Working Student (BISAYA AU FROM TIKTOK)

BAYNTE SYETE

Deny

“Ana ko sa imoha nga dili na nimo kinahanglan ihatod pako taga buntag. Anad nako mag commute. Kung nagpadayon na lang unta ka’g tulog diadto.” Pangasaba nako kay Janvier.

Nang huy-ab niya samtang nag drive padulong sa eskwelahan.

Wala sila’y klase karong buntag pero nimamata lang gyud siya para ihatod ko. Dili unta nako gusto kay kabalo kong gitulog pa siya tungod kay bilar sa ilahang dula. Dili nako gusto mahasol pa siya.

“Sayo pa sa buntag, Langga. Gipapamahaw nako nimo’g kasaba.” Mikatawa siya.

Naglingo-lingo na lang ki nga nitan-aw sa kalsada.

“Ayaw kabalaka, gusto man sad nako ni akong gibuhat. Gusto nako nga ihatod ka kada buntag.” Lingi niya sa akoa ug mingisi.

Gidrop ko niya sa gate sa VVU human nidiretso na siya’g pauli. Nisulod ko sa among room ug nakit-an si Chloe nga nauna na sa akoa’g abot.

“Good morning,” timbaya niya.

“Goos morning,” sulti nako pag lingkod.

Nitan-aw ko sa pultahan pagsulod ni Karille. Diretso iyahang tan-aw sa akoa. Nikun-ot akong agtang pagkita nga nihangad siya gamay ug gipatuyok niya iyahang mata usa nibaklay para molingkod sa likod.

Taod taod kay nisunod sa iyaha si Cherry. Nahinumdoman na sad nako ‘tong nakit-an mi niya ni Janvier sa akong kwarto. Mipahiyom ko sa iya pero giagian ra ko niya sa iyahang panan-aw ug nidiretso’g baklay padulong sa likod.

Ning lingi ko ug nakit-an nako si Cherry nga nitapad kay Karille. Naa’y gisulti si Karille ug nagkinataw-anay sila. Nganong pamati nako bahin ‘to sa akoa? O praning lang jud tingali ko.

“Ngano ka?” pangutana ni Chloe.

“Natingala ko ngano naa si Cherry didto nga diri ra man unta iyahang bangko,” sulti nako ug gisulayan og balewala akong mga nabantayan.

Niabot among maestra sa research ug gipangayo niya sa amoa among output. Kaming tanan wala kapasa kay parehas mi wala nangahuman. Gihatagan mi niya’g oras para makig meet sa among partner aron ipadayon among research. Nilingi kay Cherry sa likod nga nagcellphone ra. Mura’g wala siya’y plano molihok maong ako na lang ang miduol sa iyaha samtang gadala ko sa akong laptop.

“Hapit namo mahuman, Niks?” pangutana ni Lee Anne.

Siya ang ka partner ni Karille. Mitapad ko nila kung asa nag lingkod si Cherry.

“Polish na lang.”

“Maayo pa mo.”

“Cherry, naa pako’y nakit ang mga article na pwede nato madungag.” Lingi nako kay Cherry.

“Isend lang sa akoa,” sulti niya usa nagpadayon sa pakig istorya kay Karille.

Nagkinataw-anay sila samtang nag open ko sa laptop. Niapil pud si Lee Anne ug katawa. Wala ko nagdahom nga ing ani na diay sila ka close tulo. Sa tinuod lang, nakabati ko’g ka out of place sa ilahang grupo.

Nagpadayon na lang ko’g buhat sa akong part sa among research. Wala na nako gisampit pa si Cherry kay basin makadistorbo pa ko sa ilahang tabi. Naa sila’y gi-topic about issue sa laing school ug wala nako napugngan nga maki-apil.

“Sa Central High diay ka nag high school, Karille?” pangutana nako. Wala siya’y gana nga mitando. “Diadto pud ko nag eskwela. Wala lagi tika nakit-an didto?”

Gipalihok ra niya iyahang abaga ug niatubang na dayon ila Cherry. Nagpakita nga dili siya interesado sa akoa makigtabi. Gitak-om na lang nako akong baba. Naabtan nako si Lee Anne. Naalanganin siya’g likay sa iyahang tan-aw sa akoa maong mipahiyom na lang siya usa mibalik og tan-aw sa iyahang laptop.