هروب ليلة الزفاف💍مكتملة💍

💍الجزء 110💍

💍❤️هروب ليلة الزفاف❤️💍

بقلم✍️ أسماء الزروالي⭐🌙
فقرة 110🌹

وفعلا بعد مرور يومين الحاجة فاتحات بلال في موضوع السفر ... في الاول استغرب كيفاش غادي اسافرو بلا هبة .. الحاجة قنعتو باللي هبة موحال ترتاح عند الناس   ...  وفي نفس الوقت انها بغاتها ترتاح من تربية ملاك ... وتفرغ شوية لراسها...
بلال ماقتنعش بكلام الحاجة حيث عارف ملاك وهبة ماتيتفارقوش

بلال: الحاجة جيني نيشان ... شنو الغاية من هاذ التسافيرة  بلا هبة ... راني حافظك الحاجة.

الحاجة سكتات لكن في الاخير ترفكعات عليه:. شوف اولدي انت مزال صغير وهبة حتى هي وردة متفتحة الف من راجل اتمناها ... صحيح  ان زواجكم على لوراق ... لكن هاهي ولات ام بنتك ... وانت ماغاديش تبقا عمرك كامل عازب ... اي راجل تيبغي شي مرى تشارك معاه الحياة .... وانا بصراحة ارتاحيت لهبة كعروستي  ... وحاسة انها غادي تسعدك ... وملاك واحد اليوم خاصك تخاويها ... وو

بلال ابتسم وشاف في الحاجة وقاطعها : ذابا فهمت الحاجة بغيتي زعما تخوي لينا الجو ياك ...

الحاجة  قربات منو ومسكات يدو تتستعطفو : اه اولدي الله اهديك ... نسا الماضي وعيش الحاضر وفكر في المستقبل ... بغيت حتى  انا ماتبقا من عمري نشوفك مستقر وفرحان مع مرتك ووليداتك ... باش الا مت نموت مرتاحة ...(سلاح الام المغربية منين تتبغي تقنع ولدها بالزواج )

وبلال: وانا شنو المطلوب مني

الحاجة : مطلوب منك تحيد هديك تقنديشة وتعوبيسة ديالك ... وتقرب منها بالعقل ... راه بالمهل تيتكال بدنجال ... وهبة حساسة حتارم مشاعرها وحسسها انك مهتم بيها كأنثى محبوبة وزوجة .... خرجها ...عشيها برا .... سافر انت وياها ... اي حاجة ...المهم حسسها انك راجلها وهي مراتك... وهي غير تعرف عليك كزوج اكيد تبغيك. راك طالع لباك ... كنت تنحماق عليه الله ارحمو.

بلال ابتسم بمكر : والله الحاجة طلعتي ماسهلاش ... ذابا عاد عرفت الحاج علاش كان شاد معاك السراط المستقيم.

ضحكات وقالت : حيث كنت تنفهمو وهو تيفهمني وكان زواجنا مبنيةعلى الثقة والوفاء ... وخا كان تيسافر وغيب بالشهور ... كان عارف انني صاينة دارو وديما تنتسناه.... وهاذ الصفات أنا متأكدة موجودين عند هبة

بلال نزل وجهو بحزن : ماشي بحال كاميليا .... اللي اول ماتنسافر دخل كريم لبيتي

الحاجة طبطبات على كتافو : انا كنت شاكة فيهم لكن ماكانش عندي الدليل ... كنت مريضة وشادة لفراش ... وهذاك الشي علاش مابغيتكش تحزن عليها حيث ماتستهلش ...وفي نفس الوقت  ماقدرتش نقول ليك حتى حاجة خفت من الذنوب ... وخفتك انت ماتتقبلش الموضوع وتخزن كثر من الحزن اللي كنتي عايش فيه.

بلال : بقا فية الحال غير حيث ظلمتك انتي وملاك معايا هجرتكم عام كامل حتى كنتو غادي ضيعو مني بزوج.

الحاجة : حكمة ربي اولدي ... لو مامشيتيش لهذيك لبلاد ماكنتيش تتلاقا بهبة ... اللي غيرات كلشي بعدما دخلات لدارنا جات وجابت معاها الفرحة.
بلال ابتسم : فعلا كلامك صح ...تيبقى للقضاء والقدر كلمتو الاخيرة.