هروب ليلة الزفاف💍مكتملة💍

💍الجزء 23💍

💍❤️هروب ليلة الزفاف❤️💍

بقلم✍️ أسماء الزروالي⭐🌙

فقرة 23 :

مشاو كاملين تيجريو جيهتو .
اول ما وصلو بان ليهم صباط بلال قدام الباب .
الصباط اللي كان لابس في الصباح معناها بلال كاين لداخل .

هبة من شدة الصدمة بقات واقفة  دماغها وقف وتفكيرها وقف معاه الدنيا وقفات وحياتها وقفات . بقا غير قلبها اللي تيضرب وصوت ضرباتو تيتسمعو في وذنها

مستحيل الرجل الطيب اللي وقف معاها وسندها ودعمها ودافع عليها في اصعب اوقات حياتها اكون تحرق لداخل.
مستحيل تكون نهايتو على هاذ الشكل واش اعباد الله اي واحد حنين فيها لازم تخسرو . خسرات أمها ودابا بلال . مستحيل اكون تحرق غادي اكون ناعس وخاصها تغوت باش افيق واخرج من ثم . وبلاما تشعر غوتات غوتة وحدة : بلااااااااااااااال ...... بلااااااااااااااال ............ بلاااااااااااال .
لكن لا مجيب على نداءها .....

نزلات على ركبيها لان رجليها مابقاوش قادرين احملوها نزلات في البلاصة اللي لقاها فيها وهي في أضعف حالة . الليلة اللي اواها في بيتو ورحب بيها وعالجها وسكنها عندو وتقبلها في حياتو رغم مشاكلها اللي بسبابها هاهو خسر حياتو  .

رجعات تتغوت وتقول : بلااااااال ....بلاااااال ...... عفاك خرج ماتخلينيش حتى انت.  .... ياك وعدتيني .... قلتي لية مستحيل تخلا علية وغادي تبقا معايا حتى توصلني لبر الامان .... خرج عفاك انا مابقيتش باغا  حتى شي حاجة منك .... غير انك تبقا حي .... ياربي لا .. لا لا .. مايمكنش .... اموت حتى هو ....  ياربي كوغير خديتيني انا بلاصتو حيث والله حتى عييت يارب ... هو مادارش علاش استاهل اموت ... انا اللي خاصني نموت انا  اللي مابقا لية حد نبقا حية على قبلو .... ياربي خودني حتى انا راه عييت عييت ياربي.

تتشوف في امي رحمة اللي نزلات حدها باش تحضنها لانهم تيشوفو ان الكوخ فعلا تحرق والنار وصلات دروتها وصعيب اطفيوها او اوقفوها.

نزلات امي رحمة  حتى هي محطمة ودموعها في عينها وگأن اللي تحرق ولدها  ولد كرشها .

هبة شافت في امي رحمة وترمات في حضنها تتنذب حضها  هبة تتبكي بحرقة : الله ياربي علاش الناس اللي تيعطفو علية تنخسرهم قدام عيني بأبشع موتات .... امي رحمة الا كان اختبار من الله راه صعيب صعيب بزاف وانا مابقا لية جهد .... عيت امي رحمة عييت .... امي رحمة غير قولي لية واش انا ملعونة . واش بصح انا ملعونة ... شوفي شوفي اسي بلال مات اول مادخلت لحياتو .... مات وهو محروق .... مايستهلش هاذ الموتى

امي رحمة من وسط دموعها : استغفر الله ابنتي . انتي اطيب انسانة شفتها وربي تيمتحنك في الحياة . و ما عليك غير الصبر . اي حاجة تتوقع الا وراها حكمة من عند الله سبحانه وتعالى.

ادم مسكين كيف شي هبيل تيهز الماء بواحد السطل من البرميل وتيخوي على العافية . لكن من كثافتها وكأنه تيخوي الماء على التراب .

بقا غادي جاي حتى خوا البرميل لكن هداك البرميل كان هو اخر املو طلق السطل ونزل على ركابيه تيبكي .

ادم : خويا بلال ..... سمح لية ماقدرتش نعتقك ..... سمح لية اخوية .
خشا راسو في الارض وكأنه ساجد وبقا ابكي بصوت عالي ومجروح دليل على أنه خسر شخص عزيز بزااااف على قلبو.

بكاه قطع لهبة قلبها وحسات ان خسارة ادم كبر من خسرتها. بعدات على امي رحمة ووقفات ومشات جهتو. تبعتها امي رحمة ونزلو بزوج حداه هزو ليه كتفو شاف فيهم بزوج وقال : اليوم خسرت خويا وأبا في نفس الوقت امي رحمة . اليوم عاد حسيت براسي يتيم ديال بصح امي رحمة .كان هو سندي الظهر اللي تنتسند عليه لكن خسرتو ليوم أمي خسرتو بقيت مرة ثانية بلا اخ وليت مقطوع من الشجرة مرة ثانية امي ...

قطع ليهم قلبهم بزوج وحضنوه بزوج وهو تيبكي بحال الطفل الصغير.

هبة نسات حزنها وهمها قدام حزن ادم لكبير وقالت : حتى أنا ختك . من اليوم انا اختك وعمري نتخلى عليك. انا بحالك ماعنديش أخ ولكن اللي درتيه معايا كثر ماتيدير الاخ مع ختو . مانساش كيفاش دافعتي علية البارح وكنتي غادي ضحي بنفسك على قبلي انا وامي رحمة.
كلمها هدؤو بدا تيسكت واتحكم في راسو بشوية بشوية.

منين حسو بيه هدأ وقفوه على رجليه  زبعدما فقدو الامل نهائيا بأن بلال ممكن اكون مزال حي .. مشاو جيهت كوخهم لأن الكوخ نهار وطاح  ولا مساوي مع الارض ومستحيل  اكون بلال بقا حي او بقا ليه شي اثار اكيد ولا رماد.