ليش لعد اجه و المصيبة أبنه وياه و متزوج.
و أختي الي طاحت بيها و هو شاف عمره
و هيا بعده حابسة نفسه شكد نصحته تنسى
بس ما يفيد وياها ادري صعبة عليه ...
بس شنسوي كلبي كاعد يتكطع عليه
و خايف لا يصير بيها شي و هيا بعده صغيرة...
وصلت للبيت و صايرين أعصاب
اجه محمد كال بعصبية: صدك الي سمعته شهاب رجع..
أبوي : اي رجع و كافي سدوو السالفة
بعد هاهية رجع و مانكدر نمنع اجه يم اهله
و عيب كافي من أبوه خطية هو أتفشل من يمه..
محمد صاح بعصبية : عييب من أبوو موو
بس همه من أستقبلووه ما كالو عيب
أخوك ما كال عيب من أخوي ادخل أبني
الي دمر بنته و نزل راسنه كدام الناس
بوية سنين مرت و احنه ما ننسى من نشوف
اختنه مدمره حياته بأيده و احنه نظل ساكتين..
صارت عيني على فاتن مدنكة راسة ماتكدر
تحجي و هذا الاخ يحجي و مايدري بنفسه
حتى ظل يحجي على اهلها و يغلط
محمد هادئ بس بهاي السالفه محد يعرفة..
حجه ليث بصوت هادئ : محمد شتريدنه نسوي
نجره و نطرده من بيتهم مايصير هم ..
باوعله محمد و يخزر بيه : لعد استاذ ليث
تريد نشوفه و نستقبله بالأحضان و نشوفه رايح
راجع ..
ما كلت هيج قصدي هو يم اهله مالنه شغل بيه
بس مايوصل لهذا البيت و مانريد شوفته
اهم شي عدنة اختنه تكون مرتاحة ..
كلت بهدووء : و جوري وينه ليش ماكو..
حجت فاتن : من سمعت بلسالفة صعدت فوك
ولحد هسه ما نزلت ..
سمعت صوت حبوبتي تحجي : ولكم لا تسوي شي
بروحه شوفو شبيه ..
غيث : حبوبة لا تخافين ماتسوي شي لنفسه
جوري قوية و كدها راح تكون ..
جدي كال : روحو شوفوها و هسه تلكوها
زعلت مني ..
باوعت على جدي و كتلة : ليش تزعل منك شسويت
جدي الها ..
باوعلي بطرف عينه : ماسويت شي بس كلت الصح
خفت من كلامه : شقصدك شنو الصح غير نعرف..
حجه بأمر : كتله انسي و شهاب لازم يرجع يم اهله
وناسة كافي الولد تغرب و صح سوه غلط
بس احنه نعاقبه او نعاتبه اهم شي يرجع يم اهله..
مستغرب تصرف جدي مانحس غير ليث طفر
بعصبية و ظل يحجي هذا منا مفول على جدي..
كال بغضب : رحمة لموتاك جدي كافي عاد تتحكم
بينه يعني هذا وقته تحجي هيج وياها ماتعرف
هيا شلون تتحسس من الموضوع ..
بس انت ما ترتاح الا تشوف ولد سلمان تحت امرك
و طاعتك و يسكتون على كل كلمة تحجيها..
حجه أبوي بعصيية : ليث احترم نفسك و اكعد
كافي..
كعد ليث و يهز رجله بعصبية بده يحرك هاي
القرية على روسنه كلنه و الله لان كل يوم
جدي يحجي براسه و براس أبوي على زينب..
باوعله جدي و كال : بعد و بعد ششوف منك
يا ابن سلمان ماعندك كل احترام و تكول احترم جدي
يا حيف والله وسفة عليك طول صوتك عليه
ما خليت كل احترام اليه ..
ضجنه كلنه من تصرف ليث يبقى جدنه و اله احترامه
ليث كام بهدوء و باس راسه و كال : اعذرني جدي
بس اختي خطية الي تسمعه منكم بدال ما توكفون
انتم وياها تصيرون عليها ..
حجه جدي : يابني اني وياها مو ضدها بس خل تتعايش كافي و هو الى متى يظل بعيد عنه
خل يبقى هنا و احنه نشوف صرفة وي شهاب ..
ظلو يحجون و اني كل بالي و تفكيري يم جوري
اخذتني رجلي وصعدت فوك وصلت يم غرفتة ..
ما تحملت اريد اشوف شبيها ما بيها
بس لا تبجي هسه هيا و مدمرة نفسه
دكيت الباب و طولت يلا فتحت ..
اني كلت هسه اشوفه مكطعة نفسه من البجي
بس من فتحت الباب استغربت منه تباوعلي بهدوء
و عادي ما جنه سمعت شهاب راجع ..
كالت : خير شاهر محتاج شي!؟
هزيت راسي بلنفي : لا ماريد شي بس حبيت اطمن عليج..رفعت حاجبة : على شنو تطمن مابية شي ..
دخلت لغرفتة و هيا دخلت وراي كعدت على الجرباية
و أشرت بيدي تجي تكعد بصفي و اجت هيا و كعدت
ظلت مدنكة راسها و تفرك بأيديها متوترة ..
ابتسمت و كتله : رفعي راسج جوري ما عاش و لا كان
الي ينزل من راسج كولي الي بكلبج يا بعد أخوج ..
رفعت راسه و شفت بعيونه كل الكلام عيونه ينطقن
بلتعب و الحزن مال سنين ..
كالت بهدوء : شحجي و شأكول الكلام كله راح ياخوية
راد يروح و راح و راد يرجع و رجع الي عجبه سواه
بعد اني شحجي ..
كملت كلامه : معليكم بيه خوية رجع يم اهله و
ماله دخل بينه و لا احنه ندخل بيهم هاهية بعد
اهله شنو ذنبهم ينحرمون منه ..
كتله : لعد و أنتي !؟
أبتسمت و كالت: أني شبيه .. اني محد يوكف وياي
كله تكول خل يشوف حياته خليه يرجع طول غبيته
بس ماكالو جوري طول حزنه و همه ..
: لا تكولين هيج خوية احنه اخوانج و أبوج
مانعوفج وحدج ولج مالنه غيرج لا تحجين هيج..
ابتسمت بتعب و كالت : ادري ربي لا يحرمني منكم
يا خويه اني اخذ قوتي من يمكن بس عوفوني اني
اسوي الي براسي ..
استغربت من كلامها كتله : جوري شقصدج
شنو الي براسج احجي خوفتيني ..
أبتسمت ؛ اكمل الي بديتة من الماضي اخذ حقي
بيدي ..
مادري خفت من نظراته و تصرفاته كتله : جوري
لا تتصرفين من وحدج احجي شتردين تسوين
ولج لا تسوين شي احنه ناخذ حقنه منه كافي
عوفي الحقد مراح يسوي شي غير يضرج ..
باوعتلي بعصبية : مايفيد كل هذا الحجي هذا رجع
و هو جابه لنفسه لو يرجع من وين لو يشوف مايعجبه ..
هزيت راسي بيأس من يمها : مادري شحجي وياج
كلبي ما مطمئن من كلامج يا خوفي تسوين شي
حجت بقهر: شسووي بس كلي لا تخاف مني
و لا تنسى اني وين عايشة و مجتمعنا بشنو يفكر
اني عايشة تحت عادات و تقاليد خانكتني
كون المرة تنجب و تسكت هنا و ماتسوي شي..
: حتى لو السبب مو مني و هو الي كسرني
و دمرني بس يكلولي اشش انتي مايصير تحجين شي
هو ولد و غلط و انتي انسي عليج بس بلنسيان
هو هذا علاجج ما حجو و كالو هاي البنية
مايفيد وياها كلشي بس تريد تحجي وياه
وتكله ليش هيج سويت بيه اني شسويت ..
حجت هيج و خارت كل قواها سوت نفسه قوية
و صمدت دقائق حتى ما تنزل دمعته ..
بس عيونها خانوها و نزلت الدموع تحجي كلشي
كلبي كسرني على منظرة و كرهت شهاب
حضنته و هيا لزمت قميصي بقووة و ظلت تبجي
و اني امسح على ظهره ااخ الله يساعدج ..
........
فاتن /
صار الليل و الجو متكهرب و مشحون بلبيت
مجان الي نفس اروح لبيت اهلي من سمعت
شهاب رجع ماردت اشوفه بعد ..
كعدت كبالي المراية امشط شعري و انفتح الباب
باوعت على محمد من انعكاس المراية دخل
وكعد على السرير تعبان امبين عليه
ظل صافن و ما يحجي كمت من مكاني و كعدت
على الجرباية اريد انام ما سئلته و لا كتله شبيك..
بس هو حاجاني و كال : ليش مارحتي لهلج اليوم..
باوعت عليه لكيته يباوعلي بهدوء
ابتسمت بأستهزاء : شنو ناوي هم ترجعني يم اهلي
لأن شهاب رجع ..
طبك حواجبة و حجة بعصبية:
لا تمسلتين بلحجي اني ما كلت هيج بس قصدي
شعحب مارحتي و شفتي هذاك اخوج العار ..
صح اني شايلة على أخوي و مقهورة منه
بس يبقى اخوي الي جان محترمني و يحبني
ما اقبل اي احد يقلل من قيمتة و اليوم
سكتت و ماحجيت لان حقهم بس كافي
هيج على طالعة و نازلة يغلط و يسب ..
كمت من مكاني بقهر : كافي عاد كل ما حجيت
وغلطت عليه ندري غلط بس مو هيج
بلصاعدة و نازلة و تكول عليه عار و تغلط و تسب
عاد احترمني شووي كدام اهلك و لا تسب كدامي..
اجه وكف كبالي و لزمني من ايدي و جرني عليه
كال و هو يخزرني : شنو هاي المحنة الي نازلة عليج
لو حنيتي لاخوج لا تنسين ترى هو سبب الي صار
ويانه بسببه رحتي من يمي و صارت مشكلتنه ..
ردت ابعد نفسي منه بس هو لازمني قووي كتله
و اني أباوعلة كتلة بقهر :
لا مو هو السبب لا تذب اللوم و الصوج بأخوي
ترى أنت السبب كل الي كاعد يصير بيناتنه
أنت الي سويتة و سببته ..
باوعلي بقووة و كال : شقصدج ولج انتي نسيتي
شسووه ..
مليت من اسطوانتة دفعتة قووة و كتلة:
مانسيت فهمت و الله فهمت اخوك كسر اختي
بس منو الي كسرني و شمرني يم اهلي ٩ اشهر
و اكثر كللي ..
كتلة و دموعي تنزل : كلي منو الي شمرني أنته
لو أخوي الي ذبني هناك و ما سئل علية ..
سكت هو ماحجة رحت يمه و كتلة : هاا شو سكتت
ليش ما تحجي لو تعرف نفسك أنت الغلطان
بس تذب الصوج براس أخوي ..
باوعتله : ترى ما اكلك أخوي ما سوه شي
لا بلعكس هو بسبب دماره لجوري هذا سبب كلش
كافي بس ما نذب الصوج بيه
بس انت الصوج بيك هم لأن ما تفرق عن أخوي هواي..
: أخوي مثل ما دار ظهرة و عاف أختك و خله
الناس تحجي أنت همين درت ظهرك من اولمشكلة و عفتني و خليت الناس تحجي
هسه كلي اكو فرق بيناتكم ..
ابتعدت عنه و اني مقهوره و نار بكلبي تسعر
دموعي تنزل ظليت اشهك من البجي
درت وجهي عنه و ما حس غير جرني
و اخذني بين احضانه ردت ابتعد عنه
بس هو منعني و حضني بقووه ..
كتله و اني اشهك :وخر من يمي عوفني
اريد امشي ..
بقه هو و يمسح على شعري :
اشش كافي
لا تبجين ولج والله دموعج يكسرني
من اشوفج اظل الوم بنفسي ما اتحمل
اشوف هاي العيون ذبلانة و بسببي
سامحيني و الله جنت بوقتة عصبي
و ماعرف اتصرف بوقتة بس بيومه تندمت
والله كلش متندم يعني حسي بيه
اخوج هيج سووه و انتي كبالي و صبيت غضبي
عليج ..
كتله و اني كلبي يتكطع : و اني شنو ذنبي..
باوعلي و مسح دموعي كال بحنية : مالج كل ذنب
بس كتلج وقت عصبية و اريدج تسامحيني فاتن..
باوعت على عيونة الي تحجي كلشي
عيونه بيها حب و لهفة ما شفتهن قبل
ماشفتهن بوقت جنت محتاجة هذا الحب
وهاي النظرة عيونها تنطق بلندم ..
كتله بهدووء :اجيت متأخر ياا محمد ..
: شقصدج فاتن ..
بعدت ايده و ابتعدت عنه كتله :
اني رجعت علمود ابني و لا تنتظر شي ثاني مني
ابقه نفسك محمد الي اعرفه الي جان مايحبني و
لا يريدني محمد الي فقد محبتة من كلبي
بيوم الي سوواه ..
دمعة نزلت و مسحته بسرعه : محمد لا تتطلب مني
اسامحك و انت سويت شي جبير صعب عليه
اسامحك حبك مات بعد و ماظن يرجع يحيي..
عفته و رحت لسرير تمددت و انطيتة ظهري
هو ظل شوي و اكف بس بعدين طفه الضوة
وتمدد على السرير و اني ظليت ابجي بهدوء
ماريده يسمع صوتي و يدري بيه ابجي ..
بعد وكت محمد هسه يلا اجيت و اتندمت
من برد حبك بكلبي ما انكر و اكول ماحبك
لا والله بعدني احبك و اموت عليك بس
صعبة تصير مذنب بذنب انت ما ارتكبتة
اني شنو ذنبي و هيج سويت بيه و هسه
راجع و تكلي سامحيني شسامح منك ولك لا ليلي ليل
و لا نهاري نهار حبك موجود بكلبي بعده..
بس صعبة انسه الي سويته و ارجع اسامحك
هيهات ارجع مثل قبل و ارجع انذل من حبك
مرة ثانية ..
غمضت عيني و كوة اخذتني النومة تعبت
من التفكير يلا نمت ...
.....
جوري /
نمت شووي و كعدت على صوت اذان الفجر
كمت من مكاني و دخلت للحمام غسلت وجهي
وتوضيت طلعت فرشت سجادتي و توجهت
لله سبحانه وتعالى..
ظليت اصلي بس دموعي تسبقني
اصلي و ابجي و اردد الايات من خلصت
ظليت كاعدة على السجادة و صافنة
ورافعة ايدي ماعرف شحجي بس بقيت
على هاي حالتي كلت الله يعرف شنو الي بداخلي
و هو يفهمني حتى لو ساكتة الي خلقني يعرفني ..
اخر شي حجيت بصوت مهزوز :
ربي ساعدني و دليني الطريق الصح ..
مسحت دموعي و لميت السجادة
و توجهت لشباك حسيت نفسي محتاجة
اشم هوى نقي فتحت الشباك ..
ولفحني الهوى و صوت زقزقت العصافير
غمضت عيني و اخذ شهيق و احس
الهوى دخل لريتي اريد اجمع طاقة
لان احس طاقتي هلكت بعد خاصه راسي
اريده يرتاح من التفكير طول هاي
الخمس سنين مارتاح دومه يفكر ...
ظليت اباوع على السما شلون صافية
وبعده الشمس ما طالعة اباوع على الاشجار
شلون تتحرك بسبب الهوى لو على البستان ..
باوعت بأتجاه بيت عمي ابو غسان
وحجيت بيني و بين نفسي هسه
شهاب هنا موجود يعني مايفصل بيناتنه بس
حايط واحد و هسه يفكر مثلي لو لا ..
ولج جوري اصحي شنو يفكر هو الي عافج
بنص الطريق تردينه يفكر بيج اصلا و لا مهتم بيج
و مايريدج عافج و راح تزوج بس الي سمعته من
شاهر انو زوجتة اتوفت اثناء الولادة ..
يعني ماطولت وياه او هو شبع من شوفته
هه مادري شكول و شحجي بعد ..
استغفرت ربي اني شكو بهذا الحجي
رحت كعدت بلكاع و ظليت صافنة على الشباك
و شوي شوي بدت تطلع الشمس و العصافير كله طلعت
وصوت الديج الي يكعد بلناس حتى يطلعون و
يشوفون شغلهم ..
الجوو صار يخبل بس تكعدين و تباوعين
مابدج تعوفين هذا المنظر صار خيط من الشمس
صارت الدنيا عبارة ظلام بنور لان
هستوه طلعت الشمس بس تباوعين
و تكولين سبحانك ربي على هذا الخلق
رسام و ابدع بلرسمه ظليت صافنة عليه ..
صارت ب٦ الصبح كمت من مكاني سديت الشباك
و رحت غسلت وجهي و بدلت ..
نزلت جوه كلهم بعدهم نايمين بس شفت
جدوو و حبوبتي كاعدين دومهم يكعدون من وكت
سلمت عليهم و صبحت ..
كتلهم :متريكين
حبوبتي : لا والله ياحبوبة هسه كعدنه
واريد اسوي عود لهذا الشايب جاي ..
باوعله جدي و كال : ولج يلعجوز شنو شايب
بعدني اني بشبابي انتي الي صرتي عجوز
وسنونج طاحت حتى افكر يمكن اعرس عليج..
كالت حبوبتي بقووة : اذا تكدر فنك حتى
بهاي العصا على راسها اكسره والله ..
: هو انتي بيج حيل و تضربين
روحي بوية سووي ريوك الي و لهاي العجوز
وتعاي تريكي يمنه بس بوية خاف بعدج
زعلانه عليه ترى مااتحمل زعلج.ضحكت على مناكرهم شكد احبهم من هيج
يتعاركون كتله بأبتسامة : هو اني اكدر ازعل عليك
شعندي غيرك هسه اروح اسوي ريوك و اجي ..
سويت ريوك النه و رحت كعدت يمهم
وظلينه ناكل و جدي يتحارش
بحبوتي و هاي تضووج و تتعارك وياه ..
كامو الولد يكعدون و ابوي كعد
وراحت فاتن تسوي ريوك و كله ملتمةة
الوقت جان بيه برودة بداية شتا ..
فا اجه بنفسي اطلع للبستان واكعد هناك
ارتاح بس اتذكرت شهاب موجود و اخاف اشوفه..
نظفنه البيت و ظلينه نسوي الغده
خلصنه و كله اجت كعدت بس ابوي احسه ضايج
والله حتى الولد كلهم ضايجين من البارحة ..
صار الغدة و فرشنة السفرة و كعدنه كلنه
اكلنه و خلصنه لميت الاكل وراحت فاتن تسوي
جاي و رحت غسلت المواعين ..
صار العصر و اني بغرفتي اقره لان هاملة دراستي
هاي اليومين فا كلت خل اعوض هسه و اقره ..
كاعد اقره و ماحس غير بلباب انفتح بوقه
حتى انركع بلحايط فزيت من مكاني و اني خايفة
اباوع و جان الكه ميامين بنت خالي موجوده
وتباوعلي بصدمة ..
كتله : ميامين شبيج اكوو واحد عاقل
يفتح الباب هيج ..
هيا اتقدمت عليه و مصدومة اني خفت
كلت بس لا صاير شي كتله :
ميامين شكوو شبيه وجهج هيج مخطوف
احجي صاير بيج شي ..
شو ماحس غير جرتني لحضنه و كالت :
يعمري انتي لا تنقهرين ادري ضايجة
لان شهاب رجع بس عوفيه خل يولي
من سمعت تخبلت كلت هسه هيا تعبانه و تبجين..
شو هاي دفعتني وباوعت من فوك ليجوة وكالت :
بس والله شو جنج كلشي مابيج مثل
الورد عفية عليج هيج اريدج قوية..
صدك ضحكت عليه خرب يومه
اجت من سمعت بشهاب راجع و هيج تسوي
:ولج وعلي شكلج يضحك و انتي طابه عليه
مداهمة حسبالي صاير شي و طلعت هاي سالفتج..
: ايي شبيج تضحكين
سكتت و ابتسمت اله : لا تخافين كلشي مابيه
وعادي هو تاليته يرجع اليوم لو باجر لو بعد سنة
تاليته راجع لهله لعد يبقى بلغربة..
باوعتلي بشك : هااا يعني كلشي ماكو
ابتسمت :اطمني كلشي ماكو ..
جرت نفس و كعدت على الجرباية:
عفية عليج سباعية طالعه على بنت خالج
يولي الحب و اهله بس شلعان كلب ..
باوعتله بطرف حاجبي :
امم وانتي هسه اصدك ما تحبين علينه
ميامين ..
ابتسمت و كالت :
اني وجهه حب الله وكيلج نت و اكل ونوم
هذا الحب بس الحب الي تقصديه ووع
خليته لهله ..
ابتسمت الها و كلت : احاول اصدكج ..
كالت ؛ صدك ولج
: هاا شبيج
:تدرين زياد اخوي من عرف خطيه
ظل كاعد على نار و يفكر بيج و يكول هسه
حاله محد يعرفه بس الله و كلبه عليج
يكول هسه حابسة نفسه بلغرفه اعرفة كلش زين
و هو كالي ترحين و تشوفينه طمنيني عنه
وراد يسمع صوتج ..
ابتسمت الها ابد معافني زياد وياي وياي
و هو خلاني اتقوه رغم رفضي اله
وماقبلت بيه و اهلي رفضوو بس عادي
خالي و عائلته اتقبلو الموضوع و كالو
كلشي قسمة ونصيب مابيها شي و بقينه سوه
هما يجونه و احنه نروحلهم ...
ابد ماشفت مثل طيبة كلبه و حنيته
ومرات افكر و اتندم اكول اني شحبيت بشهاب
وماحبيته بزياد شو زياد حلو وشخصيتة بعد احلى
البنات بالجامعة كاتلات نفسهن عليه و هو مامعبرهن..
كلت لو قابلة بيه جان ما صار هذا حالي
بس كلبي غبي و صاحبه اغبى منه
ماحب غير خناكة ...
فززتني ميامين من صفنتي :
شبيج ولج مو احجي وياج
: شكوو شبيج
: ولج اكلج زياد يريد يحاجيج هاج اخذي..
اخذته من يمها و اجاني صوته كال
بصوت امبين عليه القلق :
الووو جوري شلونج اخبارج
: هلا زياد الحمدلله تمام و أنت
: أني بخير اذا انتي تبقين بخير
سكتت ماحجيت شي رجع حاجاني
بصوت كله حنية لامس كلبي:
جوري معليج حتى لو رجع شهاب
صيري كده وقوية اني وياج و ماعوفج صدكي
اذا يأذيج اني اصير بوجهه بس اهم شي دمعة
ما تنزل من عيونج ماعرف بشنو فكر من خله
هاي الدموع تنزل لو يكسر كلبج ..
حجه بقهر : اخخ اني لو مكانة
سكت ماكمل كلامه كال : الله وياج جوري
انتبهي على نفسج ..
سد الخط و اني دمعة نزلت من عيني بس
مو علمود شهاب لا والله علمود زياد
وكع بحب وحده ماحبته غبية مافكرت
حبت شخص ما اهتم الها و لا دار بال ..
مرت الايام و الاسابيع و اني من الجامعة للبيت
ومن البيت للجامعة حتى للبستان ماروح
حتى ماشوفه لان ماعرف ليش يجيني شعور
انو يكون هناك متواجد و جمارة صار فترة
ماتجيني اشوفه بالجامعة ..
وفاتن راحت مره وحده لأهله و شافت شهاب
بس كالت سلام عادي جنه يعرف انو مراح تتقبله..
مره كاعدين كلنه بالصالة و يشربون جاي
و ما نسمع غير جدي كال بأمر : باجر تسون عزيمة
و اريد شهااب يجي هنا اريد اشوفة..
صدمة للكل و خاصة اني ...
يتبع
