Working Student (BISAYA AU FROM TIKTOK)

BAYNTE SAIS

Ex

Gihubo dayon nako akong gisuot pag abot nako sa kwarto ug nidiretso sa CR para mamunas. Gusto pa unta ko maligo pero gitulog na jud kaayo ko. Bintaha gani kay na huwas-huwasan nako gikan sa pagkatipsy maong naa pako’y kusog para mag-ilis, kay kung wala, basin nidiretso nako'g hapa diris akong higdaanan.

Nihigda nako paghuman nako'g palong sa suga. Andam na unta ko matulog sa dihang gibati nako ang pagsakit sa akong pus-on. Mura’g gilubag sa kasakit. Gipaak nako akong baba ug giduot. Bisan unsa na nga posisyon akong gibuhat. Galimbag-limbag ko para mo-arang arang pero mao ra gihapon iyahang kasakit.

Gitulog na ko. Gipiyong na nako akong mata pero dili gihapon ko katulog tungod sa pag antos aning sakit. Please, kanus-a pa man intawun ni mawala. Patuloga na tawun ko kay unsa nang orasa, sayo pako momata ugma.

Nilingi ko sa akong cellphone pagkita nako nga misiga ug nakita nako ang pangalan ni Janvier sa screen. Gamit ang isa ka kamot, gikuha nako ug gi-open iyahang message.

Janvier:

Langga, online pa lagi ka?

Wala pa ka natulog?

Ako:

Nagsakit sakong pus-on.

Ikaw? Nganong wala pa ka natulog?

Janvier:

Nagdula mi'g valo ni Patrick.

Unsa'y kinahanglan nimo?

Meds?

Ako:

Okay ra. Mawala ra siguro ni unya.

Janvier:

Unsa'y dali nga pampawala ana?

Aron makatulog na ka dayon. Sayo pa baya ka momata ugma. Dili pa jud ka anad magbilar.

Ako:

Hot compress, pwede.

Janvier:

Naa ka'y hot compress diha?

Ako:

Wala.

Sakit jud kaayo ibangon. Basin makuyapan nako inig naog nako.

Janvier:

Ako na’y bahala, Langga.

Unsa pa’y laing kinahanglanon nimo?

What about food?

Ako:

Kana lang. Please.

Janvier:

Okay, I got you.

Hulata ko diha. Kadali lang.

Pila ka minuto, nabantayan nako nga miliso ang door knob. Bisan ngitngit maklaro nako si Janvier nga misulod. Gisirad-an niya ang pultahan usa gi-on ang suga. Mitarong ko'g higda pagduol niya. Gitunol niya sa akoa ang compress bag ug gibutang sa akong pus-on dapit. Milingkod siya sa akong kilid ug gitarong akong buhok sa agtang.

“Nangluspad ka ug gipaningot," sulti niya ug igo rako mitando. Ganina pako nag sige'g pugong pugong sa kasakit.

Mitarong siya'g lingkod ug gigunitan niya ang compress bag nga naa sa akong tiyan. Gikuha nako akong kamot tungod sa iyahang gibuhat. Nibintaha na siya gamay tungod sa kainit.