((((((( الكبيره ٢ )))))))
#لولو_محمد
الحلقه ٤٨
شحته / بسيطه احزرهم انا
جوزيف / مش وقت غباوه ما لو حد حزرهم هيبقي اكيد انا اللى باعته كل ده مجرد اختبار ليا
شحته / بس انت بتقول انهم فى الضياع و البت كدا ممكن تروح ما ترجعشي
جوزيف / انا محتاج رجاله تكون بتثق فيهم و الفلوس انت عارف
شحته / محتاج كام واحد
جوزيف / كتير اوى
شحته / حاضرين
جوزيف / امتى
شحته / وقتى ... يا رجاله
كل الرجاله تقف بدى بيلدينج
شحته/ يكفوك و لا نبعت نجيب من بره
جوزيف / اوعى هى الاشتراكات كلها ... امال الهلومه دى كلها منين... شحته لتكون رجعت للشقاوه
شحته/ فى الحق بس .. زى وقفتى معاك كدا و بعدين انت جاى الدور الرجالى و الرجاله شقيانه الفلوس كلها بتيجي من دور الحريم جاكوزي و اسبا و مساج و سونا و حاجه اخر دلع و الصرف ايه على ودنه
جوزيف / و انا لو قولت يا حريم هيقفوا كلهم كدا زى دول
شحته / هو انت ياض مش تبت
........................
جوزيف / يا عم انت فهمت ايه انا عاوزهم زى دول يلزقولها زى ضلها
شحته/ ااااه موجود
جوزيف/ برده !!! دا احنا كنا نفتحلك شركه حراسات بقي بدل الجيم اللى بتصرف عليه من جيبك ده
شحته / و انت مين قالك انى ما فكرتش فيها ... الخطه الجايه بإذن الله
جوزيف / ما بتضيعش وقت انت ... غباوه غباوه يعني
شحته/ المهم رسيني ايه المطلوب من الرجاله دى بالظبط
جوزيف / صح معاك حق طولنا فى الانبهار نرجع للجد
شحته/ نرجع
جوزيف / بص يا سيدي
......................
فى شقه مروان
مهره عماله ترجع و مروان ساندها لحد ما جسمها يسيب و تقع مروان يشيلها يحطها على السرير و هى مفتحه و يروح المطبخ يطلع كيس بودر و يفرد سطر و يشد و يغمض عنيه و يرجعلها تانى
مروان / انا مش وحش ... انا بس مش هفضل عبد عند على الدسوقى كتير مش هفضل عايش عيشه مش عيشتى عشان هو عاوزنى زيه ... انا حبيتك على فكره حبيتك بجد و كان نفسي نبقي حاجه حلوه بس ابوكى واقفلى فيها و بيحاربنى كل ما ارتب ورقى و اقول خلاص الالبوم اهو انا جاهز اهو يدخل بمعارفه و نفوذه و مجاملاته و قرفه و يبوظلى كل حاجه ... انتى فى ايدك نعمه الراجل بيحبك بجد مجنون بيكي ... مش فاهم يعني لو ... على العموم هو هيعوضك هيحققلك كل اللى بتحلمى بيه و لو شغلتى مخك حبه هتخليه يكتبلك اللى وراه و اللى قدامه ... و انا دلوقت هثبتلك انه مستعد يدفع اكتر كمان
مروان يطلع بره يجيب الموبايل و يتصل بالتليفون
مروان/ جوز اختى حبيبى
اكرم / طمنى عليها عامله ايه
مروان / معليه و بتدعيلك
اكرم / مش قادر أصدق انى طاوعتك حاسس ان قلبي واجعنى اوى عليها
مروان/ طب ما اطمنك عليها تحب افتحلك الكاميره و لا تحب تيجي بنفسك تسمع النبض و لا اقولك انا اسيبلك المفتاح تحت المشايه و انزل اشترى شويه طلبات
اكرم / اخرس يا حيوان اللى بتتكلم عنها كدا دى تبقي اختك
مروان / ما تفكرنيش لارجع فى كلامى دا انا منيمه ب تلاتين فى الميه من أسهم شركاتك
اكرم / تلاتين ايه انت واخد عشرين بس
مروان/ ما انا شاريك اهو و بقولك المفتاح تحت المشايه و حبيبه القلب فى دنيا تانيه هتستخسر فيا عشره فى الميه كمان مهر
اكرم / انا كنت عارف ان على الدسوقى مش هيخلف حاجه عدله ابدا
مروان/ خلف حبيبه القلب اللى مجنناك
اكرم / يا ابنى فوق انا بحبها و عاوز اتجوزها انا شاريها انما انت انت بايعها و بايعها بالرخيص اوى
مروان / يعني تجيب اكتر من كدا ... و ماله ... عشان تعرف انك حبيبي و انى شاريك
اكرم / انت بلبعت من اللى اديتهولها
مروان / طباخ السم بيدوقه
اكرم / ما كدا ابوك هيعرف ان انت اللى اديتهولها يا متخلف
مروان/ ما يعرف بالفلوس اللى معايا ما عدتش محتاجله و لا فارق معايا وجوده اصلا
اكرم / انا مش قادر اصدقك بجد مش قادر
مروان/ انا نازل و هسيب المفتاح تحت المشايه اعمل اللى يريحك سلاااام
مروان يقفل الخط و يمشي و يقفل الباب يرد مروان ما ياخدش باله و ما يبصش وراه و يمشي
..................
فى القسم
نسمه تدخل بتجرى
نسمه / اللى سمعته دا حقيقي بدر اتخطف بدر اتاخد من وسطوا ازاى حد يرد عليا بدر ابنى فين
محمود / اهدى يا نسمه هنلاقيه ان شاء الله
ام عبده/ انتى سبتى مصطفى مع مين
نسمه / مع أمى ما هى اللى جت قالتلى
ام عبده تبص لمحمود
نسمه / انا عاوزه ادخل للبيه الظابط انا لازم اقابل اى حد انا مش هقف ساكته انا هروح للكبير انا لازم اروح للكبير
نسمه تيجى تمشي محمود يشدها
محمود/ انتى رايحه فين الكبير مش هنا لا عباده و لا مختار الزيني هنا امال احنا جينا على القسم على طول ليه و يا ستي ما تقلقيش هيرجع باذن الله فرغوا الكاميرات و هيجيبوا اللى عملها
نسمه / يبقي اروح على الشركه اروح للباشمهندس دياب يساعدني انا مش هقعد ساكته و استناهم يا يلاقوه يا ما يلحقوش لازم اعمل حاجه
ام عبده / اللى تقدرى تعمليه انك تنقطينا بسكاتك منها لله اللى قالتلك ما طبعا جت لها على الطبطاب فاكره انها كدا بتكسب بنط على قفايا
نسمه / بنط ايه و زفت ايه دا ابنى ضنايا انتوا هتلعبوا على ابنى على بونطات انتوا ايه ما بتحسوش
ام عبده/ صوتك لصدغلك
نسمه تسيب القسم و تطلع تجرى محمود يجرى وراها يمسكها
نسمه / اوعى
محمود/ هتروحى فين طيب اجى معاكى انتى فاكره ان لو فى سكه ارجع بيها ابنى هتاخر
نسمه / ما هواش ابنك ما هواش ابنك ... دا ابنى انا روحى انا
نسمه تعيط
محمود / ابن اخويا و انا اللى مربيه و ان كنتى نسيتي هاتى اى حد يفكرك و اهدى فرجتى علينا الناس
عربيه البوكس تدخل و وراها عربيات كتير محمود يشد نسمه فى جنب
محمود / اهدى اهدى
شاكر ينزل من العربيات اللى ورا و صابر ينزل من البوكس يبص لنسمه عنيهم تيجي فى عنين بعض يدخل القسم
محمود / ما كفاهوش اللى عمله فى عبد الهادى و رعد و حالف ليقضي على نسل الجزار كله ابن الحرام
نسمه / صابر !!
محمود/ اكيد الحكومه عرفت حاجه عشان كدا بعتوا جابوه ... انا هروح اشوف و ارجع اطمنك بلاش تحشرى نفسك وسط رجالته لحد فيهم ياذيكي و لا حاجه
نسمه تسند على عربيه راكنه و الدموع عماله تنزل من عنيها و تهز راسها لا
محمود / اجمدى ما تقلقنيش عليكي
نسمه / ليه ؟!! انا بيجرالى كل ده ليه ؟!! انا عملت ايه بس يا ربى عملت ايه ؟؟
محمود / بصي خلينا نقول اللى لينا و اللى علينا المتهم برئ حتى تثبت ادانته يعنى احنا برده ما نقدرش نظلمه
محمود يطلع ليها علبه مناديل من جيبه
محمود / اجمدى لحد ما اروح اطمن و ارجعلك
نسمه تهز راسها لا و تحاول تروح ناحيه القسم محمود يشدها
محمود/ اهدى بقي انا مقدر اللى انتى فيه بس ما تزوديهاش رايحه فين مش شايفه الرجاله هتعدى من بين كل دول ازاى بس
نسمه / ابنى يا محمود بدر يا محمود ابنى
محمود / هيرجع احلفلك بالله هيرجع باذن الله هيرجع ثقى فيا هيرجع
نسمه تخبط على رجليها و هى منهاره من العياط شاكر يدخل
شاكر / ام بدر ... بعد اذنك عاوزك فى كلمه
محمود/ اسمع يا دكتور احنا كبرنالكوا و سكتنا على حق اخويا اللى اتغدر بيه انما الحكايه دى ما يتسكتش عليها من امتى العيال بتدخل فى الخلافات دى
شاكر / مش هو يا نسمه مستحيل يكون هو انا كنت معاه طول الوقت
محمود/ و هو لازم يعملها بنفسه ما رجالته ما شاء الله اهم يسدوا عين الشمس و بعدين احنا ما لناش اعداء غيره
شاكر/ هيرجع باذن الله يا نسمه بس اقسملك بالله مش هو
نسمه تبص لشاكر و هى منهاره من العياط تغمض و تبص الناحيه التانيه ثانيه و تمسك دماغها و تدوخ و تقع محمود يشيلها و هو بيصرخ
محمود / اسعاف اسعاف اللحقونا يا ناس اللحقونا يا هو
.......................
عند عربيه مروان
مروان يقف جنب العربيه يحط ايده فى جيوبه و يحسس عليهم مفيش حاجه
مروان / يخربيت الفصلان بقي ... المفتاح فوق ... هرجع كل ده تانى
مروان يمشي شويه يبص على البيت
مروان / ما انا قفلت الباب و البت فى دنيا تانيه ما حدش هيفتح ... اركب اى حاجه بقى و الصباح رباح
مروان يمشي و هو بينام على نفسه يعدي من جنب عربيه فيها رجاله منهم واحد بيتكلم فى التليفون
الراجل / ايوه يا سي كارم ... لا الدنيا هاديه مفيش حاجه .. هو بس اللى اسمه مروان ده خرج ... لا الست مهره فوق لسه ... النور قايد شكلها صاحيه... تمام لو فى جديد هبلغ حضرتك .. لا عيني على البوابه ما تقلقش ... فى عنينا ما تقلقش خالص ... فى حفظ الله ... سلام
........................
فى شقه عباده
عباده قاعد فى اوضته بيتكلم فى التليفون
عباده / ايوه ما انا عارف اننا سألنا عليه قبل كدا و أنه راجل نضيف بس برده طلع ان فى حاجات احنا ما نعرفهاش عنه فمش عاوزك تدورلى من على الوش انا عاوزك تنزل فى قعر القفص تحت خالص عاوز غسيله الوسخ كله ... تمام يا حبيبي ما اتحرمش .. فى حفظ الله
مختار يدخل
مختار/ ايه يا عم بتعمل ايه كل ده لوحدك
عباده / بشوف حوار كدا خير فى حاجه و لا ايه
مختار / انت بقيت بتخبى حوارات من ورا اخوك .. فى ايه يا اسطى مالك
عباده / اسطى !!
مختار/ يا عم انجز بقي فى ايه
عباده/ الا قولى ... هو مش كان فى كلام كدا ان فى كيميا بين الواد عمران ابنك و البت مهره
مختار / مش منه ... و لا منها الحق يتقال ... بس فى كلام اه
عباده / طب ما تشوف الدنيا كدا انا شايفها بنت جدعه و طيبه و منكسره كدا و بنت ناس برده ... هم اه كلهم زرعه عوجه بس ... انت فاهم قصدى
مختار / هو ما كلمنيش فى حاجه يا عباده ما لمحش حتى يعنى
عباده / طب ما تكلمه
مختار / ما تيجي دوغرى و تفهمنى فى ايه بالظبط
عباده / تمام بس سر
مختار / يا عم احكى و اخلص فى ايه حاجه بخصوص قاعدتها مع نجاه
عباده / انت ما لفتش نظرك اللى حصل و لا حتى من باب الفضول يعني تسأل او تعرف كانت بتعيط ليه
مختار يسكت
عباده/ نجاه وعدتها مش هتقول لحد بس لمحت على الخاتم يعني باختصار طلبت منى ادور وراها عشان اعرف بطريقتى
مختار / و لمحت لكارم كمان و هو كمان شغال على الموضوع بس من سكه تانيه غير التسجيلات
عباده / و لقى حاجه
مختار/ لا الدنيا هاديه
صمت
عباده/ مهره بتقول ان اكرم بيتحرش بيها .. بس مفيش اى دليل واحد على كلامها الراجل قمه فى الادب و الاحترام
مختار / صدقها ما فيش واحده هيتقدملها كل الحب ده و تهرب تعيش لوحدها الا لو فعلا حصل
عباده / طب و احنا نقدر نعمل ايه فى حوار زى ده ... نجاه عرضت عليها تيجي تعيش معانا و طبعا البنت رفضت و دا طبيعي جدا ... و اخوها مش سألك اوى يعني واد عادى بعيد عن ربنا عايش فى جو غريب كدا مزيكا و سهر و كان مدمن قديم
مختار / بس مش وحش ما شوفناش منه حاجه اه كان مدمن و اتعالج و الموضوع اتقفل مش هنفضل مسكينهاله يعني ناس كتير بتقع فى الغلط و تتوب و تتغير حياته ما انتهتش يعني و بعدين احنا عينا عليهم و لا ايه
عباده / بس قلقان مش هنكر
مختار / و انت بقي شايف ان الحل انها تتجوز عمران ابنى
عباده / يا عم هو يطول دا البت فلقه قمر دا غير ان اهتماماتهم واحده و متفقين جدا
مختار / ايوه بس الجواز حاجه تانيه
عباده / خلاص خلاص انسي الفكره
مختار/ اكلمه ؟
عباده/ من بعيد
مختار / تلميذ انا يعني ... هو جابر فين انا مش شايفه خالص ... هروح ادور عليه
عباده / تمام
مختار / انت هتفضل قاعد فى اوضتك كدا
عباده / مستنى تليفون من البلد
مختار / ما تقلقش مغاورى واقف على رأسهم و باذن الله يلاقوا الواد
عباده/ فى حاجه غلط بتحصل فى حاجه كبيره بتحصل فى عيله الجزار
مختار / شاكر بيحلفلى انه ما فارقش صابر
عباده/ مش صابر ... ما يعملهاش عمره ما يعمل كدا ... بس مين ... مين بس
مختار / هيبان ما تقلقش ... هروح اشوف جابر و ارجعلك
عباده يهز راسه مختار يمشي
.....................
فى عربيه اكرم
اكرم سايق و عمال يفكر
////////////////
اكرم / رايح على فين يا اكرم ناوى تنزل اكتر من كدا ايه هتقف امتى هتفرمل امتى ... بحبها و مش قادر اعيش من غيرها... تقوم تاذيها بالشكل ده ما صعبتش عليك هتقتلها و تقتل برائتها و ضحكتها هتقدر تشوفها بتتوجع هتقدر تستحمل عذابها طب لو جرالها حاجه هتقدر تسامح نفسك ... انا هعالجها انا مش هسيبها تمشي فى السكه دى .. دى دى مجرد مرحله بس لحد ما اوصلها انا مش قصدى ائذيها انا بحبها ... هتكرهك و هتكرهك اكتر لما تعرف انك السبب فى اللى جرالها ده عمرها ما هتسامحك و بناتك لو عرفوا الحقيقه هتبص فى عينهم ازاى ... ما يفرقوش معايا عمرهم ما فرقت معاهم عشان يفرقوا معايا انا عمرى ما فرقت مع حد غير مهره و ما حدش فارق معايا غيرها مهره ما ينفعش تبعد عنى ما ينفعش تكون مع حد غيرى ما حدش هيحافظ عليها قدى دا اخوها باعها و زى ما باعهالى ممكن يبيعها لغيرى ... للى يدفع اكتر دا واطى و ابن كلب ما ينفعش اسيبهاله ما ينفعش اثق فيه ... دا ممكن يعمل فيها حاجه ... عشان كدا لازم افضل جنبها لازم احميها من الدنيا بحالها لازم اخليها جنبى و فى حضنى مهره ما حدش حبها و لا يعرف قيمتها غيرى مهره ما ينفعش تكون مع حد غيرى ... مهره بتاعتى انا و بس
///////////////
اكرم يزود سرعته و يكمل سواقه
....................
فى جيم
جابر لابس جلوفزات و بيتمرن كيك بوكسينج على ساند باج تليفونه يرن يروح يشوف مين يلاقى خالى ياخده فى جنب و يقعد و يرد
جابر / السلام عليكم
مختار/ و عليكم السلام سألت عنك قالوا خرجت من بدرى و لسه ما رجعتش فينك
جابر / فى الجيم اللى ورا جنبك يعني خطوتين عاوزنى فى حاجه
شاب يروح ناحيه الساند باج
الشاب / خلاص هنا يا كوتش
جابر يهز راسه الشاب يبدا يتمرن
مختار / هتروح امتى كنت عاوزك
جابر / حوار ضرورى يعني اجى لحضرتك دلوقت ؟
مختار / لا وقت ما تخلص براحتك بس ما تنسانيش
جابر / تمام
مختار / و ما تأذيش نفسك احنا محتاجينك
جابر يبتسم بكسره و هو عمال يقلب بعنيه فى المكان
جابر / تمام
مختار / انت كويس؟
جابر / تمام
صمت
مختار / لما تروح عدى عليا
جابر / حاضر
مختار / سلام
جابر يقفل المكالمه و يقوم يمسح عرقه و يشرب مايه و يبص على نفسه فى المرايه بحزن و يروح على جهاز فاضي يكمل تمرين
......................
فى عماره مهره
باب الشقه اللى فوق شقه مهره يتفتح و يطلع شاب شايل كيس زباله
الشاب / ما انا واخدها اهو هو انا قولت لا و لا هو اى تهزيق و السلام ... دى ما بقيتش عيشه دى
الشاب يرزع الباب و ينزل يلاقى باب شقه مهره مفتوح يستغرب و يدخل راسه
الشاب / انسه مهره ... مهره ... ما حدش هنا و لا ايه ... مهره
الشاب يدخل يبص يمين و شمال مفيش صوت يستغرب و يمشي و يقفل الباب وراه و ينزل يروح يرمى الزباله و يتمشي للناصيه يشاور لتاكس اول ما يمشي اكرم يوصل و يركن العربيه و يفضل قاعد فى العربيه ما ينزلش و يفكر
//////////////
اكرم / ايه مالك متخشب ليه ما تنزل مش ضربت المشوار دا كله انزل ... انا مش قادر اصدق انى جيت لحد هنا مش قادر اصدق اى حاجه من اللى بيحصل دا اكيد كابوس كابوس مستحيل يكون حقيقي ابدا ... لا حقيقي انزل و كمل اللى جيت عشانه امال انت كنت جاى ليه
اكرم يغمض عينه و يتنهد و يبص على البيت
اكرم / و اخرتها هتفضل قاعد كدا كتير ايه هتيجي فى الاخر و تنخ امال انت دفعت الفلوس دى كلها ليه و بعدين مش دى اللحظه اللى بقالك سنين بتحلم بيها كل يوم و كل ليله مش دى المرحله اللى بقالك سنين بتضغط على نفسك و تستحمل و تضحى عشان توصلها هى خلاص ... لا ما كانتش كدا و ما كانتش بالطريقه دى انا مش كدا و لا هى كدا ... ما فيش طريقه تانيه ما فيش سكه تانيه تمشي فيها و مفيش فرصه تانيه يا دلوقت يا ما فيش ... يبقي ما فيش... ما فيش
////////////////
اكرم يسوق العربيه و يمشي
.......................
فى شقه فى حته مطرفه فى البلد
واحد من الاتنين البلطجيه يفتح باب الشقه و فى ايده كيس اكل يحطه على السفره
البلطجى / يس يس الاكل ... الله ايه الصمت المريب ده
البلطجي يفتح باب اوضه
البلطجي/ يعني عرفت تنام يعني و انت جعان امال كنت ... الله انت فين يا عم .. يس يس انت فين يا يس
البلطجى يدور فى الاوض و الشقه كلها مفيش حد
البلطجي/ يا واقعه سوده مش باين لها وقوف روحنا فى داهيه
البلطجى يطلع يجرى من الشقه
..........................
فى المستشفي فى البلد
نسمه مركبه محلول و نايمه فى السرير و مصطفى ابنها نايم فى حضنها و امها قاعده جنبها بتقرا قران الباب يتفتح و ام عبده تدخل
ام نسمه / اهلا
ام عبده / عاملين ايه
ام نسمه/ واحده ابنها ضاع منها عوزاها تبقي عامله ازاى ... بقى يا وليه يا ناقصه مش عارفه تخلى بالك من عيل صغير امال لو ما كانش حفيدك كنتى رميتيه بايدك فى الشارع
ام عبده / مش راده عليكي و مش هسمحلك تسحبيني فى السكه دى انا مش نقصاكى
ام نسمه / منك لله حسبي الله و نعم الوكيل فيكي ربنا ينتقم منك
نسمه تفوق
نسمه / بدر !! لقيتوا بدر
نسمه تحاول تقعد امها ترجعها مكانها
ام نسمه / اهدى يا ضنايا هيلاقوه هيلاقوه باذن الله ما تقلقيش
نسمه تعيط تانى
نسمه / يا حبيبي يا ابنى يارب انا ما ليش غيرك ... دا انا عمرى ما اذيت حد ... ابنى يا رب ارحمنى برحمتك يا رب
ام نسمه / عاجبك كدا يا شيخه سيبينا فى حالنا بقي ما شوفناش من وراكى خير
ام عبده / و انتوا شوفتوا الخير و لا العز الا من ورانا بس نقول ايه اصل واطى
ام عبده تسيب الاوضه و تطلع بره تلاقي ابو محمود داخل تجرى عليه
ام عبده/ عرفتوا حاجه وصلتوا للواد
ابو محمود/ ابدا فص ملح و داب
ام عبده تعيط
ابو محمود / اهدى اهدى و باذن الله خير ما حدش ساكت
ام عبده / كان فى ايدي ... الواد كان فى ايدي فجاه ما لقيتوش فجاه فص ملح و داب ... اقسم بالله ما غفلت عنه اقسم بالله ما عارفه ازاى دا حصل ... الواد كان فى ايدي يا ابو محمود كان فى ايدي
ابو محمود / خلاص ... خلاص يا ام عبد الهادى خلاص اجمدى كدا و باذن الله نوصله
ام عبده / باذن الله ... طمنى ابن الحرام اعترف بحاجه و لا خرج منها زى كل مره
ابو محمود يبص فى الارض
ام عبده/ خرج ... الا حتى ما حبسوه يوم واحد .. ضيع عيالي و عيال عيالى و ما باتش فى الحجز يوم واحد ... ضيع عمرى كله و ما ضاعش من عمره يوم واحد... لا... لا لا لا لا انا مش هسكت على الكلام ده ... مش ههنيه مش هسيبه يتهنى أبدا ... هقتله و اشرب من دمه و اطفى نارى بايدي يا احصل عيالى ... اصل انا فاضلى مين فاضلى مين انا يا ابو محمود فاضلى مين
ابو محمود / هيرجع باذن الله هيرجع انا مش هسكت اطمنى اقسملك بالله ما هسكت و لا يهدالى بال الا اما الواد يبات فى حضن امه
ام عبده تقعد تعيط و ابو محمود متابعها
.........................
فى الشركه عند منصور
صابر يدخل يفتح الباب من غير استاذان و شاكر وراه منصور يمد ايده يجيب فلاشه يرفعها صابر يروح ياخدها
صابر / انا مش راجع الجبل غير و الواد فى حضن امه و اعرف الحكايه دى اخرها ايه
منصور / بيتك و مطرحك
صابر / مش فاهم انا و الله ام المخروبه دى فاتحينها ليه
صابر يمشي منصور يبص لشاكر
شاكر / مش هو
منصور / ما انا عارف انه مش هو ما انا عارف
شاكر يتنهد و يجرى ورا صابر يحصله فى الشارع
شاكر / صابر صابر انت رايح فين
صابر / هروح شقتى هروح فين يعني
شاكر / طب ناوى على ايه طيب
صابر / لو حكمت انى اقلب البلد دى و اساويها بالأرض و الواد ده يبات فى حضن امه هعملها فابعد عنى السعادى عشان انا مش طايق جلدى حتى
شاكر/ على فكره انا فى صفك
صابر/ تمام روح لم الغفر و انشرهم على حدود البلد لا حد يطلع و لا حد يدخل و لم كل بتوع المكروباصات و اتاكد منهم ان الواد ما خرجش من البلد
شاكر يهز راسه و يمشي و صابر يركب عربيه و يمشي فى اتجاه تانى
........................
فى الفندق
دياب واقف ناحيه التراس بيتكلم فى التليفون
دياب / يا عم مش هتقول حاجه ابعت بس الحاجه ابص عليها على ما اوصلك ... ما تسمع الكلام و تريح نفسك و تريحني دا ايه المرار الطافح ده
وفاء تطلع من الحمام بتنشف شعرها
دياب / تمام ... سلام سلام
دياب يقفل
وفاء / شكل فى حاجه كبيره حصلت
دياب / و احنا من امتى كان فى حاجه صغيره بتحصل لنا او حتى يوم يعدى كدا من غير ما حاجه تحصل خالص
وفاء / ألم الشنطه
دياب يبصلها
وفاء / تمام هقوم ارتب الحاجه
دياب / انا اسف انا حقيقي اسف
وفاء تروح تحضنه يبوس راسها
وفاء / انت فاكرنى مضايقه ... بالعكس انا الصراحه كنت عاوزه ارجع من اول يوم بس ... بص مش عارفه اقولهالك ازاى بس انا ام على قد ما كنت هموت و اتفسح و اغير جو و ابعد عن الدنيا بضغوطاتها بس ... اول ما بعدت ... عيالى وحشونى اوى يا دياب
دياب / ربنا ما يحرمنا منهم و لا منك
وفاء / و لا يحرمنا منك يا سيد الناس كلها ... اديني ربع ساعه بس هلم الحاجه على طول و اللبس و نبقي جاهزين على ما تشوف هنروح بر و لا جو
دياب / جو هحجز على اول طياره او هشوف طياره خاصه تنجزنا
وفاء / للدرجادى الموضوع كبير ... تمام هنجز على قد ما اقدر
......................
فى عماره فاروق
جابر يضرب جرس شقه نجاه تفتح
جابر / خالى هنا
نجاه / اه جوه فى الاوضه دى
جابر يعديها و يروح يخبط على الباب و يدخل نجاه تروح تقفل الشنطه و تشيلها تحطها جنب الباب جابر يطلع من الاوضه يبص عليها و يعديها و ينزل نجاه تروح اوضه عباده
نجاه / انا جاهزه ... بس كنت عاوزه اطمن على مهره ... انا اتصلت بيها كذا مره ما ردتش و خايفه تزعل انى مشيت من غير ما اسلم عليها
عباده / هنعدى على بيتها نقف خمس دقايق نسلم و نمشي
نجاه/ بس حضرتك ليه غيرت رايك اننا نمشي دلوقت مش قولت
عباده / نجاه
نجاه / تمام ... على العموم انا جاهزه ... عن اذنكوا
نجاه تمشي
مختار / انا مش مرتاح لكل اللى بيحصل ده
عباده / و هو فى ايه فى اللى بيحصل يريح ... روح لجابر اتكلم معاه و اسمعه و لا اقولك خليك انت انا اللى رايح له
عباده يطلع بره ينزل و يقفل الباب وراه
........................
فى القسم عند محمود
محمود / يا باشا طب اديني اى تسجيلات للكاميرات نمشي وراها احنا كمان البت هتموت على ضناها دى لسه ما فاقتش من اللى حصل لجوزها
الظابط / صدقنى فى ناس كتير اوى شغالين فى السكه دى و احنا مش ساكتين و عاوزك تعرف ان الضغط علينا عالى دا الكبير اقسم بالله تقريبا بيكلمنى كل ساعه يعرف ايه الجديد
محمود/ لا حول و لا قوه الا بالله هى الناس جرالها ايه اتسعرت دا عيل يتيم يا ناس هيستفيدوا ايه بس من حرقه قلب أمه عليه بس يا باشا انا مستعد لكل اللى يطلبوه بس الواد يرجع لو عاوزين فلوس هديهم بس يرجع
الظابط / باذن الله خير و قريب اوى هتسمع اخبار حلوه و هيرجع لحضن امه
محمود/ سامحنى يا باشا رايح جاى عليك و معطلك بس حضرتك مقدر
الظابط / لا ابدا مفيش مشكله و لا حاجه
محمود يسلم و يمشي يطلع بره يبص يمين و شمال البلطجى يبسبسله و يشاورله محمود يشوفه يتجنن و يتلفت و يجرى عليه يسحبه فى جنب
محمود / انت اتجننت انت ايه اللى جابك هنا
البلطجى / اكيد بلوه سوده ايه هكون مش قادر على بعادك يعنى
محمود / انتوا لحقتوا صحيح ادى اخره اللى يعتمد على أشكالكوا... خير انجز
البلطجى / يس و بدر
محمود / ما شوفهمش و هم بيخطفوا الواد شافوهم و هم بينقطونى ما تنجز مالهم
البلطجى / روحت الشقه ما لقيتهمش
محمود / قول تانى كدا
البلطجى / اقسم بالله نزلت أجيب لقمه رجعت ما لقيتهمش
محمود يمسك البلطجى من هدومه
محمود / اقسم بالله لو كان ده ملعوب عشان تزودوا فلوسكوا
البلطجى / يا رياسه احنا خدامينك من زمان و عمرنا ما قلينا معاك
محمود / تغطس و تقب و تعرفلى الحيوان ده فين بدل اقسم بالله
البلطجي/ هعرف هعرف
محمود / غور من وشي
البلطجى يجرى
محمود/ ماشي يا يس الكلب
..........................
فى مخزن
ابيك واقفه بتتكلم فى التليفون و قدامها البلطجى التانى نايم فى الارض و فاقد الوعى
ابيك / لا الولد لسه ما فاقش و لا حتى البغل الكبير فاق
بابلو / قدامه قد ايه
ابيك / قدامه ربع ساعه على ما النانوروبوتس تشتغل
بابلو / اشتغلى على محمود هينفعنا
ابيك / كنت فاكره انك هتسلم الواد لشاهين عشان يكسب بونط
بابلو / هيحصل بس محمود هيبقي تحت جزمتك عشان ما تسليميهوش و تفضحيه
ابيك / تمام هشتغل على الناحيتين ... مفيش اخبار من جو
بابلو / لا بس انا متأكد انه مش هيسكت
ابيك / مش هيغلط بالسهوله دى
بابلو/ اتمنى ... تصدقى انى لأول مره اتمنى انه ما يغلطش
ابيك / غريبه دى
بابلو / لو جوزيف طلع خاين هيقتلوا امايا و يحرقوا قلبه عليها قبل ما يقتلوه
ابيك / يا حنين لتكون بتحبها بجد
بابلو / و انتى اللى زيك تفهم ايه ... سلام
ابيك تقفل و تبص على الراجل المرمى فى الارض و تضحك
..........................
على الطريق
عربيات الزنايته بتتحرك ورا بعض و فارس سايق واحده منهم و عباده جنبه و ورا كارم جنبه نجاه نجاه باصه من الشباك على عربيه جابر جنبها سايق و مركز فى الطريق و كارم زهقان
كارم / لا اله الا الله دا الطريق طويل يعني على الصمت المريب اللى احنا فيه ده
عباده / عاوزنا نتكلم فى ايه
كارم / اى حاجه بس نقصر الطريق يعني
عباده يبص فى المرايه على نجاه باصه من الشباك و مضايقه
عباده / هو مفيش استراحه قريبه ... اتصل بجابر قوله يقف فى اقرب استراحه نقف عشر دقايق كدا نشترى اى حاجه ناكلها و لا نشربها
كارم / حاضر
كارم يطلع موبايله و يتصل بجابر يحط الايربود فى ودنه و يرد
كارم / السلام عليكم ... عاوزين نقف فى اقرب استراحه ... تمام تسلم
كارم يقفل جابر يسبق
كارم / بيقول فى واحده قدام شويه هيسبق و يامنها
عباده / تمام
تليفون نجاه يرن نجاه ترد
نجاه / السلام عليكم انتى فين يا بنتى كلمتك مليون مره دا انا حتى جيتلك ما حدش فتح خالص
مهره / معلش و الله كنت نايمه ما سمعتش
نجاه / طب انتى كويسه طيب
مهره / مصدعه اوى و جسمي واجعنى خالص مش عارفه مالى هقوم اعمل قهوه و اخد حبايتين بنادول و باذن الله هفوق خير فى حاجه و لا ايه
نجاه / لا بس رجعت البلد
مهره / بجد !!
نجاه / فى الطريق اهو ... بس عمران لسه فى مصر لو احتاجتى حاجه كلميه
مهره / تسلمى لما توصلى ابقي كلميني طمنيني عليكي
نجاه / بقولك ايه فكرى تانى كدا فى موضوع انك تيجي تتفسحى عندنا فى البلد يومين تلاته كدا و لا حاجه غيرى جو
مهره / امتى بس يا نجاه مش كفايا ما قدرتش اروح الشغل النهرده اهو
نجاه/ رتبيها و باذن الله هتظبط معاكى
مهره / تمام يا حبيبتي خدى بالك من نفسك
نجاه / تمام يا قلبي فى حفظ الله
نجاه تقفل و تبص لكارم قاعد بيلعب فى الموبايل
نجاه / ما تجيب دور
كارم يناولها الموبايل تفتح النوت كارم يستغرب نجاه تكتب
نجاه / انت عملت حاجه فى الموضوع اللى قولتلك عليه
.......................
![](https://img.wattpad.com/cover/339982434-288-k991712.jpg)
YOU ARE READING
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه