شرفي عندك

البارت الثالث والثلاثين

البارت الثالث والثلاثين
تمنيت الزمن لو يرجع
سنين لضم روحي بقفص
منچ يا دنياي
بقلم الكاتبة الزهيريه الزهيريه

آيسن/ اني دائمًا أحب الصدفه أكثر من الموعد لان الموعد شگد نگعد نرتب رواحنه ونحضر الكلام ألي نريد نگوله والله بلحظة كله يطير وينسي اما الصدفه أحبها واموت عليها لان تكون تلقائيه ما تحضرلها تكون هي القدر مرتبها ما بيها تصنع وهذا چان حالي

أكثر الأشياء الي صارت بحياتي كلها صدف وصدفه جر صدفه الى ما وصلت الي اني وصلت عليه انه آم ثلاثة أطفال وما أدري شنو الموعظة من الي صار وأكثر شي يحز بگلبي اطفالي خطيه كل شي ما شافوا من حياتهم بالأخص جود ورودينا جود تحمل فوگ طاقته من هو وصغير ورودينا دائمآ تعاني من العازه خطيه ما عاشوا طفولتهم مثل بقية الأطفال

لهذا من تخربط يزن وگالوا بي جلطه گعدت خارج الطوارئ والله هانت عليه نفسي واطفالي حتى گامت تجيني أفكار عجيبه آنه أدخل للبيت ويايه أطفالي وأقفل بابي  عليه واجيب نفط واحرگ روحي ويايه أطفالي ونموت سوه حتى لا يبقون أطفالي ورايه وحدهم منو الهم بس ارجع استغفر ربي واگول هسه أني عشت عمري مكفخه وذل ما حرگت روحي وهسه انوب ويايه أطفالي لحگتهم على عمرهم والله من أشوف رودينا ادعي من الله يكون حظها أحسن من حظي ولو اني متأكده البنيه دائمآ على امها

ومن گاعده اجتي وحده من منطقتنه وچانت علاقتي بيهم زينه وهي صير ام باحثه يمنه وگالتلي على دموع بصراحه صفنتني شنو دموع بالبصرة شنو يگدون بيها ظليت اتحقق منها ماكو نفس كلامها ومصرة عليه مر ذكرى شريط حياتي گدامي  صح دموع مو امي بس هي ربتني ويگولون ألأم ألي تربي مو الي تنجب وما شاءالله شلون تربيه ربتني كلها تعيرني بيها وبموج وآخر مره شفت بيها دموع چانت من بلغتها إنه موج انقتلت وبعدها شفتها بالشارع تركض من دى اخذ اطفالي وبعدها أختفت دموع ولا شفتها ولا وصلني آي خبر عنها

رجعت گتلها / خاله الله عليچ شوكت تروحين للبصره اريد اروح وياچ لان اني ما اعرف احد بالبصرة ولا اندل أماكن بالبصرة

گالت / والله خالة أروح راس الشهر لان گتلچ أروح على اختي مريضه وانتي تعالي وشوفيها

حسبنه اني وياها بعد شگد على راس الشهر طلع بعد 17 يوم بعدين رجعت سألتني
گالت / خالة ليش ما يوديچ للبصره اخوچ سجاد لو زوجچ يزن

هنا حچيتلها على سجاد شلون نضم لداعش ومن تحرر العراق بعد ما ادري بي ويزن گتلها وضعه وانه جوه بالطوارئ وصار معاق
خطيه هي نقهرت عليه وظلت تسال شلون عايشين ومنو يصرف عليكم هذا السؤال الأزلي الي اي واحد يسمع بقصتنه سؤال وحد نسمعه وهو منو يصرف عليكم

رجعت أني جاوبتها شلون نصرف وهي هوايه تأثرت على وضعنه
وگالت / ان شاء الله يصير خير واني هم راح انطي رقمچ لبنتي حتى عسى هي هم ساعدچ او شوف آحد يساعدچ وبعد مبادلة الأرقام راحت واني هم گمت للطوارئ أشوف يزن وبلغنه الدكتور انه الجلطة سوت عنده ثقل بالنطق يعني الكلمات تطلع بصعوبه وبالگوه يله نفهم عليه