في اعتقاد ما بيتم تغذيته من قبل التنمية البشرية وبتوع المشورة كمان..
الاعتقاد دة ان اللي معطلك عن حاجة حلوة ما (النجاح/الاستمتاع بالحياة/الراحة النفسية/....) هي فكرة معينة. وانك مجرد ما تقتنع بالفكرة دي هتوصل للحاجات الحلوة اللي فوق.
المشكلة ان الطرح دة متفائل شويتين، او -بافتراض حسن النية- تبسيط مخل..
الانسان وحياته مش بيتغيروا لحظيا .. مهما كانت روعة الفكرة او درجة اقتناعنا بيها..
كل حاجة بتاخد وقت .. خصوصا التغيير ..
لان تحويل فكرة مجردة ل mind set واسلوب حياة، عمره ما بييجي بسرعة
لازم الفكرة تتهضم
وتتجرب
وتفشل احيانا
وتجيب نجاحات صغيرة اقل من المتوقع
وتاخد وقت طوييييل
كل دة قبل ما فعلا نقول انها عملت فرق ملحوظ..
لكن ان حد ييجي يقول انت بس لو فكرت بالطريقة الفلانية هتلاقي الحياة بمبي .. دة يا اما بغبغان مجربش اصلا .. يا اما عبيط وينطبق عليه مثل «تيجي مع الهبل دوبل»
كل فكرة زي البذرة
ومفيش بذرة بتطلع ثمر .. لازم تبقى شجرة الاول
