قــدر الــمــنــحــوسة ( الجزء التاني )

الفصل 13

روايــة "قــدر الــمــنــحوســة2"📖...
بــقــلــم🖋📚"Fatima Z-F"📚..

عيا ما يصبر فراسو لكن مقدرش ضرب دورة و تبعها كيجري حتى قرب حداها وهو يوقف مكمش حجبانو من بانت ليه نقطة حمرة كتبان فسروال لور ..
بسرعة وصل عندها دور يدو على خسرها و جرها عندو بجهد ..ضهرها لصق مع ضهرو و انفاسو كضرب فادنها ..
نطق بصوت هامس ..
-غير انا
تقطع نفسها بجبدة لي جبدها و اليد لي لتفات على خسرها... كتحاول تفهم شنو واقع حتى تهز قلبها من سمعات صوتو حدا ودنها "غير انا" ...
بقا قلبها كيضرب بجهه و انفاسها تسارعو ..حولات تمالك نفسها و تبعد وهو زاد لصقها معاه كتكثر...زاد خلاها تجنن وتخسر معاه الهضرة ..
عفراء: المرض واش نتا مريض فكرك ولا مالك ..شهاد لبسالات و قلة لحيا ...
تفلتات ليه صوت ضحكة من بين شفاه ديالو زاد صعرها بردت فعلو ..بغات دور وهو ممخليهاش...
جعفر: متحركيش ...
مبقاتش كتسمع ليه بدات كتحرك بجهد ..بغاتوتهرب من بين يدو معصبة وهو مزير عليها مباعي تا حد يشوف داكشي...
جعفر: رصااي اندير عليك غير قامجة و نبعد...
كتنهج بشراسة و وجها رجع حمر ..
عفراء: واااش شكييت عاليك تعطيني شي خراا ولا زبل ديالك ..طلق الحمااار يخخ طلااااااق ...
جعفر تحرج : انا بغيت غير نعاونك...
عفراء: متعااوني ماا نعاااونك ..جمع يديك قبل ما نعيط لي يجي يهرسهم ليك...
بدا كيحل صدايف قامجة ديالو بيد و يد مزال مدورها على خسرها ..فور ما سمع كلماتها تبسم ..
جعفر: شكون !!...علال و لا عبد القادر ...
عفراء بصدمة: منيين كتعرف خوووتي...
فهاد اللحظة حيد قامجة ديالو حطها على كتافها و حيت كانت طويلة غذات مؤخرتها كاملة مع طبعة لي كانت واضحة فسروال ..
بغات تحيد القامجة وهو يدورها عندو ..تقبلات معاه وجهاً لوجه وهو راسم ابتسامة جميلة و الحنية واضحة فعينو تجاها ...
ونطق بهدوء : كنعرفهم مزيان...
عفراء بدون فهم: علاش كتشوف فيا هكداك...
جعفر زاد وساعت الابتسامة ديالو و زينات وجهو الوسيم و تقاسيمو الرائعة و نطق ببساطة ..
جعفر: حيت نتي زوينة ... زوينة بزااف ...
الكلمة لي لو تنطقات فوقت اخر كان ممكن تقبلها لكن دابا كانت معصبة ...
عفراء: اسيدي نكوون زوينة و لا خااايبة ماااشي سووقك و ماشي من حقك تعنقني وتبسل عليا هاد لبسالة...
جعفر مد يدو بغا يعاونها تلبس القامجة ..
-مغاديش نعاود ولكن لبسي القامجة..
عفراء تجننات : واش كنبان ليك عريانة ولا شنو...
جعفر هبط نضراتو وخا تحرج مقدرش يزيد سوء تفاهم لي بيناتهم ..
-شي حاجة خرجات ليك فسروال لبسي القامجة باش متبانش...
رجع وجها حمر تحرجات لأقصى حد و قطعات لكلام من عرفات اش قصد...
تقدم عندها و قرب لمسافة لي بيناتهم ..واقف حداها لدرجة انفاسو كتحس بيه على جبهتها..بدا كيلبسها القامجة بصمت ..دخل ليها يديها فلكمام و سد صدايف بشوي ونطق بهدوء...
جعفر: حاجة طبيعية كتوقع لبنت ونتي ممسؤولاش عليها معندك علاش تحرجي ولا تحشمي تا حد ما شاف داكشي...
زيرات على سنانها بجهد...
عفراء: نتا شفتي ...
جعفر بحنان : بوحدي ...
دفعاتو عاضة على شفاه ديالها بجهد ..دربات دورة و تمشات بسرعة ...وقفات و رجعات دارت عندو لقاتو واقف و نضراتو تابعينها ..بقات كتشوف فيه بصمت حتا نطقات بهدوء...
عفراء: جــعــفــر ...
جعفر ميل راسو بإبتسامة و رد عليها بحب واضح فصوتو..
-عـفـراء...
هبطات راسها و رجعات هزاتو فيه ...
عفراء: متستاهلش تسما بهاد سمية ....
خلاتو واقف كيضحك ورا كلامها و توجهات لدارهم اتموت بالحشمة ...
دخلات لحمام كتأكد من المراة ديال دوش حتا بانت ليت بقعة حمراء خلات لون يمشي من وجها ...تزيرات مكرهاتش لأرض تشق و تبلعها فهاد الموقف لي تحطات فيه ...
دغيا بدلات لحوايج جداد و دارت لحماية باش متوقعش فنفس الغلط ..بانت ليها قامجة ديالو محطوط فوق سرير وهي تهزها رامتها فزبل معصبة و رجعات لبيتها كتقاد حالتها و كل مرة توقف تسها و ترجع تكمل شغلها وهي تنهد بجهد ..رجعات هزات القامجة من زبل ..
دخلات صبناتها وخا عمرها صبنات شي حاجة..دارت معاها جهدها و طلعات لسطح نشراتها و هبطات مع اصوات زغاريت ..كتشوف فيهم بدون فهم..
عفراء: اش واقع
علال كيضحك: ليوم ايجيو فليل شي ناس يخطبو مينة ..
عفرء شافت فمينة لي كتفرنس فجنب الحيط .. عرفات شكون جاي ...
لطوف : شكون هاد ولد ناس ا ولدي..
علال: داك المحامي امين لي عجبك امي عقلتي عليه ...
لطوف بفرحة: الله يا ولدي و شكون ينسا داك ولد الاصل ...
علال : اوا هو اميمتي هاد صباح جا عندي الخدمة و هضر معايا ..قالي نهار شفتكم بنتو لي ناس معقول بزااف و كيف ايها الناس مشا كيسول على راسو و سمع عندي بنت اوا قالي بغاها لزواج و ايجي هو ومو يشوفوها ..
عفراء هزات حاجب و هبطات لأخر شافت فمينة كدور فراسها و نطقات بينها و بين راسها..
-اوا الله يمسخكم بجوج...
فدار امين ..تابع مو تالف وهي كتقول ليه اش خاص وهو كيقيد شاد معاها الخط...
الحاجة: كل هادشي جيبو و عنداك تنسى لورد و لحليب و تمر عامر و لحلوى غير ديال لوز داكشي يكون مفخفخ..
امين: وا الحاجة راه غير انشوفو البنت ماشي انخطبوها...
الحاجة: اسيدي من شوفة كيبان البرهان مغاديش ندخلو عند ناس بيدينا خاويين و يشوفو فينا ناقص.."مدات يديها"..ارا نيت واحد 2000 درهم نمشي نشري شي حوايج ندخلوهم كادو..
امين بدون فهم : شمن حوايج ...
الحاحة: جوج تواب ديال جلابة بصاكهم و صباطهم و جوج ريحات و المكياج و الحنة و جوج بيجامات و جوج تواب قفاطن و توب جوهرة وشي شربيل...
امين حل فمو ما عرف ما يقول ..جبد لفلوس عطاهم ليها معاودش الهضرة ..
الحاجة: عنداك تنسى كراطن ديال سكر راه عيب ندخلو عند ناس بلا سكر...
امين : هادشي كامل لي قلتي ، قالب سكر لي عليه كلشي ..
الحاحة: اوا زواج هو هذا عنداك تصحاب لعب و تبرهيش...
حط يدو على فمو معاودش نطق و اية كتمشى بشوي مزال مقدراش تمشى كيف العادة جلسات حدا جعفر..
اية: مبروك عليك اخويا امين ..
امين: الله يبارك فيك اختي لعقوبة ليك...
هبطات راسها بحزن و جعفر تبسم وقرب لعندها ..
-غادي نمشيو لخطبة مخاصك والو ...
اية بدون فهم: انمشي معاكم ..
الحاجة: وعلاش ابنتي فين غادي نخليك ضروري رجلي برجلك ...
ترسمات ليها ابتسامة على وجها و بداو عنيها كيلمعو فجعفر..
-بغيت ناخد قفطان نلبسو...
جعفر : وخا الالة..
جبد البزطام ديالو مد ليها لفلوس ...
-سيري مع الحاجة خودي لي عجبك ...
عيونها كيلمعو حطات يدذها على قلبها كضحك غير وحدها و هو كيبادلها الابتسامة...
جعفر: فرحانة دابا ...
حركات راسها بسرعة: اااه بزااف ...
جمع الوقفة : انا انتبع امين نعاونو ..قدرتي تمشي مع الحاجة سيري مقدرتيش تا نجي و نديك تشري قفطان صافي ...
اية : لا غير سير انمشي مع خالتي ...
تبع امين يقضيو شغل ديال تقضية مركزش مع نضرات اية لأنها فعنيه مجرد طفلة كيحاول يعوضها بلي قدر عليه ...
وصل ليل ..مجموعين فبيت مينة لي الفرحة و الخلعة تخلطو عليها..لابسة بيجامة بيضاء مضورة عليها زيف و مخليا وجها طبيعي وحداها عفراء مفقوصة بغات تاكل راسها...
عفراء: واااش هاد نااس ايجيو يخطبوووك نتي و لا انا ...
مينة : وصافي تا نتي راه غير شوفة ...
.عفراء: شمن شووفة هادي لي تخرجي عندهم بالبيجامة ديال نعاس و شقا ..سيد جاي يدوي فيك يخطبك يعني تخرجي عندو بالقفطان و مزينة راسك ماشي خارجة عندو بحالي اتقضاي عند مول لحانوت..
بشرى: شوفي اديك المنحوسة بعدي ليا من بنتي خليها فراحتها لبسي غير نتي و تقادي غير نتي ..
جلسات كتسوط لابسة فراشة فالاسود وشداها بصمطة دهبية ..خلات شعرها مطلوق لجنب و مزينة ادنها بحلقات دهبية و لفراشة مفتوحة من جناب كتبين رجيلاتها لبويضين و صندالة لعالية لي زيناتهم كتر ..
هزات ريحة رشات فعنقها و يديها وجمعات الوقفة مشات عند مها مبقاتش مسوقة لمينة لي باغية دير ضحك فراسها حسب عقل عفراء ...
دخلات عند مها لكوزينة حلات كراطن لحلوى هزات منهم لي خاصها و جلسات كتاكل و لطوف تشوف فيها و ضحك...
-تقولي ابنتي غير نتي لي عروسة وجايين يشوفوك ..
عفراء: شفتي بنتك شحال غزالة ..
لطوف : زيينة ا بنتي كتحمقي تبارك الله عليك...
عفراء: اوا قوليها لهاديك لي اتخرج بالبيجامة لناس دير فراسها شوهة ...
لطوف: غير خليها على راحتها راكي عارفة ...
سمعو دقان فالباب وهي تحيد لطوف بزربة تزارة ديالها و قدات زيفها ...توجهات عند ولادها و راجلها كترحب بضيوف فرحانين وضيافهتم ديال ناس لكبار و الابتسامة مزينة ملامحهم...
دخل امين و الحاجة كيتعرفو بناس و اية من وراه كتفات غير بسلام من فمها و تابعة الحاجة حتى تم داخل هو بلباسو الاسود الانيق و وسامتو المعهودة..
راسم ابتسامة وحيت لطوف و سي لعربي توجهو لصالون مع ناس مشافوهش سلم عليه علال و عبد القادر لي معرفوهش بينما هو عينو كتفحصهم.. كبرو على صورة لي كانت عندو فداكرتو..
حيد صباطو و جلس حدا امين مبتاسم فسي لعربي و لطوف لي هزو فيه عنيهم من جلس حتا تبدلات ملامحهم وعيونهم تغرغرات بدموع ...
جمعو لوقفة خرجو معارفين كيف يتصرفو ...
لطوف: حعفر هداك ..عيني ميكدبوش عليا ...
لعربي: انمشي نسولو...
لطوف: بلاتي اش انقولو لعفراء لكان هو...
كيهضرو مشافوش عفراء لي خرجات عند ضياف بأبهة حلتها ..دخلات بإبتسامة ...
-مرحبا بيكم ...
عينو مركزين معاها وهي داخلة شافت فيه و بزربة بعدات نضراتها وهو مفتون بيها واضح كلشي من نضراتو تجاها ...
الحاجة شافت فيها وعجباتها بزاف ...
-تبارك الله اجي ابنتي جلسي حدايا ...
عفراء مشات جلسات حداها دايرة صواب و خا مكتحملش امين ...
وامين كيفرنس غير وحدو ...
-اهلا ختي عفراء كيف دايرة لباس عليك ..
عفراء: الحمدلله ..اسيدي صدمتيني مكناش معولين نتناسبو مع سيادتكم ..
امين تبدل فيه لون: المكتاب في ما اختاره الله..
الحاجة بدون فهم: علاش ابنتي ماشي نتي لي جينا نخطبوك ...
جعفر جمع حجبانو لوسط بينما علال قال...
علال: هادي ختي صغيرة ...
دخلات لطوف كضحك و عينيها كيمشيو لعند جعفر ...
لطوف: هي وبنت ولدي بنات عام واحد بزاف ناس كيغلطو بيناتهم ...
الحاجة تبارك الله كون كان عندي شي ولد اخر كون زوجتها ليه ..
"سكتات من شافت فجعفر حطات يديها على دراعو و كملات كلامها"...
-لا ...كاين ها هو ولدي جعفر متلقاوش بحالو لبنتكم...
تسمعات شهقة و بكاء من لطوف لي صدمات كلشي نطقات وسط بكاءها و يديها كضرب صدرها ..
لطوف: جــعــفــر..ولديي جعفر يااك ..ولد لكبيييرة ...
جعفر عينو ولاو حمرين : هو هذا الالة لطوف ...
كلشي لي سمع جوابو تصدمو بقوة وعنيهم خارجين ..تلاحت عليه لطوف كتبكي بقوة وتنطق من بين شهقاتها..
- كبرتيي اولدي..كبرتي و وليتي راااجل...
عيونو رجعو حمرين ولطوف كتبكي فصدرو و لعربي فجنبو كيمسح دموعو ويشوف فيه....
كفاش داك طفل ابن قبيلته جعفر هو لي قدامهم... راجل كامل متكامل ..تا قالو محال يكون عاقل علينا و جبدو سميتو غير ايام سابقة معولين على زيارة قبيلتهم لأجله..
و اليوم في هذه الساعة و اللحظة ..واقف امامهم بشحمه و لحمه ..معترفاً انه جعفر ابن الكبيرة ...
الكل حاوطو بعناق حار و مبكي معرفو ما يقولو لأن الكلمات حبسات ليهم فالحلق اما امين و مو مفاهمين والو بقاو بعاد كيسمعو باش يفهمو شنو واقع و طاري ...
اما هي مزال جالسة فبلاصتها كتغمض عنيها و ترجع تحلهم و اضافرها داخلين فيديها بقوة ..محساش بالالم اكثر من دقات قلبها المتسارعة وتنفسها الحاد ..ممتيقاش ان هذا لي قدامها هو جعفر لي كتعرف ...
بقات في صدمتها و حيرتها الشديدة والاحداث لي وقعو بيناتهم كيرجعو بين عنيها لقطة بلقطة حتى وقفات كتنفس بجهد و دموع مشكلين فعنيها و جسدها كيرجف...
قربات لعندو جرات امها بجهد من صدرو و وقفات قدامو كتشوف فعينو وهو كذالك كيبادلها نفس النظرات فيهم بريق من الاشتياق و اللهفة تجاها...نطق اسمها بكل المشاعر لي فقلبو...
-عفراء...
نطقات بين سنانها مزيرة عليهم ..
عفرء: كنتييي عااارف...
مقدرش ينكر وحرك راسو بالايجاب ..
جعفر:اه..
تقهرات، بداو دموع كيهبطو كتر..
عفراء: كنتي عارفني من الاول؟؟ ...
مقدرش يهز يدو يمسح ليها دموعها قدام والديها كتفى فقط انه يرد على سؤالها...
جعفر: لا....
مسحات دموعها بزربة بضهر يديها وهما كيزيدو يهبطو ...
عفراء: من عنقتيني كنتي عارفني انا هي عفراء...
ساط بجهد و غمض عينو نادم...
جعفر: عفراااء...
قطعاتو..
-جاااااوب !!!!..كنتي عااارف...
جعفر : اه كنت عارف ..
حسات بالغضر منواتهاش منو هو لي كانت عطياه قيمة فقلبها كثر من اي واحد بل كتر من والديها لانه هو لي خاطر بحياتو باش يعتقها ..هو لي حماخا و خلا ضهرو منو لعافية كتنهش فجسدو وكتحرقو و رغم دالك متخلاش عليها...
عمرو نعتها بالمنحوسة...
كلشي هادشي خلاها تبني صورة ليه ما يوصل ليها تا حد فقلبها و ذاكرتها ..
فقط اسمو مكتحملش شي حد يتشبه بيه وهو الان قدامها نفس شاب لي كانت كتقارونو بجعفر لي فذكرتها ..
نطقات بألم كاارهة...
-كتلعب بياااا...
جعفر تغيرو ملامحو : بلاتي نشرح ليك.....
دفعاتو بجهد كتبكي..
-شغااادي تشرح نتاا عااارفني شكوون انا ...و ساااكت، علاااش متقوولهاااش لياااا ...عاااجبك الحاال ضحك عليا ...
سي العربي مفاهم والو دخل بيناتهم..
-اش واقع مالكم ...
جعفر تزير : مواقع والو....
لطوف كتمسح نيفها و صوتها مجروح..
-كتعرفو بعضياتكم...
عفراء بعصبية عنيها رجعو حمرين..
-سولووه هواا..
خرجات من صالة طلعات مباشرة لبيتها ممهتماش بصراخ جعفر بإسمها...
زدحات بابا بيتها بجهد و رمات جسدها فوق السرير مخبيا وجها فالمخدة وخلات دموعها و شهقاتها يتحررو..
بقا فيها الحال بزااف ..فرحانة بلقاء جعفر و لكن اكثرية متألمة لأنه خبا عليها شكون هو...
كتسول راسها علاش مصرحهاش من الاول ...علااش خلاها تقلل عليه لحيا و تعايرو بكلام ماشي ديالو ...
خلاها تبين وجها الخايب ليه وتبين عصبيتها و فمها السام و شخصيتها العصبية ...
من نهار عرفاتو وهي كتعايرو و تنقص منو وهو ساكت ليها..من كتفكر شحال قالت ليه كتمنى الارض تشق و تبلعها...
بكات بزاف لدرجة محساتش بالوقت ..سمعات لباب تحل و نطقات بصوت مكتوم..
- بغيت نبقى بوحدي...
جلسات على طرف السرير كتشوف فبنتها ودموع فعنيها ...
لطوف: علاش ابنتي قللتي عليه لحيا قدام ناس و خوتك...
عفراء زادت خبات وجها فالمخدة كثر ..
-خليني امي عافك بغيت نبقا بوحدي...
لطوف تنفسات بجهد ...
-بغى يهضر معاك ..
عفراء: ما بغيييت نهضر مع تا واحد اماما قوليه يمشي بحالاتو مبغيتش نشوفو ...
لطوف دورات يديها على بنتها جبداتها و عنقاتها بجهد حطات ليها راسها فصدرها ...كطبطب عليها بلطف..
-مالكي ابنتي كضيعي رزقك من بين يديك...
بقات ساكتة بدون ما ترد كتفات لطوف تنهد بجهد و نطقات بألم واضح فصوتها ..
-نوضي جمعي حوايجك...
هزات راسها فأمها..
-علاش؟؟
لطوف: غادي نرجعو لقبيلة ...
عفراء بعصبية : مغاادييش نرجع و الله لا رجعت و خا تقتلوني تااال ديك القبييلة لااا لاااااا....
لطوف حطات صبعها على فمي ..
- سكتيييي..نوضي ديري داكشي لي قلت ليك بلاا هضرة ...
عفراء شدات ليها يديها بتوسل: عافك امي مبغيتش...
لطوف حيدات يديها ..
-لبسي شي حاجة طويلة ..
"سكتات كتنفس ضاق عليها صدرها وكملات كلامها بصوت مخنوق"...
- ام جعفر...لكبيرة ماتت...
واقف مع صاحبو لي ما عرف امتا تحولات لخطبة ديالو لجنازة ...دور راسو لعند جعفر لي كيشوف بعيد ساهي ...
امين: مكنتش متوقعك كتعرفهم...
جعفر مزال كيشوف بعيد ..
- ولاد قبيلة وحدة غير زمان فرقنا...
امين: لبنت لي كنتي كتهضر عليها باغي تخطبها هي عمت مينة...
جعفر حرك راسو : اه هي....
امين تنهد بجهد: شهاد دنيا صغيرة سبحان الله..دابا شنو غادي دير ...
جعفر: انرجع لقبيلة ..
امين: و الخدمة...
جعفر عض فمو من لداخل وصبعو كيضرب فطبلة نطق بشوي...
-مغاديش نغيب بزاف ، غادي نسالي شي مسائل و نرجع...
امين: وديك جهنم الكــ.... "سكت و بزربة بدلها "..كنقصد عفراء شنو ادير معاهم ...
جعفر تنهد بجهد: معرفتش..نوصلو لقبيلة و يكون خير ..
امين : هما ايمشيو لقبيلة ...
جعفر: والديها بغاو يزورو قبر الواليدة ...
امين حدر راسو ساكت تا ولا كيضحك غير وحدو..
-ماعرفت واش نبارك ليك نتا ولا نبكي على راسي مشيت نخطب صدقت خارج خاوي...
جعفر تبسم و ضرب كثف صاحبو ..
-عرفتي تختار ...
امين فرح: الله ينورك اخويا ...
خلا صاحبو و توجه لبيتو بدا كيجمع حوايجو و كل مرة يوقف من كيتفكر عفراء و كلامها ....ساط بجهد وعول على لي فبالو يوقع فأسرع وقت ..
صبح صباح ومزال لوقت بكري ...قدام دار كتواجد تلات سيارات وحدة لي جا بيها جعفر مسلفها من امين و لاخرا ديال علال و عبد القادر ...
مجموعين مع جعفر كيهضرو معاه و يضحكو يفكروه فجعفر صغير وايامهم فالقبيلة ...
خرجو لعيلات وهي تبعاهم من لور لابسة جلابة فشيبي وجامعة شعرها ... عنيها حمرين و منفوخين باين انها بكات بزاف و وجها صفر حادرة راسها مافيها لي يهضر ..دازت من حداه بلا متقول ليهم سلام بينما هو متبع ليها العين مقدرش يهضر ..
شداتها مها من شافتها غادي تركب مع علال ونغزات راجلها لي حداها ...
لطوف: لعربي ركب نتا مع علال ايكون نسا طريق لقبيلة ...
علال بدون فهم : لا الواليدة مزال عاقل عليها ..
لطوف مخنزرة: جوج عقول خير من عقل واحد اولدي ..
سكت لعربي و جلس حدا ولدو وهي جرات معاها عفراء حتى وقفو قدام جعفر ..
لطوف فرحانة بشوفتو:كيف صبحتي اولدي مزيان ..
جعفر: حمدلله...."شاف فيها بحزن من وجها لي مخطوف منو لون"...عفراء مالكي ...
لطوف حبسات لبكية بزز : غير من سمعات لخبار على لكبيرة مبغاتش تسكت من لبكا بزز باش نعسات واحد شوي.
حلات لطوف لباب جلسات لورا وهي بقات ساكتة حادرة راسها ..دازت من قدامو دور لجهة لأخر تجلس حدا مها وهو تبعها ..
شاف بنص عينو كلشي دخل لسيارتهم ..مد يدو دار راسو ايحل ليها لباب و يد لاخرى دورها على خسرها ....جبدها عندو هزها دخلها فصدرو و معنقها بجهد خلا انفاسها تهرب ما بين شفاه ديالها ...
همس ليها حدا ودنها وانفاسو الساخنة كضرب فودنها ..
-توحشتك بزااف.....
كابر على فكرة انها ديالو وهو ديالها ومن لقاها وهي قدامو مقدرش يتمالك نفسو ..تصرفاتو كيديرهم قبل ما يفكر لان قلبو هو المتحكم حاليا ،،،
توحشها و مخباش وحشو ليها بل بينو ومحشمش و مبغيش اصلا يحشم منها لانها هي لي كاينة فقلبو... هي لي مقدرش ينسا ولا تبعد من بالو ...
من صغرها وهي كتعجبو بزاف و زادت دابا من كبرات و زيانت و عطات لعين زادت حمقاتو و تعجب بيها كثر و كثر ..
عنقها بلهفة و نطق بإشتياق تجاها وهي مكمش فصدرو مخلوعة كتشوف جهة خوتها يكون شي حد شافها ...من لقاتهم كلهم دخلو لسيارة تنفسات بإرتياح مع خجل طفيف كيضهر نادراً على ملامحها الشقراء ....
تا هو مكترش عليها فور ما نطق كلماتو طلقها وحل ليها لباب مبتسام و عينو كيلمعو ....
جعفر: دخلي ...
حادرة راسها نطقات بصوت شبه مسموع..
-شكراً...
ركبات حدا مها و لطوف كتشوف فيهم بنص عين دارت راسها مشافت والو و نغزات بنتها لي حداها...
-سيري ابنتي جلسي حدا جعفر ونسيه فالهضرة را طريق طويلة ...
عفراء خرجات عنيها ...
- دوزي ونسيه نتي نيت ..
لطوف قرصاتها من لتحت مكتبينش...
-سكتي المسخوطة سيد عاطي عليك خروف...
عفراء كتحك بلاصة القرصة معصبة..
- يعطي تا بقرة انا مالي قلت ليه عطيني شي حاجة ...
لطوف : وايني مكتحشميش و ناكرة الخير ..
ركب جعفر فبلاصتو شاف فيها من المراية القادم وكيضحك غير وحدو ..ديمارة تابع دراري لي شدو طريق قدامو و لطوف شادة معاه الهضرة فرحانة بيه...
لطوف: تبارك الله وليتي محامي وكدافع على الناس...
جعفر: حمدلله ، داكشي لي قدرت عليه كنديرو...
لطوف: الله يسهل عليم اولدي، بعدا راك وصلتي وخا دازت عليك.. كون اولدي عرفت هادشي ايوقع ليك كون رجعت لقبيلة نجيبك تكبر معانا بحال ولدنا...
جعفر : الله يبارك فيك ولكن حمدلله ربي كبير وقادر نتكلف براسي...
لطوف : داكشي لي عودتينا عليه اولدي ما تمد يديك لحد و ما ترضى بحد.. بعقلك من صغرك و زدتي فالعقل و زين ما يفوتك حد فيهم...
جعفر كيضحك: الحمدلله...
عفراء تصدمات فلطوف كتنغزها تسكت و هي عاد ما زيادة حتى تعصبات بنغيز عفراء وهي دفعها مفقوصة..
لطوف: بعدي مني لهيه خليني نهضر مع نسيبي راني موحشاه...
خرجات عنيها و دورات راسها بزربة لزجاج معوداتش الهضرة ولا شافت اتجاهم بينما جعفر بقى كيضحك متبع عينو مع عفراء...
لطوف: مديش عليها اولدي غير بقا فيها الحال من جهة لكبيرة ..و مك كانت ديراها بحال بنتها ...
هبطو ليها دموع فور ما تذكر اسم لكبيرة ..بزربة مسحاتهم و وجها مزال منعاكس مع الزجاج ..
لطوف: ها نتا اولدي كتشوف بعينيك دغيا كتولي تبكي.. لبارح بزز باش سكتها باها اما كانت اتحماق بالبكى ...
شافها جعفر من مسحات دموعها و نطق بشوي ...
جعفر: الأعمار بيد الله وهادشي مكتاب خاص نصبرو ونكملو حياتنا حتى يحين وقتنا ...
بقات ساكتة كتسمع ليه كيهضر مع مها و صوتو غليض رجولي وفيه بحة عجباتها بزااف ...وزاد شكلو الجداب و ملامحو الوسيمة مبدل على عفراء لي فذكرتها ...
بدون ما تعيق بدات كتشوف فيه بنص عين وهي تجي عنيها فعينو مباشرة تا هو كان حضيها ..
بزربة بعدات نضراتها بحالي ما وقع والو بينما هو بقا كيراقبها كأنه غادي ياكلها بعنيه ..
حطات لطوف راسها على لكرسي ومع طريق كضوخ متقدرش تبقا فايقة ..دغيا نعسات وتحل الصمت فسيارة بقاو بجوج لي فايقين ..
هي راكبة لور مدورة راسها حاضية طريق وهو لقدام كيسوق وكل مرة يسرق نضرات ايها و يرجع يراقب طريق ...بانت ليه باحة استراحة وهو يدخل ليها خلا دراري يسبقوه ...
وقف سيارة ودار عندها..
جعفر: بغيتي تشربي شي حاجة...
بدون ما تشوف فيه ...
-لا ما بغيت والو ...
جعفر : خاصك تاكلي شي حاجة باين عليك مفطراش...
عفراء: صافي انخرج نشري شي حاجة لراسي ....
خلاها تخرج هي الاولى عاد خرج هو سد طونوبيل على لطوف لي مزال ناعسة و تبعها من لور ..
قرب عندها شدها من يديها و جرها معاه لبلاصة خاوية قنتها مع الحيط وهي بصدمة كتشوف فيه بينما هو نطق و عينو فعنيها...
جعفر: علاش مكتهضريش معايا...
.
.
.
.
#تتبع