أول ما عاينت وراي شفت راشد واقف و واضح انو سمع كلامي كلو لأنو ملامح وشو ما كانت عاديه ...بس ما مفروض يضايق الضيق دا كلو و اصلاً انا ما قلت حاجه غلط سكتنا مسافه بعدها قلت ليهو بتردد : عايز حاجه؟
قال لي جيت اشيل الجبنه لو جاهزه جيبيها لي ، حسسني كأنو ما سمع حاجه! ابرار دخلت جوه لـ ناس أمي و انا مشيت لـ زينب في المطبخ و جبت منها الجبنه ليهو ، شالها مني من دون ما يعاين لي ، طبعاً لمن دخلت لناس أمي لقيت أبرار الشماره ورتهم انا عملت شنو ، أمي لامتني و قالت لي والله عيب العملتيهو دا! مرام قالت لي راشد دا ظاهر عليهو مسكين شديد و طبعو ما زي طبع أهل أبوي ، قلت ليها نعم نعم ! والله دا كمان اكعب منهم و فايتهم درجات انتوا بس عشان ما قعدتوا معاهو كتير ، أمي قالت لي بإستغراب : اكعب منهم كيف؟ ما تقولي لي بضربك أو بشاكلك.....يعني معاملتو ليك كعبه؟
بإستعجال قلت ليها لا لا ، قالت لي ما تكذبي علي ، قلت ليها و اكذب عليك لشنو و انا اصلاً قلت ليكم كدا عشان ما تدافعوا عنو 😅
ابرار قالت لـ أمي استحاله يعاملها معامله كعبه بتك دي يا خالتو مستهبله ساي و جاحده للنعمه ، لو معاملتو ليها ما كانت كويسه هل هي كانت حتسكت؟ أكيد لا ، المهم شويه كدا عبير اتصلت علي اتكلمت معاها مسافه بعديها اديتها تتكلم مع أمي و مرام ، أبرار قالت لي عايزا اتكلم معاها ، قلت لـ عبير صحبتي عايزا تتكلم معاك و أديت التلفون لـ أبرار ، اتونست معاها كويس و قفلت منها، قالت لي البت دي ظريفه شديد حبيتها والله ، حظك والله حماتك بت ظريفه كدا و بتحبك ، أمي قالت ليها آيي والله انا ذاتي البت دي من شوفتها دخلت قلبي والله و كان واضح إنها طيبه و كويسه ، مرام قالت الله يشوفني عبير دي ، شفتها زماااان لمن كنا صغار و هسي ما عارفه شكلها كيف ، قلت ليها ما مشكله اصلاً هي جايه عرسك بس اذا مُصره تشوفيها عندي صور ليها في التلفون ، فتحت التلفون و وريتهم صورها ، مرام قالت لي ما شاء الله البت سمحه شديد و اسم على مسمى ، ابرار قالت لي اذاً أمهم نحله عشان كدا جابت العسل دا كلو ، أمي قالت ليها امهم ما شاء الله مره مجيهه و سمحه سماحه لمن غلط رغم انها كبرت بس لسه متشببه و مهتمه بنفسها لكن هي مره فقر خلاص ، طبعاً أمي بعد ما قالت كدا طوالي عاينت لي قايلاني حـ اضايق و كدا و هي اساساً ما قالت حاجه غلط ، فعلاً أم راشد مره كريها و فقر ، ابرار قالت ليها عيب يا خالتو ، مها حتزعل و كلهم عاينوا لي ، فعشان أمي ما تحس على حاجه و اخليها تفتكر انو خالتو إشراقه بتعاملني كويس عملت نفسي زعلت و قلت ليها حرام عليك يا أمي هسي المره دي عملت ليك شنو؟....ما عارفه ليه ما حابه ناس أمي يعرفوا الحقيقه و انو راشد و أمو ما بعاملوني معامله كويسه ، نفسي ما سمحت لي اقول لأهلي حاجه ما كويسه عنهم ، المهم ابرار قعدت معانا لحدي العصر كدا و بعدها قالت لينا حـ امشي بعد دا ، حنسناها عشان تقعد اكتر بس قالت الزمن اتأخر ، طلعت معاها من الغرفه عشان اقدمها للباب ، قالت لي لمن اتكلمتي عن راشد قلتي : انا ما صدقت انو اتخلصت منو ، قصدك شنو بالكلام دا؟
طبعاً اتوترت شديد بسرعه رديت عليها و قلت ليها مش انا حـ اقعد هنا لحدي عرس مرام؟ .....يلا القصدتو اني حـ ارتاح من نقتو الكتيره ، قالت لي يخسي عليك يا حيوانه هسي رشودي دا في زول بقنع من الكلام معاهو؟ ...يشهد الله انا لو مكانك ما ابعد عنو دقيقه وحده ان شاء الله اقعد قصادو كدا بس و اعاين ليهو ، الراجل وجيه وجاهه ما عاديه ، صحي ما سألتك هو شغال شنو؟
قلت ليها بري ما عارفه! قالت لي و هي منططه عيونها: شنو شنو؟ مها انتي متخلفه ولا شنو؟ كيف يعني ما عارفاهو شغال شنو يا هبله انتي؟ قلت ليها عديل كدا ما عارفاهو ، قالت لي غلبني اقول ليك شنو و احسن امشي قبل ما تجلطيني بهبالتك و تخلفك دا ، لمن وصلت معاها باب الشارع جاني صوت راشد و هو بقول لي ماشه وين؟
سؤالو دا احرجني شديد قدام ابرار و ذاتو ما ظريفه منو يسألني قدامها حتفهم انو هو ما عايزني اقدمها أو شاكي فيني! ابرار قالت ليهو ما تخاف هي ما ماشه حته بس قدمتني لحدي الباب ، عاينت لي و قالت لي وصلنا الباب ارجعي بعد دا ، والله حركتو دي غاظتني شديد و خجلتني قدامها ، بعد ما هي مشت قفلت الباب و إتلفت عليهو و انا زعلانه شديد ، قلت ليهو كان في داعي تسألني قدامها؟ على الأقل لو ما محترمني انا احترم ضيوفي ، بسؤالك دا حسستها كأنك مانعني اقدمها! ياخ انت أي نوع من البشر ما معقوله معاك الوقاحه دي و عدم الإحترام و الذوق دا كلو ! طبعاً كان بعاين لي بطريقه ذكرتني بالكلام القلتو عنو قبيل ، شكلو شماني شديد لكن ما هاميني ، فجأه عمي آدم ناداني ، أكيد عايزني اعمل ليهو حاجه ، ياخ انا بقيت ما بطيقو من اليوم الوسوس فيهو لأبوي عشان يعرس في أمي و يعرس لينا انا و مشتهى ، خليت راشد واقف و مشيت ليهو ، قال لي شيلي ملابس راشد دي غسليها ليهو ، شلتهم من غير ما اتكلم معاهو اصلاً هم كانوا قميص و بنطلون ، لمن طلعت منو تاني ناداني و قال لي اتذكرت! ملابسي و ملابس أبوك دي برضو عايزا ليها غسيل ، طلعهم لي ردم كأنو كان منتظرني أجي من الأبيض عشان أغسلهم ليهو ، برضو ما قلت ليهو حاجه لميتهم كلهم بس ما اتشالوا لي عشان كدا وديت جزو و جيت شلت الجزو التاني ، كنت حـ اطرشق من الزعل بس قلت معليش حيقعد فترة علاجو دي و حـيرجع البلد و ساعتها حـ نرتاح منو ، مرام لمن شافتني عايزا اغسل قالت لي بعد رسمتك السمحه دي تغسلي الملابس الكتيره دي ؟قلت ليها اها اعمل شنو ، أكيد ما حيتغسلوا براهم ؟!! قالت لي و الغساله معطله كمان ! !" قلت ليها ما مشكله بغسلهم في الطشت ، قالت لي المشكله انو الملابس دي نضيفه! ....دا عمي آدم القال ليك غسليهم صح؟...اصلو فقر خلاص ، اقسم بالله انا نجضني نجاض كل يوم يطلع لي ملابس من ماف عشان أكويهم أو اغسلهم غيتو الراجل الفقر دا الله يطفشو مننا ، شويه كدا زينب جات و حلفت إلا تغسلهم معاي ، قلت ليها أبداً والله ، بغسلهم براي ، مرام قالت لي خلاص انا بغسلهم معاك و قالت لـ زينب انتي امشي ارتاحي ، زينب قالت لينا والله خجلتوني يا جماعه خلوني اساعدكم شويه والله تعبت من الرقاد دا! قلت ليها طيب انتي حـ تشري لينا الملابس ، قالت لي طيب ، المهم بدينا غسيل و زينب جابت ليها كرسي و قعدت جنبنا بقينا نتونس ساي و زينب بتشر لينا لحدي ما خلصنا منهم قبل المغرب ، لملمنا حاجاتنا و مشينا صلينا و في ليلنا داك كويناهم عشان عمي ما ينق فينا ، بعد ما صليت العشا طوالي نمت و خليت مرام و زينب بتونسوا ساي....
بعد تلات أيام اتصلت على عبير و اتونست معاها و الكلام جاب الكلام و جبنا سيرة راشد ، قلت ليها بالمناسبه اخوك دا شغال شنو؟ ضحكت بصوت عالي و قالت لي ما حـ استغرب والله حتى لو قلتي لي اخوك دا اسمو منو! ...المهم يا مها أخوي دا شغال في شركه بتاعة إيراد و تصدير و عندهم عدة فروع برا السودان عشان كدا هو بسافر على طول زي سفرتو الهسي دي ، طبعاً انا كنت بشرب في مويه فلمن قالت لي كدا انشرقت و كنت مستغربه كيف يعني سافر؟ ... أصلاً هو متين مشى من بيتنا عشان يسافر ؟ صح انو في التلات أيام دي ما شفتو بس لو كان سافر كنت حـ أعرف! و الغريبه ما سمعت زول من ناس بيتنا قال انو مسافر أو سافر ، قلت ليها سافر متين؟
قالت لي برضو ما حـ استغرب لو قلتي لي انك ما عارفاهو سافر ، قلت ليها حـ اعرف من وين يا عبير و هو ما قال لي! مع اننا في نفس البيت بس والله لا كلمني لا سمعت من زول ، قالت لي صح انو راشد زول عصبي و مزاجي بس لمن يكون مسافر بكلم الناس على الأغلب ناس بيتكم عارفين بس انتي الوحيده الما عارفه إنو سافر قبل 3 أيام! .....
قلت معناها لمن عمي قال لي غسلي ليهو ملابسو كان مسافر!؟ اذاً سافر تاني يوم من الصباح!؟ قالت لي انتوا متشاكلين ولا شنو؟ قلت ليها لو متشاكلين ولا لا اخوك مستحيل يجي لحد عندي و يقول لي انا مسافر ، غرورو و كبريائو ما بسمح ليهو بس ما مشكله هو حُر ، قالت لي انتوا الإتنين بتبالغوا والله ، المهم بعد ما قفلت منها قلت على راحتو ما كلمني ما كلمني و ذاتو ما مفروض اضايق من تصرفو دا....و منو القال انا مضايقه !؟ انا مضايقه في حتة انو ما اتكلم مع أهلي بخصوص طلاقنا ، شكلو ما ناوي يخليني في حالي و يحررني من السجن الأنا فيهو دا ، مشيت قعدت مع ناس أمي و بيجاي بيجاي قدرت اخليهم يجيبوا سيرة راشد عشان اعرف هم عارفين انو سافر ولا لا ، أمي قالت لي كنا قايلنوا حيقعد معانا لحدي يوم العرس لكن فاجأني لمن قال لي مسافر ، مرام قالت لي اها سافر برا السودان ولا لسه! قلت ليهم انتوا عرفتوا من وين؟ ....كلهم عاينوا لي بإستغراب! كذيت عليهم و قلت ليهم قصدي ما متذكره اني قلت ليكم انو راشد حـ يسافر! لمن كلمني انو مسافر نسيت اقول ليكم! امي قالت لي في نفس اليوم الغسلتي ليهو فيهو هدومو جا بليل قال لي عايز ملابسو و كلمني انو حيرجع الأبيض بكرا و منها حيسافر برا السودان و انا نسيت اسألك منو اذا سافر أو لا! قلت ليها آيي سافر ....معناها هو قصداً ما كلمني و يمكن شاف انو ما ضروري اعرف و فعلاً ما ضروري ، انا مالي مضايقه نفسي على الفاضي! ياخ يسافر برا السودان ولا برا الكوكب ذاتو انا مالي و مالو!؟
أمي قالت لي والله انا مع لخمة عرس مرام و التفكير الكتير في الحاجات العايزنهم نسيت إنو خلى ليك قروش معاي في يومو داك ، لأنك كنتي نايمه اداني ليهم انا ، القروش في دولابي امشي شيليهم ، قلت ليها اشيلهم شنو يا أمي خليهم ساي حـتحتاجي ليهم ، قالت لي بري ما محتاجه والله ، قامت من محلها و مشت غرفتها و جابتهم لي ، قلت ليها حسستيني اني غريبه عنكم! قالت لي ما كدا لكن ديل حقاتك و انا والله ما محتاجه ليهم ، قلت ليها بس يا أمي.....قاطعتني و قالت لي اسمعي الكلام ، قفلنا الموضوع دا و أمي قالت لي مشتهى بتسلم عليك ، قلت ليها اتصلتي عليها متين و ليه ما أديتوني اتكلم معاها؟
قالت لي أمبارح اتصل علي توفيق و قال لي انو الليله ما مشى الشغل عشان يخلينا نتكلم معاها ، و قال ليك انو حاول في تلفونك بس ما خشى معاهو و انشغل شويه قال أكلمك عشان ما تقولي غشاك لمن قال ليك برجع البيت و بخليك تتكلمي مع مشتهى ، قلت ليها طيب انا كنت وين؟
قالت لي كالعاده نايمه والله لمن حيرتيني يا بتي انتي في حاجه واجعاك لمن بتنومي كدا؟
قلت ليها خلاص يا أمي تاني نهاي ما حـ أنوم مدام نومي دا مضايقك ، قالت لي ما كدا ، انتي ما كنتي بتنومي بالنهار بس لاحظت ليك من جيتي بقيتي تنومي بالنهار! قلت ليها والله فجأه كدا بحس نفسي نعسانه ، قالت لي خلاص نومي ساي ، قلت ليها اها مشتهى ما قالت ليكم جايه للعرس؟
قالت لي قالت حتجي خلال اسبوعين كدا ، قلت ليها كويس والله ، قالت لي راشد قال ليك انو ماشي لناس مشتهى ؟ قلت ليها بإستغراب لا ما قال لي! ...يعني هو مشى ليهم؟ قالت لي دا كلام مشتهى قالت قعد معاهم يوم واحد و بعديهو طوالي سافر برا السودان ، مرام قالت ليها بكون مشى يشوف الأراضي حقاتهم و شغل الرواعيه ماشي كيف ، أمي قالت ليها يمكن ....
بس انا لسه كنت مستغربه ، عبير ما قالت لي انو هو مشى البلد! معناها هي ذاتها ما عارفه و هو ما كلم زول! طيب مشى ليه؟
المهم بعد اسبوعين مشتهى جاتنا ، شكلها كان متغير شديد حتى لونها ضلم و ملامح وشها كلها تعب و إرهاق ، قعدت جنبها و قلت ليها مالك يا مشتهى؟ حاصل عليك شنو؟ أمي قالت لي حامل عشان كدا ، بقيت بعاين ليها بس و كلمة حامل دي بقت تتردد في مسمعي! مع اني عارفه انو دا شي طبيعي و متوقع بس بالجد ما قادره استوعب انو مشتهى أختي الصغيره ديك حتبقى أم! الموضوع بقى لي غريب غريب و بعيد شديد ، طبعاً أمي بعد ما قالت كدا عاينت لي مسافه طوالي قمت منها ، قالت لي ماشه وين اقعدي عايزاك ، قلت ليها والله تتكلمي معاي بالشي الفي بالك أطلع ليك ما البيت دا ، قالت لي قولي بسم الله هسي انا سألتك؟ ....كنت عايزا اقول ليك امشي مع ابرار السوق و جيبوا لينا حاجات ضروريه.....متأكده انو أمي ما كانت عايزا تقول كدا بس لمن قلت ليها بطلع و بخلي ليك البيت كلامي كان جادي شديد ، ياخ انا ما صدقت اني حـ اتخلص من الفقر الإسمو راشد داك و بعد فتره حـ نطلق ، أمي قالت لي اذا ما بتقدري بمشي انا أو بخلي حذيفه يجيبهم و احسن يجيبهم حذيفه ، قلت ليها طيب خليهو يجيبهم ، طبعاً حذيفه أخوي كـ عادتو دايماً متشاكل مع أبوي و اغلب الوقت برا البيت ، لمن يجي نهاي ما قاعده اقعد معاهو لا هو لا عمر لسه زعلانه منهم و ما ناسيه انهم ما حاولوا يمنعوا العرس دا و خلوا أبوي و عمي يغصبوني عليهو ، حتى بعد العرس ما حصل رفعوا سماعة التلفون و اتصلوا علي....المهم بعد الفطور حذيفه جا داخل المطبخ لقاني هناك قال لي اعملي لي جبنه ، من غير ما اعاين ليهو قلت ليهو تمام ، قعد في الكرسي و بقى يحاول يفتح مواضيع معاي و انا نهاي ما أديتو فرصه ، عملت ليهو الجبنه و طلعت خليتو ....بعد يومين عمتي بثينه جاتنا مع بناتها الإتنين اسمهم سندس و إستبرق عشان العرس قرب و كلنا بقينا مشغولين مع ترتيبات العرس و قسمنا الشغل بيناتنا ، في يوم كنا بنخبز و مساهرين لحدي الساعه 12 ، انا لمن تعبت قلت ليهم حـ ارتاح شويه ، مشيت دخلت جوه و فصلت تلفوني من الشاحن و انتبهت انو في مكالمات فائته لمن فتحتو ، لقيت المكالمات دي من عبير ، يمكن متصله علي زي 12 مره قبل 5 ساعات ، قلقت شديد و قلت احتمال عمي حصلت عليهو حاجه ، رجعت اتصلت عليها كتير بس تلفونها كان مغلق و رقم رامي ما معاي دايماً بنسى اشيل منو رقمو فما كان قدامي حل غير اتصل على راشد مع انو ما عندي نيه اتكلم معاهو بس قلت لو حصلت حاجه على ناس بيتو أكيد حيكون عارف ، طبعاً رقمو الكان اتصل بيهو علي داك لسه معاي في سجل المكالمات بس ما كنت مسجلاهو ، المهم اتصلت عليهو مره و مرتين فتح الخط في المكالمه التالته ، ما عرفت اقول ليهو شنو فجأه كدا بقيت بكمه و هو شغال يقول آلو مها! انتوا كويسين؟ في شنو؟ بتكلم معاك انا ياخ!؟
طبعاً اكيد حيقلق و انا متصله عليهو الساعه 12 بليل ، من صوتو عرفت انو ماف زول من ناس عمي حاصله عليهو حاجه أو يمكن في حاجه حاصله و هو ما عارف؟
_ مها اتكلمي ياخ في شنو؟ حاصل عليك حاجه؟ طيب ناس بيتكم في زول منهم حاصله عليهو حاجه؟
=....
_ أبوي كويس؟ ....اتكلمي يا بت الناس ما تحرقي لي اعصابي!
= حـتطلقني متين؟
والله فجأه كدا لقيت لساني بقول ليهو "حـتطلقني متين " جاط شديد و قال لي متصله علي الساعه 2 ص ، عشان تسأليني سؤال زي دا؟ مجنونه انتي؟
قلت ليهو المهم جاوب على سؤ.....قبل ما أتم كلامي قفل الخط في وشي ، اقسم بالله غاظني غيظه ، بس هو ليه قال انا متصله عليهو الساعه 2ص مع انو حالياً الساعه 12 بليل! ....اتذكرت انو هو برا السودان و أكيد في تفاوت في الزمن ، الحاجه الإنتبهت ليها انو صوتو كان متغير شديد زي الكأنو عيان ....ئهه ياخ انتي مالك و مالو يمرض ولا يموت عديل ما عندي بيهو شغله ...
رجعت تاني لموضوع عبير و بقيت اسأل نفسي هي اتصلت علي لشنو! ما كلمت راشد عشان ما يقلق ساي و هو بعيد عن أهلو خاصة بعد ما سمعت نبرة الخوف و القلق في صوتو ، رجعت تاني و اتصلت على عبير بس تلفونها مغلق ، شيلتني هم والله ، هسي في آخر الليل دا انا اتصل على منو عشان اعرف الحاصل عليهم شنو!؟
رقدت في السرير بس النوم غلبني والله ، حتى التعب الكنت حاسه بيهو طار مني ، بقيت ماشه و جايه في الغرفه و كل دقيقتين بتصل على عبير و تلفونها لسه مغلق في الآخر لما وصلت حد القلق مشيت كلمت ناس أمي ، عمتي بثينه قالت لي لو كان حاصله حاجه كانوا اتصلوا على ناس أبوك ، امي قالت لي كلام عمتك صح كانوا حيتصلوا علينا زي ما عملوا لمن عمك صلاح تعب و وديتيهو المستشفى ، عمك رضوان طوالي اتصل على ابوك و كلمو و بقى متابع معاهم بالتلفون ، كلام أمي و عمتي ريحني شويه و يمكن بالجد ما حاصله عليهم حاجه ، قلت ليهم طيب عايزني اعمل ليكم حاجه ولا خلاص لأني بالجد نعست و عايزا أنوم ، عمتي بثينه قالت لي امشي نومي ساي نحنا ذاتنا خلصنا ، مشتهى و بناتي هسي خشوا ناموا، باقي الحاجات دي انا و أمك حنلمهم ، قلت ليها طيب تمام رجعت الغرفه و طوالي رقدت و بعد مسافه نمت....
في اليوم البعديهو بعد ما شربنا الشاي جاتني مكالمه من عبير ، قلت اللهم اجعلو خير و طوالي فتحت الخط ...
يتبع........
