ماهر ومازن غير مشاو من الاوتال بدا مازن يشكيلو
مازن:يااا الرب قد القطة جاية تهدد فيا شفتها.....شفتها يحكي ويعيط ويحرك في يديه
ماهر سمع سمع لين مبقاش ليه قدرة يحمل
ماهر:مازن متهبلنيش خليني نسوق وراك نتا اللي بديت هيا كانت مزروبة ونتا بديت تعيط وقلت عليها حمارة
مازن رجعت بيه صور لواش صرا شافها كي ظمت المسجلة لصدرها وبان الخوف اللي في عينيها عليها هدن وسقسى
مازن:زعما وش فيها المسجلة؟
ماهر:وشمن مسجلة هاذي
مازن:اللي جات علاجالها وكانت حاضنتها وخايفة عليها
ماهر:معرف..... وش دخلنا...... وضك انزل
مازن دور راسو على وين راه :اوو وكتاه وصلنا
ماهر:كي كنت نتا تخمم في أميرة الاحلام انا كنت نسوق
مازن تفجع:يااا ماهر خوويا تعيش وشمن أميرة الاحلام يا ربي متقبلش دعوتو ديجا ضك نشكيك للينار كي حاميت على طفلة من غيرها ورايح تدعي خوك بيها نبقى بلاش ومنديهاش .....(وبعد ما خمم في هدرتو حط يدو على فمو )لالا يا ربي منقعدش بلا مراا ارزقني من عندك وحدة تكون شابة ومناا نجيب انا وياها وليدات ورفع يديه زعما يدعي :آآآآميين يا رب العالمين
ماهر خبطو لكتفو :انزل بركاك من الجياحة و انزل تشوو
ونزلو وكيما كان الحال دخلو للفيلا لقاو الدار كامل ملمومة على طابلة العشا تعشاو تحت جو هادئ غير لينار تحكي على يومها فالمدرسة وتحاول تضحك الكاينين حتى نطقت فالموضوع اللي كل ما توصل ليه ميجاوبوهاش
لينار:بابا
ماهر حط الكأس تاع الما وهزلها حواجبو تاع وش كاين
لينار جبدت نفس من صميم قلبها عارفة التبهديل اللي رايحة تديه من عندو:اا....احم....انااا....
ماهر::ليناار اهدري وش كاين
لينار:بابا حابة نشوف ماما
كامل العائلة (سليمة نسيمة ميرال مازن)ضربو السكات وهبطو روسهم ,أما ماهر ضغط على الكاس اللي كان في يدو يحاول يكالمي روحو ونطق::ليناار يماك ماتت وين راكي حابة تشوفيها هاذي ثاني
لينار بدات تعيط وعينيها غرغرو:كاينة حاجة اسمها قبر, صورة .اسمها, احكولي عليها اي حاجة علاش راك رافض تديني لقبرها راها ماما اللي جابتني وماتت بسبتي ,في ولادتي و متخلونيش حتى نروح نشوفها كامل الولاد يجو معا أمهاتهم إلا انا مي قلت معليش ,يقولولي احكيلناعليها نسكت باسكو انا مانعرف والو عليها....(شحقت وكملت)يمااا مانعرف عليها والو متخيلها.. لا اسمها لا عايلتها وااااللووو وكل ما نهدر تسكتوني
YOU ARE READING
"اسيرة_لعبة_الماضي "باللهجة الجزائرية
Romanceاول كرو ليا بقلمي وافكاري وتعبي ممنوع النقل الا باذني "الدنيا خيبات...تعطيك الأرخص وتأخذ منك الأغلى ......تجعلك تثق وتخونك ......تجعل جميع الظروف جامعة لك بما ستحب وتتعلق ....لتتأكد من شدة المك عندما تاخذه منك ويصبح الماضي هاجسا بينك وبين ال...
