الموت الحي

البارت الرابع

مرحبا حبايبي العسل شلونكم ❤️

ينات رجاءًا تجنبوا الغلط والتجاوز على عمو ياسر بالتعليقات ترة بتصرفاتكم هاي دتكلولي وقفي الرواية يعني والله ميصير اني من يمي كمت اتنرفز من اشوف البعض نازلين فشار وغلط على الرجال والله عيب رجال بكد ابوكم والصغار من المتابعات يجوز يطلع بكد جدهم والله ميصير شوية الزم اعصابي ليش تضطروني اسوي شي ما احب يطلع مني واني احبكم واحترمكم فرجاءًا وللمرة الثانية غلط ما اريد على عمو ياسر متحمسين ، ضايجين اوك اني وياكم
عبروا عن مشاعركم بس بدون تجاوز ، واتمنى هالشي ميتكرر مرة لخ وتحياتي ❤️

#الموت الحي
#للكاتبة براء الموسوي

انا اشتاكيت الج يا شمعة البيت
انا خلافچ يا يمة شكد تأذيت
خذاج مني الزمن وانطاني دمعات
اريد انه مكانچ رحت يا ريت
وعمة عيوني يا يمة اذا انساچ

ديمة : دعوفي امي مستحيل تنتبهلچ تعاي وياي ندور عليها برة ... طلعنه ودورنه هم مالكينه ماكدرت اتحمل رحت ركض لبابا الواكف بالشارع بابا زبيدة ماهي بالبيت

ياسر : لا رد

ديمة : اباوعلة واكف وعيونه رايحة بالفراغ وميسمع اليحاجي ... لزمت كتفة وهزيتة حيل بابا تسمعني الله يخليك بس ركز وياية زبيدة ماهي بالبيت

ياسر : شنو تكولين ما جاي افتهم

دُنيا : وخري ديمة وكفت كبالة بابا حبيبي ركز وياية شوية زبيدة ، زبيدة اختي ماهي بالبيت دندور عليها بكل مكان بالبيت وهي ماكو

ياسر : شنو ماهي وين راحت ، دورتن بغرفتها او يجوز بغرفة وسيلة

ديمة : والله بابا ماهي دورنا بكل البيت ... اباوع لمعين اجه من شافنه

مُعين : هاي شعدجن هنا مستسحن انتن بلة متشوفن كومة الزلم البرة شطلعجن جوووه يلة

ياسر : اسكتتت انت اختك ماهي واجن يكللي ، تعال اوكف بمكاني وانتن بابا تعالن وياية نشوف الكامرات

ديمة : اي صحيح الكامرات نسيناهن ... رحنه نركض لمكان الكامرات كعد بابا يرجع بالكامرات واحنه ندور بين الناس ، ماكو كل البيت مليان ناس والدرج ناس صاعدة نازلة منه وكلها لابسة اسود مجاي نكدر نميز ماكو مجاي نلكاها

ياسر : وينج يا زبيدة وينج يا بوية اني ناقص ... بابا ركزلي راح ارجعة على البارحة

ديمة : رجعة على البارحة وكعدنه نشوف من ال12 بالليل ماكو بس احنه موجودين وهاي زبيدة ، بابا سرع الفيديو شوية خلي يمشي اليوم لان على هالسرعة منخلص لباجر ، اباوع بابا سرع الفيديو  واني صابة كل تركيزي على الشاشة ، اباوع الساعة ب4 الفجر نزلت زبيدة وطلعت من البيت