كفاك ظلماً

33

#كفاك ظلماً
#البارت الثالث والثلاثون
# للكاتبه طيف عامر

(( البارت اهداء الى الصديقة والاخت " لاريـن الجنابي " بمناسبة نجاحها .♥.))

نورهان / روح جابت ديج لوجه الله بسلامه ابنها..
شفت امي تطبخها على الغدا تخصرت وكتلها

ــ روح والله جلف المثلهه يذبح طلي وهي تذبح ديج والله تضحك ههههه..

محسيت غير نعال نطبع براسي درت وجهي معصبه شفتهه واكفه بغضب
ــ دماغ المطي لو ذابحتج أنت وزمن وموزعه لحمچن ؏ چلاب احسن ما اذبحلي طلي واخسر كم فلس..

بربوك علساس متعرفين بيه مصفره ولا ربع وبعدين تعالي ام الگمل منين اذا اذبح طلي منو ياكله انتم الحقراء الخبثاء الطايحين الحظ ...

امي ردت عليهه ـــ هوب هوب هم منو الحقراء ابوج واخواتج بعد عليمن تحجين..

جاوبت بتبرير ـــ اني مـاحجي عليهم اكول ليش الصخله نورهان تحجي وتكول جلف عليه (جلف= بخيل)
مو عيب عليها اني كبالكم كاعده ومنجبه ومن وين اجيب ابوگ..

صحت بوجهه ـ دكافي شكلنه شكد تراددين..

شمرت النعال الثاني بوجهي وراحت للغرفه وهي تكول ــ نجبي

هزيت ايدي وامي لزمت الخاشوگه وكالت ـ لا تضوجين اختج رجلها الحقير اكيد جافص وياها حتى هيج كارهته بطلي تضوجيها والعباس اكتلج واكول لابوج عليج..

غمضت عيوني وحجيت بملل ـ ختولي اني شمسويتلهه..

جاوبتني روح من داخل الغرفه ــ ولج الصخله مو اجي اطيح حظج..

حجيت بكلبي ـ هاي شنو من بشر عوذه.

رن موبايلي فتحته شفت منشورات وبعدهه دخلت ع مسجات زمن دازتلي قبل ساعتين
ـ شوكت تجين؟

باوعت لامي ملتهيه بالطبخ ونسوان اخوتي كل وحده بغرفتها لبست عبايه وطلعت بدون محد يشوفني لبيت خالي..

مرات الانسان من ينطو نصيحة على گوله اختي روح يستجلب ويكوم يلوص ويحب يسوي الي براسه لحد ما يسويله خ** بحياته يلله يتوب..

اني هم ماسمعت كلام امي من تكول بنت خالج متحبج هي وحده موزينه و روح تحذرني ما ارد جنت اكول روح متعقده ومتحب احد ودائما تغار لان اني احلى منهه ويحبوني بيت خالي عكسها..

جنت اكول لان زمن متحبها بالحقيقه زمن تغار منها لان روح مرتبه ولادتها بغداد وزمن عبالهه بغداد لندن جانت دائماً عينها على روح شتكول تكول نفسها شتتصرف وشنو تلبس

حتى تعلمت منهه كلمات،،هي اللهجات مالت المحافظات تتشابه بس روح من نوع تحب تتمايع وتكول مفردات كيوته على گولتها وذيج تشوفها وتشتعل نار تكوم تقلد .

رغم بالحقيقه زمن حلوه احلى من روح بس شلون روح اطباعها تختلف هي تريد مثلها تصير..

واصلا زمن حتى من تحجي ما يلوگلها لان متعودين علهه تحجي وطريقه كلامهه محلوه..