شرفي عندك

البارت الخامس عشر

مهما بلغت قوة شخصيتك هناك
دائمآ شخص يمكن ان يجعلك
ضعيفاً امامه ليس خوفًا ولا ذل
انما هي مكانه راقيه في قلبك
يستحقها
آيسن/ مرات القدر يخونه ويلعب لعبته الي تخططه اله آنه سوي بعدين جزء بسيط من تخطيطك ما يصير تبقى إرادة الله فوگ كل شي ورب الكون مستحيل يكون الشي الي نريد نغش بي غيرنه الله يساعدنه بي لأن رب العالمين رب الحق مو رب الباطل

لهذا اني وبتخطيط يزن چنت أريد اغش صائب بس رب العالمين گلي اوكفي هذا حدچ لازم افضحچ لان انتي تريدين تغشين شخص ما اله ذنب بيچ كل همه ينسى البنيه الي لعبت على مشاعره

واكبر خيبه ممكن تحصل للأنسان هو انه واحد يستغل مشاعرك والمصيبه منو يخلي عينه بعينك وهو يكذب عليك وهاي الحاله چانت ويايه اني طول الفتره ألي مضت اني كل همي انه اعيش قصة حب ويا صائب الي حبيته ومن كل گلبي بس نسيت مصيبتي او بالأحرى تناسيت لان مستحيل وحده تمر ألي مريت بي وتنسى وهذا چان أول حب بحياتي يعني انطيت كل مشاعري لهذا هانت عليه حتى كذبي حتى اوصل لمشاعر صائب

واني مثل كل بنيه بعمري أفرح من الشاب ألي أحبه وأتمنى يگلي احبچ و يعترفلي بحبه بس اني لا ما فرحت لان على حظي الاگشر صائب تاب من الشرب هسه لو اني بنيه عاديه المفروض افرح لان خليته يتوب حتى أدخل للجنه بس هاي توبة صائب جرت عليه ويلات

بيومها بقيت صافنه بوجهه حتى هو أستغرب عليه شلون ساكته
گلي / شبيچ آيسن ما تحبيني گليلي والله ما أتقرب عليچ وحتى أطلق سراحچ واطلگچ أنتي ما مضطره تتحملين واحد سكير مثلي

گتله/ والله صائب إني احبك اكثر ما انت تحبني بس أكو أشياء تمنعني

ضحك وگال / لا تخافين أعرف شلون أصرف وياچ اخليچ تنسين الدنيا وألي بيها

آني بيني وبين نفسي قررت اگله بس حظي الأسود وين ما أخلي ما يگعد دائماً يصير حاجز بيني وبين اي نقطة تحول بحياتي بعدنه دى نحچي ونسمع العياط ملا أركان البيت

وهو بخطوتين صار يم الباب مال الغرفه
ويگول/ شكو سترك يا رب شصار
وبعدها ما شفته يمي واني هم عدلت حجابي وطلعت أركض بس بيت ماكو بي احد اذا نذب بي الابره تسمع صوتها

طلعت من البيت شفت مرة فلاح والباقين يركضون واني هم ركضت وراهم وصلنه يم نخله وعمي أبو فلاح جوها ويعيط ويستريح طلع خطيه واگع من النخله
وفلاح وصائب والباقين يريدون يگومه وبس هو يعيط ويگلهم عوفوني خلوني بمكاني لا تحركوني
الوجع بيه مو بيكم وما تحسون بشي من وجعي

بس الولد ما يقبلون يريدون ياخذوه للمستشفى
وهو يصيح/ لكم ولد الكلب الوجع بيه مو بيكم

وصاح فلاح على صائب گله روح حضر السيارة حتى بسرعه ناخذه

وعلى رغم صياح عمي والغلط الي حصلوا منه بس گدروا يشيلوا ويوصلوا لسياره الي محضرها صائب وأخذوه وراحوا واحنه بقينه بالانتظار نشوف شنو راح يصير وشنو بي عمي واني تقريبًا قبل هاي الحادثة ب 10 أيام اني متجاهله يزن ما أرد على اتصالاته وحتى الموبايل ما أطلعه من مكانه واشوفه گد ما فرحانه بمشاعري ويا صائب لهذا ما يهمني يزن ابد