قــدر الــمــنــحــوسة ( الجزء التاني )

الفصل 28

روايــة "قــدر الــمــنــحوســة2"📖...

بــقــلــم🖋📚"Fatima Z-F"📚..

عفراء بصدمة: هادشي كلو لي عشتي ومزال اتزيد فالعداب ...

شاف فيها وفدموعها ونطق بصوت ضعيف: هادي مشيئة الله بغاني نرجع لطريقو ...

عفراء بدون فهم: كفاش؟؟؟..

جعفر  : كيف قلت ليك وليت عصبي بلا قياس والوسط لي تعايشت معاه وانا فسن المراهقة تخربقت معاه  بديت كنقطع الصلاة ومكنصليش فالوقت و القرأن مبقيتش كنهزو كيف كنت  ..بقيت هكاك تا قطعت الصلاة نهائياً وتابع طرف الخبز ونسيت ان الله هو رزاق ولا توكلتي عليه ايفتح ليك بيبان كتيرة ..كل هادشي نسيتو وخا حمدلله عمري عصيت الله ولا توجهت لحرام ..داكشي لي تربيت عليه بقيت محافظ عليه ولكن  اهم شيء فالدين وهو الصلاة قطعتها  ...

عفراء: وشنو وقع باش رجعتي كتصلي ...

جعفر: كلشي وقع فالهند بعد ما وصلنا  وخدينا واحد وطيل رخيص ندوزو فيه هاد شهر لي انخدمو فيه ...توجهنا لمكان لخدمة كنلقاو ناس كتيرة  مجموعة وكيهضرو بلغة ماشي هندية ومكيعرفوش الانجليزية  يعني داك دري لي مشينا معاه هو الوحيد لي  كيترجم لينا كلامهم و كيترجم كلامنا ... وغير انا لي كنت مغريبي فدوك دراري او نقول غير انا لي مسلم وهما معارفينش اني مسلم حيت مشافونيش كنصلي  لأني كنت قاطعها ربي يغفر ليا ولجميع المسلمين ...

عفراء :  وفاش خدمتو...

جعفر: طلبو منا نبنيو واحد دار فواحد الارض خالية من ناس  ولي فهمناه ان ديك الارض كاع طوك ناس حاطين فيها فلوسهم ودار اتكون مكتوبة فسمياتهم كاملين وغادي يوهبوها لشي حد حنا معارفينش شكون هو ..وانا من نوع لي سكوتي ومعنديش مع جميع معاهم .. كندير خدمتي كما خاص تكون وكنرجع لوطيل مكنبقاش مجمع معاهم ...صافي داز شهر وكملنا لي خاص يكمل  و تخلصنا خلاصنا و رجعنا نجمعو حوايجنا نرجعو  بحالنا...ساعة هادوك  ناس مخلاوناش وقالو ضروري خاصكم تحضرو هاد ليلة حيت ايديرو واحد المهرجان وبغاونا نحضرو نحتافلو معاهم ... وافقو دراري ولقيت راسي وسطهم مجاش نخرج منهم ونقول لا ....فليل رجعنا عندهم وجلسنا مع ناس كنشوفو اش كيديرو حتى كنلقى قدامي عجائب و غرائب ...ديك دار لي بنينا كلها مضوية بشمع  ودايرين فيها واحد صنم كحل كيخلع وجالسين كيعبدو فيه انا تلفت و قلبي حبس ورجع كيدق بجهد ولحمي تشوك عليا عمري ضنيت اني غادي نعاون نبني معبد ديال الهندوس يعبدو فيه  الأصنام ويشركو بالله و انا مسلم ...

عفراء خرجات عنيها فيه  مقدراتش تهضر بصدمة بينما هو هبط راسو مزير ..