حنا مزلنا نحكيوا حتى تدخل شهرة هي تاني استاذة تاع علوم نهار كامل وهي لاصقة في أدم تقول جامي لا شافت راجل باينة بلي عينها عليه قتلوا آدم انت هنا وانا من الصباح نحوس عليك نحتاجك في حاجة ارجو بزااف .خزرت معها بنص عين قتلوا ملا انا نروح استاذ هيا باي.قالي:اك روحي. شفت معا شهرة لقيتها تخزر معايا بتشناف وتافف . خليهم وخرجت وانا نغلي وحدي وشبيهم هادوا البنات الكل لاصقة فيه غير هو راجل ولا واش هم .
رحت نحوس على شروق لقيتها واقفة مع جلال ساعات نحسها بلي يعجبها جلال ومش حابة تقولي . وقفت معاهم بقينا نحكيوا جيت نتلفت لقيت آدم وشهرة يمشيو ويضحكو يبانو منسجمين لي يشوفهم يقول بلي راهم خاطبين ،اناهنا شعلت فيا النار من الغيرة .
شافتني شروق قاتلي راني قتلك غير نحيه من بالك شوفي كيفاه راه يبان يحبها ،انتي راه دايرك كي اختو كي عاد صاحب خوك .
حسيت قلبي راح يحبس قلتلها شروق راني مروحة قاتلي وين مروحة رانا نقراو مبعد قلتلها أخطيني هزيت حوايجي وجيت خارجة . شافني خارجة جاني قالي : ريجة وين رايحة .خزرت معاه بتشناف وقتلوا اسمي اريج مش ريجا وسكتت جيت ماشية حكمني من يدي ودورني قالي انا نحب نعيطلك ريجا متسالينيش وزيد قوليلي وين رايحة وانت تقراي من بعد .قتلوا: مروحة قالي علاه مروحة كيشما بيك .هنا شفت شهرة تخزر معانا من البعيد انا جاتني فرصة قلت اليوم نعتلها الهاملة هادي .
لعبتها قتلوا والوا جيست قلبي يوجع فيا وزدت فيها حكمت راسي زعما راح ندوخ.هو تخلع حط يدو على ظهري قالي ارواحي اقعدي هنا لدوخي وصلني حتى قعدت في الكلوار وهو وقف قدامي حسيتو خاف صح عليا حتى لونو تخطف .انا هبط راسي وحكمت قلبي من الفرحة تسما يخاف عليا شفتو طابس عندي وحكملي يدي قالي مازال يوجع فيك قتلوا ايه قالي خلاص اصبري شوي نعيط لخوك ولا باباك يجي يديك تروحي قتلوا لا دوك نروح وحدي خويا يخدم وبابا مكنوش .سكت بقا يخمم ويخزر معايا حتى نشوف في شهرة هديك جاية لينا وصلت قاتلو آدم يخي لباس وش كاين وش عملت الطفلة هادي .قلقتني قلتلها وش باش نعمل ديجا وش دخلك وخزرت مع آدم قتلوا راني رايحة حاروا فيا في زوج متوقعونيش نرد عليها بالفاصون هديك .مشيت وخليتهم نسمع في صوت آدم يعيطلي وهي تقولوا خليها تروح باينة مش متربية غدوة نديرها استدعاء .
انا سمعت كلمة مش متربية وانا هجت وليت نرجف ديجا انا نحوس على سبة باه نتعارك معاها دورتلها ديراكت قلتلها :علاه تقولي عليا منيش متربية رباتني يماك و انا معلاباليش. كنت نرجف تاع الصح كون طاوعت روحي راني تلحت فيها وضربتها .عيط عليا آدم قالي وش الهدرة هادي اريج ترباي . قاتلو شفت كيفاه تهدر والله اليوم ندير بيك تقرير ولا ما نسماش شهرة . خزرت معها وقلتلها ديري على روحك روحي قودي بيك بالتقرير تاعك .هز يدو وضربني بكف وجهي دارت للجيهة لخرة انا تصدمت متوقعتش بلي راح يضربني وزيد علاجالها حسيت قلبي تكسر ولي كسرهولي آدم لي عشقت فيه .دورت وجهي شفت وجهو ولا أحمر وهي تخزر معايا وتشفى حسيتها قاعدة تقولي شوفي ضربك علجالي اكبر خيبة صراتلي ليوم .خزرت فيهم في زوج وخرجت نجري ،بقيت نجري حتى وصلت للدار حتى لبكا مقدرتش نبكي حكمني شوك .دخلت للدار شافتني ماما بقات تسقسي فيا قلتلها راني مريضة ودخلت للشمبرة تاعي حطيت راسي على لمخدة ورقدت
YOU ARE READING
حب في الثانوية
Romanceقصة فتاة اسمها اريج تقع في حب استاذها من اول نظرة . ابطال القصة. اريج:طفلة عمرها 15سمرة حلوة شعرها طويل عينيها نوازات قصيرة وسمينة شوي مسرارة وحشامة آدم : استاذ يقري في ليسي علوم عمرو 30 جنتي .هو طويل وزين
