الجوزاء والفيصل

الجوزاء والفيصل ٢

#الجوزاء_و_الفيصل
#روز_الفياض
#ح٢
.
.
.
.
‏التعمُق بي مُتعب جداً انا لا أُجيد التصنُع ولا أُجيد التمسك بـ ايدي الراحلين ممُتلىء قلّبي بالغمُوض ويتلبسهُ الكِبرياء .
.
.
.
بعدما جمعنه مبلغ لابن عمنه وسافر حتى يسوي عملية تبديل مفصل وبقى شهرين بعمان وكالوا بدا يتحسن والحمدلله فجأة اتصل رعد ابن اخوي كريم :
خطية حتى مالحك يرجع يشوف عائلته ، اتوفى هناك وراح يجيبون الجثة لهنا حتى يدفنونه ..

فيصل :
لاحول ولاقوة الا بالله ، انا لله وانا اليه راجعون ..
الله يرحمه ويغفرله .
هو مو كالوا تبديل مفصل مدري شنو ؟
شلون مات بدلوله مفصل لو شسووا بي ؟

رعد :
اي

فيصل :
جا شجاه ؟

رعد :
اللهم ياكافي لاكين عنده الخبيث ومنتشر مالحكوا عليه .

فيصل :
لاحول ولاقوة الا بالله العلي العظيم .
الله يرحمه خطية ماشاف اهله .

رعد :
الله يرحمه
ابوي يكول لازم يجون للفاتحة انت وعمي  علي ..

فيصل :
ابوك يريدله حجه ..
شني هي السويد وره البيت ؟؟
شو اليعرس ابوك مودي علينه ،
اليموت ابوك مودي علينه خاف عباله احنه وره البيت !!!

رعد :
هههههه والله كناله بس انت بعد تعرف .
لا ومايصير وعمامنه والناس شيكولون ومن هالحجي ..

فيصل :
ابوك عباله شيخ عشيره مو جبير اخوانه ههههه من طلع تقاعد لهسه ضال يدور فواتح واعراس ههههه .
ماشي ...
ماشي ...
اشوف عمك علي ولو مااتصور يكدر يجي لان ماصارله هواي من راح ورجع مايطونه اجازه .
يجوز بس انه اجي ..

رعد :
وشغلك ؟

فيصل :
هو شنو شغلي هههه هو سايق تكسي اليسمعك يكول مهندس وخاف تتعطل المشاريع والبلدية تعزل هههههه ولك والله عليك سوالف .

رعد :
هههههه عود كلت الكالك عذر غير .

فيصل :
هههههه خلي اعذارك الك ابوك يتبرى من عدنه اذا اثنينه مانجي لا انه ولاعمك علي غير يفضحنه .

مثلما اتوقعت علي مايكدر يروح فلازم انه اروح وحدي .
الصدك انه جنت حاس بفراغ وملل محتاج اغير جو ..
ومشتاق لبيت اخوي كريم ولجماعتي بالعراق ..

محتاج ارجع اشوف ذيج الشوارع القديمة والبيوت اللي صارلها سنين طويلة مبنية ..
محتاج ارجع اشوف الماضي .. حتى اكدر اكمل بالمستقبل ..
مرات جنت اسأل نفسي الله سبحانه وتعالى ليش خالقني ؟؟
وشنو العبرة والحكمة من حياتي ؟؟
لذلك كل فترة احتاج ارجع للعراق حتى احس انه موجود وعايش واكو سبب لوجودي .

اللي اطلعه من شغلي شي بسيط بس بالنسبة الي كافي وزايد علي .
عندي بيت الحمدلله والاكل والشرب مايكلف لان انه نفر واحد ومرات اتغدى عد وحده من خواتي واتعشى عد بيت علي او اطلع ويه واحد من جماعتي ..
ماعندي اي هوايات ولاعندي اي اهتمامات ..
مااعرف ادلع نفسي ، اصرف على كد الحاجات الضرورية بس .. واللي يبقى اجمعه لان واجبات اهلنه بالعراق هواي كريم مايغلس على مناسبة مهلسنه اول بأول ..
احس الفلوس قيمتها بمساعدة الناس هذا مريض وذاك يريد يتزوج وذيج تريد تجيب وهذول يردون يبنون وبالتالي مايبقى فلس عندي الحمدلله .