___🌸🌸___
دوب ماكان كبوطها مغطي اكتافها ويديها شادة في اطرافو مثبتتو ...كانت تتمشئ مع اسحاق شوية شوية لباب الدار...الليل كان مليل والوقت خذاهم بلا رادة منهم ..مازالها واقفة معاه بايلي تقدر ...تحكيلو وتفسرلو...تمشي وتجي ع الطبة وتسألو علئ حالة امو وبوه بالضبط ومع معرفتها في هاك الدومان سهلت عليه بارشا أمور وطمنتو...آخرها مرواح امو من السبيطار ولهوتها الخاصة بيها ...ولانها وصلتها معاه و ريڨلتلها دواها كطبيبة ...حب يرجعلها شوية ملي تعمل فيه معاه و قرر يوصلها لدارها يونسها و لسبب آخر نافيه وموش قابل يخمم فيه بالذات في وضع عايلتو هاكي.. وهي بالطبيعة الفازة عجبتها و ماقالتش عليها لا .
نڨز كلبها فرحان بوصولها وهي بكفوفها فركت وذنيه و عيونها علئ اسحاق الواقف يستنئ فيها تدخل" خايف عليا موش راضي تروح الا بعد ماتطمن اني في داري وبابي مسكر ؟! "
جرأتها في الموضوع ضحكتو ..هرب بعينيه وهو يشاور للضو الشاعل في الدار " أنت ايلي تخاف بامارة الضو ..تخافش الستاغ تهبطلك لوسي "
عقد حواجبو مستغرب وقت جات لبالو حكاية حيرتو " أنت كيفاه تنجم تقعد وحدك في الدار؟! "
ضحكت " وشكون قالك وحدي...فمة مرا كبيرة قريبتنا تجي في الليل تبات حذايا وفي النهار تطل علئ أولاد ولدها ..هنا في الدوار موش بعيد "
_" أنت علاش ماتنقلش مع خوك ...ديجا بعد عرس بنتو بقئ راسو وراس مسكية والدنيا فرغت عليه ...هاوكا ونسو بعضكم "
تلفتت للدار وراها " الحق ...دار بابا ماانجمش نخليها ..فيها ذكرياتو ومانلقئ راحتي كان وسط حيوطها " تبسمت مودعتو وحاطة نقطة نهاية لحديثهم " يلا أنا نقلك علئ خير وسايس روحك وأنت راجع "
_" علئ خير "
شيعها بعينو حتئ دخلت من الباب ودار لكرهبتو..في فكرو كان تبسيمتها وهبلتها وعقلها ايلي يوزن جبال ..دوب ماقعد ع الكرسي ودور المفتاح حتي سمع صوت حلان باب الدار بالقوي...تلفت مفجوع وين كانت سلمئ خارجة تزرب وكبوطها في يديها ...دق قلبو بخوف وتصور انها لقات حد في الدار وهو ايلي خوفها ولخلخلها وجها...هبط يزرب وعرضها " شبيك ؟! شصاير؟! "
وسط لهيثها دزتو ناحية الكرهبة " أمشي فيسع لدار الياس "
_" الياااس؟! توا في ها الوقت ؟! يابنتي شصاير لراسك "
_" امااانك أمشي وفيسع ...تو تفهم كل شي بعد "
الخبر ايلي وصللها صحيح كان متوقع ...لكن في هاك الوقت بالذات كان سابق شوية وايلي زاد النار هو حالة إلياس ...وسط ها الاحداث لكل ...ماتصورتش اسحاق ينجم يفهمها ويتقبلها فيسع ...لذا كان الاحسن انها تعمل عقلها وتخمم وحدها في شنوة لازمها تتصرف بعيد عليه .
أنت تقرأ
🌸 💚سَــلاَمُ قَــوْمٍ ( باللهجة التونسية : مكتملة) 💚🌸
Adventure🦋الاسم : سـلامُ قَـومٍ ( مكتملة ) 🦋الكاتبة : نودا 🦋النوع : اجتماعي ،عائلي ،ديني ،رومنسي 🦋تاريخ النشر : 10/1/ 2022 🦋تاريخ نشر آخر فصل : 20/07/2023 🦋عدد الفصول : 78 🦋القصة " شابة تتبع والدها في زيارة قصيرة لمسقط رأسو تلقئ روحها وسط اسر...
