حب في الثانوية

116

وجدت الصينية وهو لبس وراح يصلي بقيت غير وحدي نسمع في تكبيرات العيد ونوجد في روحي الفرحة مش سايعتني نهار العيد ديما هو اسعد نهار في حياتي نوض فرحانة سيرتوا كي نسمع هكدا التكبيرات كملت وجدت روحي لبست روبة ليشريتها ودرت ماكياج ، قعدت نستنى في آدم يجي شوي وسمعت صوت المفتاح كي فتح الباب خرجت عندو مع شافني فتح يديه قالي الشابة تاعي مشيت عندو عنقني قالي عيدك مبارك تعيدي وتزيدي كل عام وانتي في حياتي وبركة حياتي . بستو على رقبتوا قتلوا سنين دايمة ان شاء الله يتعاد علينا بالصحة والهنا  . بقا يشوف معايا قالي كي جيتي شابة ليوم راكي تضوي كي الڨمرة .تبسمت ضحك عليا قالي زعما راكي حشمتي . دخلنا للصالة قالي راكي موجدة الحالة والله نعول عليك .قعدنا قتلوا نسربيلك حليب قالي ايه العبد صبح جيعان . كي سربيتلوا قالي وانتي متشربيش  قتلوا لا منشربش ، انا باينة نقعد شحال باه نقدر نرجع الروتين تاع الفطار والفت بالرمضان.  سكت من بعد شاف معايا قالي فكرتيني انتي مفطرتيش خلاص في رمضان . قتلوا ايه تهنيت باه منصومش الدين من بعد. ضحك عليا  قالي هدا فاه خممتي زعما ممخمتيش بلي قادر تكوني اونسانت .قتلوا لا ااا امبوسيبل علابالي بروحي ليوم ولا غدوة وتجي نورمال. قالي منعرف بصح مافيها والوا كان تجربي تاست .  قتلوا لا  ما ندير لا  تاست لا والوا فكنا منو .قالي علاه بصح جربي على الأقل تتأكدي . تنرفزت وحدي قتلوا آدم راني قلت منديرش مش بسيف وزيد انا منيش حابة نكسر راسي بهاد الحكاية .شاف معايا من بعد قالي خلاص كيما تحبي .وقفت قتلوا دقيقة نجيب تلفوني ونجي .دخلت للشمبرة تنهدت شحال عاد يقلقني موضوع الاولاد تالمو هدرت عليه بزاف وستنيت بزاف تعقدت منو هكا راني عايشة الاز كنت كل ما نهدر عليه يجو معاه قاع المشاكل والمروضات تمنيت الناس كل تنساه حتى آدم ينساه كيما نسيتو انا  وواحد ما يفكرني بيه ،نقعد هكدا راسي راسو راني غاية . هزيت تلفوني وخرجت رجعت للصالة عيطت غافرت على دارنا وعلى عجوزتي ودنيا . كملت بقيت قاعدة معاه قالي اريج راح نقولك بلي راني مسافر بعد غدوة .قتلوا وين مسافرين .قالي لا مسافر وحدي عندي قراية  لازم نسافر للماريكان .قتلوا كيفاش تسافر وحدك وانا ؟؟قالي وشبيك انتي راكي هنا لاباس عليك  تبقاي مع يما ودنيا حتى نرجع .قتلوا نروح معاك . قالي من لول كنت راح نديك معايا بصح انتي عندك مشكلة في البسبور تاعك طول باه وتتحل وزيد لهيه منكونش قاعد راح تبقاي وحدك . قتلوا دبر راسك انا نروح معاك كيفاش هادي تروح وتخليني وحدي هنا . حط يدو على خدي قالي ولاه انا  تحسابيني حاب نروح ونخليك حتى انا مذابيا وين نروح تكوني معايا بصح الله غالب جات هكدا حتى كون تروحي معايا راح تتمرمدي باطل انا مش راح نبقى في بلاصة وحدة وهكا بزاف عليك ، وزيد المشكل لي في الباسبور امبوسيبل يتحل في سمانة . بكيت قتلوا بصح انا حابة نروح معاك . عنقني قالي خلاص حبسي البكا مش مليح تبكي نهار العيد والله كي نرجع نديك تصيفي في البلاصة لي تحبيها . مسحت دموعي قتلوا وشحال راح تبقى قالي معلاباليش .قتلوا باينة راح طول بزاف قالي لا منطولش بربي ان شاء الله .قتلوا مالا ربي يسهلك فيها ان شاء الله .باسني على جبيني قالي هكدا نحبك  ديما توقفس معايا وتدعميني بدعاويك ، وعد من عندي غير نرجع نخلفهالك . قتلوا راح نخرجهالك دوبل اشفا عليها . ضحك قالي هيا وجدي روحك نروحو نغافروا على يما . لبست غوب تاع برة لي شريتها جديدة وروحنا عند عجوزتي لقينا عندها لافامي هدا داخل وهدا خارج الدار مافرغتش حتى قريب الوحدة تاع النهار ، حطو لغدا تغدينا من بعد آدم هيا نروحوا للدار ولعشيا نديك لداركم تغافري عليهم . غير وصلت للدار قلعت كلشي السخانة تقتل دخلت ديراكت للدوش درت دوش خفيف وخرجت لقيت آدم في الشمبرة متكسل غير شافني وانا بالبشكير  قالي شوفي ابقاي كيما راكي ارواحي  ديراكت عندي راح نقولك حاجة تعجبك بزاف  .ضحكت فهمت قصدوا  قتلوا خلي برك ما تقولي ما والوا راني تعبانة . قالي هادي حكاية جديدة خرجتيلي بيها من نهدر معاك تقوليلي تعبانة وحابة نرقد . قتلوا والله غير تعبانة صح . قالي  ارواحي برك لي يشوفك هكدا خايفة يقول راح نعدبك . قتلوا صح راك تعدبني .قالي انتي لي فراجيل وش راح نديرلك هيا ارواحي ولا نوض ليك . قدمت عندو قعدت .جبدني لحظنو قالي حتا نحاولك باه تجي . غفلني وقرصني على فخضي عيطت قريب نبكي قتلوا علاه عليك علاه وجعتني .  مسحلي عليها و باسني على خدي قالي الله غالب غرت منك عجبتيني بزاف خفت لا عيني تحكم فيك . قتلوا تتمسخر بيا لاه اول مرة تشوفني . قالي مش نتمسخر هادو ليام فيك حاجة مبدلة راكي غير تزياني . ضربت شعري لور قتلوا انا من بكري زينة غير انت متعرفليش .قالي شوف اسيدي مالا من بكري زينة .قتلوا ايه وين راح تلقا وحدة كيفي ، أصلا كون مزلت متزوجتش كون راهم الخطابة بصف قدام الباب شحال من واحد كي طلعت للافاك يقولي نجي نخطبك  .حسيت غير بالشحطة على فخضي تقول واحد كواني مش ضربني دموعي هبطوا  تنطرت من بلاصتي .قتلوا وشبيك وشبيك هبلت علاه راك تضرب ناضولك جنونك . طلعت نشوف فيها لقيت ليطراس تاع خمس صوابع حمر راح يزراقوا من قوة الضربة . لقيتوا واقف فوق راسي حكمني من شعر قالي شوفي هنا ، خزرت فيه قالي كي تعودي متزوجة #### قولي الهدرة لي قولتيها ، علابالك كون نسمعك برك غلطتي وعاودتيها حتى في قلبك وجهك نخمجهولك ضو الشمس مبقيتيش تشوفيه نحبسك هنا في الدار شارع تنسيه متشوفينيشش هكدا والله وندور عليك غير ما تعودي تفرقي بين ليل ونهار . نكذب كون نقول ما خفتش منو ، انا من عند ربي هو يخوفني سيرتو كي يبقا يتهدد هكدا عليا  نعرفوا وصل لآخر نقول دوك يضربني بسقلة للوجه يجيبني راقدة على طولي .قالي فهمتي ، درتلوا براسي ايه غير يطلقني برك . طلقني ورجع قعد فوق السرير وانا واقفة في بلاصتي ، شوي ورجع تكسل حط يدو على عينيه راح يرقد فسدلوا الجو لي كان فيه  وليت خليتو وروحت لبست روبة تاع دار ورجعت لقيتوا مزال بنفس بوزيسيو تاعو دخلت بجنبو ف السرير . غمضت عينيا سمعتوا قالي من اليوم ما كاين لا فارمسي لا خدمة لا قراية  الشارع تنسايه  تحبي تشري ولا تحوسي رجلي على رجلك . دورت قتلوا كيفاش هادي .قطعلي الهدرة قالي هدرتي  ما نعاودهاش من ليوم تنساي كلشي راكي في الدار ماخصك والوا . قتلوا والله جديدة هادي  كيفاش منخدمش ومنقراش راني في حصار . هبط دراعوا قالي وش قلتي ، سكتت قالي عاودتي وش قلتي . وليت نتهته في الهدرة قتلوا بصح انت . قالي تسمعي كلامي وتبلعي من اليوم مكانش خرجة برة غير رجلي على رجلك . ورجع كيما كان . انا ملقيت نهدر ولا نسكت . بقيت ڨايلة كاملة وانا هكدا غير نتقلب في الفراش هو رقد وانا ما رقدت ما والوا كيفاش هادي يحبسني من القراية مكفاش العامين لي راحولي  بسبابوا وزيد يقولي حبسي والله ما صراتها  هادي بقيت نغلي هكدا وحدي ، حتى وجعتني كرشي خرجت للطوالات لقيت شوي دم ساح مني درت فوطة وعاودت رجعت غفيت غير مع العصر،كي  فقت لقيت  شومبرة مضلمة كلش طافي غير التيلي شاعل على القران  حتى كي شفت في التاقة برة الضلمة
هزيت التلفون شفت الساعة لقيتها العشرة تاع الليل اه يا ربي وش رقدت وزيد ما رحتش حتى لدارنا نغافر عليهم . خرجت سمعت صوتوا  دخلت للصالة لقيتوا قاعد وحاط مع التلفون غير شافني قالي نضتي .قتلوا ايه وتكسلت فوق الفوتاي قالي نوضتك قبيل محبتيش تنوضي.  قتلوا منعرف ما فقتش خلاص وزيد كنت حابة نروح لدارنا مروحتش قالي غدوة الصباح نديك . غمضت عينيا قالي راح ترجعي ترقدي . غست حسيت بيه قعدني قالي افطني شوي وشبيك غير راقدة انتي تقول مدروڨية   . قتلوا أخطيني خليني .ورجعت كيما كنت . عاود قعدني قالي وين نخطيك  راكي شاربة كاش دوا افطني وشبيك دايخة وحدك راح تخمري من رقاد . هز كاس تاع الما ورشني بشوي لوجهي . وانا غير مغمضة عينيا راقدة بالقاعدة ماني جايبة خبر لوالوا كي شافني منيش معاه خلاص عاود كسلني فوق الفوتاي عدلت روحي ورقدت  . شوي وتقلبت لقيتوا مزال قاعد بحدايا  قتلوا آدم بردت راح جاب الغطا غطاني بيه ، هادي هيا عادتي انا حتى كي نكون راقدة في السرير كي نبرد نبقا بردانة هكاك ومانوضش نجبد الغطا ونتغطا غير هو لي يغطيني حتى كي كنت في دارنا هكدا ساعات نبقى بردانة مجمدة ليلة كاملة  حتى تدخل ماما وتغطيني . كي فطنت المرة هادي لقيتو الصباح الشمس داخلة من التاقة الباب تاع الشمبرة مفتوح وصوت لماعن ، عرفتوا في الليل جابني للشمبرة وما فقتش . دخلت للطوالات لقيت الدم حبس حرت بصح محطيتش في بالي بزاف دوشت بدلت وخرجت للكوزينة لقيت آدم يشرب في قهوتوا  شافني قالي نضتي حطيتك راح تبقاي راقدة حتى لغدوة . حكمت راسي لي يوجع فيا من الرقاد قتلوا منعرف وش صرالي حابة غير نرقد حتى راسي وجعني . حكمني على وجهي قالي ياك مشربتيش الدوا تاع الرقاد ولا كاش دوا آخر .قتلوا لا قالي راكي سير  اريج قتلوا لا والله ما شربت حتى دوا . قالي تحبي نديك للطبيب .قتلوا لا ، اديني عند ماما برك . قالي كيما حبيتي .قتلوا صح وش قتلي لبارح ماراحش تخليني نقرى قالي شارع تنسيه ملخر عتبة الباب تفوتيها غير معايا باه تترباي . سكتت بصح في قلبي قلت نروح لدارنا ونقول لماما وهي دبر عليا وش ندير .