صباح الجمال والتفائل كيكاتي ❤️❤️
حاول أن تخفي نقطة ضعفك قدر ما أستطعت ، هي ليست نقطة ،هي اشبه بثقب أو نفق يقود العالم للعبث بداخلك .
نورس : تعرفت على العسكري
اسمة ( وليد )
جان وليد منطيني كل شي
الحب والاهتمام والامان
وبحكم دوامة قريب مني جنت اذا احتاج شي بس اتصل عليه
عرفني على اهله وخواته
وجان رايدني زواج
حتى امة اكثر من مرة حجت وياية
وتتمنى اصير زوجه وليد
خواته صارت بيناتنه علاقه صداقه ونحجي
جنت مرتاحه كلش بعلاقتي بوليد
بس الي جان مضوجني من عنده هو الشك
شكاك اكشر ماايوثق بااي شخص
اقرب الناس ميوثق بيهم
وجان دائماً يكلي
امي مااوثق بيها
خلصت المرحلة الاولى واني احجي ويا وليد
بس بطلوع الروح خلصت من ورى شكة
اكون كاعدة بالنادي ماشوف اذا مداخل يشوفني ويامن كاعدة
لو مرات اسد من عنده الخط ورى شويه يدك عليه يشوفني اخاف انتظار
لو اذا تأخرت بالرد عليه يعيط ويطلب مني سكرينات اخاف جنت احجي ويا شخص
واني طبيعتي مااتحمل ضغط من شخص
وعندي نظام (الي ماايتعدل يتبدل )
وجنت منتظرة البديل
داومت مرحله ثانيه
وعتبرت المرحله الثانية من اجمل مراحل الكليه
اولاً طلع نقل وليد الغير مكان
وثانياً شفت (مرتضى)
راح اكللكم منو هو مرتضى
مرتضى طالب مرحلة رابعه
كلش كلش حلو عيونه الي يشوفها يغرك بيها
طويل وابيضاني
وكل يوم لبسه شكل والاناقه اصيح بااسم مرتضى
ومو بس اللبس والاناقه لاا
حتى سيارات جان كل يوم سيارة
والاهم بالموضوع هو جانت عينه الحلوة علية
واني لكيتها الفرصه
هم حلو
وهم فلوس
وهم ثقافه
بين قوسين ( كامل المواصفات )
بدأ يتقرب مني ويكعد ويايه ونسولف
ونتعرف على بعض
ماكو مدة كلش قليلة شهر واحد
مرتضى : نورس اني اريد اخطبج
نورس : طرت من الفرح من طلب مني الزواج
شنو
مرتضى :مثل مسمعتي اريد ازوجج وصيرين
ام بيتي وام جهالي
نورس : بس اني ماعرف وين عايش ولا شتشتغل
مرتضى : اسمعي اني عايش بمنطقه ال ...
واشتغل ويا والدي
وحالتنا المادية مثل ماانتي شايفه
نورس : اكول الامي واردلك خبر
مرتضى :واني انتظر منج خبر
نورس : طلعت من الكليه والفرحة بوجهي
احس روحي صدك نورس ويحب يطير بالسما
رحت للبيت ومثل العادة امي متعاركة ويا نجمة وكاتلتها
وسبب الكتله نجمة مسوية اكل ميعجب حسن
وهذا حسن ولي العهد لازم كل شي يريدة نكول احنا لبيك
مثل الخدم مسويتنا الها والابنها
يومة اريدج بموضوع مهم
بشرى: ماايجي منج ومن خواتج بس الشر
نورس : ييي احنا شر
بس هذا الموضوع راح تحبي كلش
بشرى : وشنو هو
نورس : اجوني خطابه
بشرى : يييي اكيد مهتلف
نورس : لااا لتخافين اني اريد اطلع من فكرج
بشرى : احجي عدل لا بالنعال
نورس : ييي عنده فلوس
بشرى : شيشتغل وين بيتهم شكد عنده املاك
من هسه اكلج اذا مااينطيني فلوس ماازوجج
نورس : ييي عود مو تفضحينا من البدايه
بشرى : نجبي اني اعرف اصرف
سولفيلي عليه
نورس : بيتهم بمنطقه ال .... ويشتغل ويا ابو
وعنده خير من الله من المزارع
بشرى : بس هاي المنطقه بالعرب
والي اعرفه عنها كلهم حالتهم تعبانه
عايشين على الزرع والبقر والغنم
نورس : ييي هو كلي احنا هناك كاعدين علمود المزارع مالتنه لان منكدر نأمن بواحد غيرنا
بشرى : ييي وانتي شفتي حالته الماديه لو بس كلام
نورس : ييي شفتها كل يوم سيارة شكل واللبس مالته كله ماركات
بشرى : اذا هيج اني موافقه
نورس : هوو شنو موافقه الي يسمعج يكول انتي العروس
بشرى : انجبي بنت القن...رة
نورس : ييي عاد انتي مينكعد يمج
صعدت وعفتها
ويومين مااداومت كلت خلي اثكل على مرتضى
وخلال هاي اليومين امي موتتني بالزن والكلام والفشار
وكل كلامها راح يروح الولد
هسه من مارديتيله الموافقه عباله رافضه
اذا راح اموتج
اذا راح احركج
بنت الفكر
هو انتي وجهه نعمه
كومة كلام هذا شي بسيط من كلامها
ورى اليومين داومت وانطيت موافقتي المرتضى
ورد فعل مرتضى جنت ممتوقعته
كام يعيط بالنادي مال الكليه ويضحك
والفرحة مااشيلها الكاع
ومثل كل مرة اغلط
جانت غلطتي انجاه هاي العلاقه
اني ماسألت اني بس شفت
جنت مستهانه بموضوع الزواج
الزواج مشروع ابدي وازلي
المفروض الشخص يااخذ كل ابعادة
ويعرف يصرف بكل خطوة يخطيها
الزواج مو ثوب ابيض اذا مااعجبنا اليوم نكدر نغيرة
المهم اجو اهل مرتضى وصارت الكعده مالتي والعقد القران
وجان كل شي من اجمله
بس الي جان مضوجني وليد دائماً يدك عليه
اخر شي حظرتة وفتكيت من عندة
وعشت احلى فترة خطوبة ويا مرتضى
كلها حب وسعادة واهتمام وغيرة
عتبرت مرتضى عوض على سنيني الي دمرتها بسبب جهلي ومراهقتي •••
نجمة : من صار عقد قران نورس جان احساسي ابداً مو حلو
مخنوكه وضايجه
بس الخنكه والضوجة مو مثل كل اخت تفكر اختها راح تروح منها
لا جنت ممرتاحه للوضع كله
نورس بيديها كاعدة ادمر حياتها
وكاعدة تركض ورى سراب اسمه الفلوس
عبالها بعلاقتها وزواجها من مرتضى تكدر تحقق احلامها البعيدة كل البعد على الواقع
من دخلو اهل مرتضى جانوا ناس بسيطه بشكل مو طبيعي
يعني مابين عليها العز والفلوس والغنى الفاحش
الي جانت تحجي نورس
ورى مااتم العقد مال نورس وشفتها سعيدة ويا مرتضى فرحت من كل كلبي ودعيتلها الله يوفقها ويا مرتضى
ورى احداث نورس كمت اشوف امي بحالات غريبة كلش
بحكم نورس وملاك دائماً بالغرفه
وبيبي ام مهدي دائماً بالغرفه ويا جدو لان جدو حالته كلش تعبانه فتبقى يمه دائماً
ابقى بس اني بالبيت
انظف واسوي اكل
فبيوم من الايام واكفى بالمطبخ اسوي عشا
شو امي طلعت من البيت بدون متحجي شي ولا تكول وين راحت
ضليت صافنه هاي شبيها وين رايحه بهذا الوقت
لحد الان اذكر الساعه الي طلعت بيها
جانت ب 8 وربع
ورجعت ساعه 10 ونص وهم مااحجت شي ولا كالت وين راحت
او بالاصح اني مااسألتها لان اخاف اسألها وتضربني
واني جسمي تعب من الضرب والاهانه
لكن الحاله تكررت كامت تطلع كل يوم بنفس الوقت وترجع بنفس الوقت
ومن ترجع تنهت وتلهث وخايفه
مثل الحرامي
ودائماً انتبه تاخذ وياها علاكه سودة وترجع وبيدها نفس العلاكة
الفضول كتلني بس مااعرف شسوي او ويامن اشارك همي والتفاصيل الي كاعدة اصير ويا امي
فات اسبوع على هاي حالتها
واني كلت لازم اسألها
ضليت انتظرها لحد مرجعت
رجعت اجر النفس بالكوة وتنهت
اول مدخلت وشافتني انصدمت
بس بعدين حولت صدمتها الامر
بشرى : بسررعة روحي جيبيلي ميي
نجمة : حاظر
رحت جبتلها مي واجيت
تفضلي
بشرى : يمه تعبت
نجمة : من شنو تعبتي وين جنتي
بشرى : بنت الكوا...د معليج بيه وين جنت وين اروح
واذا سألتي اركعج بالنعال
مبقى عليه غير الد...ة تسألني
ويلاااا كومي حضريلي الحمام بين ماارتاح علمود اسبح
نجمة : مثل كل مرة لازم اسكت لان اخاف منها
بس بداخلي اكو فضول اريد اعرف
وكلت اليوم الا اعرف
حضرت الحمام وهي دخلت تسبح
واني دخلت الغرفتها
امشي على كيفي
اباوع الميز مالتها كله مرطبات وعطور ومكياج وصبغ اظافر
والله اني وخواتي ماعدنا هيج ميز
باوعت على الميز وتحسبت عليها
لان هذني بفلوسنا جانت تقصر علينه في سبيل هذني الاشياء
رحت للميز وشفت التلفون مالتها موجود والحمدلله مابي رمز
او بالاصح حتى لو خلتله رمز هو من تسترجي تلزم تلفونها
اذا لزمنا تكوم تتفنن بتعذيبنا
فتحت التلفون وجانت اكو رسالة من شخص مكتوب عليه ( معاذ ❤️)
فتحت الرساله
مكتوب بيها
( مثل كل مرة ترجعيني شباب )
ماافهمت كلامه وليش امي ترجع هذا الرجال شباب
رفعت المحادثه علمود اشوف بقيه الرسائل
ونصدمت بالي شفتة
الي شفتة
امي كاعدة تهز عرش الرحمن بسوالفها
***************************
اعرف القفله تجلط بس اتحملوني
لان من اذكر هذا الموقف اكره بشرى واكره كل النسوان
لاتنسون كيكاتي النجمة والتعليقات الي تفرح كلبي ❤️
