قــدر الــمــنــحــوسة ( الجزء التاني )

الفصل 22

روايــة "قــدر الــمــنــحوســة2"📖...

بــقــلــم🖋📚"Fatima Z-F"📚..

ماسول عليه حد ما عيط عليه حد وتا هو ماسول على حد ..دوز نهار مع اطفال كيضحك ويلعب معاهم عاطيهم وقتو الكامل وبعد المرات كيجلس ساهي كيشوف بعيد و يرجع يهبط راسو بحالي تا حاجة مكاينة...

مكيبينش على ملامحو داكشي لي فراسو ..كيبقى لغز يقدر يكون كيضحك اما من لداخل ايكون  ربي لي عالم بيه..مكيبينش ضعفو او استيائو ديما البسمة على الوجه و المعاملة الحسنة ..

هكذا تربا وهكذا كبر على توصيات الام ديالو ..لكن فنفس الوقت نهار يتقلب ما يبقى عاقل على تا واحد كيولي شخص اخر عمر شي حد شافو وهاد شخصية الخايبة ما كيوصل ليها الا لو تضرر نيت وهبط شي حد من قيمتو تم ماكيعقل على تا حد وخا يكون اقرب الناس ليه ...

جالسة متوسطة خوتها وعائلتها الجميلة لي الفرحة باينة عليهم مجمعين بعد ما سلاو دبيحة وسليخ الأضحية  ونقاو دنيا من دم ..

مفرشين فسطح كيشويو قدامهم ولعيالات مقابلين شغل من غيرها لي جالسة وسط دراري بحال ضيفة منقية حالتها ولابسة بيجامة بيضة مخيطة بدهبي و مفتوحة من جناب ديال سيقانها مع سنيديلة عالية ديال صبع ومصبغة ضفرانها بالأحمر ..ضافرة شعرها ودايرة فقط مرطب لشفاه ديالها مخلية وجها على طبيعتو ...

حط ليها خوها طبسيل فيه دجاج مشوي...

علال:هاكي الالة ها هو دجاج ديالك ..

عفراء:قويتي ليا انا غادي ناكل غير صدر صافي..

عبدالقادر: ما كتاكلي والو اعفراء راكي ضعيفة علاش كديري هاد ريجيم ...

عفراء:انا معدتي ماشي بحالكم كانكل غير شوي كنشبع ..

سليم واناس جلسو حداها...

اناس: نعاونوك تكملي دجاجتك ازين ..

سليم مخسر ملامحو : العيد وكتاكلي دجاج ...

عفراء: كنعيف داكلشي لي فداخل ديال الحولي ما عرفتش كيف يعطيكم نفسكم تاكلوه.

سي العربي: كلشي محللو لينا سيدي ربي علاش غادي نمنعو راسنا منو ...

عفراء: انا ابا كنهضر غير على راسي انا كنعيف ومكنقدرش على داكشي بغيتو تاكلوه بصحتكم ...

لطوف لي كتقاد فأتاي وجالسة حدا راجلها هزات عنيها فبنتها كتشوف فيها مدة طويلة عاد نطقات...