__🌸🌸___
أصوات بعيدة ...مشوشة ..متداخلة وخارجة من وسط ظلام ...شعلة صغيرة من لهيب شمعة يتلاعب بيها الريح ،تتمايل يمين ويسار .. تقاوم باش ماتطفاش ..صوت صريخ قوي ..صوت ضرب ورضيخ ...صوت نواح بمرارة ...صوت سحلان و باب يتسكر بقوة ومعاه رنة حديد المفتاح وهو يدور في كوبة ...صوت خشين قاسي غايبة عليه الرحمة بدات تبان حروفو وتتشكل كلماتو "" كي وجودك كي بلاش ""..."" يارخيص اندادك ""..."" تفوه علئ رجوليتك ""..."" خليك كي الكلب علئ بلاصتك ""..."" اذا حاولت حتئ تهز راسك الا ما نززرك ""
جملة ذكريات تصبت مع بعضها...اختارت في مابينها الاكثر وجيعة و خطرت لبالو ...فوق الصخور المتكدسة ...كان مرمي بجروح وكسور متكتلة علئ بدنو ...ذراعاتو مفتوحين علئ كبرهم ...والدم كان مغطي ملامح وجهو...رمشت جفونو خايفة تتفتح وتشوف آخرتو...خايف يفتحها يلقئ روحو في قبر ضيق ...خايف يتسأل شنوة عملت في حياتك وشنوة حضرت لنومتك ااطويلة تحت اللحود ...رضئ يخليهم مسكرين ويعيش مع الوجيعة ايلي تنخر بدنو علئ أنو يفتحهم علئ عالم الحساب .
صوت جديد غير الاصوات ايلي كانت توصلو من الماضي...صوت حركة ساقيه تمشي ع الصخور وعمال تقرب...ممكن جات اللحظة ايلي فيها السؤال ...طيلة تلاثين عام تعدو ...مالقاش فيهم حاجة يقدمها ويقول أنا عملت ها الخيرة ...كلهم سنين ضياع ...لا بوه...ولا جاهو ...ولا حتئ معارفو ...قادرين لحظتها ينشلوه ولا حتئ يهزو عليه حمل الذنوب ايلي حس برزنهم في صدرو ...مثقلين بدنو في هاك البلاصة موش منجم يزيحهم وياقف ...شنوة يقول لو تسأل ...وباش يفسر ويحاجج ؟؟!
حاسس بكل شي ...حتئ انو حاسس بحد مجهول عمال يقرب منو اكثر...حتئ صار عندو ...اذا صدق وكان في قبرو ...اذا صدق وهو فارق هاك الدنيا ...فيا ويل الويل ايلي يستنئ فيه ...شكون مانعو من الحساب...وشكون مانعو من العذاب؟!
تمتم بصوت مخنوق وعيونو مكبوسة علئ اشفارها رافض يحلها " يااارب "
لأول مرة يحس بهاك الضياع ...وخاصة هاك الخوف...ولاول مرة يتمنئ أنو تتعطالو دقيقة جديدة يبدل فيها كل حياتو ...دقيقة يقول فيها أنو نادم ويطلب المغفرة ...لكن الدقيقة وهو في لحظة الحساب معادش عندو فيها الحق .
في خضم وجيعة كسورو ونزيف جروحو ...كان قلبو يتفتت ندم وكانت فيه وجيعة أضعاف ماحاسس بيها علئ بدنو .
صوت معهود بدد الوحشة ايلي كان فيها و بدد عتمة هاك الظلام ايلي غارق فيه " فااادي ...تسمع فيااا ...فااادي حل عينك ..تحمل "
تمتم بخوف " يارب سامحني ...يارب اغفرلي ..."
حس بسخانة كف تلامس كفوفو و سمع هاك الصوت يكبر " الله اكبر... وله الحمد " حس بصوابع تتحسس جبينو ومعاه يرجع الصوت يحكي " تحمل ...طلبت الاسعاف وعدك بيهم وصلو "
أنت تقرأ
🌸 💚سَــلاَمُ قَــوْمٍ ( باللهجة التونسية : مكتملة) 💚🌸
Adventure🦋الاسم : سـلامُ قَـومٍ ( مكتملة ) 🦋الكاتبة : نودا 🦋النوع : اجتماعي ،عائلي ،ديني ،رومنسي 🦋تاريخ النشر : 10/1/ 2022 🦋تاريخ نشر آخر فصل : 20/07/2023 🦋عدد الفصول : 78 🦋القصة " شابة تتبع والدها في زيارة قصيرة لمسقط رأسو تلقئ روحها وسط اسر...
