البارت 12
ماحس غير ايدي انسحبت و رجعتني وره
من الخوف شهكت ايده صارت على شفايفي
تمنعني من الحجي ..
دفعني للحايط باوعت لكيته شهاب
يباوع بعيوني وايده بعده على حلكي .
وخر ايده وظل يباوعلي بنظرات غريبة
كلت بصدمة :
شهااب
كال و عينه ما شاله عني: اشش صوتج
باوعت لكيته مركز عيونه عليه اريد ابتعد عنه
لان كرهت قربه الي تذكرت كلشي صار ..
حسيت كلبي يدك بسرعه و خفت لا
يجي احد يشوفنه هيج و يفكر بشي ..
خليت ايدي على صدره اريد ابعده عني
دفعته و جان اسمع اصوات زلم غريبة ..
رجع لزمني من كتوفي و دفعني على الحايط
ثبتني بأثنين ايديه و اني ظليت اضرب بيه
باوعت عليه بحقد : وخر ايدك خل امشي ..
رجع باوع عليهم كال : مشوو
باوعلي و ابتسم وبقه مثبت ايديه عليه:
شبيج هيج مرتبكة و خايفة لو هيج
لمستي تأثر بيج بعدج ..
تخبلت من هيج حجه شنو قصده و هيج يحجي
ما حسيت على نفسي غير دفعته بقووة..
و هو رجع ليورة باوعلي متفاجئ من حركتي
تذكرت شسوه بيه ماحس غير رفعت ايدي
وضربته على خده بقووه حتى ايدي وجعتني
من الضربة ..
رفعت اصبعي بتهديد :
دير بالك تفكر تلمسني مره ثانية فهمت لو لا
ما اسمحلك تجاوز و تحجي وياي هيج حجي ..
حجيت بغضب حقد عمه على كلبي :
كتلك جوري القديمة ماتت ترى زمان جان
عندي كلب و حبيتك بس هسه ما احمل الك
غير الكره و البغض ..
:اذا تشوفني ميته اكبالك لا تفكر تلمس ايدي
ولك والله اكطع هاي ايدك مو شفت اهلي رجعو
دخلوك هنا لبيتنه حسبالك يرجع كلشي طبيعي
لا تفكر بهيج فهمت احنه دخلناك هنا كله علمود
جدي لا يزعل او ياخذ بخاطره ..
ظليت اتنفس سريع و كلبي يدك بسرعه
ايدي ظلت ترجف من العصبية اول مره بحياتي
اضرب شخص ولد و منو شهاب ابني عمي
بس عصبني كلامه و اتنرفزت من لمسته
اكره ما اطيق يصير قريب مني ..
باوعلي و ابتسم و هو خال ايده على خده
الي ضربته كال و هو مبتسم :
عادي هذا شي قليل من الي سويته بحقج
لو تردين تخلين طلقة بكلبي عادي
لأن الي سويته مراح ينغفر الي و خاصه
اني تركتج بيوم حرج ما يصير اتركج بيه ..
ما تحملت يحجي بلي صار يحجي و هو مبتسم
كتله و اني مقهوره منه ماريد ابجي كدامه
و اضعف كل ما احاول ابين لنفسي اني قوية
بس الكه العكس ماكو اضعف من يمي ..
كتله و كلبي مكسور من يمه:
من تعرف كل الي سويته غلط فهمني
ليش هيج سويت ليش عفتني بهذا اليوم
عادي عوفني اتركني بس مو بهذا اليوم
الي كله حاضره حتى الي يكرهون
انت تعرف شسوو ظلو يحجون عليه ..
كتله بخنكة : تدري شكالو كالو هذا اله شاف
ابنت عمه شي و عافه ما راد يكمل وياها
سمعت أشكال و الوان كلامهن جان مثل
السم و يدخل لجسمي ..
باوعت عليه و صارت عيوني كبال عيونه
باوعت عليهن و انصدمت ..
يتهيألي لو لا عيونه مغوركة مثل الي يريد
يبجي هذا شهاب الي كبالي معقولة ..
كال بصوت بيه ندم واضح :
كلشي تحجين اعرفه و حقج جوري
بس انتي ما تعرفين الي صار ..
كتله بصيااح اتخبلت :
هوو شنو الي صااار فهمني كلي شنو صار
ولك كسرت كلبي أنت بيومه خاف ماتعرف
خذلتني و تكلي ما تعرفين شنو الي صار
فهمني هسه انت و كلي شنو الي صاار ..
باوعلي و كال بهمس : يجي يوم و تعرفين
يلا روحي لا يجي احد غريب و يشوفج ..
ابتسمت بأستهزاء اله:
ايي روح اهرب مثل ماسويت قبل
ما تحب تحجي لان ماكو سبب او مبرر لغيابك
بس اريد اكول عساك تشووف نص الي شفته
اريد الله يبليك مثل مابليتني و يحرك كلبك
مثل ما حركت كلبي ..
كال بخنكة : موو كافي جووري
كتله بحقد : لا مو كافي ..
دار وجهه و عافني و مشه و ظليت واكفة بمكاني
و اني هم درت وجهي و رجعت لحديقتنه
و مارحت لزينب لان حالتي ما تسمح ..
رحت بسرعه طبيت للبيت و صعدت فوك
لغرفتي سديت الباب و رحت كعدت بلكاع
يم الجرباية ..
دمعة نزلت من عيني و مسحته بسرعة
ماريد ابجي علموده اريد احرك كلبه
مو هو مرتاح و اني كاعده بنص الهم ..
اريد اخذ حقي من بين أيديه اريد
يجي و يكلي اعتذر عن كلشي سويته الج ..
كامت افكار تجي براسي و ابعده
ماعرف شو صار ..
شنو مبررك يا شهاب شنو الي صار
و رحت عفتني و مشيت ..
اني شنو ذنبي ابتليت بحبه و تالي
كسرني و شمرني حتى ما كال هاي بنت عمي
و تالي يرجع و يكلي مو كافي ..
لا والله مو كافي و لا راح اسكت
على الي سويته بيه ..
مر اسبوع كامل و بعد ماشفت شهاب
و لا هو شافني حتى بلجامعة اروح اني
يلا يجي ياخذ جمارة لان من اسئله
تكلي يجيني شهاب ياخذني ...
اجيت من الدوام تعبانه رحت صعدت
فوك لغرفتي اندك الباب و كلت
: تعال منو
انفتح الباب و شفت رسيل و اكفة يم الباب
كالت : عادي ادخل
ابتسمت اله : تعاي حبيبتي دخلي
اجت وكعدت يمي على الجرباية و كالت:بيت عمي ابو غسان مسوين عشه اليوم
على حسابي و عازمينه و كال خل تجي جوري
بس امج كالت ماتروح صدك مراح ترحين !؟
ليش يا عمي تريدني اجيكم و انت تعرف بيه
ما اوصل من جان شهاب ما موجود
و هسه يمكم و تريدني اروح يعني الا تحرجني..
كتله : ايي ماكدر اروح
: ليش!؟
: شوي تعبانه و مابيه حيل اروحن
ماحبيت اكللها على الصار و لا اريد اسولف
بهذا الموضوع احسن شي لا تعرف ..
وره الظهر اني فوك اقره اندك عليه الباب
و دخل ليث : ها ليث رايد شي
باوعلي و كال : عمي ابو غسان جوه
و يريد يشوفج ..
كمت و كتله بأستغراب : ليش على شنو جاي
:مااعرف ..
لكيت شكله متغير و هادئ : ليث انت شبيك
هاي الايام صاير ابد ما تعجبني بيك شي ..
: بعدين احجيلج هسه ماكدر ..
هزيت راسي : ماشي .. راح البس حجابي
و اجي انزل عليه ..
عافني و راح و اني اخذت شالي و نزلت جوه
لكيت ابوي و جدي و بيبي و عمي كاعدين
حتى الولد و رسيل و فاتن ..
رحت سلمت على عمي و كعدني بصفه كال :
شلونج يا بعد عمج زينه ان شاءالله
: الحمدلله بخير عمو ..
:عساج دووم يا بوية بخير
: طال عمرك عمو ..
سكتت بعدين حجه هو :
اي بوية جوري اليوم اني اجيت بنفسي
واعزمج اريدج تجينه اليوم و تنورين بيت
عمج ..
باوعتله مصدومة من طلبه كتله:
مشكور عمو و لا يحرمني منك بس اسفة
ماكدر اجي و أنت تعرف ليش ..
: بوية اذا على شهاب حقج بس اخليه مايشوفج
و لا تشوفيه بس كافي عاد ارجعي دخلي على بيتنه
اني شكو و تحرميني من شوفتج اذا اريد
اشوفج اجيج اني ..
: اسفه عمو بس والله ماكدر
هز راسه و كال : ماشي يا بنيتي عود كلت
اروح لبت اخوي و ماتكسر بخاطري و تعنيت الج
بس اثاري مالي خاطر عندج ..
شكد انحرجت من عمي و من كلامه و فعلا
كل مايريد يشوفني يجي عليه ..
كتله بتردد : اا عمو خاطرك جبير و انت
بمقام أبوي ان شاءالله اجي اليوم ..
ابتسم و كال بفرحة : اصيلة يبنيتي ماكسرتي
بخاطر عمج ..
جر راسي و باسني و كام كال : يلا من رخصتكم
رايح اني و ان شاءالله بليل نتشاوف ..
كامو الولد وي عمي و وصلوه للباب اجه شاهر
حجه : ليش ترحين انتي شبيج جوري
شو صايره مدري شلون تفكرين ..
كمت و كتله : هو شنو الي صايره شلون تفكرين
انت ما شفت عمي شلون يحجي يعني اكله
لا والله اعذرني ماروح ترى عيب عمي يجي
و اكله اسفه ماكدر اجي وياك و الله اتعنه عليه
ترى هو مو اصغر من يمي و اقلل من شأنه
و اقلل من احترامه شاهر انت هم خلي نفسك
بمكاني ..
كعد على القنفة و كال بعصبية :
استغفر الله استغفرالله شلون يعني
احنه مانخلص من سالفة شهاب هذاا ..
سكتت ماحجيت شي باوعت على رسيل
تباوعلنه و هيا مستغربة كلشي ماتعرف ..
ليث كام من مكانه و كال : شاهر اهدئ
ترى كلام جوري صحيح مايصير تكله
لا ماروح ترى عيب ...
شاهر : اسكت انت الثاني مدري شجاك..
عافنه ليث و مشه كال غيث بملل:
والله لعبت نفسي من مشاكلكم يوميه
مطلعين سالفة بخصوص هذا الموضوع
ترى والله منطين شهاب اكبر من حجمه..
باوعله جدي بطرف عينه و كال :
الله يرحم أيام زمان جان صكارك شهاب
حتى جنت تخاف توكف يمه ..
باوعت على شاهر شفت بطرف شفايفه
ابتسامه ورفع حاجبه بس رجع محه هاي
الابتسامة...
غيث باوع عليه و على رسيل :
عيب جدي شهل حجي شلون تحجي
هيج كدام ذني غير يلكفنه و انت كلت
جنت يعني بلماضي القديم من جنت طفل ..
كمل كلامه : ليش هيج جدي تكسر بختي يمكن
اتقدم لرسيل و اخطبه و من تسمع هيج تبطل..
باوعتله رسيل و كالت :
شجاني و اقبل بيك اصلا قبل
لا اعرف بسوالفك ذني اني ماريدك ..
باوع عليها بطرف عينه وكال :
ديري بالج على اساس اني كاتل نفسي عليج
خايبة من ترحيلي حلاوة اصلاً لو مو اني
محد يكلبج احمدي ربج وباوعت على جهرتج..
فتحت عينه مصدومه من كلامه كالتله:
دير بالك هو انت شايف نفسك بلمراية
باوع بغرور و كال : اي والله شفت نفسي
و اكول اللهم صل على محمد وآل محمد على
هذا الجمال الشايله اكول ربي ليش هيج
منطيني هذا الجمال كله اخذ شوي من جمالي
و انطي لرسيل هيا بنية و ماتمشي تظل
كاعدة على كلبي و ماتعرس ..
ضحكت على سوالفهم رسيل من دخلت
لبيتنه انطت جو النه و اخذت ميانه بسرعه
وي غيث مثل سوالفه هذا و اخذت ميانه وياي
شوي شوي بدت تتعود علينه و تاخذ ميانه
حبيناها كلنه ..
كال شاهر لغيث :
ولك عيب هيج تحجي وياها..
باوعت رسيل و ابتسمت اله:
لا عادي اصلاً ما اهتم لكلامه..
باوعله شاهر ابتسم الها ورجع باوع بموبايله
اشوفها مرات تباوعله لو تصفن عليه
خرب اذا تطلع تحبه بس ليش لا اخوي الي
يشوفه بسرعه يحبه فدوه لكلبه بس انقهر عليها
احسه مو مال هيج سوالف شاهر ..
صار العصر و صعدت فوك لبست قميصلون ماروني وحزام بلوسط وتنوره لون اسود
لبست شال وياه و نزلت جوه
انتظرنه رسيل تنزل حتى نروح نزلت وباوعت
عليه لابسه فستان لون سمائي وحزام بيه
ابيض ..
طلعنه كلنه و وصلنه للبيت دخلنه جوه
لكيت البنات موجودات و حتى زينب موجوده
شفت زهراء هيا باوعتلي من فوك ليجوه و ماعاجبه
سلمت على رسيل و امي و فاتن و اتجاهلتني..
شفت زينب سلمت عليه بهدوء اباوع على شكله
شاحب مابيه كل معنى كعدنه بلصالة
وكعدت ام غسان يمنه بس تباوع على أمي
ومرة عمي ام فارس و ماعاجبه الوضع
وهنه اصلا معليهن بيها يسولفن وحدهن
صار عيني على ابن شهاب علي ...
لابس دشداشه بيضه ويفتر يلعب
وي بنت غسان سما هيا اكبر منه بسنة ونص
تقريبا ..
ابتسمت اله شكله حلوو ولايكه عليه الدشداشه
بس اختفت ابتسامتي و اني اتذكر هذا ابن منو..
صارت عيني على زينب مدنكة راسه
وصافنه هاي البنية ما عاجبني وضعه ..
رحت يمها و هيا انتبهت عليه كالت :
هلا جوري
باوعتله : شبيج ولج ليش هيج صاير شكلج
بيج شي ..
سكتت شوي و بعدين حجت : لا مابيه شي
لزمت ايدها و كتله : تعاي وياي خل نحجي
بره احسن ..
اخذتها من ايدها و طلعنه بره بلحديقة
كتله : يلا احجي بسرعة شبيج
اني حجيت هيج و هاي طكته بجي
ظلت تبجي و ما حس غير حضنتني
وتبجي وتشهك مصدومة من ردة فعله
خليت ايدي على ظهره كتله :
اهدي زينب شبيج ولج ليش هيج تبجين
كالت بصوت مخنوك : تعباانة جوري
تعبانة ماكدر ..
بعدته من حضني و كتله :احجي ولج
شكو شبيج منو وياج..
دنكت راسه و تشهك :
راح احجيلج بس مو تكولين فدووة
اني احب اخوج ليث..
اني صراحة مانصدمت لان اعرف
شكله جان مفضوح من تشوفه ..
بجت : بس اخوج يكرهني مايريدني
حتى يكلي اكرهج لان اهلي فرضوج عليه..
كتله بذهول : شنوو شهل كلام
ليث الي حجه هيج وياج !؟
هزت راسه و بدت تحجيلي كلشي
وشلون ظل يصيح عليه و تبجي
انقهرت كلش عليه و ليث ماقبلت على تصرفه
ااخ شبيكم انتم ولدنه ماعدكم غير كسر
الكلوب ...
كالت : ليش هيج يسوي وياي
اني شنو ذنبي هو ليش مايحبني
والله حبيته من طفولتي و متت عليه
بس هو طلع كارهني ..
مسحت دموعه و كتله : معليج حبي كافي
كتله بقهر : الي مايريدج لا ترديه
قوي كلبج وانسيه حتى لو اخوي بس
ما معناته هيج يتصرف وياج..
ظليت اسكت بيها لحد ما هدئت..
صار الليل و اذن صلينه و خلصنة صلاة
بدو يصبون العشه لزلم ساعدنه بلنكل
بس شهاب ابد ماشفته يمكن كايليله
اباوع على ليث شكله هادئ و من شاف زينب
ظل يباوعله بندم و هيا شافته و طلعت
من المطبخ ..
اخخ بعديش تتندمون بعد ماتكسرون الكلب
تجرحون بينه و تكسرونه و بعدين تتندمون
استغفر الله ..
صبينه عشه النسوان و خلصنه
راحت زهراء تسوي جاي واني رحت اغسل ..
مريت و جان اسمع زهراء تحجي وي
شهاب تكله : مادري ماشفته ..
حجه : روحي شوفي خاف يم امي ..
استغربت عليش يدورون هو انتبه عليه
باوعلي اني درت وجهي و رجعت ..
سمعت زهراء تكل لام غسان :
خالة يكول شهاب علي يمها
: لا يمه مو يمي من زمان راح على الزلم..
سمعنه صوت شهاب صاح: يالله
لبسنه شالاتنه و هو دخل باوع على امه وكال:
يمه علاوي مو يمي غير اجه عليج..
: اي يمه وبجه عليك و كال راح اروح لأبوي
و بعد مانتبهت من الهوسة ..
حجه بصيااح و عصبية و نسه النسوان كله
الموجودة اول مره اشوف هيج عصبي
جان طبعه هادئ مثل ليث حتى نكل لليث
انته تشبه شهاب بس هسه طول الوقت
عصبي و يصيح ملاحظته و نظراته كله غموض..
كال بصيااح : شلووون يعني مو يمج
يمه اكلج ماشفته من العصر يعني وين راح
ألولد ليش هيج يمه و اني امنته يمج
كال بخووف : راح اتخبل وين مشه ..
صعد فوك بسرعه يدور عليه و كله كامت
خايفة ادور حتى ام شهاب ظلت تبجي و تكول
اني مانتبهت عليه ..
حتى اني طلعت ادور عليه خطية انقهرت
على الجاهل و خفت عليه ..
ولدنه كلهم طلعو يدورون حتى اخواني ..
طلعو وره البيوت يدورون ما لكوه
حتى دورو ببيوتنه بس مالكو اثر اله
مثل فصح ملح و ذاب ..
اباوع على شهاب ظل يلوب يروح و يرجع
وجهه احمر و مخطوف من الخووف
كال : دخيلك ربي لا تخوفني و تكسر
كلبي بأبني
سمعته يحجي لان قريبة عليه باوع عليه
ورجع حجه : ربي ادري غلطت بس كلشي
و لا علي امانتك ربي ..
شفته شلون مقهور و عيونه مدمعة
طلعنه ندور رحت اني على جهة البستان
و دنيا ليل بس موبايلي مشغله لايت بيه
ظليت اتلفت و ادور ..
وصلت يم الساكية و جان اسمع صوت بجي
خفت اول شي بس قويت نفسي كلت يمكن هو ..
كل مااقترب كل ما يزيد صوت البجي
وصلت و خليت اللايت كبالي ..
هو شاف اللايت و خاف ظل يبجي
ويصيح : بابا تعال ..
انقهرت عليه خطيه كاعد بلكاع و يبجيدنكت وكعدت يمه كتله :
لا تخاف حبييي هسه اوديك لبابا
باوع عليه و مثل الي تذكرني و كال :
طلعيني منا اريد اروح ..
كتله : ليش اجيت هنا
: جنت العب و وصلت هنا و ماندل
وظليت هنا و كام يبجي
انقهرت عليه خطيه متيه و خايف
همزين ماصار شي بلولد لزمته من ايده
اريد اكومه هو صاح : اااخ رجلي و يبجي
: شبيها رجلك
: تعورت ماكدر اكوم ..
اخذته وشلته بحضني وظليت امشي
واسمي بأسم الله لان تخوف صارت و ظلمة ..
وصلت يم بيتهم و شفت شهاب يدور
مثل المخبل هو شاف أبو و صاح :
بابااا
التفت علينه و باوع كال بفرح : علي
اجه يركض بأتجاهنه ظليت اباوع عليه
وعلى فرحتة اخذه من بين ايديه و ظل
يحضن بيه و يبوس بوجهه ..
كال بخوف : وين جنت بابا ولك
موتتني عليك ..
باوع عليه و كال بخوف : جوري وين لكيتيه
شصاير وياه ..
كتله بهدوء : لكيته بلبستان و رجله متعوره بس
جان خايف ..
باوع عليه وظل يباوع على رجله رجع حضنه
كال بخوف : ولك امانه انته شيصير بيه
اذا يصيرلك شي يروحي ..
اجت زهراء شافت علي و اخذته من
شهاب و دزته الهم بس ما فاتته رجعت علينه
باوع عليه و كال : ماعرف شلون اشكرج جوري
كتله و اني ما اباوع بوجهه : مايحتاج تشكرني
ماسويت شي اني ..
عافني هو و مشه اجت بأتجاهي زهراء :
لا تفرحين هوااي فهمتي ترى هاي حركاتج
مو حسبالج يرجعلج شهااب ..
كتله بأستهزاء : حبي اخذيه الج بلعافية عليج
لايكين لبعضكم ..
درت وجهي و عفته بس وقفني كلامه
بعدني منطيته ظهري و كالت :
وهو صدك الي لأن مابقه شي و راح يكون
شهااب الي و نتزوج يمكن ماتعرفين
حبيت اكلج اول وحدة و بعدين راح
ينتشر الخبر بين الكل و تسمعين صوت الهلاهل ..
باوعت عليه و كالت بخبث :
راح يتزوجني و يخطبني الي
يكمل حياته وياي الي ماكمله وياج
وراح تشوفين بنفسج ..
عفته و درت وجهي معقولة تتزوجه
ظليت افكر ماريد اضعف و لا ابين كدامهن
ماريد يشمتن بيه ..
........
فاتن/
اجيت من بيتنه تعبانه صعدت لغرفتنة
هستوني فتحت الباب ..
شفت محمد داير وجهه و يخابر
ما يدري بلواكفة وراه اسمع شيحجي
و كلبي مكسور من يمه
اروحلج فدووه انتي الله لا يحرمني منج ..
ضحك بصوت عالي و كال :
خايبة أموت عليج شعندي غيرج
ظليت ابجي و اني اسمع كلامه
معقولة محمد يخوني ليش يربي
شسويت اني و هيج يصير بيه
دار وجهه و شافني ظل يباوعلي
مثل المتفاجئ ..
كال بصدمة : فاتن
مصدومة ظليت اباوعله معقولة هذا محمد
الي جان بس يريد يراضيني و يكلي انتي حبي
و اني احبج طلع كله مجرد كلام ..
اتقدم بأتجاهي و كال : يمته اجيتي فاتن!؟
كتله بخنكة : يمته اجيت هذا الي هامك موو
يمته اجيت لان خربت اتصالك وي حبيبة كلبك ..
صيحت بووجهه : هذا الي هامك يمته اجيت
وما همك اني سمعت الكلام لو لا ولك فهمني
ليش هيج سويت بيه اني شسويتلك و تخوني
و تحجي وي وحده غيري ..
ظليت ابجي بس هو حجه بغضب و صياح :
شمسوويه!؟ الج عين و تسئلين شمسوية
ولج كولي شنو الي ماسويتي ولج كرامتي
طاحت من وراج انذليت ذل علمودج
اترجى بيج صارلي ٤ سنين اكلج سامحيني
عرفت غلطي بس كافي لا تصديني عنج اني احبج
بس انتي شنو تظلين بس تبجين و تكول كسرتني
ما اسامحك ..
اقترب من يمي و كال بغضب:
ولج كتلج عاقبيني ازعلي عليه
عفتج ٩ اشهر ازعلي عليه هيج مدة
بس انتي طولتيها و شفتيني لأن اترجى بيج
و احبج انغريتي عليه و كلتي هذا يرجعلي و ماله
غيري ..
: تعبت بحبج اني هوواي بس مايفيد وياج
الى هنا و كافي مليت اني و خلص صبري منج..
ظليت اشهك و مصدومة من كلامه
ظل يعاتب بيه بدال ما اني اعاتبه هو يعاتبني
حسيت بلندم بس شيفيد من خسرته
كتله بشهكة : مليت مني ..
كال بصيااح : اييي مليت منج لعبت نفسي
من هاي العيشة ٤ سنين و اني صابر عليج
حارمتني من كلشي ولج حتى ابتسامة ما تبتسمين
بوجهي ولج والله حتى حرام حبي الج ..
كعدت بلكاع ظليت ابجي و اشهك :
ليش هيج محمد مليت مني ولك مو حقي ازعل منك
ولك انت موتتني جنت احبك من طفولتي
وتالي هيج تسوي وياي و تالي اسمعك تتغزل بوحده
ثانية و تكللها احبج و اني جنت ميتة و اسمع
هاي الكلمة منك ..
كعد بلكاع كبالي و لزم ايدي و باسه كال
بحنية:احبج ..
باوعت عليه صفنت بين دموعي كتله :
هااا شتكول ..
ابتسم و كال : ولج و القرآن احبج و اموت عليج
شعندي غيرج صابر عليج لموتي و ما اباوع على
غيرج ..
كتله بصدمة و ابجي : شتكول أنت لعد هاي منو
الي جنت تحجي وياها لا تجذب عليه محمد ..
ابتسم و كال : هاي كله سوالف غيث
من شاف حالتي كلش و مقهور من وراج
كال يا اخي مليت منكم انتم و انطاني خطة
حتى ترجعيلي كال خليها تغار عليك و
خل تسمعك تحاجي وحده ثانية هسه نلكاكمشمور من السطح و صدك طلع اخوي مو هين..
مصدومة يعني كله طلع لعب و من غيث
اني رجعت ابجي اتخبلت : ليش هيج محمد
كلبي طيحته من وراك اني اعلمه غيث ..
مسح دموعي بحنية ابتسم و اجه باس خدي
كال : والله باجر اشوفه الا ابوسه من وراه
تصالحنه اني وياج ..
وخرت من يمه : منو كال وخر من يمي
ترى مانسيت كلامك هسه واني ماحبك وتكلي
مليت مني ..
قاطعني:اسكتي فدوه لا تكليلي مات حبك
لان مثل ماشفت هسه حبي بعده على قيد الحياة
ولج لعبتي لعب بلعياط و ردتي تموتين و تكليلي ماحبك ..
حجه بجدية: صدك مليت بس مو منج
من الحياة الي نعيشة العمر يتقدم و احنه بعدنه
هيج كافي كتلج سامحيني و هاي اخر فرصة
فاتن لأن صدك ذليت نفسي هواي اربع سنين
اطلب السماح منج مو كافي عااد ..
ظل يباوعلي و اني اباوعله صدك كافي
طولته اني وياه و انطيته درس اني
اربع سنين حارمته مني كافي عاد ..
ابتسمت اله و كتله: ماشي مسامحتك
بس والله يا محمد اذا سويت مره ثانية
هيج شي او غلطت بحقي تشوفني لامة غراضي
و رايحة لهلي و ماكو رجعه هنا ..
ابتسم و اخذ ايدي : ابد والله توبة اصلا
حتى غلط ماغلط على السويتي بيه ..
حضني و كال بحب : ولج احبج اموت عليج
والقرآن..
بادلته الحضن و كتله : اني هم احبك ..
.........
رسيل/
اجيت من عزيمة بيت عمي ابو غسان
كله صعدت فوك لغرفه اباوع على جوري
مو على بعضه بس صافنة و صلنه للبيت
و راحت فوك لغرفته وسدت عليه الباب ..
مستغربة تصرفاته و اكو سر ماعرفه
شنو الي بينها و بين شهاب و العائلة
كلها تحجي بيه ..
طفو الاضوية و كله دخلت لغرفه
و الولد لو بغرفهم لو طالعين الساعه ب١٢ بليل
و اني وحدي بلغرفة كاعدة و ضايجة
راسلت نرجس شوي و سديته ..
ضجت كلش حنيت لايامي يم بيت جدي
هيج وكت سهرانين اني و نرجس و نظل نباوع
على مسلسل لو فلم هسه وحدي كاعدة ..
عجبني انزل جوه اكعد بلحديقة و الجو حلو
اخذت شالي خاف احد يلكاني من الولد
اخذ احتياطي ..
نزلت جوه و فتحت الباب بهدوء و رحت للحديقة
كعدت على الكرسي و ظليت اشتم هوى
الجوو خيال يجنن وخرت الشال و خليته على اكتافي
سمحت للهوى يلعب بشعري شعور حلو ..
غمضت عيني و ظليت افكر مدري ليش
اجه ابالي شاهر شخصيتة كلش حلوه
و هادئ و رزن بلكلام و احسه يحب اخته
كلش يخاف عليه ..
احس شخصية شاهر خيالية ما شايفته ابد
بلواقع احس محد يجي مثله بعد ..
فزيت من صفنتي و اني اسمع صوته وراي
لو جايبه طاري مليون هم ما تجي ..
درت وجهي عليه لكيته واكف وراي يباوعلي
بعده بملابس الطلعه و بيده الموبايل و السويج
يمكن هستوه اجه لأن طلع من بيت عمي ابو غسان
و راح ..
كال بهدوء : شعندج طالعة بهيج وقت ..
كتله : اا مو جنت ضايجة و مجاني نوم
فا حبيت انزل اشتم هوى ..
كاال :اها و بغرفتج شنو ماكو هوى ..
انحرجت منه و كتله : مو هيج قصدي
ااا
ابتسم هو و كال : شبيج بوية كمت اتأتين
أشاقة جنت وياج بس ليش ضايجة!؟
دنكت راسي و كتله : هيج ضاجية لان وحدي كاعدة
اني ما متعودة جنت هناك بلكوت يم بيت خالي
اني و بنت خالي نسهر لو نسولف هسه اني وحدي ..
جر الكرسي و كعد كبالي كال : رسيل ..
رفعت راسي و صارت عيني كبال عينه
هو بعد عينه عني و كال : وحدج !؟
ليش هيج تحجين جا مارحتي
لعد يم جوري ماعتقد هسه هيا نايمة ..
كتله : مادري احسه هلمرة مو ويانة
من اجينه بس تصفن و ضايجة ..
عدل كعدتة و رفع حاجبة ارتبكت اني من يمي
شبيج ولج رسيل اعقلي ...
كال : شلون شبيها ضايجة..
: ماعرف والله بس من اجينه من بيت عمي
و هيا ضايجة حتى ما حاجت احد صعدت فوك
كبل ..
هز راسه و ضاج كال :خير ان شاءالله
كتله و نسيت نفسي : شاهيير
هو رفع حاجبه مستغرب كال:شنو شكلتي
شاهيير شنو ..
ابتسمت : اي شبيك غير اسمك هيج
ابتسم :لا بوية اني اسمي شاهر مو شاهيير
يحجي و يقلدني..
كتله : ماعرف شسوي
تعودت احجي اسمك هيج ..
هز راسة و كال :خير ان شاء الله
شنو سالفتج بوية احجي ..
كتله بفضول : هيا شبيها جوري
و شنو علاقته بشهاب لان من تجيبون اسمه
تظلون تباوعون على جوري و عمي من اجه اليوم
و يحجي وياها شصاير ..
كال بهدوء : يصير الا تعرفين
هزيت راسي : اي والله احجي حباب ..
كام من مكانه و ابتسم : امبين فضولج قوي
بس مراح احجي ماطول هيا ماحجت
خل هيا تحجي ..
دار وجهه و كلت بضوجه و مادريت عن نفسي:
لا شاهيير ..
دار وجهه عليه و رفع حاجبة كال :
شاهر بوية
عافني و مشه و اني ظليت كاعدة بمكاني
شوي و كمت صعدت لغرفتي ..
يتبع..
