البارت24
يا خسارة روحنة
ويارخص ذيج ألونه
ردفن علينة أسهامكم
وعلى الصبر دامنة
لا احنة للدنيا صفينة
ولا هوى الدنيا ألنة
متبدل بطبعه الوكت
لو احنه التبدلنة
آآآآآه يا هواهم بأول ايامه اشكثر دللنة
ومن وصل طينتهة الظهر
كلهة تبرت منه
لا سالفة بشفت محب
لا عاذل اليعذلنة
موحشة دنيانة وصفت جنهة
أبد موش ألنة
متبدل بطبعه الوكت
لو احنه التبدلنة 💔🥀...
جمارة /
كاعدين اني ورسيل فووك بغرفته والباب مفتوح
جنه منتظرين وصول ليث وزينب حتى نسلم عليهم
ونباركلهم ..
كمنه نحجي على العرس واللبس والركص
نتذكر اخبالاتنه ونضحك عليه جان تكلي
: ولج جمارة طلعتي بلحنة تخبلين بلفستان
جان يجنن عليج و الون مناسب لبشرتج طلعتي
تجننين حتى كامو يخطبووج ..
ضحكت وكتله : ايي ولج اشوف نظراتهن حتى استحيت من يمي ..
رجعت كتله : ولج غير كاعده يم امي واجتني وحده
جان تكول بنتج مخطوبة اريده لابني الدكتور ..
: صدك ..
باوعتله : يي حتى طلعت موبايله وشوفتني صورته
كدام امي ..
اجت ركضت عليه: عليج الله وشلونه هوو وشنو اسمه ..
ضحكت واني اتذكر شكل الولد :
هو ماشاءالله شخصية و شكله حلو مقبول بس طاغيه
عليه الشخصية و لا يكول دكتور واسمه رافد ..
باوعت وغمزت : اممم رافد حلوو وتصيرين زوجته
زوجة الدكتور رافد ..
: ولج اسكتي حرام تحجين هيج مجرد كلام شنو زوجته بعدين انتي تعرفين البير وغطاه فا ماله داعي هذا الحجي ..
: ولج واحد ساحلج سحل ومسح كرامتج شتترجين منه ..
كتله بغصه : هو اني هذا القاهرني اهاني وضحك عليه
خلاني اكره اليوم الي حبيته بيه ماعرفت ليش حبيته اصلاً وبشنو هو احسن من غيره ..
رجعت سئلت : اذا هذا الولد يخطبج توافقين بيه !؟
ابتسمت : يي عادي ليش دكتور وشخصية وحلو ومرتب وامبين اخلااق اكثر من هيج شي شريد هم اتبطر على نعمة الله مايصير ..
رادت تحجي رسيل بس سكتت من سمعت صوت السياره راحت من الشباك باوعت ورجعت باوعتلي
كالت :ولج اجوو يلا تعاااي انزلي ..
كتله: روحي انتي انزلي و اني اجي وراج خل اعدل شكلي والبس حجاابي ..
هزت راسه و عافتني و مشت درت وجهي و باوعت على نفسي بلمراية كلش زين جنت بوقته لابسه فستان شتوي لونه زيتوني يجي قالب واحد على الجسم وبيه حزام من الخصر ..
باوعت على نفسي كلش زين كلت بهدوء :
شنو الي مو حلوو بيه و مايحبني مو غرور بنفسي
بس الحمدلله ما ناقصني شي ..
غمضت عيني واهدي بحالي اخذت شالي خليته على راسي طلعت من غرفة رسيل هستوني اريد انزل
ماحس غير انسحبت من معصم ايدي بقووة ..
باوعت لكيت غيث لازمني من ايدي ويجر بيه
ردت احجي بس سكتت من الخوف واني اشوفه مدخلني بغرفتة فتحت عيني بأتسااع كتله :
غيث هدني وين ماخذني ..
ماحس غير شمرني بلغرفة ردت اوكع لو مو ميز المراية استندت عليه ..
باوعت عليه بأستغراب من تصرفه لكيته واكف بنص الغرفة يباوعلي بحدة و رافع حاجبه ..
كتله بهدووء: شبيك غيث ليش هيج سوويت ..
اتقدم من يمي و عيونه ماتنطق بخير ضل يقترب
واني جسمي يرجف بخووف ماحس غير ركضت
اريد اطلع من الغرفة عبرت من يمه و هو ماتحرك
حسيت الفرج اجااني واطلع من غرفته ..
وصلت يم باب الغرفة ماحس غير انسحبت مره ثانية
على الغرفة هلمره وكعت بلكااع باوعت لكيته
سد باب الغرفة و قفله ..
هناا قطرة دم ماتلكون بيه كتله بصوت يرجف :
غ غيث شتسوي ..
اقترب من يمي و هو يحجي راص سنونه :
الي سمعته شنووو ..
كمت من مكاني ارجع ليوره و هو يقترب اكثر مني
لحد ما لطخت باوعت لكيت ميز المراية ورااي
رجعت باوعتله لكيته واكف بصفي مايبعد بيناتنه اي شي ..
دنكت راسي ماكدرت ارفعه كال بحده :
ارفعي راسج و جاوبيني صحيح الي سمعته ..
كتله و اني بعدني مدنكه راسي: شنو الي سمعته ..
: موافقه على الي يخطبج !؟
فتحت عيني بقووه يعني كل هذا الي يصير علمود شخص خطبني شنوو معقوله سمعني اني و رسيل نحجي لان محد يدري بهيج شي ..
رفعت راسي اله بهدووء واباوع على عيونه
مانزلتهن اريد افسر هاي النظرات بس ماكدرت
كتله : ليش تسئل يهمك أنت ..
طبك حواجبه و كال : ليش تسئلين هيج
احجي جاوبي وخلصيني انتي توافقين عليه اذا يخطبج ..
كتله : وليش مااوافق شو شخص حلوو و دكتور وو
بعدني ما مكمله كلامي ماحس غير لزمني من ايدي وجرني عليه صرت كلش قريبه عليه مثل الي حاضني
كال بحده : ششش لا تكملين شنو راح تفصلينه
كتلج توافقين لو لا ماكتلج اوصفيلي شكله ..
ردت اوخر عنه بس هو لازمني قووي مايخليني ابعد عنه كتله : ايي واني اكلك ليش مااوافق مابيه شي ..
ابتسم ورفع حاجبه : لعد و اني نسيتي حبج الي بسهوله ..
ماحجيت شي توترت من كلامه دنكت راسي وكتله : يا حب انت الي تحجي عليه شو صدكت نفسك ..اقترب واحس انفاسه قريبه عليه غمضت عيني
بتوتر كلبي يدك بسرعه كال : لعد ونظراتج الي شنو افسرهن لو توترج من اصير قريب عليج واقرب مثال هسه ..
فتحت عيني باوعتله لكيته مبتعد عني ومبتسم
كتله بهدوء : انت متوهم اني ماحبك ..
كال : رفعي راسج و حطي عينج بين عيوني وكولي اني ماحبك و لا اريدك ..
:كتلك ماحبك و ماريدك لا تظل توهم نفسك ..
ماحس غير رفع راسي واني خايفة منه و من جرئته
كال بأبتسامه و عيونه مركزه على عيوني : احجي هيج كبالي وانتي رافعه راسج حتى اصدكج ..
ماضعفت بس كتله بقهر :حتى لو احبك شتريد مني تريد تذلني لو تنزل من كرامتي مثل اخر مره بس اكلك تحلم تشوف هيج لان اني ادوس على حبي بحسااب كرامتي و اذا على الولد اذا يجي يخطبني اني موافقة
كتلك مايعيبه شي عاد احسن منك يحترمتي ويقدرني ..
باوعتله بقووة و كتله : شخص يحبني ويقدر الحب الي انطيه اله مو واحد من يشوف شخص يحبه يدوس عليه و يهينه وحسبالك يرجع عادي ويااك لان يحب
لااا اصحى اني مو الي انهان و ارجع الك ..
اقترب مني بغضب و كال : انتي الي فهمتي ماتصيرين لغيري ..
اقتربت منه اكثر و عيوني مانزلتهن منه كتله بغضب : ليش فهمنيي شنو الي تغير مو قبل مده كلت مااباوع عليج انسيني لا ينكسر كلبج ..
كال : جنت ماافتهم كولي عني جنت طايش وهسه
يلا وعيت وفهمت ..
ابتسمت :لا والله شنو هذا الكلام شو جديد ترى مو حسبالك اني مثل البنات الي تعرفهن عادي تحجي هيج وياي و اصدكك واكلك ميخالف ..
: هسه شتردين ..
: والله مارايده شي انت شرايد لان انت الي سحبتني من الغرفه و دخلتني هنااا..
ابتسم و كال : شوفي اني ما احجي اي شي بس اكلج شغله وخليه ابالج انتي الي و ماتصيرين لغيري لو اعرف اصير كاتل او مكتول اسمج ماينكتب لاحد بس الي ...
ماعرف بوقته افرح من كلامه لان يكلي تصيرين الي زوجتي بس مااعترف هو يحبني لو اضوج من الي سواه قبل ..
بس بسرعه بعدت التفكير من راسي واني اتذكر كلامه
الي جرحني كتله بأبتسامه : تحلم اصير الك ..
كال بنفس الابتسامة : ايي نحلم ليش لا بس اتأكدي
هذا الحلم راح اسويه حقيقه ..
كمل كلامه: وهاي الغرفه تصير غرفتج وكل الي بيها الج ..
رفعت حاجبي اله بأبتسامه :شنو هذا التغير شنو بس لا حبيتني ..
هو صفن بوجهي بس ضحك و كال :
يااا حب ماحب طبعا بس كولي عنااد بيج خليتج براسي لان الشي الي اريده اخذه حتى لو بلقوه وانتي هسه عاندتي ودخلتي بمزاجي ..
انصدمت من وقاحته ماحس غير انطيته راشدي من قهري...
كلبي ثاني مره يكسره كتله بتهديد :
ماريد اسمع هذا الحجي ولك لو تظل تتوسل بيه مراح اوافق عليك ..
رفع راسه عليه وهو مصددوم من ضربتي اله اني هم انصدمت من جرئتي بس من قهري مافكرت بأي شي
كال بعصبيه و وجهه انطعن احمر : شلون تتجرئين و تمدين ايدج عليه ..
كتله بغضب : مثل ما انت اتجرئت وخليتني سلعه الك ..
رفعت ايدي اله ماحس غير اخذه وخله وره ظهري ولواها الي اني من الالم عطت باوعت هذا مو غيث هذا شخص ثااني عيونه حمر من العصبية ..
دمعه نزلت من عيني كتله بوجع : غيث ايدي راح تنخلع وخر فدوووه ..
كال بعصبية و هو راص سنونه : ان شاءالله عساها تنكسر شلون تمدين ايدج عليه ..
غمضت عيني و ابجي من الالم : غيث فدووه هد ايدي ..
وخر ايده من يمي باوعت على ايدي ماكدر احركه
باوعتله و كتله بقهر واني ابجي : الله ياخذك اكرهك..
كعد على الجرباية ونفسه يصعد وينزل كال :
كومي طلعي بره لا ابتلي بيج وعلي
كتلج انتي الي فهمتي ..
باوعتله و اني لازمه ايدي وعيوني مغوركه : تحلم فهمت ..
باوعلي بس ماحجه شي درت وجهي منه واني احس نفسي مذلوله لازمه ايدي احسه انخلعت وابجي من الالم موتني كسر بيدك عساها ..
فتحت القفل وفتحت الباب باوعت وجان الكه ليث
كبالي صاااير باوعلي بصدمه و كال مصدوم :جمااارة شتسوين هنا ..
هيا هاي الي جانت عايزه عيوني كامت تصب مثل الشلال هسه يفهم غلط دخل للغرفه و باوع على غيث الي كاعد على الجرباية و على شكلي ابجي و لازمه ايدي و حالتي مبهذلة انخبص من شاف هيج ..
كال و هو يباوع لغيث :شكوو شصاير غيث وليش جمارة عندك بلغرفة وحدكم والباب مقفول فهموني ..
رحت يم ليث ابجي و اتوسل يمه شحطيت نفسي بموقف : فدوووه ليث لحد يسمعك وتصير سالفه ..
باوعلي بغضب و نظرات مثل شخص متقرف
ماتحملت نظراته ..
كال بغضب : خوفج لحد يشوفكم بس ماخفتي من ربج انتي ويااه وحدكم بغرفة مع الاسف عليج جمارة مع الاسف والله ..
مصدوومه من كلامه شقصده يشك بيه وبأخلاقي
سجينة و نبتت بكلبي ..
كام غيث و كال بعصبية :هو شنو مع الاسف الابنية ماله دخل اني الي جبرته تجي هنااا ..:وشنو الي يجبره يخليه تجي شو فهمني ..
كتله : ليث فهمت غلط والله ..
كال و هو راص على سنونه: لعد فهموني هو اني منتظر واحد منكم يفهمني ..
اجه غيث يمه وهو كام يحجي كلشي صاار لليث
اني دنكت راسي ابجي و ليث يباوع علينه مصدوم
من خلص كلامه غيث ..
كام ليث ولزمه من ياخته بقووه وكال :ماتستحي ولك انت اكو شخص عاقل يجيب بنية لغرفت واحد عزابي وغريب عنه بس المن احجي لشخص ماعده عقل ..
كمل كلامه :لو اجه احد وشافك انت وياها هنا بنفس المكان والباب مقفول عليكم مو راح يحجون بيكم
أنت طبك مرض الا هياا المسكينة راح يحجون بعرضه وتصير سالفه واذا توصل يم اهله يقتلوه ولك اني من شفتكم فهمت خطأ..
هذا ساكت مايحجي حجه ليث بحركه : وشنو تجبره عليك هاي وين صايره لو تريد تصير مثل جدك ..
هذا غيث مايحجي اي شي واني بس ابجي كله بسببه خلاني بهذاا الموقف الله لا يراويه لأي احد ..
انكسر كلبي بسبب غيث الله لا يسامحك على السويته بيه انهانيت بما فيه الكفااية كرهته وحقدت عليه
خجلت من نفسي الف مره كدام ليث ..
باوع عليه ليث و كال :اعتذر خويه من كلامي بس والله من غضبي روحي هسه انتي وغسلي وجهج لحد يشوفج هيج و ماتخلصين من التحقيق ..
ماحجيت شي بس باوعت على غيث الي يباوعلي
من شافني نزل راسه ..
طلعت من الغرفه و رحت ركض لغرفة رسيل
كعدت بلكاع ابجي و الطم على وجهي وميته خوف من الي صااار : عزااا العزاج رسيل شصاااار بيج ولج لو احد من اهلج شافوكم سووه ..
ابجي مقهوره على حالي : ولج هذا ياحب الي حبيتيه
من الله يطيح حظ هيج حب ولج هذا بس كسرج
وذلج واليوم اهانج كدام اخووه شتترجين من شخص صاحب علاقااات كله وي بنات ولج عزا العزاج على شنوو حبيتيه ..
ابجي واشهك اجت رسيل شافتني هيج شهكت بخووف
من شكلي قفلت الباب بسرعه لحد يجي ..
اجت حضنتني و كالت : ولج شبيج شصاير وياج ليث وزينب راحو و حتى ماشفتيهم و مانزلتي شكو شصاير ..
حضنته و ضليت اشهك و اكله : ليش حبيته هووو
ليش حضي جابه عليه ضيعني هذاا كلبي ضيعني
من حبيته ..
مسحت على راسي و تهدي بيه وهيا ماتعرف شيصير
صارت بيه خوفه من الي صاار اليوم حتى من غيث و جرئته صح لسان هو و يشاقي لو يقهرني بس ماشفت هيج منه ..
.......
زينب /
اجينه لبيت عمي ابو محمد اهلي كلهم موجودين
واعمامي سلمنه عليهم وامي تبوس بيه وتكول وحشه عليج البيت يكول فاركتهم سنه ..
استحيت اسئل على فارس لو اسلم عليه
بس بعدين طلب يشوفني رحت لبيتنه سلمت عليه
وابوي اجه شافني باسني من راسي وانطاني فلوس
كال هاي هديتج رجع كال: بويه سامحيني لان جبرتج بس لمصلحتج والله
سكتت ماحجيت شي لان بعدني مناسيه الكلام
اجتني جوري و كال ليث يكول يلا نطلع ..
اخذت شكم غرض الي من بيت عمي ابو محمد
كل ملابسي يمهم نقلوها ..
سلمت عليهن ورحت صعدت لسيارة وهو اجه
بس شنو مايتحاجه و كوه سلم على اهله ..
طلع من يمهم و هو و لا يحجي وي احد ساكت
طول الطريق ابااوع عليه ساكت مستغربه عليه
شو اليوم الصبح عادي وجهه طبيعي بس هسه
من طلع طابك حواجبه وساكت و وجهه احمر ..
باوعت عليه كتله : ليث بيك شي !؟ ..
حجه و هو مايباوعلي : مابيه شي ..
رفعت حاجبي : شنو مابيك شي ماتشوف شكلك امبين عليك ضايج و معصب ماجنت اليوم الصبح هيج ..
سكت ماحجه شي رجعت سئلته : شبيك مو احجي وياك بيك شي ..
صاااح بعلووو صوته فزيت اني وضرب الاستيرن : كتلج مابيه شي كااافي اكلان تبن ليش تلحين كاااافي ماريد اسمع صوتج تنرفزيني ...
خنكتني العبرة ماحجيت شي درت وجهي على الجامة
دمعه طاحت من عيوني اني اجيب الاهانه لنفسي
اني شكووو بيه مسحت دمعتي حتى لا ينتبه
بقيت دايرة وجهي ماريد اشووفه اول يوم بزواجنه
وهيج يهين بيه ..
سمعت صوته كال :استغفرك ربي واتوب اليك ..
كال :زينب ..
ماحجيت شي رجع كال : زينب مو احجي ويااج ليش ما تجاوبين ..
سكتت همين ما جاوبته و لا اريد احجي وياااه مو على اساس صوتي ينرفزه ..
كمل كلامه كال :بكيفج لا تحجين بس ماقصدي اعلي صوتي عليج بس من شفتيني عصبي ابتعدي عني و لا تحجين وياااي لان تضرين نفسج بهيج شي..
باوعتله و كتله :مالي دخل بيك يا ليث لو عسى ما اشوفك واكع كبالي اني ليش اجيب المهانه الي
ليش ما انجب و اسكت شعليه بيكم ..
باوعلي ماعجبه كلامي كال :هيج صاار ترى ماكو داعي هذا الكلام و صدك انتي تجيبين المهانه لنفسج اسكتي احسلج و لا تدخلين بيه ..
ماحجيت شي انطيته ظهري و طول الطريق احنه ساكتين مانحجي لحد ما وصلنه لكربلااء العصرية رحنه للفندق الي حاجزينه ..
دخلنه اني رحت كبل ذبيت العباية على الجرباية
ورحت ذبيت الحجااب ميته تعب ..
كام ليث فتح جنطته طلع ملابسه و دخل بدون كلام للحمام يسبح اني هم حضرت ملابسي و انتظرته يطلع حتى اسبح ورااه ..طلع هو لابس تراك نيلي وينشف بشعره دخلت اني سبحت ولبست دشداشه قصير لركبه ..
طلعت شسورت شعري باوعت عليه من المراية كاعد على الجرباية و ساند راسه على تاج الجرباية و يكلب بموبايله و لا منتبه لوجودي ..
مشطت شعري ورحت لجهة الثانية من الجرباية تمددت وغطيت نفسي كال هو : بليل جهزي نفسج حتى نزور ..
ماحجيت شي غمضت عيوني وغفيت من التعب
كعدت على صوته كال : يلا كومي ما طلعت نومه
فضيه ..
كمت كتله بنعاس : الساعه بيش ..
:الساعه ب ٧ فضيه خل نطلع ..
هاي شكد نمت اني كمت من مكاني دخلت للحمام غسلت وجهي و توضيت طلعت اصلي خلصت صلاتي
وهو كاعد منتظر مبدل ملابسه ..
لبست بنطرون جينز وقميص احمر لفيت حجابي و ماخليت مكياج بس حمره خفيفه و مسكارا لان خاف مايدخلون وهاي ويكولون امسحي ..
لبست عباتي كتله : يلا ..
جر نفس :واخيرا ..
طلعنه اني وياه قفل الغرفه وطلعنه صعدنه بلسيارة
حرك وصلنه يم الامام نزل سيارته ومشينه مشي
وصلنه يم الامام الحسين عليه السلام اول شي دلاني وين الكاه ..
دخلت زرت اني و شفت كبته وبجيت طلبته يفرجه عليه ويحنن كلب ليث عليه ..
طلعت بره صليت وقريت الزيارة وطلعت
لكيته منتظرني بنفس المكاني خلصنه ورحنه زرنه الامام العباس هم صليت وقريت الزيارة وبقينه هناك شوي كاعدين يم الامام اباوع على ليث صافن وامبين عليه الضوجة ...
شوي وكمنه كال :خل نتعشى بمطعم ..
دخلنه لمطعم اتعشينه و طلعنه ضلينه شووي نفتر
بعدين كال خل نرجع ..
رجعنه للفندق و كل واحد كاعد وحده حتى ضجت
وكرهت الساعه الي وافقت بيه ...
مرن يومين على وصولي لكربلاء هيا اليومين مره زرنه وثاني يوم طلعنه فترينه بكربلاء ...
هذا الثالث يوم و العصر طلع ليث بس وحده ماطلعني وياه..
صاار المغرب وهو ماكو اتصل عليه مايرد
خفت لا صاير بيه شي صارت الساعه ب ٨ وهم ماكو اليوم اصلا الجو مغيم وكالو يمكن تمطر ..
وهسه كامت تلمظ وشوي شوي كامت ترعد وصوته يخوف وكامت تمطر بقوووه ..
كمت ارجف من الخوف يعني وين صايره يعوفني وحدي هنااا مكال يصير عليه شي مافكر ..
كعدت على القنفة غطيت نفسي بلبطانية لان بردت
وارجف من الخووف هم وافكر هذا وين صاير
غوركت عيوني من التفكيرات الي اجتني ..
صارت ب٩ ونص واني انتهيت صارت ضربه قويه من الرعيد طفرت من مكااني وعطت بعلووو صوتي
:دخيلك ياريي ..
كمت ارجف من الخووف شووي والباب انفتح
باوعت لكيت ليث داخل وملابسه كلهن مبلله وشعره مبلل ..
سد الباب و اجه للغرفة شافني طبك حواجبه كال :شبيج بوية ليش هيج وجهج ..
اجيت عليه بسرعه ومقهوره منه و ابجي :
وتكلي شبيج انت الي وين جنت هااا !؟
: جنت طالع ..
: ادري طالع مافكرت بهاي الكلبه الي كاعده وياك بنفس الغرفه ما كلت اكلت ماتت انخطفت شصار وياها ..
اخذ نفس و كال :حقج عليه اعتذر بس نسيت ..
انصدمت من يمه ظليت ابجي من الصدمه كتله :شنو شنو كلت نسيت انت صدك تحجي ..
عطت بوجهه : شنووو نسيت ولك انت متزوج ادري مجبور بس مو هيج تنسى عندك زوجة منتظرتك مصار على زواجنه اسبووع و تكول نسيت خااف ربك
ماتعرف شصااار بيه من بقيت وحدي بلغرفه ردت اموت وصوت الرعيد القوي و حسبالي بيك شي تالي تطلع وتكلي نسيت ..
كعدت على الجرباية و مدنكه راسي ابجي خليت ايدي على راسي اتخيل الموقف لو صار شي شراح يفيد .
كتله و اني مدنكه راسي : ولك اهلي امنووك كالولك دير بالك على بتنه و كتلهم لا تخافون عليه لك اني كمت اخاف من نفسي منك ما أمن اعيش ويااك
اذا مصارلنه فترة من تزوجنه وهيج تسوي عايفني وحدي بفندق و بمحافظه غريبه عليه كلشي ماعرف
مع الاسف ليث ماحسبالي هيج انت ..
دموعي تجري بسكته من الموقف ماحس غير
رفع راسي بأثنين ايديه باوعت عليه وعيوني تنزل دموع هو يباوع بنظرات ندم ..
اقترب عليه و خله شفايفه على كصتي باسني بهدووء
مصدومه منه ابتعد من يمي و كال : اسف و حقج عليه مراح تتكرر ..
عافني وراح يبدل اباوع على ملابسه مبلله وناكعه
مااي خفت لا يتمرض بعدين شلت هذا الحجي من بالي
مانسيت الي سوواه ..
رحت بدلت و نمت فزيت على صوت درت وجهي
وجان اشوف ليث يون و وجهه يصب عرك ..
اقتربت من يمه لزمته من كتوفه اهز بيه :
ليث اكعد شبيك ..
فتح عيونه بثقل و يرجع يسده كال : ما مابيه شي
بس غطيني بردان فدوه ..
شفت وجهه يصب عرك خليت ايدي على كصته
حاااره تموت خفت كلش شسووي وياه هذا حرارته مرتفعه ..
كبل بدون تفكير جبت كاسه ماي و وصله وظليت اسويله كمادات اول شي فز هو من البرودة مال الماي
بس بعدين هدئ ظليت لصبح بس اسويله ماعرف اسوي غير هيج شي ..
حسيت حرارته هدئت صار الاذان كمت صليت وخلصت باوعت لكيته زين بس قميصه مبلل من العرك كمت حبت قميص اله كعدت كتله : ليث كوم ..باوع عليه : ها شكو ..
: كوم البس هذا القميص قميصك مبلل ..
ماحجه شي كام وكوه ذب القميص ولبس هذاا
عدلت نومته وغطيته ظليت كاعده يمه اشوف خاف يتمرض ..
ظليت صافنه على ملامحه ردت ابجي ليش هيج
حظي ليش ماحبيتني يا ليث ..
اقتريت من يمه وبسته من راسه بهدووء ولزمت ايده
اتمنيت هاي الايد ماتفلت ايدي بس مو كلشي نحلم بيه يتحقق ...
ثااني يوم كعدت باوعت لكيت نفسي نايمه بصفه
ماد ايده وراسي فوك ايده نايمه وهو لازمني من أكتافي ماردت اكوم بس كلت لا يكعد ويشوفنه هيج
كمت بهدوء من يمه وطبيت اسبح ...
.......
جوري/
خلص زواج ليث على خير الحمدلله وصارلهم اسبوع
بكربلاا واليوم اجو واهلي سوو عزيمة وعزموو
اهلنه كلهم وخوالي هم ..
ضلينه نشتغل ونسولف وي زينب احسه مو على بعضه او تتصنع انو هياا فرحانه ماحبيت احرجه و اسئله
هذا الشي بيناتهم همه واحنه نعرف سبب زواجهم
وهمه مجبورين ..
خلصت العزيمة و مرت الايااام و الاسبوع ونفس
الروتين ماكو شي وحتى شاهر بعده كلهم حاجوني
بس شاهر بعده معند ومايحجي وياااي ..
استغربت شهااب ماكو وماله حس شكوو شعنده
والله وبيومه دز رساله و كال بيها ؛اهلي باجر يجون يخطبووج من اهلج..
ماحجيت ويااه و لا جاوبت ظليت افكر باجر من يجون شيصير ..
وفعلا ثاني يوم صادف يوم الجمعة اجت امه واخته جمارة النه ..
وكال ام غسان :صح الي صااار قبل بس ننسى واحنه اهل اليوم و نرجع اليوم ونخطب بتكم جوري لابنه ..
امي باوعت وهزت راسه ماقابله بس سكتت وكالت الحجي لابوها و اخوانه ..
ماحجت شي امه بقوو شي و بعدين طلعو
امي باوعتلي و كالت : ولج انتي تخبليني فهميني ليش توافقين عليه واكو احسن منه خطبوج ..
كمت من مكاني: يمه كافي سدي هاي السالفه ما مليتو مو كتلكم موافقه عليه لا تجبروني على شي ماريده فدوه ..
كعدت امي وحجت بقهر : اااخ منج راح تموتيني ..
سكتت اني ماحجيت شي لليل يلا اجو اهلي
ابوي و اخواني كلهم امي حجت وياهم وهمه ساكتين
باوعولي ..
كال ابوي : انت متأكده من كلامج ترى احنه كلنه ما موافقين عليه بس مانريد نكطع بقسمتج ..
حجه محمد بعصبية : بوية صدك تحجي هيا يا قسمة الي تكول عليه ترى اذا هيا غبيه و ماتفتهم احنه نفهمه مو نشمره بسرعه لواحد عافه ..
كال ابوي : كاافي اختكم كبرت و القرار اله مالنه دخل وهيا تتحمل نتيجة افعاله و اخوي اجه عليه اليوم وطلبه مني ..
كال محمد لشاهر :ماتحجي انت قنعه بلكت تقنع منك ..
باوعت لشاهر اتمنيت يحجي ويااي حتى لو يضربني اهم شي يحجي يسوي شي مو هيج باقي بس صار العكس ...
عدل كعده باوع عليه ورجع باوعلهم كال برود :
مالي دخل بيه اني شلت ايدي من كلشي شتسوي خل تسوي مو تكول هيا رايدته واحنه نجبره خليه ناره تاكل حطبه شيصير بيها خل يصير واحنه نبري نفسنه اذا يصير شي و مالنه اي دخل ...
استهضمت كلش من كال هيج ..
حجه غيث :يعني شنو نسكت ومانسوي شي ..
ابتسم شاهر برود : يعني شتسوي اكعد واحضر عقد اختك من شخص عافه بهيج يووم وحط ايدك على كلبك لا يعوفه مره ثانية ..
ليث : انت شاهر شبيك هيج تحجي ..
كال بحده : شتريدني اسووي اضربه لو احبسه بغرفه واكطع عنه كلشي حتى ماتوافق ترى عده لسان ومحد جابره و كلنه واكفين وياها ليش توافق عليه !؟...
كمل كلامه و كال :اني بلنسبه الي اختي الي تطعني وتكسر كلمتي ماعتبره اختي ومعليه بيه وكفت وياها وصرت ضدهم كلهم علموده تالي هيج تسووي مالي بعد سلطه عليه ..
حجه هيج وصعد فوك لغرفته كلهم سكتو
حجه ابوي : شاهر كلامه كله صح بعد بيدها القرار ..
باوعلي : بعدج مصره على رايج ..
سكتت ماحجيت شي كام ابوي وكله كامت وياه
كال :هاهيه راح اخابر عليهم وانطيهم الموافقه ..
محد حجه شي كله راحت لغرفه وضايجين
صعدت فوك اني لغرفتي سديت الباب كعدت على الجرباية ابجي من كلام شاهر كلشي و لا هو يزعل عليه ااخ كله من وره شهاااب كمت اكرهه اكثر و اكثر ..
مسحت دموعي اخذت موبايلي ورحت على رقمه
كتبت واني حاقده عليه :اهلي وافقو واني وافقت
الخميس الجاااي تكللهم خطوبتنه وماريد اي بشر يحضر و لا احد غريب بس بيناتنه عمامي ...
شافه بس مارد عليه ثاني يوم بلكلية انتهت محاضرة وهسه استراحه عدنه كعدت بلحديقة اقره شفته اجه عليه سلم و كعد ..
كال :ليش هيج مستعجله وتردين الخطوبة الخميس هذا الي يجي ..
باوعتله و كتله برود : احسن نسرع بلخطوبه حتى لا تسوي شي وتغدر بيه مره ثانية ومدري وين تروح ..
باوعلي وسكت رجع كال : وشعرفج يمكن مراح اسويه مره ثانية واعوفج بهذا اليوم ..
كمت واني كتله : شتسوي سووي بس صدكني هاي المره محد يكدر يخلصك مني اذا تسويه ...
عفته ومشيت خلص الدوام ورجعت للبيتوصدك بيومه بليل اتصلو وكالو الخميس محد حجه
ولا كالو ليش هذا الاستعجال ..
طلبت من اهلي محد يجي بلعرس يجون بس عمامي وهاهيه ماقبلت امي بس اني اعترضت وضليت اصيح كتلهم ماريد اي احد يعرف خلوه سكته ...
مرت الايام وماكو بيناتنه اي مراسلات و مانتشاوف
اجه يوم الاربعااء وطلعنه اني وفاتن ورسيل وزينب
اشترينه فساتين وقبله اجرنه كووشه لهذا اليوم ..
اشتريت فستان طويل شفته لونه ماروني وتذكرت فستاني بذيج الخطوبه السابقه ...
صار ثاني يوم واجه هذا اليوم الي راح يحدد مصيرنه
ثنينه كلبي يدك بسرعه تذكرت قبل من جنت اتحضر واني متحمسه وحيل فرحانه ..
بس هسه العكس كلبي مجروح وملجوم من يمه
وين جنت قبل كلها فرحانه واصوات الهلاهل والاغاني
وهسه سكته ...
نزلت من الدرج واشوف اهله كبالي امه الي ماعاجبه
الوضع وبت خالته زهراء عيونه حمر من البجي ..
خوالي الي جايين وشكم وحده..
اباوع على امي ما قابله على السويته هلهلت مرة عمي ام فارس من شافتهن هيج سكته ...
كعدت بمكاني واباوعلهن دموعي ماريده تنزل كدامهن
الذكرياات كله مرت بنفس الوقت يكول اليوم صار هيج وياي وعافني ...
وصوت الشماته والنسوان والحجي بعرضي وبشرفي
دموعي الي نزلت بسببه وبليوم الف مره اموت
لو دموع ابووي الي شفتهن واخواني وانكسارهم بيه ..
ضغطت بأيدي على طرف الفستان ونزلت راسي
لفت السنه ورجعتني لخمس اسنين جنهن هسه صارن
انحرمت من كلشي بسببه والخوف الي صار وياي
هو الي قواني وخلاني هنااا اكون مره ثانية ..
صاحت امي وكالت : يلا راح راح يعقدون ..
كومني من مكاني واحس رحت للمشنقة بأيدي
قويت نفسي وامشي بس خطواتي ثقيله اصوات تجيني وتكلي عفيه عليج على الي راح تسويه
وصوت يكلي لا تسوين اي شي ...
كعدوني على الكرسي يم الباب وخلو شي على راسي
حسيته ثكل عليه وعلى انفاااسي ..
سمعت صوت السيد يردد اياات من القرآنية وظل يحجي بعدين كال احجي كولي نعم انت وكيلي ..
كال السيد : بنتي جوري تقبلين الزواج من شهااب ال ..
غمضت عيوني وساااكته ماحجيت شي احس ثكل لساني ماكدر انطق اي شي ..
امي خلت ايده على كتفي و كالت بهمس :
ماما السيد يحجي وياااج ..
طلبو منه يعيد السؤال وهم سئلني واني ماجاوبت
بس دموعي تنزل وايدي ترجف امه تباوعلي ومعاجبه..
البنات يباوعن بخوف ويكللي ولج احجي وافقي
وامي تكلي كليله موافقه مو هذا الي ردتيه...
حجيت بنفسي لا يمه مو هذا الي ردته اني و لاردت اوصل لهيج مكان بس هو السبب وخلاني هيج اسووي ..
كال السيد : شكووو ليش ماتحجي..
سكتت وهدئت نفسي طلبو منه اخر مره يحجي وكله متوتره وامي تقره ايااات ..
كال يا بنتي هل انتي موافقه على الزواج من شهاب ال.. ..
كتله بخنكة وانكسار : لا ما موافقة ...
يتبع..
