حب في الثانوية

chapitre 102

غير راح آدم بقات معايا الفرملية حتى جاو دارنا بقاو معايا حتى الليل وصلت التسعة راح ماما وبابا باه يتعشاو ، بقيت غير انا ومحمد لقيتها فرصة باه نحكي معاه على راحتي على خاطر حاساتوا مزال متغشش مني ومش حتى حاب يشوف في وجهي . غير خرجوا . كان قاعد بعيد عليا قتلوا محمد ارواح اقعد بحدايا جا قعد بجنبي في السرير . سكت من بعد قتلوا  محمد مزلتي متغشش مني . تبسملي قالي لا بصح منقدرش نشوف في عينيك بعد ما وصلتك للحالة هادي ربي يهدي لكان السبب في لي صرا . قتلوا متلومش روحك خاطر اي واحد في بلاصتك كان راح يعمل لي عملتوا انت واكثر ، انا وقتها الشيطان لعبلي بعقلي وكانت  نفسيتي زيرو مقدرتش نحمل بلي حتى انت تكرهني وتتخلى عليا انت بنسبة ليا اكثر من اخ انا فتحت عينيا لقيتك انت قبل بابا و واقف معايا في أي حاجة نحبها ، محبيتش نطيح من عينك . قالي بصح مهما صرا مكانش عليا نقول الهدرة لي قلتهالك ، أصلا انا كنت معول غير نرجع للدار نراضيك خاطر انا علابالي بتربيتك وعلابالي بلي جامي تعملي حاجة طيح بينا بصح الشيطان سبقنا كل ، ربي يغفرلنا ان شاء الله . قتلوا ان شاء الله اهيه قولي وش صرا وقت لي كنت انا راقدة ما علابالي بوالوا كاش جديد . قالي مكاين حتى جديد غير القديم قاعد يتعاود ايه حقا راني هزيت الدبلوم تاعك تاع الفارماسي .قتلوا صح قالي ايه . قتلوا هدا خبر يفرح زيد، يخي متزوجتش وانا راقدة برك والله نعاديك .ضحك قالي لا بطلت مش تزوجت . قتلو كيفاش بطلت .قالي بطلت الخطبة . قتلوا راك تحكي صح علاه وش صرا . قالي والوا غير متفاهمناش . قتلوا لا مش هادي السبة قول الصح علاه حتا بطلت . تنهد  قالي بعد لي صرالك انتي بطلت كيفاش راح نكمل معاها وانا مش قادر حتى نسمع اسمها   . قتلوا علاه وش دارت . قالي لاه معلابالكش بلي هيا لي قاتلي وش صرا هداك النهار ، عبالك كل ما نتفكر هداك نهار نحس روحي منيش راجل هيا رمات عليك الكلام وانا جيت عندك كي رافاي نصوني وغشي كامل فرغتوا فيك . قتلوا متقولش هكدا ، انا كنت نحساب بلي آدم هو لي قالك . قالي تحكي صح آدم راح يقولي هدرة كيما هاديك . قتلوا معلاباليش انا حسبتوا هو دارها مكرة . قالي اريج انتي تحسابي آدم ذراري حتى يدير لقطة كيما هادي ، امبوسيبل يديرها ، بصح هي دارتها كي سقساها آدم علاه دارت هكدا قاتلوا راكم كل تحبوها اكثر مني وانا درت هكدا خاطر داتكم مني ومنعرف واش من لخر هيا غايرة منك كي عاد آدم يحبك ، وانا كان لازم عليا نعرف هاد الشي من هدرتها ، كانت اي حاجة تشوفها عندك ولا  حاجة يديرهالك آدم تقولي ديرلي كيفها واشريلي كيفها وانا كنت نقول بلي صحبتها راهي حابة تعاند برك كيما لبنات كل ، يخي ضهرت قلبها معمر من جيهتك غير لقات فرصة شوفي وش عملت ربي لا متتي في جرتها ، المهم لي فات مات . بقيت غير نسمع فيه يهدر وحايرة دنيا دير هكدا صراحة متوقعتهاش منها يعني لي صرالي كامل بسبتها ، واكثر من هكدا مفهمتش علاه حتا تغير مني صح آدم يحبني بصح مش قاعدة تشوف بلي طلقني ومشاكلي معاه ميخلاصوش  . تنهدت قتلوا ربي يهدي ويسامح ، المهم انت احسن اخ في الدنيا كاملة . ضحك قالي راكي ترضي فيا .قتلوا لا راني نقول في الصح انت احسن اخ في الدنيا كاملة . دخل بابا   وماما جا بابا  قعد بجنبي قالي بنتي الدلولة تاعي كي ترتاحي وترجع صحتك راح نديك معايا ونروحوا نسافروا غير انا وياك مكرة في ماماك وخوك.  قتلوا صح .قالي ايه نروحوا . قالوا محمد حتى انا نهز ماما ونروح . قتلوا بصح انا مش حابة نروح لحتى بلاصة حابة غير نبقى وصتكم هكدا . قالي بابا منزيدش نفرط فيك راح تبقاي معايا وعندي حتى يهز ربي امانتوا حاب نشبع منك كنت ديما بعيد عليك في جرة الخدمة وكي كملت الخدمة انتي تزوجتي ماشبعتش منك خلاص . قاتلوا ماما يا راجل وقيلا راح تخليها تبور وهي مقابلاتك . قالها ايه صاي راح نخليها عندي مقابلتني قدام عيني وادا على الزواج ياك جربت مكملش  المكتوب صاي . ضحكت وانا في بالي راهوا غير يتمسخر برك قاتلي ماما اضحكي اضحكي راهو يهدر بصحوا من لي مرضتي وهو يحلف قالي منزيدش نخليها تتحرك من بحدايا.  كملوا سهرو معايا حتى فض وقت الزيارة روحوا حتى ماما قلتلها روحي برك راني لاباس نورمال نبقى وحدي . غير خرجوا هزيت التلفون لي مدهولي آدم فتحتوا  دخلت للفايس لقيتوا ديجا عيطلي قداش من مرة عاودتلوا من المرة لولة هز عليا . قالي حبي لباس قتلوا لاباس قالي وين كنتي من قبيل وانا نعيط مهزيتيش عليا . قتلوا ماما وبابا كانوا هنا دورك وين راحوا قالي ملا راكي وحدك ، قتلوا ايه قالي ملا  افتحي الكام  نشوفك قتلوا  ايه  دقيقة برك . ضحك  قالي بطة غير مكان لاه تبقاي تريڨلي في روحك راني شايفك وانتي كشرودة. قتلوا يا انا كشرودة قالي ايه كشرودة. فتحت الكام قتلوا شوف انا كشرودة . ضحك قالي احلى كشرودة شفتها في حياتي. .بقيت نتبث وين قاعد قتلوا يا هادي شمبرتنا قالي ايه شمبرتنا . قتلوا راك قاعد لثم وحدك . قالي ايه باه نحس بيك معايا ونشم ريحتك  . ضحكت قتلو آدم راك وليت رومانسي فوق  اللازم . قالي خاطر تع الصح راني متوحشك بزاف وحابك عندي ليوم قبل غدوة . دورتلوا الهدرة قتلوا تعشيت . قالي مزال راني نايض نطيب . ضحكت قتلوا يا مسكين تطيب وحدك علاه ما شريتش من برة قالي نكدب عليك والفت نطيب وحدي . قتلوا ملا راك تعلمت تطيب قالي راكي تجي ونطيبلك وتشوفي بعينيك . وقف راح الكوزينة حط التلفون مقابلوا وبدا يجبد في الحوايج قتلوا وش راح تطيب قالي راح نطيب فريت ونقلي سكالوب وندير السلاطة . قتلوا اهيه راك وليت شاف وانا معلاباليش . بقا يطيب من بعد هز بواط . قالي حبي تعرفي وش هدا من لي شريتوا معرفتوش وش هو . قتلوا وريني نشوف قربهولي للكاميرا .قتلوا هدا اسموا راس الحانوت . قالي اول مرة نسمع بيه . قتلوا كيفاش تقولي نعرف نطيب وانت متعرفش راس الحانوت . قالي نكدب عليك انا نعرف غير ثوم والفلفل أكحل خاطر كي نشمو نعطس .  ضحكت قتلوا انت هو  شاف فارس الغلابة . شفتوا نحا تريكو تاعو قالي السخانة تقتل في الكوزينة قتلوا علاه راك تعدب في روحك كون تعشيت عند ماماك برك ولا شريت من برة . قالي حقا فكرتيني غدوة يما راح تجيك . قتلوا ايه مرحبا بيها . سكت وبقا يشوف معايا قتلوا وش . قالي بلاك راح تجي معاها دنيا ياك نورمال . قتلوا حتى هيا مرحبا بيها .