__🌸🌸__
في جنينة واسعة مليانة شجر بفصايل كثيرة وعلئ كرسي ساند ظهرو كان محجوب قاعد يتكيف في سيڨاروه وكل مرة يعمل رشفة من قهوتو المرة ، الفيلا ايلي ساكنها حد ما ملك كيفها في هاك الحي الراقي وماكانتش الوحيدة عندو هذا غير بقية العقارات والاراضي والاملاك ايلي تتعب في عدها ، كان لاباس بيه و صاحب افاريات كثيرة والكل يسعئ لودو وشراكتو ...بينما هو كان كل همو يصطاد بنت ناصر لاغير ...لأنو هي الصنارة ايلي تعطيه خير البحر .
جاء فادي جنبو ووقف يخزر لمنڨالتو بمعنئ ماعنديش وقت طويل للحديث " قالولي وصيت أول مانفيق نتعدالك ...أن شاء الله خير "
نفث دخان سيڨاروه وخزرلو بعين ضيقة " سي فادي ...صحة النوم بابا "
لهجة التمقعير كانت ظاهرة من نبرتو ماخفتش علئ ولدو ...جبد كرسي وقعد مقابلو " نعرف شنوة مشكلتك ونعرف علاش طلبتني ...اذا علئ طيبة ..مازلت مانعرف عليها شي...مشيت وجيت علئ خدمتها والكل يقولو مايعرفوش عليها وين بالضبط...تاليفونها مسكر...حتئ تبعت خيط من معارفها مانجمت نوصل لشي...تقول الأرض انشقت و بلعتنا "
طفئ بقية السيڨارو في الصندرية الكريسطال " لأنك واحد مسطك ...ببدن بغل و عقل بهيم "
مط شفايفو موش قابل هاك تطييح لقدر ...لكن بالاخير ايلي سمعو لكلامو ماهو الا بوه .
ثبت فيه محجوب لوقت طويل قبل ما يعطيه لب الموضوع ايلي طلبو فيه " طيبة في دوارهم ايلي كانو يعيشو فيه وقت كانت صغيرة ...وأنت ماعليك كان تمشيلها و ترجعلها عقلها لراسها بطريقة العادة "
شاور لقماش ع الطاولة ملفوف علئ حجاب صغير " هاذي تحطها في أي حاجة تتبعها ...صاكها كيما مسانس ...والا مكتوب كبوطها...تحت زيتونة دارهم...في عتبتهم ...المهم ...بلاصة حد مايراه فيها ..."
تأفف فادي " بربي مازالك مصدق خزعبلات اك ايلي اسمو جيلاني...الراجل دجال كبير...قالك يسخر في الجن و كذا...طيبة خمسة سنين وأنا نقنع فيها واخرتها مشات وماخلتش حتئ خبر وراها "
ضحك باستصغار " خزعبلات ؟!..." هزو وحطو " العز ايلي أنت فيه لولا الشيخ جيلاني " اشر للقماش " ولا ها الشي هذا ..كنت توا تتشحت في دينار عند الناس ... أما شعندي نقول لواحد كيفك انت، قليل عقل وماعندوش منفعة " اشر بصوابعو آمرو " تعمل ايلي قتلك عليه وليوم قبل غدوة ...طيبة طاح بيها واحد اخر يحلب فيها وفي ظرف شهر ضرب علئ قلبو فلوس زرقاء ...فلوس كان المفروض احنا نربحوهم ...ونزيد نقلك يا رخيص اندادك ...الشيخ جيلاني تهاجمت روحانياتو و كتبتو تحرقت مالحق منها كان ع القليل ...وصاحب ها العملة ...مايكون كان ايلي طوعها لروحو ...فيسع خنلقفوها قبل لا نخسروها و يصعب علينا ترجيعها "
أنت تقرأ
🌸 💚سَــلاَمُ قَــوْمٍ ( باللهجة التونسية : مكتملة) 💚🌸
Adventure🦋الاسم : سـلامُ قَـومٍ ( مكتملة ) 🦋الكاتبة : نودا 🦋النوع : اجتماعي ،عائلي ،ديني ،رومنسي 🦋تاريخ النشر : 10/1/ 2022 🦋تاريخ نشر آخر فصل : 20/07/2023 🦋عدد الفصول : 78 🦋القصة " شابة تتبع والدها في زيارة قصيرة لمسقط رأسو تلقئ روحها وسط اسر...
