___🌸🌸__
" إلياااااس ...إلياااس استنئ "
خطفت كبوطو كيف ماجاء وبزربة ...وبشلاكة الدار خرجت وراه تجري ...رمات خمارها رميان حتئ ماانتبهتش أنو خصلات من شعرها كانو هاربين و ظاهرين ليلي يشوف .. خلطت عليه وقت كان يحل في باب الكرهبة طالع...سكرتو بكفها و جات قدامو متكية عليه ومانعة إلياس من الطلوع " ماكش ترئ في حالتك .. وين ماشي بها هكا ؟! "
العرق يلب عليه وانفاسو متداخلة ...يلهث ومع لهيثو خارجة تحشريجة من صدرو " لازمني نكون معاه ...لازمني نخلط عليه ...يعيشك أبعد "
خذات وجهو بين كفوفها " عزيز قلبي...ياروحي...أنت مريض...وهو متأذي...اذا مشيتلو توا .. باش تزيد عليه ..وباش يزيد عليك...كل ايلي باش تعطوه لبعضكم هو الأذية ..."
بعد وجهو منها وحاول يزيحها ع الباب " ماتعملش هكا يعيشك ...حتئ شي ماباش يمنعني ياطيبة توا غير ربي سبحانو ...حتئ لو لحظة وصولي لجنبو باش تكون آخر لحظـ..."
شهق راد النفس وكفوفو من وجيعة ضلوعو تحطت علئ صدرو لا اراديا..طبس يكح يغالب في معاناتو وهي مالت معاه ..تمسح علئ ظهرو بحنية ...ترجتو ببكاها " لو تقدر محبتي ليك...ارجع...ماتعاندش في صحتك "
لهث ودواير فمو كلها كانت بالدم خارج منو "ماتحطش محبتك كف لكف بيه...أنت هكا ..توازي بين زوز عروق من قلبي ..ولا واحد نخيرو ع الثاني "
فقدت الصبر وقلبها رف " خاايفة عليك ...خايفة باش تفهم...خذاو كل حاجة ...ماخلولي منك شي...حتئ صوتك باش يحرموني منو "
_" شكونهم هوما حتئ يحرموك...ر......"
حاول ينطق كلمة ربي ..جاهد وحط كل قوتو والاحرئ ماتبقئ منها باش ينطقها..لكن لسانو كان يتربط ويتعقد عليها ..المشقة خلتها تدخل في هيستيريا متاع بكاء...معادش قادرة تسكت منها...ضمها لصدرو وتنفس عطرها بكل جوارحو " صدقني قوتهم ماتكفيش ...الحرب مازالت ماوفاتش...سبقونا بخطوة...لكن ماغلبوناش
بعدها عليه شوية حتئ ينجم يشوف وجهها..مسح دموعها وباس عيونها لاسعها ببرودة شفايفو " اذا يرضيك وصلني أنت لعندو...موش أنت ...شطري ...وين أنا وين أنت "حط يدها علئ صدرو " شطرك هنا...ماتخليهوش وحدو مالا..."
هزت براسها باهي ..البكاء موش مخليها تقول جملة وحدة..رجعت لحضنو ماخذة مايكفيها واول ماتفكرت انها بقربها تزيد عليه وتعمق مرضو ...حبت تبعد...لكن هو كان عندو رأي آخر وقعد مستحفظ عليها عندو " معادش تخاف اذيتي ...ايلي ورثتو من والدتك...حررك...وممكن يحررني ... "
___ 🌸🌸___
ماكانش مركز في شي ..غير ايلي يدور في راسوو...المشاكل كثرت ...و حاسس روحو مشتت موش داري وين بالضبط يشب ..شنوة باش يحل وشنوة باش يفض...بوه مازال علئ حالو في البلوك ..الياس مريض مرضة بعمرو ماشافو عليها...ادريس ماهوش موجود أغلب الوقت ...يتصرف بغرابة ...ديما ساهي ...واذا دخل لبيتو معادش يخرج منها الا للضرورة..واذا حد جاء حكئ معاه فهو يلخص كل شي في كلمتين ويرتح راسو ...اسحاق مايفوتهوش غرابة ...أغلب الوقت مع سلمئ ...موش متلفت ولاسامع حد ..ولا الحديث ايلي قاعد يتقال عليهم في الدوار...قداه من مرة يجي يحكي معاه ويفهم منو التاڨزة بالضبط ..يلقئ روحو يبلع الحديث ومايطاوعهوش لسانو ...لو هو في علاقة معاها فعادي ...وبالعكس حاجة تفرح ..لكن ..حاسس أنو رونديفواتهم فيها ان ...وها ال" إن " تخص ايلي صاير في دوار ...زَيد لاقي روحو في القراية ..ايلي تعدئ علئ راسو وايلي شهدو في عايلتو موش هين عليه .
أنت تقرأ
🌸 💚سَــلاَمُ قَــوْمٍ ( باللهجة التونسية : مكتملة) 💚🌸
Adventure🦋الاسم : سـلامُ قَـومٍ ( مكتملة ) 🦋الكاتبة : نودا 🦋النوع : اجتماعي ،عائلي ،ديني ،رومنسي 🦋تاريخ النشر : 10/1/ 2022 🦋تاريخ نشر آخر فصل : 20/07/2023 🦋عدد الفصول : 78 🦋القصة " شابة تتبع والدها في زيارة قصيرة لمسقط رأسو تلقئ روحها وسط اسر...
