السلام عليكم
أسمي مريم عمري ٢٢ سنة تخرجت من الجامعة بتقدير جيد جداً...حالتنا المادية متوسطة او جوة الوسط بس ليشوف بيتنا يكول عائلة عادية بالاصل بيتنا ورث والحمدلله والشكر عندي اخت مزوجة واخ مزوج واني ....امي مثل اي ام عادية.....اما بابا ف راتبة قليل او الصراحة هو ميعرف يتصرف بيي مخلصها ديون ...لو ينطيني الف دينار بالشهر لو يكول ماعندي أما اخوية ف كل عيد دا يتذكر ينطيني عشرة الآلاف.....
طلعت النتائج الحمدلله عرفت نفسي ناجحه...رحنا لبيت عمي وجانت جنتهم موجودة وتحجي على ابنها جان راسب بالفيزياء والانكليزي لي هي تخصصي اما الانكلش اني حيل زينه بي ...اجت ببالي فكرة وكلتلها اني ادرسة .....اتفقت وياها وامي بالبداية حجت من يمها عود بببلاش ....كلتلها الله كريم نتفاهم بعدين اتصلي ....رجعنا للبيت ماخليت وماحجيت على امي ..من جبت الها طاري فلوس وانطيج سكتت تواصلت ويا ام خطاب وكالت ادزلج ياه اسبوعين جان امتحانه واحد ورا الثاني صفنت باسبوعين لازم اخلص بس تذكرت بعدين هم كورسات يعني اهون نص المادة اتفقنا ع السعر وكلتلها ع النجاح لأن جانت بالبداية تجربة .....
كالت بعد ٤ أيام يجيج .....بقيت الليل كلة كاعدة لزمت دفتري وكعدت اخططط ثاني يوم كعدت من الصبح ورحت ع المخزن مالتنااا البرا شفت بي غراض كومة اكدر احولها قنعت امي اخذ وحدة من الغرف الفوك ووافقت .....
صعدت طلعت الغراض البيها حولتهن ع الغرفة الثانية ودك تنظيف الشباك قديم بس كلت مايسوة اغيرة وهو أصلا راح يتغطى ببردة باوعت الباب رايح وهنا كلت لازم اتصرف فتحت الباب شلون ماجان وطلعته ع السطح كلت اصبغة ابيض واغير اليدة مالته ....سلجت بدفتري يدة مال باب سودة .... جان عدنا جص مدري شيسمونة بالمخزن سويتلي خبطة وبديت اعبي الشقوق ومن جف نعمتها بقت بس آثار تتغطى بالصبغ ....
نزلن تغديت غسلت المواعين ومانمت فكرت شلون اصبغ ....طلعت ع اليوتيوب وتعلمت غطيت البلكات وهم سجلت بدفتري بلكات لون أسود عدد ٤ غلفت البنكة والشباك وسويت خبطة الصبغ واكول يارب تكفي صبغت مرة وحدة وبعد شوية الآثار مبينه يحتاج اعيدة مرة ثانية كلت لحد ما يجف ....... بهل أثناء كلت اروح اشوف المخزن شنو بي غراض تذكر مبردتنا القديمة جانت تشتغل بس اهلي غيروها كلت اشغلها اشوفها وطلعت تشتغل كلشي مابيها مو مهم شكلها راح تصير ع السطح المهم تجيب هوا واكو حنفية موجودة وفعلا خوش موقع قنعت امي وصعدتها فوك وثبتتها على بلوكات بقى بس اخلي بيها مي كصيت الها صوندة وثبتتها زين شلت الجامه واجيت فت عليها خليت من برة اسفنج مالتها نظفته وطبطبته جان بي تراب وهو مغلف يعني مو شي فوضوي ......
رجعت المغرب صبغتها الغرفة كلت منا لباجر هي نظيفة صايرة ..... كاعدين بليل بالهول جان امي تكول ام أحمد عارضة غراض للبيع .....قنعت امي وتداينت منها ٨٠ ألف كلتلها اني انطيج ياهن بعدين وافقت امي .... ورحنا بليل عليها اشتريت منها بردة تجنن سودة والتول مالتها الداخلي ثخين وابيض حلو وجان اثنين يعني مو واحد اخذتها ب ١٠ من عدها وكنتور ابيض يجنن جديدد حيييل بابين اثنين يخبل حيل عجبني كالت ب ٥٠ وبي مجال بقيت اقنع بيها اخذته ب ٤٠ الف واخذت منها مراية طويلة حيل حلوة ب١٥ وكرسي ابيض بدون الميز مالته رادتة ب ١٠ والميز ب ١٥ بقيت اقنع بيها واخذتهن اثنينهن ب ٢٠ رجعت مكيفة كالت ولدي باجر يجيبوهن الكم ......
