خواطر

4

بشوف ان الحياة عبارة عن رحلة من اللاوعي للوعي
مش الوعي اللي هو في مصطلحات التنويريين وكدة
لكن الوعي واللاوعي بأصل المصطلح النفسي..

يعني المفروض ان مع تقدمنا في الحياة، بنفهم حاجات عن نفسنا والناس، بنشوف حاجات مكناش واخدين بالنا منها، بندرك افكار ومشاعر كانت موجودة بس كنا عاميين عنها..

زيادة وعينا دة من المفترض انه يقربنا من نفسنا ويصالحنا عليها .. وكمان من المفترض انه يدينا بصيرة عن احنا فين حاليا وعايزين نروح لفين وممكن نروح ازاي
فلما نخطط لنفسنا، نخطط عن فهم وادراك وخبرة، فمنبقاش بنرمي زهر نرد وزي ما يطلع يطلع .. لأ، نبقى كإننا بندخل الوجهة على ال GPS بتاع عقلنا، وعقلنا يقولنا ايه اللي نقدر نعمله عشان نوصل هناك

الوعي بقى محتاج حد ادنى من التواضع .. وحد ادنى الذكاء .. وحد ادنى من الشجاعة ..

تواضع لان لو حد شايف انه برنس الجيل وزي الفل، اكيد مش هيحس ان في حاجة ناقصاه ولا وجهة محتاج يوصلها

وذكاء لان لو حد مش واخد باله ان حياته ممكن تكون احسن، وان هو شخصيا يقدر يبقى شخص افضل وأقدر وأكمل .. هتفضل مركب حياته متروكة للامواج تخركها زي ما تيجي

وشجاعة لان الرحلة مش سهلة ولا مريحة .. بل ان اغراءات الاستمرار في وضع ال "محلك سر" كتير .. والمطبات اللي بنقابلها عشان نكون بشر اعقل وانضج وقادرين على التساؤل عن اهمية ومنطقية الطوق اللي بيحطه المجتمع في رقبتنا، المطبات دي بلا حصر ..
وشجاعة كمان لان النتيجة شبه الحتمية لزيادة الوعي الذاتي هي الانعزال .. في الاول الانعزال بيكون بسبب ان الكل بيبصلك على انك الغريب او المجنون او المتفزلك او المتعالي .. وبعدين الانعزال بيكون لانك بتكتشف اختفاء كل جسور التواصل بينك وبين اللي ممشيوش في رحلة الوعي او حتى اللي في اولها .. فالموضوع محتاج شجاعة كبيرة انك تقدر تقف لوحدك احيانا .. وشجاعة اكبر انك تنتشل نفسك و تبادر و تبتدي تدور في الضلمة على اللي شبهك خصوصا اللي بيحاربوا ومش عارفين ان في ناس تاني بتدور في الضلمة زيهم..

لكن برغم كل شيء -في رأيي على الاقل- يظل الموضوع مستاهل .. انك تفهم نفسك .. وتفهمهم .. وتاخد خطواتك الجاية على أساس .. وتفضل فايق برغم حلاوة كل المنومات الموجودة ...