ការចងចាំដ៏ស្រស់ស្អាត (ចប់)

ការពិត

រាប់ចាប់ពីពេលដែល Camellia មកជួប Jungwon Jungwon សោកសង្រេងជាខ្លាំងរហូតមានគំនិតចង់សម្លាប់ខ្លួន។ គេយល់ថារស់នៅបន្តក៏លែងមានន័យទៀតដែរ ព្រោះមនុស្សដែលគេជឿជាក់និងទុកចិត្តបំផុតបែរជាក្បត់គេទៅវិញ។

នៅពេលយប់ Jungwon បានទៅកាន់ជ្រោះមួយដែលគេស្គាល់ថាជាជ្រលងផ្ដាច់និស្ស័យ។ មនុស្សដែលលោតចូលជ្រលងជ្រោះនេះនឹងត្រូវស្លាប់ក្លាយជាវិញ្ញាណដែលមិនអាចទៅចាប់ជាតិបាន តែថាហេតុអីបាន Jungwon សម្រេចចិត្តធ្វើបែបនេះ?

ចម្លើយគឺ Jungwon ត្រូវបានវិញ្ញាណអាក្រក់សណ្ដំព្រោះផ្លូវចិត្តរបស់គេកំពុងទន់ខ្សោយ។ ចំពោះមូលហេតុដែលវិញ្ញាណនោះធ្វេីបែបហ្នឹងគឺដេីម្បីអាចឲ្យខ្លួនឯងបានទៅចាប់ជាតិ។ លុះត្រាមានអ្នកមកជំនួសកន្លែងទេីបវិញ្ញាណនោះអាចទៅចាប់ជាតិបាន។

Jungwon បានលោតទៅក្នុងជ្រោះនោះ ហើយវិញ្ញាណរបស់គេប្រែក្លាយជាវិញ្ញាណតែលតោលដែលមិនអាចទៅចាប់ជាតិបាន។ ដំណឹងការស្លាប់របស់ Jungwon បានល្បីពីមាត់មួយទៅមាត់ហេីយក៏ឮដល់ត្រចៀករបស់ Jay ដូចគ្នា។

Jay ស្លុតចិត្តខ្លាំងណាស់នៅពេលដែលដឹងរឿងនេះ។ គេអាណិត Jungwon ដែលត្រូវស្លាប់និងក្លាយជាវិញ្ញាណដែលមិនអាចទៅចាប់ជាតិ។ Jay បន្ទោសខ្លួនឯង ព្រោះយល់ថាខ្លួនគេជាមូលហេតុដែលធ្វើឲ្យ Jungwon ត្រូវស្លាប់ ហើយគេក៏មានគំនិតមួយ។

Jay គិតថាខ្លួនឯងនឹងត្រូវស្លាប់ដដែលក្នុងពេលមិនយូរមិនឆាប់។ ដូច្នេះគេនឹងហក់ចូលជ្រលងផ្ដាច់និស្ស័យដេីម្បីឲ្យ Jungwon មានឱកាសទៅចាប់ជាតិ ព្រោះគេចង់លុបលាងទោសកំហុសរបស់ខ្លួនដែលធ្វេីឲ្យ Jungwon ត្រូវឈឺចាប់ ហើយគេក៏លោតចូលជ្រោះនោះនៅពេលយប់។

•••

រូបភាពនៅក្នុងកញ្ចក់ចាប់ផ្ដេីមរលាយបាត់។ Jungwon យំឡើងខ្សោះខ្លួននៅពេលបានដឹងរឿងអតីតកាល។ គេមិននឹកស្មានថា Jay ហ៊ានលះបង់ដល់ថ្នាក់នេះ។ ជាពិសេសគេមិនបានក្បត់ទំនុកចិត្តរបស់ Jungwon ឡេីយ គេស្រឡាញ់ Jungwon ដល់ថ្នាក់ហ៊ានលះបង់ជីវិតនិងដួងវិញ្ញាណ។

Camellia សម្លឹងមេីល Jungwon ដោយក្រសែភ្នែកពិបាកស្មាន។ ភ្លាមនោះរាងកាយរបស់នាងស្រាប់តែរលាយបាត់ ហើយ Jungwon បានត្រឡប់មកបន្ទប់នៅឯផ្ទះរបស់ Jay វិញ។