حب في الثانوية

chapitre 88

فاتوا ليامات وانا عايشة في نفس الروتين ، حتى نهار لي ما روحتش نقرى فيه صبحت راقدة سمعت التلفون تاعي يصوني ، فطنت وانا حايرة شكون لي راح يعيطلي خاطر انا قطعت علاقتي بالناس كامل نقرى ونروح وبرك لا عندي صحبات لا والوا نهار كامل وحدي ، هزيت لقيتها دنيا قاتلي الوا اريج لاباس  .قتلها لاباس غيرر الخير علاه عيطتيلي قاتلي عندي هدرة معاك . قتلها احكي راني نسمع فيك . قاتلي مش هدرة تاع تلفون نتلاقو و نهدرو خير قتلها ايه ليوم راني قاعدة وين نتلاقو قاتلي في كافي ### قتلها اوكي على ثلاثة . قاتلي ايه .وجدت روحي لبست كيما عادتي غوب تاع خريف وصباط وهزيت صاك تاعي حتى المكياج كرهتوا مبقيتش نديرو قلت لماما بلي راح نتلاقى صاحبتي قاتلي اوكي بصح مطوليش بزاف قتلها علابالي .وصلت للكافي لقيتها قاعدة تستنى فيا ، قعدت مقابلتها ما قاتلي لا وش راكي لا واش حوالك بقيت حايرة فيها . قاتلي شوفي اريج نخرجلك فيها ديراكت بعدي حياتك على حياتنا علاه راكي دخلي في روحك في علاقتي انا ومحمد . قتلها وش راكي تقولي مفهمتش . قاتلي وش مفهمتيش علابالي بلي انتي لي راكي تحرشي في محمد باه يبطل عليا زكارة في أدم . بقيت باهتة فيها من جابت هاد الافكار لهاد الدرجة في بالها بلي أنا انسانة شريرة حتى نخرب حياة خويا . ضحكت قتلها وش راكي تقولي وقيلا هبلتي وش دخلني فيكم انا تتزوجوا ولا تت .... استغفر الله يا ربي .قاتلي غير مكان لاه تلعيبها خطيك . قتلها وشبيك ابنت الناس نسيتي بلي أنا لي وقفت معاك وعاونتك باه يجي يخطبك نسيتي خيري فيك انا وقفت معاك اكثر من يماك وضرك جاية تهدري وتحلي في فمك ، شوفي ديجا لي فيا يكفيني متزديش انتي تطلعيلي الزبل ومتزديش تعيطيلي .قاتلي غير انتي اخرجي من حياتنا منزيدش نعيطلك خلاص .قتلها انتي راكي حابتني نتڨلب عليك ولا كيفاه وقتاه دخلت في حياتكم ياك هادي قريب ست شهور ما شفتكم ما سمعت بيكم انتم لي تخرجوا من حياتي انتي وخوك قاتلي ملا علاه روحتي عند آدم للخدمة المرة لي فاتت قتلها روحتلوا غير باه نرجعلوا خماجواو تهناي  خوك نسيتوا وخرجتوا من حياتي فهمتي قاتلي متزديش تروحي عندو خاطر غير انتي لي راح تتعذبي  . وقفت قتلها ليوم راني سكتلك على خاطر العشرة لي كانت بيناتنا المرة الجاية تخربي فيا تشوفي شي ميعجبكش وتسمعي كلام يبكيك ومدابيك منزيدش نشوفك . خرجت ودموعي يهبطوا لهاد الدرجة الدنيا غدارة ودوارة حتى لي كانت صاحبتي وكيف اختي تقولي هاد الكلام بصح معليش . رحت قعدت قابلت البحر وانا نخمم وش من ذنب درتوا حتى ربي عاقبني هكدا خسرت كلشي حتى صاحبتي وخسرتها ، بقيت شوي حتى وصلت الستة وقفت راجعة للدار حكمت تكسي بصح هبطني شوي بعيد على الدار بقيت نمشي حتى حسيت بالطونوبيل لي موالفة تبعني قاعدة تبع فيا خفت بديت نمشي بالزربة حتى لحقتني وڨارات حدايا هبط منها واحد يبان في العشرينات قالي معليش نحكي معاك دقيقة .تخنزرت فيه وشنفت قتلوا لا جبتهالوا بفاصوا تاع نشعة باه يروح . قالي دقيقة برك منطولش .قتلوا قتلك لا متفهمش . جيت ماشية . رجع وقفلي في الطريق قالي والله من شفتك عجبتيني بزاف وحاب نكون معاك .  بقيت ماشية بلا ما نقيموا أصلا حكاية تاع نكون مع واحد آخر بغير آدم متدخليش مخي . عاود حبسني قالي ادا خافية مني والله راني ناوي الحلال راكي صح عجبتيني وفضيتي فيا وعلابالي بلي كنتي متزوجة وطلقتي . قتلوا شوف بعد من طريقي . قالي وشبيك متقلقة وخايفة راني قتلك ناوي الحلال تحبي غدوة نهدر مع خوك
. طلعلي الدم لراسي . قتلوا يا خويا انت ماتفهمش مدام منيش حابة نهدر افهمها وحدك بلا منزيد نطيحلك قدرك ببعد من طريقي راك عطلتني مدابيك متزيدش تخرج في وجهي اوكي .كملت هدرتي وانا خايفة كون كشما يديرلي هنا في الطريق هادي واحد ما يفيق  خاطر طريق شوي خالية مافيهاش الغاشي بزاف وزيد بدات طيح الظلمة . ضحك قالي علابالك نشوف فيك قطة قودامي . جابلي الضحك كنت راح نقولوا قطة تاع ناناك .من بعد سكتت قالي هيا قولي غدوة نجي نحكي مع خوك . قتلوا لا متفهمش وش معنتها كلمة لا يا خويا انت لصقة تاع الصح بعد من طريقي راح عليا الحال . قالي اوكي كيما تحبي بصح مش راح نخطيك كوني متهنية كل يوم تلقايني في وجهك حتى تقبلي بيا احبي . مقدرتش ضحكت جابها بوحد الفاصوا تقتل بالضحك . قتلوا الله يسهل عليك المهم بعد من طريقي برك . قالي فوتي my princess  بون نوي غدوة ان شاء الله . كملت مشيت وانا نضحك يبان من النوع العاقل الضحايكي  بصح صاي مبقيت نوثق في حتى واحد تغدرت من الكل أصلا عمري نزيد نفكر ندير علاقة من آدم اعتزلت الرجال ، ملڨري هدا مليح في الزين ويبان مرفه من لبستوا وهدرتوا  بصح محرك فيا حتى شعرة كون ماجاش قلبي عند آدم  راني ضربت فيه عشقة .وصلت للدار دخلت لقيت غير خويا وماما . قالي اريج مبقتيش تطولي برة بزاف وادا راح تطولي قوليلي نجي عندك . قتلوا ايه آخر مرة قالي شوفي وش جبتلك معايا المرة لي فاتت شفتوا عجبك شريتهولك . عطالي صاشي لقيت فيها  تلفون جديد فرحت بزاف خاطر كنت ديجا سخفانة عليه ونلم في الدراهم باه نشريه . فاتو ايام وهداك كل يوم نلقاه في طريقي ساعات منقيموش وساعات يضحكني بهدرتوا ، يبقى غير يحاول فيا باه نقبل ملڨري يغيضني بصح الله غالب قلبي ملكو راجل واحد وهو آدم  . حتى نهار قلقني كي بقا يحاول وانا نقطة ضعفي واحد يبقا يحاولني . قتلوا شوف خويا  انت ناس ملاح بزاف وتستاهل اي طفلة بصح مش انا خاطر انا قلبي عند راجل واحد منقدرش نكون معاك  ومنيش مخممة لا في زواج لا في خطبة لا في خرجة ، اسمحلي ربي يجيبلك مكتوب من جيهة خلاف  . بقا ساكت من بعد قالي انا نسيك فيه هاد الراجل غير تقبلي برك . قتلوا انت مش نورمال نقبل بواحد حتى إسموا منعرفوش .قالي يا لالا متعرفيش اسمي كيفاه فاتتني هادي اسمحيلي الزينة ، مدلي يدو بطريقة الجانتل مان قالي اسمي عثمانmy anjel . ضحكت قالي علابالي علابالي اسمي مش طالع عليا مفمتش ماما فاه كانت تخمم حتى سماتني عثمان ، الزين هدا الكل نورمالمو تسميني مهند. بقا يحكي وانا نسمع فيه عجبني خاطر كي رفضتوا مزال يتصرف بظرافة ويهدر بالعقالة . قالي شوفي اعطيني الفايس تاعك نحكو وشوفي بلاك نعجبك متدريش على الدنيا ، قادر نكون مكتوبك . مقدرتش نرفض عطيتو الفايس وانستغرام . بقينا نحكيو ساعات نحكي ساعات منرجعلوش بصح غير نحط راسي على المخدة نحس بغصة في قلبي حاسة روحي راني نخون في أدم . وصلت العطلة تاع الخريف . خويا قالنا بلي حاب يدير الفاتحة تاعوا  وجدنا كلش حتى قبل الفاتحة بنهارين قتلهم انا منروحش  نقعد في الدار برك .قالي خويا كيفاه متروحيش الفاتحة تاع خوك غير هادي لي متصراش.قتلوا يا محمد انا من خرجت من هديك الدار حلفت لنزيد نرجع ليها .قالي مستحيل تقعدي وحدك وحنا نروحوا بلا بيك لاكان بقيتي على رايك نحبس كلش انا منروحش بلا بيك . قتلوا بصح منيش حابة نشوف حتى واحد .قالي اريج ياك مراناش راح نطولوا غير نص برك ونروحوا . بقيت ساكتة قالي هيا برك مراكيش حابة تفرحي مع خوك. قتلوا ايه بصح ياك منطولوش بزاف قالي لا غير نص ساعة برك .  فاتوا نهارين كاملين وانا غير نخمم كون نشوفوا علابالي بروحي راح نرجع للصفر وشي لي درتوا كامل في تسع شهر يروح في الماء يا ربي منشوفوش ، بصح قلبي يستنى غير وقتاه يشوفوا حتى لوكان من بعيد توحشتوا لدرجة منقدرش نوصفها حاسة روحي في صراع كبير بين قلبي لي لاهف على شوفتوا وبين عقلي لي يفكرني بهدرتوا نهار آخر مرة تلاقيتوا . نهار الفاتحة فقت الصباح وانا قلبي راح يحبس من الستراس  . خرجت للصالة لقيت ماما توجد في الحوايج لي راح ندوهم معانا قعدت قدامها قتلها ماما منيش حابة نروح روحوا برك انتم وانا نبقى في الدار نورمال .قاتلي لا راح تجي معانا علاه حتا متجيش . حطيت راسي في حجرها قتلها منيش حابة نشوفوا يا ماما علابالي كون نشوفوا راح نرجع كيما قبل وراح نرجع نهدر معاه ونحاولوا باه يرجعني ليه ، مقدرتش ننساه راح نهبل ياماما ملقيتش حل اعطيلي حل ينسيتي فيه كرهت حياتي . قاتلي ششششش بنتي انا متحاول حتى واحد وما تذل روحها لحتى واحد هو طلقك وهو لي خسر انتي الف واحد يتمناك . قتلها بصح انا نحبوا هو ومراح نتزوج بحتى واحد من بعدوا . قاتلي راح تحبسي حياتك علاجالوا??? مع وقت راح يجي لي ينسيك فيه وتبقى حكايتو غير هدرة برك . قتلها ان شاء الله . قاتلي هيا نوضي وجدي روحك والبسي احسن حاجة عندك نحبك تجي عروسة مكرة في العديان . ضحكت قاتلي هيا روحي .