فوتي قبل ماتفوت وخلي نجمتك معانا
__🌸🌸__
البيت في هاك الوقت كان هادي فوق اللازم ...لا زيْد خاربها بصوتو ولا ادريس وافلامو..ولا حتئ صوت أمو من الكوجينة ومن قضياتها ...سكر الباب بالسياسة و تمشئ علئ طول الكلوار بخطوات كاتم صوتها حتئ وصل للصالة...قابلتو سامية ممدودة ع الفوتاي ومغمضة عينها غافية...قرب منها يتحسس وجها لعل مريضة وإلا بها حاجة ...لكن علئ لمستو ورغم نعومتها فاقت.
" إلياس ؟! " استوت قعدتها وهي تركح غطاء راسها " أنا قلت مايروح الا مع العشية "
قعد جنبها وحط راسو علئ حجرها " مكتبش نقعد للعشية ...وروحت باش نقيل عندك "
باس ركبتها وهي تبسمت ورجعتلو البوسة علئ راسو " شفت نادية ؟! "
همهم وهو مغمض عينو " امممم "
مسحت علئ شعرو " من الإمممم متاعك يعني تعاركتو ...كي العادة ...نفس السبب "
تقلب علئ ظهرو و خزر لوجها " يعني موش لازم ناخو بخاطرها ...مازالها موش مقتنعة بفكرة العرس ...وزيد العرس بواحد كيف إلياس مسكر ماعندوش وين يدور الريح ومعقد ...في الوقت هذا موش ساهل "
قرصتو من زندو " شبيه إلياس...الف وحدة تتمناه ...ماريتش البنات ايلي يجو لهوني قال شنوة يحبوك ترقيهم ...وهوما غير باش يشوفوك ... ولولا بوك ايلي يوضح ويعاود انك موش راقي ...كان البيت يملئ ويفرغ بيهم "
ضحك وهاك الخطوط المزينة طرفة عيونو بانو ...ضحكت لضحكو وعقبت بعدها " لو جات بيدي حكاية عرسك كنت خذيتلك بنت ناصر ...بنية متعلمة ومزيانة ومنا فينا ..."
زادت ضحكتو و رفع كفو لدڨنونتها " أمي يا أمي ياست الحبايب ...هات سمعني ...أنت حكيت مع الطفلة في موضوع كي هكا "
خزرتلو مستغربة وموش فاهمة وهو وضحكلها " قصدي بنت ناصر ايلي تحكي عليها ...فاتحتها في موضوع كي هكا ؟! "
لعبت بحواجبها " ظاهر فيه ولدي المدلل عجبتو الحكاية ...وعجبتو بنت العاصمة "
قام من علئ ركايبها " خاطيني ...قلبي معمّر بندوتو "
ضربتو علئ كتفو " احشم راك قدام امك...زيد تغزل بيها ..."
هز اكتافو " وين المشكل...ماي خطيبتي و في طريقها تصير مرتي...موش لازم ع الراجل يدلل مرتو ويبشبش بيها "
دوحت امو براسها " اممم...خطيبتك...صبر روحك...خواتها قالوها كلمة وماسمعناش بعدها خبر ...ولو جاو في نيتهم يعطوهالك...رام زربو وخلونا نلبسو الخاتم...موش كل مرة سبة ويأجلو في الفرحة ...إنت نوارة عيني وفي غلاك مافمة حد كيفك...أما نقلك وليدي ها الطفلة مارضاهاش قلبي...أما الله غالب قلبك حبها وتعلق بها "
أنت تقرأ
🌸 💚سَــلاَمُ قَــوْمٍ ( باللهجة التونسية : مكتملة) 💚🌸
Adventure🦋الاسم : سـلامُ قَـومٍ ( مكتملة ) 🦋الكاتبة : نودا 🦋النوع : اجتماعي ،عائلي ،ديني ،رومنسي 🦋تاريخ النشر : 10/1/ 2022 🦋تاريخ نشر آخر فصل : 20/07/2023 🦋عدد الفصول : 78 🦋القصة " شابة تتبع والدها في زيارة قصيرة لمسقط رأسو تلقئ روحها وسط اسر...
