الكبيره ٢ بقلم / لولو_محمد

الحلقه ١٢١

(((((( الكبيره ٢))))))
#لولو_محمد
الحلقه ١٢١
جابر / ما هواش جوزها ... او على الاقل فى بيتهم مش هنا
ام احلام / جوزها غصب عن عين امك و افتح بقك بحرف كمان عشان انت شكلك جاى و ناويها و انا خلقى ضيق و انت عارف قلبتى كويس و لا فاكر انك كبرت عليا ياواد انت
مازن يفتح الباب نجاه تجرى تلحقه يكون دخل و قعد فى حجر قاسم
مازن / ستى بتسأل عليكوا تحت
قاسم يبص لأحلام تمسح وشها و تهز راسها
قاسم / قولها نازلين اهو
نجاه / تحبى اساعدك فى مكياجك
قاسم / هى قمر اللهم بارك فى اى حاجه اهو
احلام تقوم تبص فى المرايه و تبدا تعدل مكياجها
قاسم / طب هسبق انا و مازن و ابقي حصلينا تمام
نجاه / مش هتاخد ثوانى خدها فى ايدك احسن
قاسم / عيونى انا واقف على الباب اهو
قاسم ياخد مازن و يطلعوا بره يبص لجابر هياكله و كاتم جواه جابر يبص الناحيه التانيه و ينزل
قاسم / هو فى حاجه ؟!
ام احلام / شكل فى حوار فى البلد الرجاله نصهم مشي اصلا من تحت
قاسم / خير ايه اللى حصل ؟!
.......................
ام احلام / مفيش حاجه يا حبيبي العادى عندنا خليك انت فى فرحك
قاسم / ازاى يعني
قاسم يطلع الموبايل و يتصل
.........................
فى المستشفي
بياتريس / دى امنا على فكره
اكرم / كدا احسن للكل
بياتريس / للكل و لا ليك انت
اكرم / اتكلمى بأدب مع ابوكى عيب كدا
بياتريس/ و لما حضرتك بعتنا عشان واحده تانيه و تروح تنبسط معاها و تسيبنا نغرق ما كانش عيب
اكرم / و انتوا لما تعرفوا اختكوا على حاتم و انتوا عارفينه و عارفين جنانه و قرفه ما كانش عيب
بياتريس / كنا بنحاول نصلح اللى حضرتك بوظته
اكرم / انا ابن كلب انتوا تبقوا زيي يعني ؟!
بياتريس/ على فكره اصلا احنا كنا فاكرين حاتم اتعالج
اكرم / بجد !! طب و الله طمنتيني انكوا ما كنتوش بتحاولوا تخلصوا من اختكم
بياتريس / هو من باب الفضول مش اكتر ... حضرتك رجعت ليه
اكرم / عشانك ... رجعت لما عرفت انك مش فى ايدين امينه رجعت اللحق المركب قبل ما تغرق ... انا طول عمرى حاسس ان وجودى وسطكم ما لوش لازمه ما حدش شايفني و لا حد حاسس بيا عايش وسط اهلى وحيد ما كنتش متخيل انكوا هتغرقوا فى القرف ده من غيرى
بياتريس/ بجد !! طب الحمد لله انك عرفت قد ايه الاب مهم بس يا ريت حضرتك كمان تفتكر ان الام مهمه
اكرم / الام اللى ترمى بنتها ما تبقاش ام
صوفيا تدخل
صوفيا / ايه اللى جد  ..  مهره طول عمرها بعيد ما جاتش وسطينا الا لما الداده بتاعتها ماتت ايه اللى جد يعني
اكرم / دا انتى اللى روحتى جبتيها
صوفيا / كنت غلطانه كنت يائسه و بخبط فى الحيطان بحاول ألم البيت اللى ضاع من بعدك كنت وحيده و تايهه
اكرم / و هى ما اتاخرتش عنك
صوفيا / صح بدليل انها حاولت تسرق حبيبي
اكرم / حبيب مين يا بنت انتى هتكدبى الكدبه و تصدقيها حبيب مين
صوفيا/ عمران ... هى أكدت لى ان ما فيش حاجه بينهم و اول ما قولت لها انى معجبه بيه احلو فى عنينا و طمعت فيه و بقت كل شويه تروح تبات عنده و تدلع عليه و تتمسكن له
اكرم / يخربيت البجاحه
صوفيا/ دا اللى حصل و اسأل باتى
اكرم / من غير ما اسأل انا عارف مهره كويس
صوفيا / عارفها اكتر من بناتك ؟!
اكرم / ما هو عشان انتوا بناتى عارفكوا برده كويس ... و اى كان دا مش مبرر للى حصل
بياتريس / و اى كان مفيش مبرر لخروج ماما من حياتنا
اكرم / دا قراركوا يعنى ؟!
صوفيا/ طبعا ... حضرتك زى ما بعتنا مره ممكن تبيعنا تانى
اكرم / حلو اوى ... خدوا بقي المفيد ... انا الست اللى جوه دى مش مراتى مطلقها و مش ناوى ارجع ليها تانى و مديها كل حقوقها عاوزين تعيشوا معاها براحتكوا هيوصل ليكوا مصروف كل اول شهر يكفيكوا ... يكفيكوا مش اكتر ... الميغه اللى كنتوا عايشين فيها من غير حساب و الدلع اللى ما لوش اول من أخر هتنسوه ... هشوف لى بيت تانى اعيش فيه وقت ما تحبوا دا لو حبيتوا تقدروا تنورونى ... و اه لو حالكوا فضل مش عاجبنى المصروف اللى لاوين بوزكوا عليه قدامى ده هيتقطع هو كمان
بياتريس / هو حضرتك بتمن علينا بحقوقنا
اكرم / حقوقكوا !!
صوفيا / طبعا حضرتك ابونا حضرتك ملزم تصرف علينا
اكرم / لما ابقي ابوكوا ابقي اصرف .. لما تسمعوا كلامى اصرف ... لما تبقوا متربين اصرف انما ايه فاكرين ايه هتورثونى بالحياه و لا ايه
بياتريس تبص لصوفيا
اكرم / هبقي ابعت ليكوا عنوانى الجديد... و القرار ليكوا
اكرم يمشي
بياتريس / انا بجد مش مصدقه الجنان ده
صوفيا / اهدى اهدى انتى عرفاه كويس بيقول اى كلام و هو عصبى و لما يهدى هيرجع فى كلامه و هنراضيه باى كلام
بياتريس/ الكلام ده كان زمان دلوقت بقي فى واحده تانيه بتقومه علينا و تكرهه فينا
صوفيا / طب هنعمل ايه
بياتريس / لازم نوصل ليها بسرعه و نعرف هى مين و نشوف هنتعامل معاها ازاى
صوفيا / انتى ما تعرفيش حاجه عن حاتم ؟
بياتريس/ ما تبطلي هبل بقي و كفايا اللى جرا من ورا أفكارك دى
صوفيا / يا بنتى مش قصدى حاجه انا بس عاوزه اعرف جرا له ايه
بياتريس/ ولع خلينا فى البلوه بتاعتنا
صوفيا / هدخل اطمن على ماما
بياتريس / عديتي على الحسابات؟
صوفيا / اه بابا دفع الفلوس كلها و ساب مبلغ تحت الحساب ... عشان تتأكدي انه بيقول اى كلام بس
بياتريس تهز راسها
........................
فى اوضه حاتم
حاتم قاعد و ابوه و رجاله كتير
حاتم / كفايا !! ما بتعرفوش قولوا ما بنتزفتش مش كل واحد يجرب فيا شويه انا اللى بتكهرب هنا
ابو حاتم / اهدى يا حاتم
حاتم / مش هتنيل ... البتاعه دى مهره اللى جيباهالى ... اكيد عمران الكلب هو اللى
حاتم يتكهرب
حاتم / اييييه !!!!
حاتم ياخد نفس و يحاول يهدى نفسه
حاتم / اطلعوا بره كلكوا ... قولت اطلعوا بره انتوا ايه ما بتفهموش بره
ابو حاتم / فى ايه يا حاتم مالك
حاتم / انتوا لسه واقفين قولت بره
الرجاله كلهم يطلعوا بره
حاتم / انا متاكد ان عمران الكلب هو اللى
حاتم يتكهرب يقعد يضحك
ابو حاتم / انت كويس
حاتم / جدا ... كويس جدا
حاتم يفضل يضحك و ابوه واقف مستغرب
حاتم / تمام يا بابا انا بقيت كويس خلاص عاوز انام و ارتاح شويه انا فهمت كل حاجه
ابو حاتم / طب فهمنى
حاتم / لما اصحى من النوم هفهم حضرتك كل حاجه بس انا دلوقت محتاج ارتاح
ابو حاتم / تمام ... تصبح على خير
حاتم / و حضرتك من اهله
ابو حاتم يطلع بره و حاتم ينام فى السرير و هو بيتفرج على الاسوره و مبتسم
.........................
فى شقه احلام
احلام تدخل شقه كبيره دورين بسلم داخلى مفروشه من كله و وراها قاسم و مامتها و امين و اتنين رجاله يحطوا صينيه عشا و ينزلوا و احلام بتتكلم مع مامتها فى جنب و امين بيتكلم مع قاسم فى جنب
قاسم / ما يكونش عندك فكر فى عنيا طبعا
امين / تسلم يا ابن الأصول يلا يا ست الكل ؟ ناقصك حاجه يا ست البنات
احلام / تسلم
امين يحضنها
امين / ربنا يهدى سرك و يسعدك لو عوزتى اى حاجه فى اى وقت اديني رنه بس
قاسم / احم
امين / جوزها مش جوزها انا هفضل اخوها و ابوها
قاسم / على راسي
احلام تبتسم
ام احلام / يلا فتك بالعافيه هكلمك بكره على العصر كدا اطمن عليكي قبل ما اجى أصبح عليكي ... كلو كويس يا ولاد ... خد بالك منها هاه
قاسم / فى عنيا و الله ما تقلقوش
ام احلام تمسك ايد احلام و تطبطب عليها و تمشي و امين وراها قاسم يقفل الباب بالمفتاح احلام تروح تكشف الاكل
احلام / مين هياكل كل ده ... انا اصلا مش باكل بالليل.. انا هروح اغير و اجى اعينه
احلام تروح خطوتين ناحيه الاوضه و ترجع
احلام / تحب اقطع لك منه حاجه و احط لك تتعشي الاول
قاسم / لا مش جعان دلوقت هبقي اكل بعدين ... تعالى خلينا نغير عشان عاوزين نصلى ركعتين كدا سوا نبدأ بيهم حياتنا
احلام / تمام
احلام تروح ناحيه الاوضه و قاسم وراها تبص و تتفاجئ
احلام / ايه ده !! انت رايح فين ؟
قاسم يبتسم
قاسم / هجيب غيارى
احلام / اه .. تمام 
احلام تدخل و قاسم وراها يفتح الدولاب و هى واقفه متوتره يحس بيها يبص لها تبتسم بحرج ياخد الغيار
قاسم/ انا هسيبك تاخدى راحتك و هروح اغير فى اوضه تانيه
احلام / تمام
قاسم يطلع بره احلام تجرى تقفل الباب بالمفتاح قاسم يرفع حاجبه
قاسم / ما كانش فى داعى على فكره
احلام / معلش عاده عندى ... ثوانى ... لا ثوانى بجد
قاسم / ضيعتى المفتاح و لا ايه
احلام / لا لا استنى بس ... يووووه
قاسم / هو ايه اللى بيحصل جوه
احلام / ثوانى بقولك
قاسم / انا بدأت اقلق على فكره
احلام تفتح الباب و هى بتنفخ
احلام / ضهر الفستان كله زراير و مش طايله نصهم 
قاسم يضحك
قاسم / طب لفى اساعدك
احلام تلف يفك الزراير و قبل ما يفك اخر زرار احلام تسحب نفسها
احلام / انا هكمل شكرا
قاسم / فاضل واحد خليني افكه
احلام تبص له
قاسم / احلام انتى خايفه منى ؟!
احلام / لا ... ايه السؤال ده !! اكيد لا ... انا بس الجو كله بالنسبالى جديد
قاسم / طبيعي ما انتى ما بتتجوزيش كل يوم يعني بس على الاقل عندك فكره عن الدنيا و لا انتى ما فيش حد كلمك فى اى حاجه و لا
احلام / الموضوع مش كدا
قاسم / احب اسمع الموضوع
احلام / احنا مش واخدين على بعض يعني انا عارفه و الله انك بقيت جوزى بس الموضوع ليه رهبه برده
قاسم / رهبه !!
احلام / بص انت مش هتفهم اللى جوايا انا بس ... خلينا نعدى النهرده لحد ما ناخد على بعض شويه ممكن
قاسم / ممكن
احلام / بجد !!
قاسم / ايوه عادى وقت ما تبقي جاهزه
احلام / انت بتتكلم جد و لا بتاخدنى على قد عقلى
قاسم / انا كدا كدا ما كنتش هتهجم عليكي مثلا و لا هجبرك على حاجه الدنيا ابسط من كدا و ما دام انتى متوتره اوى كدا فانا اكيد كنت هستنى تهدى شويه بس يمكن كنت أحاول اهديكي بطريقه او بغيرها يعني كنت هحاول بس لو دى رغبتك عادى مصلحه كدا كدا احنا الاتنين تعبانين على أخرنا يعني فليه لا ما نستني .. اروح اغير و ننام و نصحى الصبح ناخد اليوم من أوله على رواقه
احلام/ تمام
قاسم / بس دا مش معناه انك هتقفلى الباب عليكي بالمفتاح احنا هنام فى اوضه واحده و سرير واحد ما انا اسف يعني هناخد على بعض ازاى و احنا كل واحد مقفول عليه بابه يعني
احلام / ايوه بس انا مش واخده ان حد ينام جنبى
قاسم / لا فى دى مضطر اجى عليكي و اقول لك لازم تاخدى لان من النهرده و طالع هنام جنب بعض فكل ما اخدتى على الموضوع بدرى كل ما ارتحتى بدرى
احلام تهز راسها
قاسم / لفى بقي .. خلينى افك اخر زرار
احلام تلف قاسم يفكه ترجع مكانها بسرعه قاسم يتنهد احلام تتنهد و تيجي تقفل الباب قاسم يحط رجله و يمد ايده ياخد المفتاح
احلام / ما كنتش هقفل بالمفتاح على فكره
قاسم / يبقي ما عندكيش مانع اخليه معايا
قاسم يغمز لها تتخض و تحاول تلم نفسها قاسم يروح الاوضه التانيه و يبدأ يقلع من غير ما يقفل الباب احلام تقفل الباب
..............................
فى المستشفي
عباده / دا انا لو وقعت تحت ايدي هولع فيها
مختار / اهدى دى اقل الخسائر كنا متوقعين اكتر بكتير و انت عارف
عباده / انت مستوعب الرقم و لا انت ايه وضعك ... دى ما وقعش منها دكر واحد ما خسرتش راجل واحد
مختار / و احنا الحمد لله ما خسرناش و لا راجل و كلها إصابات هتتعالج باذن الله و هيرجعوا يقفوا على رجليهم تانى و ان كانت على الخساير فعلى قد الطلق اللى خسرناه خسرت هى كلاب مستورده متدربه و الحمد لله ان لا كان فى اطفال و لا حريم فى الشوارع
عباده / و ان كانوا النهرده ملمومين فى الفرح تضمن منين بكره لما تلاقي السيرك فاضي ما تكررهاش
مختار / قدامنا وقت من هنا لبكره نلاقي حل
عباده / انت جايب التناحه دى منين انت عارف احنا الساعه كام انت مستوعب احنا واقع مننا رجاله قد ايه و باقي عندنا رجاله قد ايه
مختار / ممكن تهدى
عباده / طب قول لى انت اعملها ازاى و انا اهدى قولى انت هادى ازاى و انا اهدى
مختار / روح ارتاح و اوعدك انها عندى ... هتصحى باذن الله تلاقيني لقيت ليه حل
عباده / اما نشوف اخرتها ... هتروح له يساعدك صح
مختار/ لا هروح ابص على شاكر فى الشيلتر
عباده / تفتكر الكلاب دى هيقدر يطلع منهم بحاجه؟
مختار / ما اعرفش هروح و اتكلم معاه قبل اى قرار
عباده / طب انا هاجى معاك
مختار / تعال يا سيدي مع انى عامل عليك
عباده / ما تعملش
مختار / مش هعمل امشي
مختار و عباده يمشوا
......................
قدام بيت جابر
جابر / انتى عارفه الساعه كام ؟
نجاه / مفيش وقت يا جابر اللى حصل ده ممكن يحصل تانى فى اى وقت
جابر / و البيه بقي ممكن يفيدك بايه يعني ما هو قايل انه مش هيدخل و ماكد قد ايه هى غاليه عنده
نجاه / انا كان ممكن اكلمه من موبايلي على فكره
جابر / حلو جيالى انا بقي ليه بترشقيني معاكى فى القرف ليه ... عشان لما ابوكى يجى يعاقبك اشيلها عنك صح ؟
نجاه / هو بغض النظر انها مش اول مره تشيل عنى و اشيل عنك بس المرادى عشان انا محتاجاك معايا فى الموضوع
جابر / دا على اساس انى هكون محرم يعنى ؟
نجاه / لا على اساس انك بتحبنى و الكل عارف
صمت ثوانى و توتر من جابر
نجاه / اكيد مش هتقبل اى تجاوز منى او منه فى وجودك يعني
جابر / لا و هو عامل لامى حساب اوى
نجاه / انا بعمل ... بعمل لخاطرك الف حساب على فكره
جابر / مش مصدقك
نجاه / بستغلك يعني ؟! بضحك عليك ؟! بشتغلك ؟! صدقنى مفيش حل تانى اسرع من ده
جابر / خلاص انا هكلمه و اشوف هيقول ايه و ابلغك
نجاه / انت مش واثق فيا صح ؟!
جابر / لا مش واثق فيه هو
نجاه / انا مش هتحايل عليك على فكره
جابر / خلاص روحى نفذى اللى فى دماغك بعيد عنى
نجاه / و ان جرالى حاجه فى السكه هتنام مبسوط يعني
جابر / دا على اساس انك هتقدرى تخرجى من باب السرايا ؟!
نجاه / مستقل بيا اوى يا ابن عمى
جابر يربع
نجاه / شوف و اتعلم
نجاه تبص ناحيه السور و تبص لجابر و تشاور علي عنيها بص لى جابر يبتسم نجاه تجرى تنط تمسك فى طرف السور جابر يتفاجئ نجاه تسحب نفسها لفوق و تقعد على السور جابر يبتسم و يسقف
نجاه / اتعلمتها اخيرا
جابر / كملى لسه فاضل الناحيه التانيه
نجاه / ما تبقاش رخم بقي انت عارف انى عمرى ما هعمل كدا
جابر / و انا قولت اللى عندى ... تعالى هنا
نجاه تتنهد و تلف جسمها بره السور
جابر / نجاه قولت تعالى هنا
نجاه تنط جابر يجرى ينط يمسك فى السور و يرفع نفسه و يبص عليها واقفه مستنياه و مبتسمه
نجاه / قلود اوى ما كنت لفيت من الباب يعني
جابر / انا لو حطيت ايدي عليكى هنفخك
نجاه تطلع مفتاح عربيه جابر من جيبها و تتك العربيه تتفتح تروح تركب جابر واقف مكانه تكلكس واقف مكانه نجاه تنزل
نجاه / ما انا ما بعرفش اسوق هاخدها مشى تضمن منين ما يطلعش عليا كلبين تلاته من المستوردين دول
جابر / نفس اللى يضمن لك انها مش هتقدر تطلعهم و انتى وسطينا
نجاه / بقي كدا !! تمام خلينا نشوف
نجاه تمشي و هى بتدنجل و جابر بيتابعها لحد ما تبدا تبعد ما بتبصش وراها يتنهد و يركب و يسوق يروح لها تركب
نجاه / كنت متأكده انى مش ههون عليك امشي المسافه دى كلها لوحدى
جابر / كلمه كمان و هغير رايي
نجاه تقفل بقها و تبص الناحيه التانيه
...........................
فى اوضه احلام
قاسم نايم على جنبه و حاضن المخده و مدي لأحلام ضهره اللى عماله تتقلب و تفرك و مش عارفه تنام قاسم يتقلب و يبص لها تلف و تدى له ضهرها يروح يحضنها من ضهرها تحاول تقوم يمنعها
قاسم / انا دلوقت بس فهمت ليه انتى و مازن حبيتوا بعض
احلام / ليه ؟!
قاسم / عشان انتوا الاتنين بتفركوا على ما تناموا ... بس هو لما بحضنه بينام
احلام / على فكره انا نادرا ما بغير سريرى و ساعتها برده مش بنام الا لو مرهقه جدا و بيبقي نوم تخاطيف كدا و كنت بقول انام فى اوضه تانيه عشان اسيبك تنام مش اكتر
قاسم / اه بس احنا مش هينفع ننام فى سريرك هناك تانى هننام هنا شويه و فى اوضتنا فى اسكندريه شويه ايه هتعيشي عمرك كله من غير نوم ؟!
احلام / لا هتعود بس هاخد وقت
قاسم/ متفقين ... يبقي نبدأ الوقت ده من دلوقت ... و بالنسبالى انا مش مضايق خالص من فركك ... و لا من حضنك
احلام / بس انت كدا مش هتعرف تنام
قاسم يضحك
قاسم/ هنام ما تقلقيش
احلام تهز راسها
احلام / هو انت مرتاح كدا ؟
قاسم / بصراحه لا
احلام / طب ايه اللى جابرك ما ...
قاسم / انتى منعانى
احلام / انا !!
قاسم / يعني عريس جديد يوم دخلته نايم ناشف كدا تفتكرى هيكون مرتاح ازاى يعني ... مش بتقولوا عليها نومه العازب و لا ايه ؟!
احلام / ما اعرفش الكلام ده
قاسم / امال تعرفى ايه ؟
احلام / ما اعرفش حاجه
قاسم / خالص !!! ما تعرفيش حاجه خالص
احلام / هو انت مش هتنام و لا ايه ؟
قاسم / هساعدك تنامى الاول عشان اعرف انام
احلام تلف تبص له باستغراب يبوسها
……………………..
فى شقه جوزيف
مختار يفتح الباب يلاقى جابر يستغرب
جابر / انا مخطوف
جابر يوسع نجاه تبان
مختار / ايه اللى جابك
جابر / عاوزه تقابل امايا
مختار / دا ايه التهريج ده بقي ان شاء الله ... انتى عارفه كويس ابوكى هيعمل ايه لما يعرف انك هنا صح ؟!
جوزيف / هتفضل مزنبهم على الباب كدا كتير؟! تعالى
مختار يبص له
مختار/ نجاه عاوزه تقابل امايا
جوزيف / أسهل حاجه تمشي لوحدها فى اى مكان و امايا هتظهر لها لما تطمن
جابر / و احنا هنجازف بحاجه زى دى يعني
جوزيف / ما هى كمان مش هتجازف
نجاه لجو / تعال معايا
جابر / نعم !!
جوزيف / تؤمرى بس
مختار / نجاه !!
نجاه / هى طلبت من عمران تشوفني ... يمكن نلاقى حل ينهى كل ده
جابر / مفيش حل … اساليه ... فى حل ؟
جوزيف يهز راسه لا
جابر / شوفتى
نجاه / ابقي حاولت
مختار / ممكن تتاذى
جوزيف / مش هسمح بده
مختار / ابوكى مش هيوافق لا على انك تروحى لوحدك و لا ان يونس يبقي معاكى
نجاه / انا مش هبقي اغلى من كل الناس دى
جوزيف / مفيش مقارنه اصلا
نجاه / سبنى احاول
جابر / يبقي اجى معاكوا
نجاه تبص لجوزيف
جوزيف / ما اقدرش اضمن سلامته
جابر / و انا مش هقف اتفرج عليها و هى بترمى نفسها فى النار موتى اهون
نجاه / جابر
جابر / كفايا
نجاه / دى كانت بلان بى بالنسبالها
جوزيف / واحده منهم
الكل يبص له
جوزيف / و اقسم بالله ما اعرف ولا واحده منهم بس دا البروتوكول لازم يكون ليك اكتر من خطه لكل الاحتمالات يعني اكيد كان فى بلان سي و دى لحد الزى كمان
جابر / و انت بقي بحكم خبرتك تفتكر فرصه نجاه انها تنفذ اللى فى دماغها كام فى الميه
جوزيف / انا ما اعرفش اللى فى دماغها و مش مقتنع انها رايحه للكلام بس
جوزيف يبص لنجاه بتحاول تدارى
جوزيف / بس امايا مش هتاذيها ... بس لو لا قدر الله يعني حصل اى حاجه لامايا ... الجيش اللى معاها مش هيسمي عليكي
نجاه / كنت فاكره حياتى مهمه للمجلس عشان الخطه اياها
جوزيف / كان جزء منها خطفك على فكره افتكرى ده كويس
نجاه/ و امايا مش هتحاول تخطفني
مختار / انتوا بتتكلموا فى ايه اصلا بتجادلوا فى ايه ... البيضه و لا الفرخه ... ابوكى لازم يعرف
جرس الباب يضرب جابر اقرب واحد يفتح عباده عنيه بتطق شرار
………………………..
فى الشيلتر
شاكر يخرج من اوضه عمليات يلاقي ناصر واقف شاكر يروح يغسل ايديه
ناصر / انت بتعمل كدا ليه ؟ هتستفيد ايه يعني لما تضيع وقتك و صحتك مع الكلاب دول
شاكر / روح
ناصر / و هى الروح دى سمت علينا
شاكر / دول كلاب ما يفهموش ... ما ينفعش تلوم الكلب انه عضك فى لحظه خوف او تهديد
ناصر / خوف ايه و تهديد ايه ؟ دول كلاب يا شاكر
شاكر / بالنسبالي أرواح
ناصر / ارواح شريره
شاكر يضحك
ناصر / انا عاوز سم قوى ابدره فى البلد يبيد ام الكلاب دول كلهم
شاكر / انت قد الجريمه دى يا ناصر هتقول لربنا ايه قتلت حيوانات كانت ماشيه فى أرضك بتسبح بحمدك
ناصر / باميط الاذى عن الطريق
شاكر / دا اللى حبست قطه دخلت النار و اللى سقى الكلب دخل الجنه
ناصر / انت فاهم قصدى الكلاب دى خطر علينا
شاكر / و انا همنعك تنفذ القرف ده حتى لو وقفت قصادك بالقوه فاهم و لا لا انا خصيمك لو عملت كدا
ناصر / و انا و كل الناس اللى اتصابت خصيمك يا شاكر انك فضلت الكلاب علينا
شاكر / ما حصلش الكلاب دى لما تخف هعمل ليهم اعاده تاهيل و هيبقوا كويسين
ناصر / انت عايش فى الجبل بقالك فتره فشكلك نسيت الدنيا بتمشي ازاى
شاكر / انا مرهق و مش شايف قدامى هدخل انام ساعتين عشان ورايا الصبح فيلم تانى عن اذنك
شاكر يدخل اوضه و يقفل الباب و ناصر بيفرك
……………………
فى عربيه عباده
عباده قاعد و نجاه قاعده جنبه فى صمت هو باصص قدامه و هى باصه عليه و مختار و جابر و جوزيف واقفين بعيد بس متابعين باهتمام
نجاه/ حضرتك ما ردتش عليا
عباده/ و هو مهم ؟
نجاه / اكيد
عباده / يبقي كنتى جيتي ليا الاول
نجاه / اسفه
عباده/ لا خلاص انا خدت على كدا ... مش الأولى... و غالبا مش هتكون الاخيره
نجاه / حضرتك عارف انت بالنسبالي ايه
عباده يبص لها و يبتسم باستهزاء
عباده / لا ما انا عارف ... عارف كويس انا بالنسبالك ايه ... اقنعتيه ازاى يجيبك لهنا ... اقنعتيه ازاى
نجاه / قولت له ثق فيا
عباده / لا مقنعه ... حقيقي مقنعه ... دا انا اقتنعت
نجاه / بابا انا اى حاجه بعملها بيكون وراها يعني ... ببقي عاوزه اساعد مش اكتر
عباده / ما تساعديش تاني ... احنا مش واقفين عليكي يا ماما ... لما الرجاله دى كلها تموت ابقي ادخلى
نجاه / ما هو ده اللى راعبنى
عباده يبص لها
نجاه / انا ما اقدرش اعيش من غير اى واحد فيكوا... حياتنا صعبه اوى ... طول الوقت بنحاول ناهل نفسنا ان ... إن ممكن دى تكون اخر مره ... كل مره تخرج فيها من البيت ... كل مره يجي لك تليفون ... كل مره تتأخر ... اكيد فى حل اكيد فى بديل
عباده / عوزانى اموت على سريرى يعني
نجاه / زى كل الناس ايه المشكله ما الرسول صلى الله عليه وسلم مات على سريره عادى
عباده / بعد ما أدى رسالته كامله ... و بعدين بتقارنيني بمين ... احنا فين يا ماما و هو فين ... هو انا ما اتمناش ؟!! لا اتمنى على فكره يا ريتني ربعه ... بس هى ما بتتحسبش كدا ... انا شيلت الشيله دى بمزاجى ... حاربت عشانها ... اه فى حاجات كتير اوى جدت عن ايام ما كنت بسعى... بس وقت قبل ما تجينى على طول برده كان فى حاجات جديده جدت على ناصر الله يرحمه ... و كمل لآخر نفس فيه... و جهزنا عشان نكمل بعده ... و ده اللى انا بعمله
نجاه / و ده اللى انا كمان بعمله
عباده / بايه !! بده
عباده يشاور على يونس نجاه تبص
نجاه / انا كلمتها فى الموضوع ده قبل كدا و وقتها قولنا خلاص يعني كانت فكره بس ... بس وقتها كنت متردده شويه يعني ... بس هى عايزه تقابلنى ... خلينا نشوف نسمع ما يمكن ... ما يمكن زى يونس... ما يمكن عايزه فرصه
عباده / تجيني الاول يا نجاه ... تكبريني ... انا اللى اجيبك ... أنا اللى اجى معاكى ... مش تنطى من فوق السور
نجاه / كنا بنلعب و الله
عباده يضحك باستهزاء
نجاه/ و الله حتى اسأله
عباده / عارفه أصعب حاجه ايه ؟
نجاه تبص فى الارض
عباده / انى مش عارف اعاقبه بايه
نجاه/ بس هو ما عملش حاجه
عباده / ما هو ده السبب انى مش عارف اعاقبه ... انه كل اللى بيعمله بسببك انتى ... لا يا بابا لازم تاخد موقف عشان جابر جالى الاوضه يخبط عشان يديني بطاطس... انما اقنع جابر ننط من السور و نيجي للشخص اللى كنت واضح جدا معاكى انك تبعدي عنه و قايل لك بالحرف لو لسانك خاطب لسانه لا انتى بنتى و لا اعرفك... انا مش عارف اقول لك ايه
نجاه / انا حاولت ابعد و الله حاولت على قد ما قدرت انا حتى رفضت اروح أماكن كتير عشان ما نتقابلش
عباده / و ايه اللى اتغير
نجاه / ما اعرفش ... ما عنديش اجابه
عباده يبتسم بسخريه
.............................