الجوزاء والفيصل

الجوزاء والفيصل ٣

#الجوزاء_و_الفيصل
#روز_الفياض
#ح٣
.
.
.
العوَضُ آتٍ ورَبُّ القَلبِ أدرَىٰ بمِيعادِه .

.
.
.
رجعت للعراق على اعصابي وبدون مااطي لاحد خبر بحيث اتفاجأوا من شافوني طبيت عليهم ..

بيوم اللي وصلت بالليل سألني كريم اخوي :
شعجب اجيت ؟

فيصل :
ماتريدني اجي ههه ..

كريم :
لا بس مستغرب ماصارلك هواي من رحت وانت بالعادة كل سنتين تجي !!!

فيصل :
والله عندي شغيله ..

كريم :
هاا ..
كون عدك شغيله هلا بيك ..

فيصل :
يعني اذا ماعندي شغل لا هلا بيه ؟

ضحكوا رعد وام رعد ..

كريم :
انه هسه مامتفيجلك ( مافارغلك ) ولا عدي خلك ونفس طويل لسوالف ..
تحجي لو اكوم انام ؟

فيصل :
ههههه جا من البداية واسألني شعدك جاي ههههه .

كريم :
اي غير نفهم شغليتيش هاي الجاي عليها مناك لهنا حتى نساعدك ..

فيصل :
شعجب ماخابرتكم ايمان لو ايات وكلتلكم ؟!!!
عموما انه جاي اريد اخطب ..

كلهم صفنوا بوجهي !!!!
بعدين ضحكوا عبالهم اتشاقى ..

ام رعد :
هههههه اي جا اخطب علواه ياهو كاضك

رعد :
هاي من سابع المستحيلات ههههه .

كريم :
هههههه اي كفوو انت وتخطب وتتزوج .

فيصل :
ها !!!
شبيكم نزلتوا علي ؟؟
جا عود كلت خل اعرس واخلص من حجيكم واحقق حلمكم وتخلصون مني شو النوب طلعت مو كفوو اعرس !!!

رعد :
عمي كول غيرها .

فيصل :
جا حتى انت رعيد ؟!!!
عود انت الفهيم مال بيت گباشي !!!

ام رعد :
كون صدك الله يهديك عدي الك مره من مره ..

كريم :
شبيج انت صدكتي ، هذا واحد كلاوجي ( محتال ) ..
عدها مره ...
هو هذا مال زواج .. هذا يريد يبقى دايح هناك بحده لامره ولاجهال ..

فيصل :
شجاكم على كلمة دايح !!
ولكم انه بحياتي لامدخن جكاره ولاشارب منكر ولا مسويلي مصيبة بعد هاي السمعة مال الدياحه منين طلعت علي ؟!!!

رعد :
هههههه هاي حوبة سندس

فيصل :
لا والله صدك جاي حتى اخطب ..
مو جنتوا ماكلين راسي عالعرس هاي راح اعرس شتردون بعد ..

ام رعد :
اييي صلاوات ..
صلاوات ...

رعد :
صدك عمي ؟

فيصل :
والله .. هاي اجيت حتى تشوفولي مره واخلص من هالموال .