الكبيره ٢ بقلم / لولو_محمد

الحلقه ١١٦

((((((( الكبيره ٢))))))))
#لولو_محمد
الحلقه ١١٦
جوزيف / اجى اوصلك ؟!
جوزيف يجى يروح ناحيه الاوضه يسمع صوت على السلم
هند / يونس استنى
جوزيف يبص يلاقي هند نازله شايله صينيه يجرى يشيل منها
هند / عملت لك فطار
جوزيف/ سبقتك بس تسلمى ... ايه كل ده مين هياكل كل ده
هند / الف هنا دا حاجه بسيطه كدا لو اعرف انك صاحى كنت نزلتهولك من بدرى بس انا كنت فكراك نايم عشان مطبق و كدا
جوزيف / غفلت كدا
هند / طب ادخل ارتاح
جوزيف / شكرا على الفطار على فكره
هند / الف هنا لو عوزت حاجه ناديلى
جوزيف يبتسم و يهز راسه هند تطلع
جوزيف / طب اكل تانى و لا اعمل فيكي ايه انا دلوقت ... ندوق يعني مش هيحصل حاجه  .. ندوق
...................
فى عربيه كارمن
بياتريس / اموت و أعرف ازاى قدرتى تسرقى العلبه من دولابها بالسرعه دى
كارمن / انا مش حراميه يا بنت ايه تسرقى دى
بياتريس / سورى مش قصدى
صوفيا / انتوا كدا بتاذوا عمران على فكره
بياتريس / يا بنتى يا حبيبتي الكوليه معانا و احنا اللى هنعمل البلاغ و دى حاجه مش هنعملها اصلا احنا بس بنخوفها ... بس انا عاوزه اقول حاجه ... كل ده غلط على فكره
صوفيا / يا سلام
بياتريس / ايوه حاتم بدئها معاها بدرى اوى المفروض كان يجر شويه ناعم انما ده ما بيحاولش اصلا و دلوقت حرقنا كل الكروت اللى كان ممكن نضغط عليها بيها بدرى بدرى
كارمن / انتى معاكى حق بس دا اللى حصل و انا اصلا اتكلمت مع حاتم قالى انها استفزته و كلنا عارفين قد ايه هى عنديه
صوفيا / اهو هيجيب بوزها فى الارض اهو
كارمن / على فكره انا متاكده ان اللى كان فى الاوضه عمران
صوفيا / عمران مش حرامى
كارمن / انا بقولك عشان تشيلى الواد ده من دماغك
بياتريس / يا ريت
صوفيا / تعرفى تسكتى
.....................
فى عربيه حاتم
مهره قاعده جنبه و هو سايق و باين عليها التوتر و الضيق
حاتم / اشغل لك ميوزيك
مهره تهز راسها لا
حاتم / فى ريست قريب تحبى نقف نشرب حاجه ؟
مهره تهز راسها لا و تشاور على بطنها حاتم يبتسم
حاتم/ ما قولنا النهرده فرى
مهره تبتسم
حاتم / انتى عارفه ايه احلى حاجه فيكي
مهره تبص له
حاتم / انك ما بتتكلميش ياااااه على الهدوء... بجد دى نعمه كبيره جدا
مهره تبص فى الارض
حاتم / مع انى عندى فضول اسمع صوتك بس ..  لا لا خليكي كدا احسن
مهره تبص الناحيه التانيه
حاتم / لا جدال بقي و لا سرسعه و لا صوت عالى و لا زن و لا قرف ... جميل حقيقي هدوء جميل
مهره تشاور على الريست
حاتم / الله مش قولتى ... ماشي يا ستى مش هزعلك المرادى عشان الهديه بس
مهره تبتسم و تبص الناحيه التانيه و اول ما يركن العربيه تنزل منها جرى على جوه و تروح الحمام و تقفل عليها الباب و تفضل تغسل فى وشها الباب يخبط
حاتم / مهره انتى جوه
مهره تشد مناديل و تنشف وشها بسرعه و تفتح الباب
حاتم / اطلب لك حاجه ؟
مهره تهز راسها لا
حاتم / طب ما تطوليش
مهره تطلع معاه و تروح ناحيه العربيه حاتم يستغرب و ما يهتمش و يروح يطلب اسبريسو
.........................
فى شقه مختار
عمران / لا مش هرجع و اسيبها و انا عارف ان فى حوار هيحصل
مختار / يا ابنى فى حوار تانى أخطر مليون مره هيحصل فى البلد و لازم اكون موجود هناك
عمران / هفضل لوحدى
مختار / لا انت لوحدك لا
جوزيف / هفضل معاه
مختار / يا فرحتى
جوزيف / طب ايه رايك يا عمران ... اروح وراها و اتعامل بدالك
عمران/ و بدالى ليه هو انا صغير
هند / كبير بس العين عليك و خصوصا بعد اللى عملته ما تقول له يا مختار
مختار / و هو مش عارف ان فى واحد من السيكيوريتي شافه و بلغ
عمران / يثبتوا انه انا
مختار / حبيبي انا ما بتكلمش عن الحكومه انا بتكلم عن مهره نفسها
عمران / الواد ده مش كويس
جوزيف / و انا هبعده عنها
عمران / طب متنفذ مستنى ايه
جوزيف / تمام ارجع البلد و انا هسافر اجيبها و ارجع لك
مختار / هتعمل ايه بقي بالظبط عندى فضول اعرف
جوزيف / مش هقتله ما تقلقش
مختار / تصدق اطمنت ... تقتل مين هى ميغه ... ما ترحمونى بقي
جوزيف/ ما احنا عشان نقدر نحل المشكله لازم نعرف السبب و كلنا عارفين ان الموضوع مش موضوع فلوس انا بقي هروح ادخل وسطهم و احط أيدى على المشكله و احلها سهله
هند / هتدخل بصفتك ايه
جوزيف / يوسف المصرى رجل الأعمال مثلا
مختار / لا
هند / ليه لا
مختار/ مش مطمن لك
جوزيف / ليا ؟!!!
مختار / وله هو انا هتوه عنك ... و بعدين انت بتخلع من المواجهه و لا ايه
جوزيف / تصدق زعلت منك ... دا انا هنهي الحوار ده و اجيلك طيران
عمران / على فكره لو ما راحش انا هروح انا مش مرتاح و هى معاه هناك لوحدها
هند / يا ابنى ما تقلقش ابوك باعت ناس وراها
عمران / كان فى ناس وراها المره اللى فاتت برده ... المشكله اللى ورا البيبان يا أمى مش الشوارع و الأماكن العامه
مختار / و انت هيتقفل عليكوا باب واحد و لا انت استحليت النط من الشبابيك
عمران/ دا انا !!
جوزيف / انا هنزل ألم حاجتى
مختار / يونس
جوزيف / جربنى ... هبهرك
مختار يبص الناحيه التانيه
جوزيف / ما تقلقش
عمران / طب ما اروح معاه طيب
مختار / انا مش موافق انه يروح هبعتك ازاى
عمران / طب هفضل هنا البلد بعيد اوى يابا
هند / طب خلينا يومين كمان يا مختار
مختار / يا هند ما عادش وقت و محتاجين كل راجل
هند / خلاص ارجع انت و انا هفضل هنا مع عمران و هبعت ناصر يجي يقعد معانا و يجيب الرجاله معاه
مختار / دا على اساس الرجاله اللى معاه ما كانوش عشان نور يعني
هند / سيب رجاله نور معاها و ابعت لى ناصر و خد الرجاله اللى معاه انت صدقنى هنرتبها دول يومين بس و انا مش هخرج من البيت خالص
مختار يبص لهند
هند / بتبص لى كدا ليه دا انا ام شاكر و لا نسيت
مختار / على كدا اخد الرجاله كلهم معايا بقي
هند تبتسم
جوزيف / انا بقول تيجي تساعدني ألم حاجتى تحت شويه كدا يا عمران
الكل يبص لجوزيف مبتسم باستفزاز
مختار / غتت زى ابوك
جوزيف / بتشتم ميتين !!!
مختار يدخل اوضته و يرزع الباب جوزيف يضحك و يروح يفتح الباب و ينزل 
عمران / انا هنزل اتفق معاه على اللى هيعمله
هند تهز راسها عمران ينزل و يقفل الباب مختار يفتح الباب و يقف ساند عليه
هند / ما تستهبلش
مختار / و انا كنت فتحت بقي و لا هى تلاكيك و خلاص
............................
فى منتجع على البحر
حاتم / ايه رايكوا بقي فى السويت ده دا أكبر و افخم سويت فى الريزورت كله و المميز فيه بقي الفيو
حاتم يفتح الستاير
بياتريس / حلو اوى
حاتم / السويت عباره عن سرير كينج سايز و هنا فى اوضه فيها توين بيدز يعني
صوفيا / يعني فى حد فينا هينام على الارض انا ما باخدش حد جنبى
كارمن / انا هاخد مهره فى حضنى هى مش هتمانع تشاير
مهره تبتسم
حاتم / احنا فيها ممكن اخد سويت تانى سينجل لاى واحده فيكوا
كارمن / مفيش داعى خلينا مع بعض احسن و اهى فرصه
حاتم / على العموم انا السويت بتاعى مش بعيد عن هنا و كدا كدا هنقضي اليوم كله مع بعض ... المفروض قدامكوا ساعه تفضوا الشنط و تجهزوا و هاخدكوا فى احلى مغامره على اليخت بتاعى هنتغدى و نقضي وقت ظريف مع بعض قبل حفله بالليل
صوفيا / هو فى حفله بالليل
حاتم / مفاجاه
حاتم يوطى على مهره و يوشوشها
حاتم / انا خليتهم يجهزولك طقم حلو اوى هتلاقيه فى الدولاب ... و المرادى راعيت المقاس عشان تعرفى انتى غاليه عندى قد ايه
مهره ما تهتمش حاتم يمشي
صوفيا / كان بيقول لك ايه
مهره ما تهتمش و تكتب على الموبايل
مهره / انا مش بعرف اعوم بلاش اجى معاكم اليخت ده
كارمن / ازاى يعني دا كلنا طالعين على شرفك و بعدين مش لازم تنزلي المايه خليكي على اليخت فوق
بياتريس / على فكره انا نفسي مش هنزل المايه و ما بحبش انزل البحر اساسا بس صدقيني تجربه اليخت دى جميله جدا و هتنبسطى فيها اوى بجد
صوفيا / دا كفايا الجو و البحر و ريحته و بعدين احنا هنبقي معاكى ... بقولكوا ايه احنا هنضيع الوقت دا يا دوب نجهز بيقول ساعه واحده
كارمن / ابتدينا
بياتريس تضحك صوفيا تطلع ليها لسانها و مهره باين انها مضايقه
.........................
فى اوضه عمران
عمران واقف فى الشباك و باين انه مضايق جدا مختار يدخل عمران يبص له
مختار / مالك واقف كدا ليه
عمران / مخنوق و طهقان
مختار يتنهد
مختار / انا كنت جاى اسلم عليك قبل ما امشي بس ما فيش مشكله لو قعدت اتكلمت معاك شويه
عمران / اى كان اللى حضرتك هتقوله مش هيغير اى حاجه فى اى حاجه انا مخنوق بجد
مختار / انا هتكلم مع اكرم تانى
عمران / هو عدل اوى يعني دا حيوان... طب و الله الحيوان يزعل منى على التشبيه ده
مختار / طب اهدى
عمران / يا بابا الست بتكدب و الراجل خايف انا مش عارف على ده جنس ملته ايه ... و بعدين انا اقدر اتصرف و انهى كل ده و حضرتك اللى مانعنى
مختار/ لأنها عمرها ما هتشوف الحقيقه يا حبيبي هى زى الغريق متعلق بقشايه و هم ساحبينها صح و فاهمينها
عمران / طب و المطلوب.. هسكت لامتى لما تموت بقي المرادى المره اللى فاتت قطعت النطق المرادى هتقطع النفس بقي
مختار/ مهره لبست حاتم الاسوره و يونس وصل و حاطتها تحت عنيه و انت عارف يونس كويس
عمران / كان المفروض اروح معاه
مختار/ و اسيب امك لوحدها يعنى و لا اعمل ايه
عمران / خدها معاك و انا هروح مع يونس و اخلص و ارجع بيها
مختار / تخلص ايه ... يا ابنى اعقل و كفايه جنان بقي
عمران / طب على الاقل
مختار / اقسم لك بالله ان كلنا زيك و اكتر بس هى مش هتسمع لحد و هتفضل متمسكه بيهم و بتدافع عنهم هى عاوزه تصدق انهم كويسين هى عارفه ان حاتم وحش و قالت لك انها مجبره عشان امها
عمران / امها بتكدب
مختار / مش هتصدقك
عمران / ايه الغباء ده
مختار / مش غباء يا ابنى دا حب
عمران / تحب دى ؟!
تليفون مختار يرن
عمران / توكل على الله يا بابا و خد بالك من نفسك و ما تقلقش انا مش هعمل اى حاجه مجنونه و لا هعرض امى للخطر
مختار / انا متاكد من ده
عمران يهز راسه مختار يحضنه
مختار / يونس فتح لك على موبايلك المايك اللى فى ايد حاتم انا متاكد اننا هنقدر نوصل لحاجه تفيدنا ركز معاه
عمران/ مش كنا ادينا واحده كمان لكارمن الكلب دى
مختار يضحك و يطبطب على عمران و يمشي عمران يروح يجيب الموبايل و يلبس الايربود و يقعد على السرير و هو بيهز فى رجله بعصبيه
........................
على اليخت
الكل قاعد حوالين ترابيزه عليها سوشي باشكاله و بياكلو و مهره مش بتمد ايدها
حاتم / ما تاخديش موضوع الدايت على قلبك اوى كدا قولتلك النهرده فرى
مهره تهز راسها لا
كارمن / انتى مش بتحبى السوشي و لا ايه دا حلو جدا
مهره تبتسم بحرج
حاتم / طب دوقتيه عشان تحكمى ... دوقيه
حاتم يعزم عليها بواحده تهز راسها لا
حاتم / مش هفضل مادد ايدى دوقيها هتعجبك
بياتريس / على فكره هو حلو جدا جربى مش هتخسرى حاجه
مهره تفتح بقها و تاكلها و تشد منديل و تتفها و تقوم من على الترابيزه
صوفيا / ازواق
حاتم / كملوا اكل انا هروح اشوفها
كارمن / بهدوء يا حاتم بليز الدنيا بينكم متوتره و احنا جايين ننبسط
حاتم / هى اشتكت لحضرتك من حاجه ؟
كارمن / اكيد لا بس يعني انت فاهم انا امها و بقدر احس
حاتم يبتسم و يروح ورا مهره يلاقيها واقفه بتبص على البحر
حاتم / عادى على فكره مفيش داعى لكل الافوره دى كان فى سلطات مختلفه كان ممكن تاكلى منها ... الا بقي اذا كنتى اكلتي حاجه من ورايا
مهره تهز راسها لا
حاتم / مامتك بتقول ان الدنيا بينا مش احسن حاجه و عشان كدا قررت اصالحك
مهره تبص له
حاتم / من ساعه ما اديتينى البتاعه دى و انا بفكر انى اكيد لازم اردها بحاجه مناسبه ... انا ما اعرفش زوقك بس انا متأكد ان زوقى هيعجبك... ما انا اخترتك
مهره تبص الناحيه التانيه مش مهتمه
حاتم / انتى مضايقه من موضوع الدايت ؟! انا عاوزك احسن حاجه ... لما نرجع هحجز لك عند أشهر دكاتره التخسيس فى العالم لو حكمت لعمليه حتى هعملك
مهره تبص له باستغراب و صدمه و تشاور على جسمها فوق و تحت
حاتم / انا ما قولتش انك طخينه خالص جسمك جميل
مهره تبص الناحيه التانيه بنفاد صبر
حاتم / بس فى احسن و انا عاوزك احلى و اجمل حاجه ايه المشكله يعني لما تهتمى بنفسك عشانى ما انا هدلعك برده
مهره تمسك فى الترابزين و تكتم جواها كارمن تنزل
كارمن / جرا ايه انتوا جايين تستفردوا ببعض هنا و سايبينا لوحدنا ينفع الكلام ده
حاتم / كنت لسه بقول لمهره على المفاجاه بتاعتها
كارمن / واو مش ممكن حركاتك دى يا حاتم
حاتم يطلع خاتم سوليتير و يمسك ايد مهره تحاول تسحبها
كارمن / هههههههه مكسوفه و لا ايه خلاص بقي ما عدش في بينكوا تكليف
حاتم يسحب ايدها و يلبسها الخاتم و يحاول يبوس ايدها تسحبها بسرعه يبص لها
حاتم / ماشي
كارمن / حلو اوى يا حاتم و شكله غالي جدا
حاتم / حلو عشان مهره اللى لبساه و اكيد ما يغلاش عليها
كارمن / طب ايه اسيبكوا لوحدكوا شويه و لا هتجوين اس
مهره تروح ناحيه اخواتها
كارمن / ما ينفعش تحرجها قدامى كدا بوس ايه انت تعرف عنها كدا برده
حاتم / دى ايدها يعنى مش حاجه تانيه
كارمن / امريكا نستك مصر باين
كارمن تطبطب على كتف حاتم و تروح ورا مهره
........................
فى شقه عمران
هند بتحط اكل و ناصر بياكل
ناصر / اقسم بالله ما فى كدا فى الدنيا دا الواحد كان طالع عينه
هند / دا على اساس انى لسه واصله ... و لا انت ما حدش قالك
ناصر / يا ماما اقسم بالله مسحول و حضرتك عارفه
هند / لا ما انا عارفه ... المهم طمنى على عروستك
ناصر / كل يوم ننزل نلف المحلات كلها محل محل عشان فى الاخر ننقى حاجتين تلاته ... الموضوع بقي مستفز بس بعديها و اقول هى الواحده بتتجوز كام مره ... خليك الكبير يا ناصر خليها تفرح يا ناصر
هند / حلو
ناصر / لا اللى مش حلو بقي لما بتروح و تورى الحاجه لأمها و قرايبها و تتصل بيا دا فلانه شافتها فى مكان تانى احلى او دى طلعت زى بتاعه فلانه و نروح تانى يوم نرجعها و نلف تانى نجيب حاجه تانيه
هند تضحك
ناصر / دى اوضه ... اوضه واحده و شويه رفايع و شويه لبس ايه الصعب فى كدا دى تتلم فى عشر دقايق و بعدين يا ستى لما تلاقى حاجه احسن بعد كدا نبقي نجيبها و نبدل هو انا قولت لا هعترض يعني
هند تطبطب على كتفه عمران يفتح الباب
عمران / دا انت شايل و معبى
ناصر / صح النوم
عمران / معلش كنت مطبق ... حمد الله على السلامه
هند / صوتنا صحاك
عمران / لا انا كنت ظابط المنبه على ساعتين
هند / ليه كدا يا عمران ترتاح ازاى انت كدا
عمران / انا تمام دلوقت
هند / طب اقعد كلك لقمه
عمران يقعد و هند تغرف له و هو بيقلب فى الموبايل
ناصر / و انا اللى كنت عامل حسابي اتجوز قبل اول الشهر
عمران / دا اللى هو بعد يومين
ناصر / الوقت ما بقاش فيه بركه خالص يا عمران
عمران / انت اللى مستعجل على الفاضي
ناصر / انت شايف كدا
عمران / هى اصلا غالبا ما كانتش هتوافق على حكايه الفرح الجماعى دى
ناصر / ليه يعني اذا كانت احلام وافقت
هند / احلام هيتعمل ليها فرحين واحد عندنا و التانى فى اسكندريه وسط اهل جوزها
ناصر / و ماله
هند / انت كدا كدا مش هتنزل البلد وقت الافتتاح انت وعدت ابوك
ناصر / مش عاوز اتكلم فى الموضوع ده انا عاوز اكل
هند / احسن برده... ممكن تسيب الزفت ده و تاكل
عمران يحط الموبايل و يهز راسه
.......................
على اليخت
مهره بتصلى فى جنب على الديك حاتم يدخل يشوفها يقف يستنى تخلص
حاتم / هو انا كل شويه هقعد ادور عليكي بقي و لا ايه
مهره تبتسم
حاتم / انتى عرفتى القبله ازاى
مهره توريه الموبايل حاتم يبتسم
حاتم/ مامتك و اخواتك غيروا تحت و انا عملت حسابى و جبت لك بوركينى
مهره تهز راسها لا بحرج
حاتم / المايه هاديه و الجو جميل ليه لا
مهره تيجي تكتب
حاتم / انا عارف انك ما بتعرفيش تعومى بس دا مش مبرر انك ما تنزليش المايه
مهره تفتح بقها باستغراب
حاتم / هبقي جنبك ما تخافيش و اهى فرصه اعلمك العوم
مهره تهز راسها لا و تحاول تعديه يمسك ايدها
حاتم / عارفه ايه هى اسرع طريقه تعلمى بيها حد العوم
مهره تبص له
حاتم / انك تشيليه و ترميه فى المايه
حاتم يشيل مهره و يرميها فى المايه فى ثوانى و يقف يتابعها من فوق و هى بتعانى
حاتم / حركى رجليكي باستمرار و ما تخشبيش نفسك
مهره بتغرق كارمن و صوفيا و بياتريس يدخلوا بيجروا
كارمن / انت عملت ايه
حاتم / ما تقلقيش يا طنط هى تمام حتى بصوا
حاتم يبص مهره غرقت جوزيف يدخل بجيت سكى طاير ينط منه يغطس لها
صوفيا / ماتت !! ماتت ... قتلتها  ... انت قتلتها
حاتم / قتلت مين هى كويسه على فكره بلاش دلع
كارمن / قولت لك ما بتعرفش تعوم تقوم ترميها فى المايه
حاتم / كان لازم تتعلم تواجه خوفها
صوفيا / انتوا بتتكلموا ما حد ينط وراها يلحقها
بياتريس / لحقها لحقها
الكل يبص جوزيف قب بيها من المايه و سحبها على الجت سكى و طار بيه
حاتم/ انت يا ... كابتن كابتن ... اطلع وراه ... اتحرك
كارمن / روحنا فى داهيه ... و الله روحنا فى داهيه
حاتم/ ما توترونيش بقي ايه الأوفر ده
حاتم يروح ناحيه السواق
بياتريس / شكلنا غلطنا لما دخلنا المريض ده وسطينا ... مامى احنا ما اتفقناش على قتلها
كارمن / و انتى شيفانى قتاله قتله عشان كمان اقتل بنتى
بياتريس/ دا مجنون يا مامى ممكن يعمل اى حاجه
كارمن/ هى كويسه هى كويسه انا متاكده انها كويسه
بياتريس / يا رب
كارمن تمشي بياتريس تبص لصوفيا مصدومه و سرحانه
بياتريس / هتبقي كويسه على فكره
صوفيا تعيط بياتريس تحضنها و تطبطب عليها
صوفيا / انا ما بكرههاش للدرجادى انا بس عوزاها تخرج من حياتى
....................
فى الجنينه الورانيه
مازن قاعد بيتمرجح لوحده جابر يدخل يشوفه يقعد جنبه
جابر / مش ممكن دا الواحد دماغه هتنفجر من الصداع اللى جوه ... مش هتضايق لو قعدت جنبك صح ؟
مازن يهز كتفه
جابر/ و انت برده هربان من الصداع و لا حد ضايقك
مازن / البنات طلعوني من الاوضه عشان احلام بتقيس الفستان
جابر / طبيعي انت راجل دلوقت و ما ينفعش تقعد وسط الحريم
مازن يهز راسه اه
جابر / طب ما جيتش وسط الرجاله ليه ... تعرف عاملين حفله فى الجبل للرجاله بس مش هناخد حريم معانا ... ايه رايك تيجي معانا هنشوى لحمه و نغنى و نتفرج على النجوم و نلعب و ننبسط
مازن / ماشي بس مره تانيه
جابر / و ليه مش المرادى
مازن / عشان انا وعدت احلام اقول لها رايي فى الفستان بتاعها و هينادونى لما تخلص
جابر / انت بتحب احلام اوى يا مازن
مازن يهز راسه اه بحماس
جابر / هى تتحب بس تعرف مين كمان يتحب ؟
مازن يبتسم بفضول
جابر / ابوك... الراجل ده ما حصلش تعرف انا اول مره اشوف واحد بيعرف يعمل الحاجات دى كلها
مازن / ما انا بحبه
جابر / امال مش بتقعد معاه ليه يعني هو قاعد فى المضيفه دلوقت ليه قعدت هنا لوحدك و ما روحتلوش
مازن يهز كتفه
جابر / على فكره انا اخو احلام يعنى زيها بالظبط
مازن يضحك
جابر / انت فى حد مننا ضايقك ؟
مازن يهز راسه لا
جابر / طب ايه رايك نلعب لعبه
مازن يهز راسه اه بحماس
جابر / تحب تلعب حاجه معينه و لا اختار لك انا لعبه على زوقى
مازن / انت اختار
جابر / بتعرف تجرى ؟
مازن / بسرعه الصاروخ
جابر / يا خبر ابيض الصاروخ مره واحده لا دا احنا نجرب بقي
مازن يقوم يقف جابر يقف
مازن / هنلف حوالين السرايا و اللى يوصل هنا الاول هو الكسبان ايه رايك
مازن / انا اللى هكسب
جابر / بتحلم يا حبيبي انا اللى هكسب
مازن / لا انا و هتشوف
جابر / جاهز يعني
مازن / جاهز
جابر / واحد ... اتنين ... تلاته ... اجرى
مازن يجرى يقابل نجاه خارجه من السرايا تشوفه تشيله جابر يحصله
مازن / شلتيني ليه كنت هكسب
نجاه / ايه ده كان فى سبق ... انا اسفه بس احلام بعتتنى ادور عليك عشان تقولها رايك فى الفستان قبل ما تقلعه
مازن / استناني هرجع لك
جابر / ما تتاخرش
مازن / صاروخ
نجاه تنزل مازن الارض يدخل السرايا يجرى
جابر / الواد ده ما بيعرفش يندمج
نجاه / و ان احلام تقفل عليهم الاوضه طول الوقت اى كان اللى بيعملوه مش صح اوى برده
جابر / بس على الاقل عارفه تحتويه
نجاه / انا شخصيا ما بحبش العيل الانطوائى اللى يفضل لازقلى عاوزه ابنى جرئ كدا يستكشف العالم و يقلب الدنيا فوقانى تحتانى و يتعلم حاجات جديده و يتعامل مع الناس ما يخافش و لا يتكسف كدا يعنى
جابر / باذن الله بس خدى بالك النوع ده متعب اوى
نجاه / و هو احنا كنا ساهلين ... ربنا يدى ابويا و أمى الصحه و طوله العمر ياما شافوا منى
جابر / و لسه بيشوفوا
نجاه / كدا !!
جابر / ايه هتنكرى
نجاه / طب اكدب عليا و لا جاملني و لا اعمل اى حاجه مش فى وشي اوى كدا
جابر / المهم قوليلى الفستان حلو
نجاه / جدا بس هى مش متحمسه خالص ... مش حساها فرحانه
جابر / انا ما بحبش الجواز بالطريقه دى اصلا خصوصا بالسرعه دى ... بس ... حاسس انه خير
نجاه / هو خير بإذن الله ما تقلقش
جابر يهز راسه
نجاه / هو احنا هنسافر معاها اسكندريه ؟
جابر يهز راسه لا
نجاه / هتسافر لوحدها ؟!
جابر / امى و امين و جماعته هيروحوا معاها
نجاه / و انت
جابر يهز راسه لا
نجاه / بتهزر
جابر / انتى عارفه احنا داخلين على ايه صح
نجاه تتنهد
جابر / توقيت الفرح فى نفس يوم الافتتاح ... بصراحه خايف مش مرتاح
نجاه / احنا كتير يا جابر اللهم بارك يعني ما تقلقش
جابر / و هم ؟! قليلين ... دى جايه برجليها وسطينا يعني اكيد مش جايه بايدها فاضيه
نجاه/ و يونس كمان مش هنا
جابر / و هيفرق فى ايه يعني سي يونس
نجاه / ما اعتقدش انها ممكن تاذيه دا غير انه يعرف عنها كتير يعني اكيد كان هيساعد فى حاجه
جابر / احب افكرك انه فى صفها هى
نجاه / مش حقيقي
جابر / يا سلام
نجاه / هى غاليه عنده لأنها اخته بس هو فى صفنا احنا دلوقت
جابر / انتى جايبه البراءه دى منين
نجاه / انا عرفاه كويس
.........................