حب في الثانوية

chapitre 72

بقيت قاعدة مع عجوزتي حتى صونا التلفون تاعها هزت بقات تهدر حتى سمعتها قالت يالطيف معرفتوش شكون عمل فيه هكا، من بعد قالت كوبي راني جاية . غير كوبات قتلها يما وش صرى قاتلي كريم ضربوه بالموس على دراعوا ورجلوا راه في السبيطار في حالة قاتلي يماه حالة دراعوا متعجبش خاطر تقاسولوا لعروق  وزيد فقد دم بزاف غاضني مسكين . انا بقيت مشوكية عرفتوا ديراكت آدم لي ضربوا متوقعتش توصل بيه يضرب ولد عموا هكدا راه قريب يقتلوا . قاتلي راني رايحة للسبيطار نشوفوا ، انا بقيت ساكتة صحتي كاملة ترجف هدا كل صرى بسبابي انا . عجوزتي راحت للسبيطار وانا قعدت غير وحدي في الدار نستنى في أدم يجي . وصلت 12 دخل . غير شفتوا  قتلوا انت لي عملت في كريم هكدا انت لي ضربتوا بالموس ، قالي ايه انا ونزيد  نلمح خيالوا برك المرة الجاية نقتلوا   . قتلو وتقول فيها بكل صحة وجه وشبيك هبلت راح تولي مافيا . قالي اعدلي هدرتك لا نضربك نقسمك على زوج . قتلوا اضربني اضرب وش راك تستنى ولا نقولك اصبر نجيبلك موس اضربني بيه خير هكا باه يبرد قلبك . مشا وخلاني نهدر وحدي حكمتلوا يدوا قتلوا استنى حرام عليك علاه عملت فيه هكدا ، وزيد كون يشكي بيك مش راك باصيت . قالي ومن بعد خلي يشكي على روحوا . قتلوا وشبيك انت علاه راك دير هكدا وش ربحت كي روحت ضربتوا حكاية فاتت عندها شحال وانت باقي غير تزيد . شعل فيا ضربة وحدة . قالي انتي حابة طحنيني ولا كيفاه راه سيد تدنى لمرتي حابتني نبقى ساكت ونشوفوا قدامي ونورمال نفوتهالوا ومانديرلوا والوا كشغل ما عمل حتى حاجة . قتلوا وكي ضربتوا دركا وش ربحت ياك طلب السماح وستعرف بلي غلط علاه راك تخرب في حكاية قديمة انسى وخلي نعيشوا كي ناس ولاراح تبقى غير هكدا ، ديجا هو غلط معايا انا وطلب مني سماح وانا سامحتوا علاه انت رايح تضرب فيه مفهمتش وزيد علابالك وش صرالوا ، راه في حالة العروق تاع يدوا تقاسوا قادر مبقاش يحركها خلاص وهدا كل بسباب الهبال تاعك . قالي وش غاضك راكي قريب تبكي عليه . قتلوا انت والله مابقات معاك هدرة تاع الصح هبلت ،علاه راك دير هكدا فهمني برك ضارب السيد قريب لا تقتلوا وجاياتك نورمال كون جا حتى براني راه ولد عمك كيفاه قدرت دير فيك هكا . بعدني من قداموا وقالي متبقايش تهدري وتكسريلي  في ## راسي سمعينا سكاتك وطيري من قدامي منيش حاب نشوف خليقتك وتفكري بلي  لي صرا كامل هدا بسبابك انتي . كنت نسمع فيه يهدر ومنيش مصدقة بلي هدا آدم كان يهدر بوحد البرود تقول ماراه ضارب واحد بموس ، مش حتى نادم على عملتوا . قتلوا انت والله مابقات معاك معيشة . قالي معجبتكش لمعيشة معايا طيري لدار باباك ، ديجا وش راكي ديري لهنا ياك وصيت يما الصباح توصلك لداركم .قتلوا داري منخرجش منها فهمت مش تزوجت بيا ومن بعد حاب ترميني في دار بابا . قالي دار باباك راجعتلها دوركا ولا من بعد ولا راكي معولة حتى كي نطلقك تبقاي عايشة عندي هنا... غير جبدلي على الطلاق قلبي تزير يعني  راه مزال يخمم يطلقني صح . قدمتلوا وقتلوا ياك رانا تسامحنا لبارح.  قالي لا متسمحناش وعمري ما راح نسامحك خاطر وصيتك قتلك يا اريج نفيق بيك مخبية عليا الطلاق بيناتنا وانتي بقيتي مخبية متجيش دوركا وتلوميني و غير تولدي نطلقك ونعاود نزوج ولا ادا حبيتي تبقاي مرتي تقبلي نتزوج عليك هديك حاجة اخرى . غير كمل هدرتوا ، قتلوا هاد الهبال لي راك تقول في المنام ومايصراش والله نقتلك يا آدم قبل حتى ما تخمم تزوج عليا... قالي والله راكي تهددي فيا ؟؟؟ متقلقنيش خير من نطلقك دوركا بعد ، خليني مداير قدر للولدي لي فكرشك ، وتفكري ديما بلي راك هنا بسبابوا هو سينوا ياحصرا من لي طلقتك . كمل هدرتوا وطلع للدار ، قعدت في الفوتاي وحاطيت  يديا على وجهي ورجعت نبكي بالشهقة كرهت كلشي . راني سمانة وانا غير في المشاكل والعراك تعبت وعييت من كلشي ملقيتش حتى لمن نشكي ولا  شكون ينصحني . حسيت بخنقة كبيرة علابالي كون نبقى في الحالة هادي تصرالي حاجة . غير شفتوا هبط مسحت دموعي وانا نشهق قتلوا اديني لدارنا ، ضحك و قالي  وش صرى ياك غير قبيل شوي كنتي تقولي منخرجش من داري .قتلوا راح نقعد يامات نرتاح شوي تعبت هنا . بقا يخزر معايا هبطت راسي . شفتوا قدم طلعلي راسي ومسحلي دموعي قالي هيا روحي وجدي روحك دوك نديك . دخلت وجدت فاليزة تاع قشي ولبست حجابي وخرجت . لقيتوا يستنى فيا ركبنا في الطونوبيل بقينا طريق كامل وحنا ساكتين أصلا ولينا  منقدروش نحكو بلا مانتعاركوا  تقول ما رانا اريج وادم تاع قبل صرات فجوة كبيرة بيناتنا . متوقعتش بلي حياة الزوجية صعيبة هكدا كنت نحسابها غير رومانسية وتحواس وحب بصح ظهرت مسؤولية كبيرة . غير وصلنا جيت هابطة حبسني قالي تهلاي في روحك وفي البيبي . درتلوا براسي ايه وقدمت بستوا على خدوا وهبطت . دخلت للدار ديراكت تحضنت ماما نبكي حتى تخلعت قاتلي وش صرى علاه راكي تبكي هكدا . قتلها والوا قاتلي غير قولي متعاركة مع آدم كشما دارلك ولا ضربك انطقي قتلها والوا غير توحشتك برك . قاتلي خلعتيني نحساب راكي متعاركة مع راجلك ، خممت نقولها وش راه صاري معايا بصح هيا سبقتني قاتلي نقولك خبر يفرحك بلاك جمعة تاع السمانة هادي نروحوا نخطبوا لخوك مدام راهم قابلين . انا مع المشاكل نسيت خلاص حكاية الخطبة تاع محمد . قتلها خلي ربي يكملوا ان شاء الله . قاتلي من بعد نعيط لعجوزتك ونتفاهم معاها على كلش خاطر الرجال صاي راهم متفاهمين . قتلها ان شاء الله . وهنا قررت نتراجع وما نقول حتى حاجة من لي صاري معايا منيش حابة نفسد فرحة تاع خويا بمشاكلي .
فوتت نهارين في دارنا بالنسبة ليا كانوا نهارين عداب كنت نبات نبكي على آدم كي طفلة صغيرة لي تبكي على باباها ،توحشتوا ومقدرتش على بعدوا ، كنت في النهار نبقى نستنى فيه غير وقتاه يغلط يعيط عند ماما ولا في التلفون تاع الدار ويسقسي عليا خاطر انا معنديش تلفون بعد ما كسرلي تلفوني بصح هو ما عيط ما سقسى نساني  .وزاد الوحم كمل على مابيا  كانت غير ماما تغلط وتقولي كلمة نولي نبكي نلقها سبة باه نبكي قدامها ، غير نهارين طاح مني النص مانرقد لا ليل لا نهار .لغدوة في العشية كنت قاعدة في الشمبرة تاعي حاطة يدي على كرشي  ويد فيها الباطة تاع النوتيلا ناكل ونخمم عندي بزاف مروحتش للطبيبة ، قررت ورى الخطبة ان شاء الله نروح نشوف الجنس تاع البيبي خاطر راني قريب ندخل في الشهر  الرابع تسما نقدر نشوف وش عندي تفكرت كي كان يقولي راني حاسس بلي عندك توام زوج ولا ثلاثة ولا ربعة ضحكت  ...  سمعت الباب يصوني نضت بالسيف من بلاصتي نكركر في روحي منيش قادرة نمشي رجليا منفخين ، كنت لابسة غير غوب قصيرة وشعري داخل بعضاه تقول عش تاع فراخ رجليا حفيانين  . وصلت للباب فتحت لقيتوا هو.  تخلعت هداك الزهر لي عندي يعني ما لقى وقتاه يجي جا وانا حالتي هكدا . قعدت نشوف معاه شحال توحشتوا غير نهارين برك مقدرتش نبعد عليه، بقا يشوف معايا من بعد قالي واش راح تخليني واقف في الباب . قتلوا لا ادخل بعدت على الباب فات عليا وخلى ريحتوا في نيفي غمضت عيني نشم فيها .من بعد فقت مع روحي قفلت الباب ولحقتوا للصالة لقيتوا قعد قالي ملا راكي وحدك .قتلوا ايه ماما خرجت تقضي ، نجيبلك حاجة تشربها...قالي لا منشرب والوا . بقيت واقفة نلعب بصوابعي  متوترة نستنى فيه يقولي علاه جا نستنى حتى يفرح قلبي ويقولي جيت نشوفك خاطر توحشتك ولا أي كلمة . خزر معايا قالي راح تبقاي واقفة ارواحي اقعدي . شاورلي  بيدوا باه نقعد  على الفوتاي بحداه. رحت قعدت حط يدو على كرشي قالي وش حوال ولدي هبطت راسي و قتلوا لاباس . كنت حاسة روحي حشمانة وزعفانة وقلقانة  حاكمة البكية على شعرة ، زاد طاحلي المورال اكثر كي جا وشافني بالحالة هادي تقول متشردة . قالي وانتي واش حوالك . تبسمت وقتلوا لاباس . هز يدو وبقا يمسحلي على شواربي قالي كنتي تاكلي في الشيكولا . درتلوا براسي ايه . ضحك وقالي شيكولا تاكل في الشيكولا . تبسمت وهبطت راسي منعرف علاه هكدا حاسة بقنطة كبيرة يمكن من الهرمونات . حط يدو على ظهري وجبدني لحضنو قالي وشبيها البطة تاعي دبلانة هكدا . قتلوا والوا . عييت نشوف في وجهوا طاحت عليا الحشمة تقول مهوش راجلي سبحان الله تقول اول مرة نهدر معاه يمكن بلاك كي راني في دار بابا . كنت نهدر غير بالعقل . من بعد وقفت قتلوا نجيبلك قهوة ونجي كنت حابة غير نروح من بحداه . دخلت للكوزينة وجدت القهوة حطيتها في بلاتوا وهزيتو رجعت للصالة . بقيت نمشي وهو يكيل فيا حتى وصلت وحطيت لبلاتوا . قالي علاه راكي تمشي بالحفا وزيد علاه  رجليك منفخين هكدا . قعدت وقتلوا منعرف . قالي هيا وجدي روحك نروحوا .  انا عزت عليا روحي . قتلوا نحب نزيد نقعد يمات هنا قالي ياك علابالك تفاهمنا على الخطبة تاع دنيا بالجمعة وهي قاتلي نحب اريج تجي توجد معايا. هنا فهمت بلي جا يروحني غير باه نوجد مع دنيا مش خاطر توحشني ولا حاجة . قتلوا بصح انا مزلت حابة نقعد يامات.  قالي لا مكانش قاعد . قتلوا بصح . قالي لا بصح لا والوا متخلينيش نوض نروحك بسيف عليك ، يالله نوضي وجدي روحك . انا سكتت علابالي كون نبقى نقولوا لا وناقش فيه نتعاركوا . وليت وقفت وانا حاكمة الغصة تاع البكية بسيف . قتلوا نوجد روحي ونجي منطولش . مع خرجت بعد طرشقت بالبكا ، يمكن هادي اقسى فترة فاتت عليا في حياتي .