اسكريبتات روان أحمد ♥️

اسكريبت 40

ـ كانسر فى المعده ..؟؟!!

ـ الجمله نزلت عليا زى السهم اللى اخترق قلبى بكيت كتير وانا مش مستوعبه ان بـابـا عنده كانسر كنت دايما اسمع عن الاطفال والكبار اللى بـيصابوا بيه بس اول مره يكون عند حد عزيز وغالى اوى اوى على قلبى وازاى مايكونش غالى وهو بـابـا اغلى الغالين ....

ـ فضلت منهاره ليله كامله وطلعت كل الطاقه السلبيه والزعل والوجع اللى جوايا فى الليله دى لان الكل كان مخبى عليا لانى كنت فى أيام امتحاناتى بس انا عرفت وانا بقرأ التحاليل اللى هو عاملها..

هنا ادركت ان بابا ليه كان كل ما يأكل كان بيستفرغ الاكل وليه كان دايما الوجع فى معدته زايد عليه وتاعبه اوى اوى وراح لدكاتره كتير اوى منهم اللى يقوله انت عندك التهابات وفى اللى يقوله انت عندك انسداد ف القولون علشان كدا مفيش اكل بيستنى فى المعده واخد كميه ادويه مهوله كلهم مكانوش بـيجيبوا نتيجه بل الوجع بيزيد يوم عن يوم لحد فى يوم اول مره اشوف بابا بيعيط وكان بيبكى من الوجع امى اخدته وراحوا لدكتور باطنه اخر وهو دا اللى طلب انه يعمل تحاليل ومنظار وهنا المنظار اللى بين انه عنده ورم فى المعده .... ساعتها عرفت ليه المنظار اتعمل وليه اتحجز كل حاجه بقت باينه قدامى بالاخص لما عرفت محمود اخويا انى عارفه فبدأت اعرف كل حاجه عن حاله بابا بالتفصيل .

اتحول على دكتور كبير جراحه عامه وهو دا اللى حجزه فى المستشفى وطبعا التحاليل دى كلها كانت بمبالغ لانهم طلبوا تحاليل وأشعه بالصبغه وأشعات تانيه تبين المرض انتشر فين علشان يعرفوا يحددوا مكانه وانه خبيث ولا حميد ... واتضح ان الورم خبيث وانه انتشر فى الاثنا عشر والبنكرياس وأماكن أخرى بالمعده ..

ـ وبعد 13 يوم وهو محجوز فى المستشفى وعايش على المحاليل تحددت العمليه انها يوم الاحد .

ـ ومش قادره اوصف ازاى كنت عارفه اخبى عليه وعلى اللى حواليا حزنى وقهرتى وما ابينش انى عارفه حاجه وبالاخص هو علشان نفسيته تبقى حلوه لانه عارف انه عنده انسداد فى القولون مش اكتر وان عمليته سهله وبسيطه مايعرفش ان عمليته خطر وصعبه جدا بالاخص لان الورم انتشر ...

ـ ناس معارفنا فى المستشفى قالوا ان العمليه خطر عليه وهو كدا كدا مـ...ـيت فيعش فى بيته اليومين اللى فاضلنه اهون من فاتحه البطن وبهدلته فى العمليه ...

ماما خافت على بابا وبالفعل خرج من المستشفى بعد ماكان صابح يعمل العمليه روح حتى من غير مايقولوا للدكتور اللى متابع حالته خرج رجعنا البيت جبنا المحاليل بتاعته وكان مركب خرطوم داخل لمعدته وطالعه من انفه علشان يطلع اللى فى المعده ..

ـ اول حاجه عملها انه قال انه زهق وتعب وشال الخرطوم وشال الكانولا اللى فى ايده وقال انا هعيش كدا كلنا زعلنا عليه وحاولنا نقنعه انه يركبهم وهو أبدا المهم قولنا النهارده هنسيبه وبكرا نقنعه حتى يكون هدى شويه ونركبه الحاجه دى فى المستشفى .

ـ كان بيقول انه يشرب بيبسى بس احنا منعناه منه نمنا كلنا وصحينا لقيناه تعبان جامد .