(((((( الكبيره ٢ ))))))
#لولو _محمد
الحلقه ٧٨
نجاه/ انت بتقولى انا الكلام ده انا بنتك يابا
عباده / ما عشان بنتى خايف عليكي و عشان هو ابن رشيد انا بقول الكلام ده
نجاه ما تقدرش تكتم ضحكتها
عباده / فرقع لوز مستفز ... نسخه من ابوه
عباده يروح يبص من الشباك و هو بيغلى نجاه تحط ايدها على كتفه بدلع
نجاه / يعني انا قدامى جابر بطوله و عرضه و ما حبتوش هحب يونس يعني
عباده/ جابر مش حلنجى و لا بيعرف يقول الكلام المايع بتاع العيال دول
نجاه / و مين قالك الكلام ده بقي
عباده يبص لنجاه
نجاه / انا مشكلتى مع جابر انه ما بيبطلش قواله يابا
عباده / برده مفيش سفر و اقطعى زن بقي انا تعبت
عباده يروح يقعد على الكرسي يبص على نجاه بصاله بدلال يبص الناحيه التانيه تروح تقعد على ايد الكرسي و تحضنه
عباده / برده قولت لا
نجاه ما بتتحركش
عباده / لا يعني لا يعني لا
……………………….
فى الجنينه
جابر / يعني ايه وافق يعني ايه وافق
ناصر / ما انت عارف نجاه كدا كدا بتعمل بس اللى هى عوزاه
جابر / ايوه بس
ناصر / يا عم انت مستغرب ليه هو ابويا نفسه فين دلوقت
جابر / راحله مش كدا؟! راحله و ما سألش عنى ... مش عارف ليه المرادى لا مستغرب و لا مصدوم زى كل مره
ناصر / صدقنى مش هنرتاح كلنا الا اما نخلص من الكلب ده و اللى تبعه
جابر / انا هروح اجهز شنطتي ما تتحركش من غيرى ربع ساعه بالكتير و ارجعلك
ناصر / خد وقتك
جابر يروح بيته عمران يطلع من السرايا شايل شنطه ناصر يجرى ياخدها منه
ناصر / ما ناديتنيش ليه يا ابنى انزلها بدالك
عمران / ما كانتش تقيله ... ايه الجماعه جهزوا و لا لسه
ناصر/ اه جاهزين من امبارح
عمران يهز راسه
ناصر / هو انتوا ناويين على ايه لما ترجعوا
عمران / نون الجماعه دى عايده على مين بالظبط و ان شاء الله مش هيكون اللى فى بالى
ناصر / هى اللى فى بالك مفيش غيرها
عمران/ ما انا برده مش فاهم انهى جزء من ان كل ده لعبه و خلصت ما حدش فيكوا فاهمها
ناصر / عشان الجواز مش لعبه يا حبيب اخوك انت راجع وسط اهلها اخوها و ابوها و جوز امها كلهم مستنينك و مستنينها ماشي احنا عارفين انها لعبه اهلها عارفين؟! انت بالنسبالك اللعبه خلصت ... الناس بقي موقعها ايه من الإعراب فى الجمله دى ... هي ... هتتعامل على انهى اساس ... هتقف قدام الناس تقولهم ايه ؟! انا مطلقه !! اتجوزت سنه من ورا اهلى و اول ما عرفوا اطلقت و راجعه اعيش لوحدى ... فكر عبقري بصراحه
عمران / خلصت ؟!
ناصر / يا ابنى انا لحد دلوقت مش عارف اقول ايه لنور بخصوص لعبتك دى ... و الجميل انكوا حطيتوها فى كل الصور اهل البلد و أهل نور كل الدنيا بتقول عليها مراه عمران كل البلد عرفاها على انها كدا
عمران / انا ما عملتش اى حاجه و لا اخترت اى حاجه عاوز تسأل كل الاسئله دى اسالها لابوك
ناصر / و هو فين ابوك ... مش موجود حتى يسلم على ابنه قبل ما يسافر ... جرى وراه
عمران / كلمته ؟! سألته هو فين ؟!
ناصر / لا و مش هكلمه
عمران / تمام ... وسع
عمران يوسع ناصر و يركب قدام ناصر يتنهد و يدخل السرايا
.........................
فى بيت فاروق
نجاه / عشان ما ينفعش نروح نقعد فى بيتك يا مهره
مهره / بس انا مش هينفع افضل عايشه فى بيت مش بيتي العمر كله يا نجاه
نجاه / يا ستي العمر كله ايه دا هو شهر يتيم لحد ما ربنا يكرم و تخلصي اللى وراكى و هنرجع البلد
مهره/ مش هرجع انتى عارفه
نجاه / نتكلم فى الموضوع ده بعد شهر مش هقعد اجادل من دلوقت
مهره / تمام ... انا هغير و اروح لبابا
نجاه / متاكده؟!
مهره / لازم يا نجاه دا انا اتاخرت اوى كمان
نجاه / هتقوليله ايه؟!
مهره / مش عارفه بس لازم اتكلم معاه لازم يعرف الحقيقه لازم يعرف انى مش زى ما هو فاكر
نجاه / و ان ما صدقكيش
مهره / هروح و اتكلم معاه و اللى يحصل يحصل
نجاه / تحبى اجى معاكى ؟
مهره تهز راسها لا بتردد
نجاه / تمام
مهره تاخد نفس عميق و تنفخ و تروح تفتح الشنطه
...................
فى قهوه بلدى فى وسط بلد ريفي
مختار يقعد و يشاور للقهوجى على شاى و يقعد يبص فى الموبايل شحته يشد كرسي و يقعد جنبه
مختار / ايه يا عم التأخير دا كله دى مواعيد برده من صباحيه ربنا بور فى البلد ايه فاضيلكوا انا و لا ايه
شحته / بص انا لا اعرف حاجه و لا هقدر اساعدك بحاجه
مختار / هو فين
شحته / و ربنا ما اعرف
مختار / صادق ... طب ايه اللى جابك هنا
شحته / وصلتني رساله حجز قطر على المحطه دى ركبت و جيت
مختار يضحك
مختار/ و الرجاله اللى معاك و حجز الشقق و كل ده مين رتبه
شحته / يا باشا زمنا مش زى زمنهم دلوقت كلو كومبيوتر و دى لعبته تكتك تكتك شبيك لبيك أحلامك بتتحقق بين ايديك
مختار/ و مكانى دلوقت كان تكتكه برده ؟
شحته / ما انت قولتها من اول النهار و انت بتور رجالتى لقطوك و بلغونى قطرناك لحد ما اتاكدنا انك بطولك جيت لك مش يمكن لا مؤاخذه يكون فخ
مختار / حويط
مختار يقرب و يوشوشه
مختار / بس انا عمرى ما بتحرك بطولى
شحته / و لا انا
مختار يبتسم و يتعدل فى كرسيه
مختار/ طب و اخرتها هنفضل انا و انت قاعدين كدا مستنين البيه يشرف و لا ايه العمل انا ورايا هم ما يتلم
شحته / مش عارف
مختار / امال انت جاى ليه يا شحته
شحته / جيتلك ... قولت يمكن انت تقولى
مختار / الله
مختار يضحك و شحته مش فاهم شحته توصله رساله
شحته / شكل المكان اتغير ... هنرجع على مصر
مختار / يا ابن الكااااااالب !!!! ازاى ما فكرتش فيها ... نجاه طبعا
شحته/ الشهاده لله يا باشا البت مش قليله فى القصه دى
مختار / و لا فى اى قصه يا شحته و الله و لا فى اى قصه... ماشي يا يونس ماشي
القهوجي يدخل يحط كبايتين شاى
مختار / اشرب اشرب شكلنا مطولين مع بعض
شحته / يدوم المحبه يا باشا
مختار يبتسم و يشرب و هو هيطق
......................
فى مضيفه الزنايته
عباده يدخل يلاقي شاب قاعد
عباده/ اهلا و سهلا بالباشا الجديد يا مليون اهلا يا مليون سهلا تعبت نفسك كنت بس ادتنى رنه و انا جيتلك اتفضل اقعد يا احمد باشا اتفضل اتفضل عشر دقايق و الاكل يكون جاهز اتفضل
احمد/ تسلم يا كبير ... انا الحقيقه سعيد ان حضرتك وفرت عليا دخله التعارف الطويله اللى فى الاول و دا أكد لى المعلومات اللى عندى
عباده / معلومات ايه دى بالظبط يا باشا
احمد/ ان ليك حبايب وسطينا
عباده / من حبه ربه حبب فيه خلقه و احنا خدامين الحكومه بنحبهم و يحبونا
احمد / طبعا ... سألتني انا ليه قررت نتقابل فى بيتك مش فى المركز
عباده / بيتي هو بيتك و بيت البلد كلها تانس و تنور فى اى وقت
احمد / تسلم ... بس انا كمان صعيدي و عارف ان اللى يدخل بيتك جاب الحق عليك
عباده / حصل ... و انا تحت امرك فى اى حاجه
احمد / البلد دى الفتره اللى فاتت كان فيها حاجات كتير اوى كان ممكن تعدى زمان بس لاسف الزمن بيتغير و فى حاجات مش هينفع تحصل و لا نسكت عليها بعد كدا
عباده / زى ايه بالظبط
احمد / يا كبير مش هنضيع وقت بعض احنا فاهمين كل حاجه ... خلينا نتكلم فى المفيد احسن
عباده / و ماله نتكلم اتفضل
احمد / البلد من كتر ما الناس اتكلمت عنها بقت العين عليها من كل الجهات دا حتى وزاره السياحه بقت مهتمه بيها و ناويه تدخلها البرنامج التطويرى بتاعها
عباده / و ماله حد يكره التطوير
احمد / اه ما هو كل الحاجات دى مش هينفع وسط بلد كامله ماشيين شايلين سلاح فى كل حته .. سياحه يعنى اجانب ... و ما اعتقدش ان تاريخ البلد كان لطيف مع الاجانب
عباده / ما اعتقدش ان الأجانب هم اللى كانوا لطاف مع البلد احنا طول عمرنا بنكرم ضيوفنا ... طالما ما خرجوش عن حدود الأدب
احمد / يا كبير انا عارف كل حاجه و عندى تقارير تفصيلية بكل صغيره و كبيره حصل و بتحصل فياريت ما نضيعش وقت بعض و نركز على اللى جاى
عباده/ دى جمله حلوه اوى ... سامعك اتفضل
احمد / البلد دى فيها حكومه انا طلبت قوات زياده تنزل البلد و هساعدك شخصيا فى تأمينها.. الناس تشوف عساكر و لا تشوف مدنيين شايلين سلاح احسن يا عباده بيه ؟!
عباده / ريحتنا يا بيه و ماله حد يكره يبقي فى حما الحكومه
احمد/ اى حد شايل سلاح مش مترخص مش هتهاون معاه اى حد عنده فى بيته سلاح مش مترخص برده مش هرحمه
عباده / ياباشا شوف شغلك حد يقدر يقول للحكومه لا
احمد / نبقي متفقين يا كبير
عباده / ايه ده بس كدا ؟!
احمد/ يا كبير انا فى صفك بس دا شغلى
عباده / نورت البلد يا احمد باشا انت و كل اللى معاك
احمد يبتسم و عباده متابعه بابتسامه و نظره بارده
...................
فى فيلا على
على / انتى ايه اللى جابك هنا
مهره / محتاجه اتكلم معاك
على / مفيش اى كلام ممكن يكون بيني و بينك امشي ارجعى من مطرح ما جيتي ارجعى للكلب اللى وطيتي راسنا كلنا ليه يا فاجره
على يضرب مهره بالقلم على وشها ينطرها فى الارض مروان ينزل من فوق
مهره / انت بتضربنى انا ؟!! بتضربنى ؟!
على / و اقطم رقبتك يا ريتني كنت اقدر ادفنك مطرحك كنت دفنتك
مهره تبص لمروان واقف بيتفرج مهره تقف
مهره / هتروح من ربنا فين ؟ قولى
مروان/ دا انتى قلبك ميت اوى انك تيجي لحد هنا برجليكى كنتى فاكره ايه ؟! هناخدك بالحضن
مهره / امال فاكرنى هترمى فى حضن اكرم و لا رامى صاحبك يا ديوث يا واطى
على يجرى يمسكها من طرحتها و يجرجرها بره الفيلا و هو بيشتم
على / اطلعى بره يا واطيه يا زباله مش عاوز اشوف وشك تانى مش عاوز
مهره / انت بتعمل معايا كدا ليه اشمعن هو صدقته اشمعن هو انا ما عملتش حاجه هو اللى عمل و الله ما عملت حاجه
على / ارجعى لعشيقك يا فاجره
مهره / يا بابا بس
على يزقها و يقفل الباب مهره تخبط
مهره / انا ما عملتش حاجه و الله ما عملت يا بابا اسمعنى... اسمعنى حرام عليك انا بنتك يا بابا ... هقف قدام ربنا و احاسبك هحاسبك
على يفتح الباب
مهره / هختصمك قدام ربنا يوم القيامه هقوله ظلمنى
على / لو ما طلعتيش بره هطلبلك البوليس و أرميكي فى الحجز انتى فاهمه و لا لا و ابقي خلى الواطى اللى بعتيله نفسك يطلعك زى ما طلعك من المصحه يا بتاعه الديسكوهات يا فاجره
مهره / حسبي الله و نعم الوكيل
على / بره ... بره قولت ... يا قاسم يا قاسم تعال ارمى البنت دى بره و لو جت هنا تانى اوعى تدخلها
البواب يروح يشد مهره تشد ايدها
مهره / انا ماشيه لوحدى اوعى ايدك
مهره تبص لعلى و تطلع بره تلاقي عربيه جابر لسه مستنيه نجاه فتحت الباب مهره تروح تركب
نجاه / ايه الاخبار ؟!
مهره ساكته و باصه فى الارض
نجاه / اطلع يا جابر ... روحنا لو سمحت
جابر يهز راسه و يمشي نجاه تاخد مهره فى حضنها تنفجر من العياط
نجاه / هو الخسران مش انتى بكره ربنا يظهر الحق
.......................
فى سرايا الجوارحه
مغاورى / بيكتفونا بالحكومة يعني ... تمام يشيلوا الليله اسحب الرجاله حوالين بيوتنا و سبهالهم يدعكوا فيها
عباده / من غير ما تقول خليه يندعق
امين / بس الجدع جاى بادبه و اتكلم عادى ما قالش حاجه و دا دوره و شغله فعلا زعلانين ليه
عباده / عشان احنا عارفين السكه دى اخرتها ايه يا امين بيفتحوا البلد عشان يدخلوا
امين / ما تاخذنيش يا كبير بس هم جوه فعلا ... الشركه الامريكيه
عباده / فاهم بس
امين/ احنا مش بنخاف من اللى بيمشي قانوني يا كبير احنا بنخاف من اللى ما يقدرش يمشي قانوني درونز و مايكروروبوتس و اخيرا سايبورج ... الحاجات دى هتختفى بوجود الحكومه
عباده / تفتكر؟!
امين / انا شايف كدا خلينا نستفيد من الوضع و ناخد نفسنا بعد الحاجات اللى حصلت الفتره اللى فاتت دى كلها
مغاورى / احنا محتاجين درونز كتير جدا مفيش و لا واحد فى المخزن
عباده / ما دى شغله الجماعه فى الشركه
مغاورى / بس البلد
عباده / اه اه فهمت ... مفيش بقي غير مخزن الجبل ... صابر مش هناك ... شاكر فين
امين / رجاله صابر مش هيلينوا غير لصابر يا كبير شاكر مش هيقدر عليهم
عباده / تؤ هيقدر ... شاكر يقدر خصوصا انه بقاله كتير عايش معاهم و عارف كل حاجه عنهم دا غير ان صابر كان واخده تحت جناحه و اتعلم منه كتير
امين / ايوه بس شاكر ... شاكر عارفينه يعني مش ... قائد ... ملوش فيه
مغاورى / امين معاه حق دى مش حته شاكر يا عباده
عباده/ عندكوا بديل ؟! رجاله الجبل مش هيثقوا غير فى شاكر ... واحد منهم
امين / منهم مش عليهم دا كبيره ... شاكر كبيره يبقي واحد منهم
عباده / ما بحبش الأسلوب ده و ما بحبش اتوقع حدود لقدرات اى حد فينا السنين علمتنى ان الانسان اللى قدامك دايما بيفاجئك انت كل اللى محتاجه انك تحسسه انك مؤمن بيه ... هينجح
مغاورى يبص على عباده و يفكر
..........................
فى بيت فاروق
نجاه بتكلم جابر فى التليفون
نجاه / بقولك بغلى تقولى اهدى لا حقيقي كتر خيرك يا جابر
جابر / مفيش حد بيقعد الفتره دى كلها فى البيت يا نجاه مسيره هيخرج
نجاه / و انا مش قادره استناه يخرج و مش قادره اعدى اللى الراجل ده عمله
جابر / دا ابوها يا نجاه ابوها يعني رد فعله بالرغم من انه راجل واطى بس ابوها اى اب فى الدنيا اكيد هيتجنن المسأله مش سهله
نجاه / هو ما بيسمعش حد ابدا
جابر / و لما تتهجمى عليه فى بيته و تضربيه هو و ابنه هيسمع يعني ... نجاه انتى اعقل من كدا
نجاه / مش قادره انام مش قادره اهدى
جابر / اذا كانت هى نامت
نجاه / بعد ما قطعت قلبي من كتر العياط انت ما شوفتش منظرها فى العربيه ؟! دى هنا عملت أضعاف اضعافه و قطعت قلبي ... دا انا بقيت بعيط معاها ... دا لو وقعوا تحت ايدي يمين بالله لخليهم يبكوا و يولولوا زى الحريم بس انا احط ايدي عليهم
جابر / تمام حاسس بيكي ... جبتهملك انا دلوقت و ولعتى فيهم هى بقي ... موقفها ايه ... هتقف تتفرج على ابوها و اخوها و هم بيولعوا و لا هتولع فيهم معاكى و لا هتعمل ايه
نجاه / انا ما ليش دعوه بيها
جابر / امال بتعملى كل ده لمين
نجاه / ليا ... مفيش اب يعمل كدا فى بنته ... طب تخيل معايا انها غلطانه ... و رجعت ... يرميها يقفل بابه فى وشها يقولها كملى فى الغلط و ارجعيله ... طب و بعدين تروح لمين هى ... الاب يحتوى الاب يعالج الاب ما ينفعش ابدا يكون قاسي كدا ما ينفعش البنت تلاقى حنيه فى الغرب اكتر من اللى عند ابوها البنت ايه من غير ابوها يمين بالله و لا حاجه مطمع كل الكلاب تنهش فيها
جابر / ايوه بس ضربه مش هيحل حاجه من المشكله بالعكس هيعقدها
نجاه / يعني مش هتيجي معايا
جابر/ و همنعك تروحى كمان ... بصي ... لو انتى رايحه تحاربى العفريت الأزرق و معاكى الحق انا قبل منك انما انى اسيبك تغلطي او حتى اساعدك على الغلط فدا مش هيحصل
نجاه / تمام يا جابر ... تسلم
جابر / هتعملى ايه
نجاه / ما لكش دعوه انت بقي
جابر / برده ؟!
نجاه / لا تساعدني و لا تقف جنبى اعمل اللى تقدر عليه و امنعنى
جابر / هى بقت كدا يعنى ؟!
نجاه / اتصل بابويا و افتن عليا هعمل اللى فى دماغى و ارجع اخد جزائى
جابر / مش للدرجادى يا نجاه مش لدرجه انك تقولى انك حتى لو ابوكى منعك هتعملى اللى فى دماغك برده ايه اللى جرالك
نجاه / اتجنيت ... انا اتجنيت
جابر / تمام يا نجاه... تمام اعملى اللى يريحك
نجاه / سلام
جابر / سلام
نجاه تقفل و هى بتغلى ثوانى و تليفونها يرن تانى جابر
نجاه / نعم ...عاوز ايه
جابر / ممكن معلش اعرف خطتك كدا انك تقتحمى ام الفيلا دى و لا انتى هتسبيها على الله ؟
نجاه / هنط من فوق السور
جابر / ممتاز يا ترى فى كلاب و لا لا يا ترى فى حراسه و لا لا يا ترى فى كاميرات و لا لا يا ترى بقي لما يقابلك اى حد من الخدامين او اى حد شغال هناك اى حاجه هتتعاملى معاهم ازاى؟ طب لو دخلتي اوضه اسمها ايه دى اخت مهره و لا و انتى بتقتحمى اوضه على مراته صحيت هتعملى معاها ايه ... فكرتى و لا انتى هتروحى كدا و خلاص
نجاه / هروح كدا و خلاص... هرتجل ايه عمرك ما عملتها ؟!
جابر/ هو مضايقك اوى كدا
نجاه / اه
جابر / خلاص ... انا هتعامل
نجاه / هتعمل ايه
جابر / ما لكيش فيه بقي بس هربيهملك
نجاه / انا
جابر / انتى بعيد نهائى عن الصوره انتى هنا جايه تلازمى مهره لحد ما تخلص الشهر اليتيم ده و نرجع خليه يعدى على خير
نجاه / انت بتنيمني و خلاص
جابر / و انا من امتى عملت كدا
نجاه / عشان انت عارف كويس انك لو عملت كدا ابويا هينفخك
جابر / ما لكيش فيه انا هعملها صح
نجاه / طب ما تاخدنى معاك
جابر / هبقي اصورهولك فيديو
نجاه / ماشي
جابر / خشي نامى بقي و اهدى
نجاه / ماشي
جابر / تصبحى على خير
نجاه / و انت من اهله
جابر / بحبك يا مجنونه
نجاه تتحرج و ما تعرفش ترد
جابر / سلام
جابر يقفل و نجاه محتاسه بالموبايل
نجاه / لازم طبعا ما يبقاش جابر لو ما قفلهاش كدا ... متخلف اصلا
......................
فى اوضه عباده
عباده حاطت الايربود فى ودنه و بيضحك خديجه تصحى
خديجه / فى حاجه و لا ايه
عباده يبوس راسها و يعدل عليها الغطا
عباده / حقك عليا حقك عليا نسيت نفسي حقك عليا
خديجه / طب ما لو بتتفرج على حاجه تضحك ما تضحكني معاك
عباده / لا انا طلبت من دياب يفتح لى مكالمات جابر و نجاه عاوز اعرف بيتكلموا فى ايه
خديجه/ غريبه اوى عليك دى يا عباده بتتصنط على البت و بعدين هتلاقي ايه يعني فى مكالماتها مع جابر غير حرقه الدم دى جلنف
عباده يضحك
خديجه / يا اخى نفسي تبل ريقه بقي و تخلينا نفرح انما نقول ايه ... حيوانه
عباده / قالتلى فى وسط الكلام اش عرفك أن جابر ما بيقوليش كلام حب .. قولت اسمع بيقول لها ايه
خديجه / عيب يا عباده
عباده / هو ايه اللى عيب ؟! هو اللى عيب يتكلم مع بنتى فى اى حاجه من غير اذنى
خديجه / وأخد اذنك
عباده / ما حصلش
خديجه / ازاى مش أتقدم و انت وافقت و واقفين على موافقتها سيبه يلين الحجر و لا انت عاوز تستنى لما الغريب اللى ما لوش فى الاصول و لا سمع عنها يجي و يلعب ليها فى دماغها
عباده / قصدك مين ؟! انتى تعرفى حاجه انا مش عارفها ؟!
خديجه/ لا و مش قصدى يونس بس بتكلم عموما الست مهما كانت بتحب تسمع الكلمه الحلوه و انت سيد من يفهم الكلمه و سحرها سيبه يتكلم ياكش الحجر يلين فى ايده
عباده / مش قادر
خديجه / طب قولى ... هو فعلا بيقول لها كلام حب ؟!
عباده / بيحبها لدرجه ان هاين عليا اجبرها تتجوزه من كتر ما انا متاكد انه مستعد يرمى روحه فى النار عشانها
خديجه / حلوفه اقول ايه
عباده / فى حاجه غلط فى حاجه ناقصه فى الحكايه دى مفيش واحده تلاقي واحد يحبها اوى كدا و تسيبه ما تحبوش
خديجه/ مش انا اللى هقولك يا عباده ... ربنا اللى بيولف القلوب ... و بعدين بنتك مش زى كل البنات هى حاطه عينها على حاجه تانيه ... و مش قصدى راجل... هى عاوزه ... تفضل طايره كدا زى النسور فى السما ... تسافر و تتنطت و تعيش مغامرات و اكشن و الحاجات اللى تقصف العمر دى
عباده يضحك
......................
فى اوضه جابر
جابر فاتح اللاب قدامه و عمال يشتغل الباب يخبط
جابر / ادخل
مختار يدخل جابر يتعدل و يقفل اللاب
مختار / لقيت النور قايد قولت تبقي صاحى ... لو رايق اجى اتكلم معاك شويه
جابر / اروق لك يا خال هو انا عندى اهم من حضرتك
مختار / عشت
مختار يدخل يقعد قدام جابر و يبصوا لبعض
مختار / انت زعلان منى صح ؟!
جابر / ما بقدرش ازعل من حضرتك ... دا انت اللى مربيني
مختار / قصرت معاك ؟
جابر / ابدا
مختار / بس انا قصرت معاه ... و قصرت جامد اوى
جابر / ابوه اللى قصر مش حضرتك ... ابوه اللى جابه الدنيا دى و ما اعترفش بيه و لما لقي نفسه هيموت قال يلا دوروا انتوا عليه بقي و شيلوا شيلتى اللى حرفيا ما بذلش فيها نقطه عرق واحده يعني هو حاول حتى يوصل لابنه قبل ما يموت يا خالى
مختار / مات خلاص و امنى امانه و انا مديون له
جابر / ليه هو عمل كل ده ليه اصلا مش عشان الفلوس
مختار / و هو العمر بيساوي كام يا ابنى
جابر / دى شغلته بيقبض عشان يعرض حياته للخطر مقابل انه يقوم بالمهمه ... ما علينا حضرتك معاك حق عم رشيد مات و حضرتك لقيت ابنه ... انا بقي مالى
مختار / انت بتقول انى اخترته عليك
جابر / حضرتك جاى تقولى انك قومت برسالتك ناحيتى خلاص و انى ما عدتش محتاجك دلوقت لكن هو محتاجك... تمام ... ايه المطلوب منى
مختار / انا مش عاوز منك حاجه انا مش عاوزك زعلان
جابر / انا مش زعلان
مختار / انت ايه اللى مصحيك لدلوقت
جابر / بشوف حاجه كدا هخلصها و انام
مختار / محتاج مساعده ؟
جابر / تسلم
مختار / تمام ... تصبح على خير
جابر / و حضرتك من اهله
مختار يمشي لحد الباب يبص على جابر متابعه بحزن اول ما عنيهم تيجي فى عين بعض جابر يبتسم مختار يتنهد و يطلع بره و يقفل الباب جابر يكتم جواه و ينفخ و يفتح اللاب و يكمل شغل
تليفون جابر يرن
جابر / ايوه يا سعيد السلام عليكم ها طمنى عملت ايه ... يمين بالله انت ما فى منك ... تمام هستنى البشاره ... بزياده يمين بالله لابسطك ... سلام يا وحش ... مع السلامه فى حفظ الله فى حفظ الله
.....................
فى سرايا الجوارحه
شاهين قاعد فى الجنينه مضايق مغاورى يروح يقعد معاه
مغاورى / ايه يا سيد الرجاله مالك قاعد لوحدك كدا ليه
شاهين / اهلا يابا ازيك ابدا عادى بتهوى
مغاورى / على فكره انا مبسوط منك اوى الفتره دى
شاهين / بجد !!
مغاورى / اه ... جدا
شاهين / حتى بعد اللى حصل على المركب
مغاورى / خصوصا بعد اللى حصل على المركب انت عملت اللى عليك و زياده و لولاك ربنا وحده اللى يعلم كان ايه اللى حصل ... بصراحه فاجأتني
شاهين يبتسم
مغاورى/ انت اه عايش فى دنيا لوحدك و بقيت بتختفى كتير و تقفل عليك الباب كتير بس ... اى كان اللى بينطلب منك بتعمله و الشهاده لله بتعمله مظبوط خلاص قضي وقت فراغك بكيفك
شاهين / تسلم
مغاورى / انا مستنى منك اكتر الفتره الجايه ... بصراحه و من غير زعل انا ما كنتش رامى عليك امال بس انت اللى طمعتنى
شاهين / باذن الله ارفع راسك
مغاورى / من يوم ما وعينا على الدنيا و ابن كبير الجوارحه البكرى بيمسك مكانه ... دا حمل تقيل و انا مجربه بس انت بينت انك قده كل المطلوب منك انك تتعب شويه زياده الفتره الجايه
شاهين / و دياب ؟!
مغاورى / انا لسه ما موتش يا شاهين و طول ما فيا نفس داخل خارج ما تقفش و حاول و انا فى ضهرك
شاهين / بس هو مش هيقبل بده
مغاورى/ كلنا بننافس بس وقت المبايعة الكل بيقول امين
شاهين / حضرتك اتكلمت معاه فى الموضوع ده ؟!
مغاورى / مش هسبق بالكلام قبل ما تكون النتيجه مضمونه فى ايدي و انت قدها كمل انت و ركز و حطها بين عنيك و انا معاك فى كل اللى هتحتاجه
شاهين يبص لمغاورى و يبص الناحيه التانيه مغاورى يطبطب على كتف ابنه و يقوم شاهين يتابعه
شاهين / شكلها جد و لا ايه ؟!
.....................
فى شقه نسمه
نسمه بتطبق الغسيل امها تدخل
الست/ انتى لسه صاحيه لدلوقت يا نسمه
نسمه / هخلص اللى فى ايدي و انام
الست / عاجبك الشحطته اللى انا فيها دى
نسمه / ياما انا عايشه فى بيتي اللى عاوز يقعد معايا ينورنى اللى عاوز يروح يتفضل انا مش رابطه حد جنبى
الست / عاوزانى اروح و الناس يحكوا و يتحاكوا عليكي
نسمه / و الله ياما انا فيا اللى مكفيني و على أخرى... ما تعرفيش عملوا ايه مع محمود و ابوه و أمه ؟
الست / لا ما اعرفش حاجه ... و بعدين ما ياما قولنا الناس دول مش سالكين تعالى وسطنا انتى اللى قولتى لا و لسه بتقولى اهو
نسمه / فكريني الصبح اكلم الباشمهندس منصور اسأله هيعملوا فيهم ايه اروح اعمل محضر و لا هيتصرفوا هم من بره بره
الست / هبقي اخلى ابوكى يكلمه هو
نسمه/ اريح و اريح .. خلصت تصبحى على خير ياما
نسمه تشيل الغسيل المطبق و تدخل الاوضه و تقفل الباب و تتنهد
نسمه/ افرجها من عندك يا رب
……………………..
![](https://img.wattpad.com/cover/339982434-288-k991712.jpg)
YOU ARE READING
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه