الكبيره ٢ بقلم / لولو_محمد

الحلقة ١٢٢

(((((( الكبيره ٢))))))))
#لولو_محمد
الحلقه ١٢٢
عباده / عارفه أصعب حاجه ايه ؟
نجاه تبص فى الارض
عباده / انى مش عارف اعاقبه بايه
نجاه/ بس هو ما عملش حاجه
عباده / ما هو ده السبب انى مش عارف اعاقبه ... انه كل اللى بيعمله بسببك انتى ... لا يا بابا لازم تاخد موقف عشان جابر جالى الاوضه يخبط عشان يديني بطاطس... انما اقنع جابر ننط من السور و نيجي للشخص اللى كنت واضح جدا معاكى انك تبعدي عنه و قايل لك بالحرف لو لسانك خاطب لسانه لا انتى بنتى و لا اعرفك... انا مش عارف اقول لك ايه
نجاه / انا حاولت ابعد و الله حاولت على قد ما قدرت انا حتى رفضت اروح أماكن كتير عشان ما نتقابلش
عباده / و ايه اللى اتغير
نجاه / ما اعرفش ... ما عنديش اجابه
عباده يبتسم بسخريه
.............................
نجاه / انا ممكن اقول مليون حجه و حضرتك هترد عليهم كلهم... بس الحقيقه انى ما اعرفش دا اللى حسيته دا اللى كان فى بالى دا اللى حصل ... ما فكرتش فى حاجه تانيه
عباده يتنهد
نجاه/ طب بالله عليك ما تزعل منى
عباده يبص لها
نجاه / دا انا نوجه حبيبتك
عباده / انا مش جابر
نجاه / نعم يعني ... ايه هتقول لى ان جابر بيحبنى اكتر منك و لا ايه
عباده / مفيش مخلوق بيحبك اكتر منى
نجاه / امال بقي
عباده / ما تبطلي اسلوبك ده انا بجد زعلان منك
نجاه / طب قولى اراضيك ازاى
عباده / مش سهله على فكره
نجاه/ انا مستعده اعمل اى حاجه
عباده/ لا لا ما تعمليش ... يومين و هترجعى تعيديها تانى مش فارقه ... اقولك حاجه... اعملى ما بدالك انتى مش كبيره كفايا انك تاخدى قرارات لوحدك ... كمليها ... و اتحملى نتيجتها
نجاه تبص لعباده عباده يفتح لها الباب
عباده / انزلى
نجاه / ايه !!
عباده / انزلى يا نجاه خليني اروح اليوم كان طويل و مرهق بما فيه الكفايا ... روحى للى جابك يروحك انا ما ليش دعوه بعد كدا
نجاه / ايوه بس
عباده / خلاص يا نجاه انا اخدت قرارى ... انا مش هقدر اجرى وراكى العمر كله و لا فى السن ده و ما ربتكيش بطريقه اكسر للبت ضلع ... انا مش هقدر اجبرك تعملى حاجه انتى مش عوزاها
نجاه / تقدر انا ما عنديش اغلى منك
عباده / روحى اعملى اللى انتى عوزاه ... روحى اعملى اللى يريحك ... لما تروحى ما تجيش تصحيني ... يلا يا نجاه انزلى لو سمحتى
نجاه تبص له
عباده / مش هقولها تانى ... انزلى
نجاه تنزل من العربيه عباده يسحب الباب يقفله و يمشي الكل يستغرب و هى واقفه مكانها بتعيط التلاته يروحوا لها
مختار / ايه اللى نزلك
نجاه تمسح دموعها
نجاه / قالى روحى اعملى اللى انتى عوزاه و اتحملى نتيجته و ما تصحينيش لما تروحى
جابر و جوزيف يستغربوا
مختار / طب اهدى و انا هتكلم معاه ... تعالى اروحك
نجاه / لا انا عاوزه اكمل فى المشوار اللى جيت عشانه
جابر / انتى بتهزرى صح ؟! ابوكى مش بيقولك كدا عشان تعملى اللى فى دماغك دا بيختبرك مش اكتر
نجاه / انا لازم اثبت له انى صح
جوزيف / و انتى متاكده انك هتقدرى على امايا
مختار / انت مش قولت مش هتاذيها ؟
جوزيف / مش هتاذيها اه لكن دا مش معناه انها هتقدر تقنعها باى كان اللى هى رايحه عشانه
نجاه / ابقي جربت
جابر / و التمن يا ماما
نجاه / انا مرتاحه للقرار ده
جابر / قول حاجه يا خالى دى مجنونه رسمي
جوزيف / لو عاوزه هاجى معاكى ... بس انتى لازم تفهمى انك هتكونى لوحدك امايا مش هتطلع لو شمت ريحه نفر واحد منهم
نجاه تهز راسها ايوه
مختار / انسي يا نجاه دى مجازفه ما تستاهلش
جابر يبوس مختار و يحضنه
جابر / اخيرا !!! قول لها
نجاه ما بتتهزش
جابر / ليه العند ده
نجاه / خليني احاول
جابر / يوووووووه !!!
جوزيف / تمام اعتقد ما فيش داعى نضيع وقت اكتر من كدا
مختار / انا هاجى معاكوا رجلى على رجلها امايا بتظهر لى عادى و لو عرفت انى لوحدى
جابر / و انا ايه يعني انا هروح فين هسيبكوا ازاى انتوا بتقولوا ايه
جوزيف / هى مش رحله ... خلى مختار يجى
جابر / انا مش هفارق ضلها فيها لاخفيها
جوزيف / حلوها سوا و انا مستنيكوا هنا بس ما تطولوش الفجر هياذن و الناس هتطلع و الشوارع هتتملى و مش هنعرف ناخد راحتنا
جوزيف يروح يقعد فى جنب
جابر / كفايا يا نجاه ... بلاش احسن
مختار / خليني اروح معاها يا جابر و ما تخافش
جابر / انا بثق فى حضرتك جدا بس لو جرا لها حاجه مش هقدر اسامح نفسي مش هقدر اعيش اقسم بالله
نجاه / مش هيحصل حاجه ما تخافش
جابر / خلاص اجى انا معاكى
مختار / هى مش هتعمل ليك حساب
جابر / جايب الثقه دى منين ... يا خالى دى مش اميره دى واحده تانيه دى مريضه و مش طبيعيه
مختار / انا هقدر اتعامل معاها
جابر يضرب كف على كف
نجاه / ما تخافش انا هاجى على طول بإذن الله
جابر / و ان ما جيتيش ... بعد الشر ... و لحد ما تيجي دا وقوع البلا و لا انتظاره يا عالم انتوا بتقولوا ايه
مختار / احنا لازم نتحرك يا جابر
جابر / يا نروح احنا الاربعه يا مفيش مرواح خالص و دا اخر كلام عندى انا مش هفارق ضلها خلصنا
جابر يبص لجوزيف واقف متابع بهدوء جوزيف يقوم و يروح يقف جنب عربيه جابر و يخبط على الكبوت
جوزيف / يلا
جابر يتعدل فى وقفته و ياخد نفسه
........................
فى اوضه احلام
احلام نايمه قاسم يدخل شايل صينيه فيها سندوتشات يبص على احلام و يبتسم يحط الصينيه فى جنب و يروح يقعد جنب احلام و يصحيها بالراحه
قاسم / خدتى على السرير بسرعه يعني ...احلام ... ماما ... احلام اصحى يا ماما الفجر هياذن قومى يلا عشان تصلى ... احلام ... انا عارف انك ما لحقتيش تشبعى نوم بس قومى يا ماما صلى و نامى تانى ... احلام بقي
احلام تفتح عينيها تشوفه تتخض و تبعد و تعدل عليها الغطا قاسم يضحك
قاسم / افكرك بنفسي قاسم الزيني ... جوزك
احلام / دمك خفيف اوى ... انا اصلا ما فوقتش ... ما لحقتش انام اصلا
قاسم / طب معلش فوقى شوفى عملت لك ايه ... انا عارف انك ما اكلتيش من امبارح و بصراحه مش بعرف اكل اكل بايت فعملت له اعاده تدوير و طلعت لك احلى سندوتشات تركى بس ايه هتدعيلى
احلام / تسلم ايدك جت فى وقتها جعانه جدا
قاسم يناولها الصينيه تاخد واحد
قاسم / فاضل على الفجر ربع ساعه لو تحبى تدخلى الحمام الاول عشان تلحقي
احلام تهز راسها و تبص له متابعها
احلام / مش هتنزل تلحق فى الصفوف الاولى
قاسم / معايا رخصه افضل جنبك سبع ايام
احلام/ اختلفوا فيها و خصوصا الحنفيه اللى احنا بنتجوز على منهجهم قالوا مش عذر
قاسم / بس الحنابلة قالوا يجوز و المالكيه قالو يجوز و الشافعيه قالو فى الصلاه الليليه فقط
احلام / و الفجر نهاريه
قاسم / يعني اتنين و اتنين و بعدين ما احنا هنصلى جماعه برده هام بيكي ... و لا انتى عوزانى انزل و خلاص
احلام / لا انا مش قصدى دا بيتك طبعا ... ما اقصدش انا بس ... انت فاهم قصدى
قاسم/ قومى بس ادخلى الحمام كدا و فوقى كدا و لما تطلعى نشوف الموضوع ده على رواقه ... اصل انا فى موضوع مهم اوى عاوز اكلمك فيه
احلام / خير !! موضوع ايه ده
قاسم / مالك يا احلام كل شويه تتخضي كدا ليه ... مفيش حاجه لكل ده يا ماما خشي بس الحمام دلوقت و لما نصلى باذن الله هقولك على كل حاجه
احلام / طب اديني فكره طيب
قاسم / هنكمل الموضوع اللى اتكلمنا فيه امبارح ما لك كدا ما تركزي معايا شويه و تخشي فى المود يا ماما
احلام / ممكن ما تقوليش ماما تانى... قول احلام بس عادى
قاسم / معلش هى عاده عندى ... هبطلها ما دام بتضايقك
احلام / لا هو انا بس مش قادره اتخيل انى مامتك بس ... و قبل ما تفهم غلط انت كبير عليا ما اخلفكش انا
قاسم يضحك
قاسم/ بس لو قولتيلى يا بابا عادى انا مش معترض ... احلام هو انتى مش عاوزه تروحى الحمام و لا ايه حكايتك فاضل على الفجر خمس دقايق
احلام / ما انت قاعدلى يا قاسم
قاسم / اوعى !!! دا بجد !!
احلام / قاسم
قاسم / طب هخليني انا الكبير و هغمض بس مش هطول انجزى
احلام / ماشي ... انا هثق فيك
قاسم يضحك
احلام / بس بقي !!
قاسم يحط ايده على عنيه احلام تلف نفسها بالغطأ و تقوم و تبص له فجاه
احلام / ما تخمش
قاسم/ اخلصي
احلام تديله ضهرها يفتح بين صوابعه و يبص و هو بيضحك
.........................
قدام السيرك
جابر سايق و نجاه جنبه و جوزيف و مختار ورا جابر يركن العربيه
جوزيف / عشان نبقي على نور انا ما اضمنش سلامتكوا انتوا الاتنين و ما اعرفش فى ايه جوه فنبقى عاقلين و هاديين و نفكر الف مره قبل ما ناخد اى رد فعل على اللى هيحصل جوه احنا على ملعبهم
جابر / اللى مبنى على ارضنا
جوزيف / لا المشكله دى تروح تحلها مع الحى انا مش بتكلم عبرى
مختار / تمام اهدى ... نجاه... جاهزه ؟
نجاه تفتح الباب و تنزل التلاته ينزلوا وراها جوزيف يسبق بخطوه و يروح يدخل السيرك الكل يدخل وراه راجل يقف
الراجل/ مفيش عروض دلوقت لسه بالليل الساعه
بنت تطلع
البنت / اهلا اهلا اهلا ... ثوانى يا رياض ... تعالوا معايا
جوزيف يبص لنجاه تهز راسها و يروحوا ورا البنت تاخدهم لحلبه السيرك مرسوم فى النص دايره جواها نجمه يقفوا كلهم جواها
البنت / كلنا فى السيركل بليز
الكل يتعدل فجاه الديره تنزل بيهم يمسكوا فى ايدين بعض و البنت تمسك ايد نجاه و بعدين الكل يتعدل و الدايره بتنزل يبصوا لفوق الارض بقت بعيده اوى يبصوا لبعض باب فى الجنب يظهر البنت تمشي يمشوا وراها فى ممر ضيق بياخد اتنين جنب بعض بس البنت الاول و وراها نجاه جنبها جابر و ورا مختار و جوزيف
مختار / انت كنت عارف بالنفق ده ؟
جوزيف / السيرك انا ما ليش علاقه بيه لا من قريب و لا من بعيد
مختار يطلع الموبايل مفيش اى شبكه يبص على نجاه و يحط الموبايل فى جيبه الممر يخلص و يبقوا فى مكان كبير مليان اقفاص كلاب فوق بعض لحد السقف أحجام و انواع و يفضلوا ماشيين و الكلاب بتنبح الممر طويل جدا و الكلاب كتير جدا نجاه تبص لجابر و تشد كمه يوطى عليها
نجاه / الكلاب دى تكفيها اربع خمس طلعات زى بتاعه امبارح على الاقل
البنت / و فى غيرهم فى الاوض التانيه ... امايا بتحب الكلاب جدا اكتر من البشر عشان كدا هتلاقينا هنا عددنا محدود انما الكلاب ... مفيش اكتر من كدا
نجاه تستغرب انها سمعت
البنت / الكلاب دى مدربه على اعلى مستوى طول ما انت نايم فى الارض انت فى امان هترفع راسك هتوحشك …  طبعا احنا عارفين ان فى ٣٤٠ سلاله للكلاب امايا بتجمعهم كلهم و بتمرن كل سلاله منهم على مهام غير التانى و كل واحد و قدراته
نجاه / هو لسه كتير
البنت / لا خلاص وصلنا
البنت تبص لهم و تشاور على باب
البنت / الكلاب اللى ورا الباب ده متمرنه انها تهاجم اى راجل ... يعني باختصار اللى هيعدى منكوا ... الله يرحمه ... انتى تقدرى تكملى معايا
جابر يمسك ايد نجاه و يهز راسه لا
البنت / بص وراك ... مفيش طريق للرجوع ... يا تكمل لوحدها يا ما حدش فيكوا هيطلع من هنا
جابر / ما احنا لو ما طلعناش ما حدش هيسمى عليكوا
البنت / ما يسموش ... يتفضلوا... برده مش هينقذوا ولا واحد فيكوا... هنقتل منهم و يقتلوا مننا و الباقي هيهرب ... فى جميع السناريوهات فى حاجه واحده مشتركه ... انتوا الاربعه جثث ... لا سورى حتى دى مش هيكون فى ... اصل الكلاب دى مش بتبقي وراها حاجه
جوزيف يروح ناحيه الباب و يمسك الاوكره نجاه عنيها معاه و جابر ماسك ايد نجاه مش راضي يسيب
البنت / و لا حتى انت يا جو ... نجاه بس
جوزيف يبص لنجاه نجاه تفك ايدها من ايد جابر
جابر / مش هقدر اجازف بيكى
نجاه / مفيش طريق تانى ... و بعدين هو ده اللى انا جايه عشانه
جابر / قول حاجه
مختار / انت عارف ان موتى مش فارق معايا ... بس للاسف مش هنقدر غير اننا نثق فى كلام يونس انها مش هتاذيها
جابر / طب افرض
البنت تروح تفتح الباب صوت كلاب عالى البنت تقفل الباب الكلاب تسكت
نجاه / هرجع باذن الله ما تخافش
جابر يبص لجوزيف
جوزيف / مش هتاذيها
جابر يسيب ايد نجاه نجاه تروح ناحيه الاوضه جوزيف يمسك الباب
جوزيف / مش معنى انها مش هتاذيها انك لو اذتيها او حاولتى
نجاه / انا جايه انهيها يا يونس
جوزيف يهز راسه و يفتح الباب الكلاب تنبح نجاه تدخل يونس يقفل الباب صوت الكلاب يختفي
جابر / اقسم بالله لو جرا لها اى حاجه
جوزيف يقعد على الارض و يسند راسه على الحيطه و يبص لمختار واقف عينه على الباب
…………………….
فى اوضه احلام
قاسم واخد احلام فى حضنه و مشبك صوابعه فى صوابعها
قاسم / و من يوميها و انا مش بقدر ازعلها
احلام / طب هو ما حاولش يتكلم معاكوا من ساعه ما سافر ؟
قاسم / بيتكلم اكيد بس ... هى مش بترضي ترد عليه و حتى لما بعت صوره مراته و عياله ما رضيتش تشوفهم
احلام / و ما نزلش مصر من يوميها
قاسم / نزل مره ... بس ما باتش فى البيت ما سمحتلوش قالت يا انا يا هى خدها و رجعوا على فندق المهم هديناها و روحنا نقوله يروح يراضي امه و كدا و هى هتسامح ... مراته رفضت ... ما هى خوجايه بقي هتقبل بعاداتنا ليه ... امى اللى تروح تعتزر لها
احلام/ وهو قال ايه ؟
قاسم / ما قالش ... ما لحقش يقول الرجاله اصلا كبروا الموضوع اوى و ما ادولوش فرصه يقول و لا يتكلم ... هاجموا البت جامد الصراحه و غلطوا ... ما كانش موقف سهل عليه نهائى ... خدها و رجعوا بلدها و ما رجعش تانى ... انا من كل وقت للتاني بكلمه
احلام / و ما حاولتوش تصلحوا الدنيا تانى بينهم ؟
قاسم / امى لما عرفت اللى حصل حلفت ما يمشي فى جنازتها حتى و اى حد بيفتح السيره ضغطها بيعلا و بتتعب فسكتنا
احلام / بس ده مش صح
قاسم / لا هو اللى مش صح اننا نتكلم فى حاجه زى دى فى وضع زى ده اصلا ... ما كانش جرح ده يعني
احلام/ بس انا عاوزه اعرف اكتر عنك
قاسم / لكل مقام مقال يا ماما ... سورى ... يا لولو ... و الله لازمه و غصب عنى
احلام تبتسم و مش مبسوطه
قاسم / مالك ؟!
احلام / مفيش ما نمتش كويس بس
قاسم /  و ماله ننام شويه و نقوم نكمل كلام على رواقه
قاسم يمد ايده يجيب ريموت من على الكومدينو و يطفي النور و يعدل الغطا احلام تتقلب و تاخد جنب يتقلب و يديها ضهره و ينام
………………….
تحت الارض عند مختار
جابر يطلع الموبايل مفيش شبكه
جابر/ مفيش شبكه يعني لو بتستغيث جوه ما حدش فينا هيقدر يلحقها
جوزيف / و لو فى و جت لك اشاره برده مش هتقدر تلحقها اهدى
جابر / انا غلطان انى سمعت كلامكوا ... حضرتك ازاى هادى كدا
مختار / مش هادى ... انا مش هادى
جابر / انا هتجنن بجد ... اقسم بالله هاين عليا ادخل و اللى يحصل يحصل
جوزيف / اتفضل انا مش همنعك
مختار / احيانا بيكون ان ما فيش اخبار خالص دا فى حد ذاته خبر كويس... على الاقل مفيش اخبار وحشه
مختار يبص لجوزيف قاعد هادى و باصص فى الارض
مختار / انت واثق ان امايا مش هتاذيها صح ؟
جوزيف / لولا العهد اللى بين امايا و نجاه كان زمان نجاه حامل منى دلوقت
جابر يتهجم على جوزيف ما اتهزش من مكانه و مختار قام بسرعه يحوش جابر
جابر / انت فاكر نفسك ايه هاه فاكر نفسك مين يعنى ؟!!
مختار / بيتكلم عن فتره عدت كلنا عارفين ظروفها و لا ده جوزيف و لا نقدر نلومه على اى حاجه حصلت وقتها
جابر / دفاعك عنه طول الوقت و ثقتك فيه الغير مبرره هى اللى جابونا هنا من الاول
جوزيف / نجاه هى اللى جابتنا هنا احب افكرك
جابر / العيب مش عليكوا والله ... العيب عليا انا
جابر يروح يقف فى جنب لوحده و يسند على الحيطه و مديهم ضهره مختار يرجع يقعد جنب جوزيف و يتكلم بصوت واطى جدا
مختار / انا شوفته فى مواقف اسوء من دى بكتير بسببها ... و بسبب حبه و خوفه عليها
جوزيف / امايا مش هتاذيها ... تموت قبل ما يتلمس منها شعره ... بينهم عهد
مختار / و امايا دى عمرها ما هتخون العهد ده ؟!
جوزيف يهز راسه لا
مختار / عشان كدا انت هادى اوى كدا
جوزيف / انا مش هادى نهائى ..  انا رجليا مش شيلانى اصلا
جوزيف يبص لمختار و يرجع يبص قدامه مختار يتنهد و يبص على جابر و بعدين يبص فى الارض
………………………….
فى اوضه امايا
امايا / قولتى ايه
نجاه / ما اقدرش و بعدين انا بكلمك فى ايه و انتى بتكلميني فى ايه ... دى بلدنا
امايا / كانت ... كانت بلدكوا
نجاه / احتلال ده يعني و لا ايه انا لحد دلوقت عامله اعتبار للعشره و بقول يمكن لو اديتك فرصه زى يونس
امايا / مش هنكدب على بعض يا نجاه مش هنكدب على بعض
نجاه / يونس بيثق فيكي و انا بثق فيه ... مع انك خنتيني قبل
امايا / ما خنتكيش انا حميتك... انا عملت اللى اهلك ما قدروش يعملوه ... انا سايبه اهلك عايشين لحد دلوقت بس عشانك … عشان هتزعلى عليهم ... تفتكرى ما كنتش اقدر اقتلهم كلهم ... ديتكوا ايه كلكوا ... انتى اللى تهميني وسطهم و بالمناسبه تهمى المجلس يعني ما كانوش هيعترضوا
نجاه / و ايه اللى هيتغير فى ده
امايا / مفيش ... انا كدا كدا هاخد اللى انا عوزاه
نجاه / مش هيحصل
امايا / هيحصل و انتوا كلكوا كويسين و نعيش كلنا سوا فى سلام او هيحصل و نصكم فى القبر و الباقي عاجز او مكسور ... كدا كدا هيحصل ... البلد دى بقت بتاعتى
نجاه / مش و انا عايشه
امايا / كل ما تقبلتى الموضوع اسرع كل ما كان احسن للكل
نجاه / خلاصه الكلام ... انا هحاول اقنعهم يدوكى انتى فرصه تانيه زى ما أدوا ليونس ... فرصه اخيره بالنسبالك ... مقابل انك تنهى كل الهبل ده دلوقت
امايا / و ان قولت لا
نجاه / يبقي انتى اللى عاوزه الحرب بقي و ساعتها انا اللى هقف لك
امايا / انتى عشان تساومى لازم على الاقل تبقي واقفه على أرض صلبه... تتكلمى من مركز قوه يعني ... تفتكرى بعد اللى حصل النهرده ده انتوا فعلا فى مركز قوه ؟! تفتكرى اصلا لو كنتوا فى مركز قوه كنتى جيتي تتفاوضي معايا من الأساس
نجاه / انا بثق في يونس ... يونس طلب منى
امايا / نجاه ... صارحى نفسك بالحقيقه  ... انا بحبك و بجد صعبان عليا اشوفك كدا ... الحكايه خلصت
نجاه / براحتك ... قدامك دلوقت حل من اتنين ... يا تقتليني ... يا نمشي
امايا / هديكوا يومين تفكروا و تتناقشوا قبل اول هجوم جديد انتى عارفه الطريق ... ما لوش لازمه تفرهدى الرجاله دول معاكى ... ابقي تعالى لوحدك بعد كدا
نجاه / انتى كمان فكرى فى كلامى
امايا / ما قولتيش اى كلام افكر فيه اصلا ... على العموم الباب وراكى ... تقدرى تمشي فى اى وقت
نجاه / ما تجبريش يونس يختار بينا
امايا تضحك و تبص لنجاه نجاه تروح تفتح الباب و تمشي
…………………………..
فى اوضه عباده
عباده نايم فى السرير هو و خديجه الباب يخبط ما فيش اى رد فعل يخبط تانى يخبط تالت فارس يفتح الباب و يدخل يلاقيهم نايمين يستغرب يروح يحاول يصحيهم يلاقى ورقه مكتوبه على الكومدينو ( احنا واخدين منوم ما تقلقوش لما تاثيره يروح هنصحى لوحدنا لو محتاجين اى حاجه بلغوا مختار )
فارس / ايه الكلام ده ... ماشي لما يصحى بقي
فارس ياخد الورقه و يطلع بره و يقفل الباب يشوف كارم معدى
كارم / ايه يا عم لقيته انا دورت عليهم فى كل حته
فارس / اه نايمين جوه معاك لزق
كارم /اه عندنا فى الاوضه هروح اجيب لك ثوانى
فارس يهز راسه و كارم يروح شويه و يرجع فارس يلزق الورقه على الباب
كارم / هو فى حاجه حصلت ؟ مش من عادته الحوار ده
فارس / لما يفوق نبقي نساله ... اصلا عمى مختار ما حضرش الصلاه و لا هو و لا جابر
كارم / اختك فين ؟
فارس / ما اعرفش ما شوفتهاش هى كمان
كارم / انا هروح اطمن عليها
فارس / هى لو مش تمام ابوك هينام يعني
كارم / هروح اطمن عليها
........................
فى عربيه جابر
صمت تام
جوزيف/ تمام ... كلنا مطبقين و تعبانين خلينا نهدى و نرتاح شويه و بعدين نتكلم
مختار / اعتقد ان دى احسن حاجه ممكن نعملها دلوقت
جوزيف / سلام
جوزيف يفتح الباب و ينزل و يقفله و هو باصص على نجاه سرحانه يتنهد و يمشي
جابر / انتى كويسه يا نجاه
نجاه / يونس معاه حق احنا محتاجين نهدى و نرتاح شويه قبل ما نفكر فى اى حاجه
مختار / بس انتى اكيد هتحكى اللى حصل جوه صح ؟
نجاه / ما اعتقدش انه هيفرق ... القرار محسوم ... الفكره احنا هنعمل ايه فى اللى شوفناه ؟
مختار/ مش اول مره نشوف استعراض عضلات يعنى
جابر / انا برده عاوز اعرف ايه اللى محسوم
نجاه / هو احنا ينفع نروح دلوقت و نتكلم بعدين ... انا اصلا مش قادره انى اواجه بابا و لا عارفه هقول ليه ايه
مختار / انا اللى هتكلم معاه
نجاه / بس اكيد قلقان عليا و زعلان منى
مختار / خلينا نروح الاول و نسيب الدنيا هى اللى تقرر ايه اللى هيحصل فى الموضوع ده هناك ... سوق يا جابر
جابر يبص لنجاه باصه من الشباك على بلكونه جوزيف واقف فيها و متابعهم عنيهم تيجي فى عنين بعض يبتسم جابر يسوق و يمشي
.........................
فى شقه احلام
قاسم قاعد و على رجله مازن و قدامه مامته و ام احلام و امين و همام
قاسم / يا عم و انت شوفتنى سبت عروستى و نزلت من امبارح ركز فى عروستك ركز فى عروستك
امين / يا عم ما فيش حاجه كلو تحت السيطره
قاسم / امال جابر ما جاش معاكوا ليه
همام / راجع الصبح دخل نام هيبقي يجي بعدين بقي مع باقي الجماعه
قاسم / يأنس و ينور ... ايه الاخبار يا ست الكل طمنيني عليكي
امه / الاخبار عندك انت اللى تطمنا
قاسم / و الله الاخبار اللى عندى كلها زى الفل اطمنى
امه / امال هى فين يعني ما طلعتش تسلم لحد دلوقت ليه
احلام تدخل شايله صينيه كبيره عليها كاسات عصير و اطباق صغيره امين يجرى ياخد منها و يحطها على الترابيزه
ام احلام / تسلم ايدك
احلام / السلام عليكم حقكوا عليا كنت بحط الكيكه فى الفرن 
ام احلام / كيكه!! بقي كل اللى عندك ده و رايحه تعملى كيكه ؟! جرا ايه يا احلام امال لو ما كنتيش عروسه يا بنتى
ام قاسم / و هى العروسه ما ينفعش تعمل حاجه حلوه لجوزها و لا ايه يا ست ام امين
ام احلام / و هى العمايل حبكت النهرده
قاسم / ما حبكتش و الله بس هى اللى مصره ترد على سندوتشات الصبح قال ايه بتنافسنى مين فينا الأشطر فى المطبخ ما تعرفش انها جيالى فى ملعبى
امين/ انت هتقولى
احلام / الصبح فطرنا شويه سندوتشات انما ايه بصراحه ليا حق اتحسد عليه
ام قاسم / تتحسدى عليه عشان سندوتشاته بس
قاسم / جرا ايه يا ست الكل انتى كدا بتقلى من سندوتشاتى
همام / لا كلو الا سندوتشاتك دا دى اللى بتسترنا فى الطلعات دى
احلام / عن اذنكوا هدخل المطبخ ثوانى
احلام تدخل و مازن يجرى يدخل وراها و الكل بيبصوا لبعض بحرج
..........................
فى مكتب عباده
عباده قاعد و قدامه قهوه و مش فايق خالص و قدامه مختار و مغاورى و شاهين و نجاه و جابر و دياب و منصور
عباده / هو انتوا بتصدعونى بالهبل ده بجد ... يعني الموضوع ده اساسا مطروح
نجاه / لا بس لازم نلاقى حل ... انا ما ردتش عليها
عباده / نلاقى !! حرف النون ده غريب جدا
مختار / عباده
عباده / انا برده بسأل تانى انا مالى بكل ده
مغاورى / هو ايه اللى انت مالك انت مش الكبير
عباده / هو انت ما عرفتش مش نجاه ربنا يديها الصحه و طوله العمر بقت الكبيره و هى اللى بتقابل و تتفق و تخطط و تقرر و تنفذ كمان
مغاورى / بقولكوا ايه يا شباب ... اطلعوا بره شويه
الشباب كلهم يقوموا شاهين يسيب موبايله مكانه و يفضل مختار و مغاورى و عباده
مغاورى / انت شايف ان ده وقته
عباده / انا تعبان يا مغاورى مش قادر الهبل ده دلوقت
مغاورى / ما هو للاسف الهبل مش هيستناك تفوق و بعدين مالك مستغرب ليه مش دى نجاه بنتك و دى تصرفاتها اللى كنت طول عمرك فخور بيها ايه اللى جد
عباده يبتسم بسخريه
مغاورى / حتى لو قولت لا و نفذت اللى فى دماغها دى حاجه تتعاتبوا عليها بعدين ابن و بنته البلد ما لهاش دخل
عباده / تمام يا مغاورى ... انت الكبير دلوقت هتعمل ايه
مغاورى / ههد المعبد على دماغها و دماغ اللى جابوها
مختار/ و دماغنا
مغاورى / ياما دقت على الراس طبول أعلى ما فى خيلها تركبه
مختار / و ممكن نسايس
عباده / انت بتتكلم جد !! انت بجد مصدق حوار تعايش و سلام و الهبل ده كانت نفعت بره هتنفع جوه ... الارض دى ارضنا احنا و البلد دى بلدنا احنا مش على اخر الزمن هنسيبها لعيله مخوفانا بكلبين
مختار / ما قولتش كدا ... انا بس بقول ان السلاح المرادى جديد علينا شويه و مش واخدين على التعامل معاه ... احنا امبارح اتمرمطنا و لفينا كل الوحدات اللى حوالينا على حقن عشان تكفى الجرعه الأولى بس ... الاصابات دى مش هتخف بين يوم و ليله اللبس بتاعنا مش مجهز ... احنا طول عمرنا نفوت فى الرصاص مش فى الكلاب
مغاورى / عاوز تقول ايه
مختار / عاوز اقول نجيب اخرها لحد ما نجهز
عباده / ساعتها هتطلع باللى اتقل من الكلاب
مختار / تخيل بقي لو طلعت بيه و احنا حتى مش جاهزين للكلاب ... ناصر الله يرحمه لما كان مكتفنا لفيرا كان دايما يقول الراجل منكوا ما يتعوضش ... ايه اللى جد ... المرادى الرجاله دول عيالنا... حد فيكوا هيقدر يعوض حد من عياله؟!
عباده / احنا بنفكر غلط
مختار / طب نورنا انت
عباده / بكره ارد عليكوا
مختار و مغاورى يبصوا لبعض و يبصوله
عباده/ الموضوع ده مش هيخرج حله عن شخص واحد بس
.......................
فى الجنينه
جابر / عدوا عليا كأنهم عشرين سنه قايم من النوم جسمى كله واجعنى كانى واخد علقه موت و مش قادر اتحرك خدت باسط عضلات بس لسه حاسس انى مش قادر برده
دياب / حقك دا انا شخصيا كنت هموت... بس الصراحه دى مش جرأه دا جنان
جابر / شوف وشها انت بس و هى خارجه... عاوزه اروح عاوزه اروح ... و ما نطقتش بكلمه غير جوه
دياب / بس قلبي بيقول انها ما قالتش كل حاجه
جابر / اللى قالته كفايا
دياب / تفتكر حوار انهم يخلوها الكبيره ده لسه وارد ؟
جابر يبص لدياب
دياب / دا مهما كان حلمها
جابر / نجاه مش خاينه يا دياب
دياب / انا ما قولتش انها خاينه ... بس هم عارفين نقطه ضعفها و بيضربوا صح ... اصل اشمعن نجاه بس اللى الحوار يكون معاها
جابر / يونس بيقول فى بينهم عهد يحموا بعض
دياب / دى مشكله ... اصل نجاه عمرها ما هتخلف وعدها و لا ايه ؟!
جابر / دى تانى مره يا دياب التالته رد فعلى مش هيعجبك
دياب/ حاول تفهم كلامى من غير عصبيه انا ما قولتش حاجه انا بفكر معاك بصوت عالى عشان نفرد كل الاحتمالات على الترابيزه
البوابه تتفتح و جوزيف يدخل
دياب / و ادى كرسي جديد هينضاف للترابيزه ... خير جاى ليه ده السعادى ؟!
الكل يبص على جوزيف نجاه تسحب نفسها و تدخل السرايا و يونس و جابر متابعينا
دياب / ايه الاخبار  ؟! عرفت امايا اتكلمت مع نجاه فى ايه ؟!
جوزيف / اه عرفت و عرفت كمان نجاه ردت عليها و قالت ايه؟
دياب و جابر يبصوا لبعض
دياب / هى نجاه ردت عليها ؟!!
.......................